ادمانو نت

هقولكم ع سر فظيع عشان يبقا فى سرق صحفى للى يدخل مدونتى

اسكوتوووووووو مش كنت مدمنة اى والله طبعا هتقولو ودى مالها مبسوطة كده ليه ربنا يشفى ، مبسوطة عشان الحمدلله اتخلصت من إدمانى ده، شمه ريحة حد بيقول ربنا يشفى معدش حد عاقل ، بس هعمل نفسى مشمتش لسه وان حاسة الشم عندى بعافية

المهم قبل مالنوايا السيئة تظهر فاحب أقول إنى وبلا فخر كنت مدمنة كمبيوتر وانترنت يعنى مدمنةcouple لمدة تتراوح مابين شهرين ل 3 شهور بس الحمدلله رربنا قوانى وقدرت ارجع لنفسى زى الأول وتخلصت م الإدمان ده وبدل ماكنت بقعد طول اليوم ومريحش غير وقت قليل بقيت بقعد وقت قليل وبريح وقت كتير:)

ع الرغم انى بتعامل مع النت بقالى سنتين تقريبا عمرى مامريت بموضوع الإدمان ده غير الفترة الى فاتت دى

يمكن كنت مهيئة نفسيا للموضوع ده كنت حاسة بوحدة فظييعة ع الرغم إن ليا اصحاب كتير اوى بس انتيمتى مكنتش موجودة وده بيمثل لى وحدة كان فى كراكيب كتير كده جت فوق بعضها كنت حاسة إنى تايهة واتصدمت فى ناس كتير وكمان كنت منتمية لفريق عمل تطوعى واتوقف نشاط الفريق لأسباب وجيهة من وجهاتها لم أفهمها قط :)

نرجع لمرحلة الاكتئاب فطبعا بعد الكراكيب دى كلها كان دافع خفى مختش بالى منه الا بعدين خلانى اتزرع ليل نهار ع النت واشترك فى منتدى كمان ياخد كل وقتى واتصاحب ع ناس منه لما بقا لى مجتمع تانى ع النت ولأنه كان مجتمع جميل اوى خلانى اتعلقت بيه جدا والحمدلله طلعت م المنتدى ده بناس محترمة جدا .بعد كده لما قررت اركز فى مستقبلى وافضى دماغى كله سيبت المنتدى وركزت انى استعمل النت فى تحقيق هدفى كوسيلة وطبعا مهما وصفت فكمية الاستفادة كانت هايلة طبعا انا طول المدة الى فاتت كنت بستفيد م النت بس لما وحدت الهدف ان استعاملى ليه يبقا 90% استفادة و20% تسلية (المفروض النسبة الى فاتت تبقا 80% بس أنا مكسلة اعدلها عادى بقا) فطبعا فضلت زى ماكنت بقعد طول اليوم ع النت بردو لدرجة إنى أدمنت السيرش وإنى أنزل كتب فى المجال الى يهمنى "Programming" طبعا برغم الاستفادة الا إنى مكنتش راضية عن نفسى بسبب انعزالى عن البيت وعن قريبى انا كنت ديما قاعده فى أوضتى فوق السطوح طول اليوم تقريبا كان مجتمع النت عندى أهم ده غير ان طبعا قصرت فى حق ربنا وفى حق أهلى وفى حق دراستى كنت بنزل الكلية قليل مع انى كده كده مش بنزل كتير اصلن ومكنتش بذاكر الا قليل حتى فى أيام الامتحانات لدرجة انى كنت بروح اذاكر عند صوحابى عشان اركز ومفتحش الكمبيوتر والحمدلله ربنا سترها ببركة دعا الوالدين ونجحت الترم الأول نضيف

فطبعن عشان احاول اغير النظام الفاشل ده النت فصل اسبوعين جت من عند ربنا وقررت اغير جو ورحت قعدت عند خالى اسبوعين تانين كانت مرحلة لا بأس بها عشان اقدر اتخلص من الإدمان ده شوية وفعلا لما رجعت تانى بيتنا قللت ع قد ماقدر وحاولت انظم وقتى وانظم جدول أولوياتى وحق ربنا طبعا على رأس الأولويات والحمدلله ربنا قوانى وقدرت أقل الوقت وحسيت انى بقيت افضل ومعدش فى تعب نفسى لانه بيسبب عزله فظييعة ده غير تعب الجسم اصلن وغير التوتر العصبى لما النت يفصل تحس ان الجهاز جثة هامدة وغير الناس الى بتتعلق بيهم من غير ماتشوفهم وممكن تعملهم اولويات بردو وانت ولا فى دماغهم عادى يعنى بس كانت فترة ظريفة بأمانة الدفعة الى اتعرفت عليهم كلهم شخصيات لذيذة اوى وربنا يديم معرفتنا بالخير واقابل الى مقابلتهمش أظرف حاجة بقا فى الموضوع إنى مكنتش أعرف إنى مدمنة الا من كام اسبوع لما قريت مقال ظريف كده عن الادمان ولقيت اغلبه بلا فخر حصل وكان بيتكلم عن:


ازاى تعرف انك مدمن يلا فحص مجانى
لازم تتطمن ع نفسك بردو الوقاية خير م العلاج :)

جاااااااااااوب

1- هل ضيعت من وقت عملك او دراستك بسبب الانترنت ؟

2- هل تأخذ الانترنت كثيراً من الوقت الذي تقضيه بالعادة مع اسرتك و اصدقائك ؟

3- هل اثر استعمال الانترنت الزائد على حياتك الاسرية بشكل سيء و كان سبباً لخلاف ؟

4- هل لجأت للكذب على اصدقائك او اهلك بسبب استخدامك الزائد للانترنت ؟

5- عندما تكون على الانترنت هل تجد صعوبة بالتوقف عن استخدامها حتى لو اصابك التعب او النعاس ؟

6- عندما تغلق الانترنت هل تجد رغبة قوية بالعودة ؟

- 7- هل تفكر بالانترنت و انت تعمل او تدرس او تقضي وقتاً مع اهلك ؟

8- هل تشعر بانك تلاقي على الانترنت اهتماماً او احتراماً اكثر مما تحصل عليه ممن حولك في حياتك ؟

9- هل اثر استخدام الانترنت على نومك او طعامك؟

10- هل دخول الانترنت هو اول شيء تفكر بعمله عندما تستيقظ من النوم او تعود للمنزل ؟

11- هل اثرت الانترنت بشكل سلبي على تحصيلك المادي او الدراسي ؟

12- هل تشعر بالندم بعد قضاء وقت طويل على الانترنت ؟

13- هل الخلافات و المشاكل او المضايقات في حياتك الشخصية تجعلك تفكر بالدخول الى الانترنت و نسيان همومك ؟

14- هل ترى المناسبات السعيدة سبباً لدخول الانترنت و الاحتفال بها هناك؟

15- هل تكذب احياناً على الانترنت لتظهر بشخصية اخرى غير شخصيتك ؟

16-هل تبرر لنفسك او للاخرين استعمالك المفرط للانترنت على انه شكل من اشكال المعرفة او النشاط الاجتماعي المفيد؟

17-هل ترى نفسك دائما تقضي على الانترنت وقتاً اكثر مما كنت قد قررت مسبقاً ؟

18-عندما تكون مع اهلك و اصدقائك هل تميل باستمرار للحديث عن الانترنت او عن مغامراتك و صداقاتك فيها ؟

19-هل تنفق او تخسر مالاً اكثر مما يجب بسبب استعمالك الزائد للانترنت ؟

لو نعم زادت على سبع اسئلة فأهنئك لقد أصبحت مدمنا ومتسكتش يابنى ع نفسك

اللذيذ بقا ان الادمان للانترنت طلع أنواع زى الادمان التانى الى بالى بالك البانجو الحشيش والذى منه

ـ الإدمان الجنسي

ـ إدمان الدردشة

ـ الإدمان المالي

ـ الإدمان المعرفي

ـ إدمان الألعاب

والحق نفسك ياريس

HoNdA

7 comments:

  1. ههههههههههه
    مية مية يامرسيدس
    موضوع في الجون

    انا والله عارفة اني مدمنة من قبل ماااقرا الاسئلة
    واحب اهنئ سيادتي اني ماجاوبتش على سبع اسئلة بأه

    دول اكتر من 15 سؤال:))

    اما بالنسبة لنوع الادمان فطلعت في المقام الاول ادمان معرفي وثانيا ادمان دردشة

    والله ححاول ياهنادي اني اتعالج بس بصراحة انا لاقيه فيكم اصحاب اكتر من اللي كنت بعتبرهم صحاب..جايز عشان لسة ماشوفناش بعض وماندمجناش للدرجة بتاعت المشاكل

    يارب مانوصل للمرحلة دي ونفضل صحاب على طول

    سلاموز

    ReplyDelete
  2. الف مبروك يا هوندا على البلوج الجميل دا وعلى المواضيع اللى بجد بجد جامدة جدا
    واطمنى يا ستى مش انتى وحدك بس اللى عندك ادمان انا كمان كدا ,هو تقريبا انتى كل اصحابك كدا من اصلا
    يلا بقى مستنين منك مواضيع كتييييييييير جدا

    ومبروك تانى

    ReplyDelete
  3. ياطنطن ياحبيبتشى انا عارفة اصلن انن انتى مدمنة لاننا كلنا كنا مدمنين وده الى خلانى مخدش بالى اصلن واعتقد ان انتى بقيتى زيى الى حد ما مبقتيش تقعدى كتير وانا بحب كل اصحابى ع النت الحمدلله وميغسى يانيمو اكيد طبعن ن اصحابى يبقو مدمنين الطيور ع اشكالها تشيت هههههه بس انتى مين ؟؟؟؟ توتى؟؟؟

    ReplyDelete
  4. هنادى انتى من غير ما تقولى دا امر مسلم بيه يا ماما انك مدمنة وبعدين كلنا مدمنين نت بس انا الحمد لله قربت اتخلص من الادمان دا بدخل قليل برده بس احنا مش قضية كتير ولا قليل اهم حاجة الاستفادة الصح منه لو بتستفيدى من حاجة خليكى وراها وان مش بتستفيدى يبقى تبعدى طبعا علشان متضييعيش وقتك وحياتك اللى ربنا هيحسبنا عليهم وربنا يعينا بئا

    ReplyDelete
  5. اكيد طبعن يامسيز همس بس مهما كانت الاستفادة المفروض مننعزلش عن الحياة ومنخليش حياتنا كلها لحاجة واحد بس هذه وجهة نظرى :)

    ReplyDelete
  6. مبروك البراءه يا حاج مش خرجت برده من سجن النت كفاره و ربنا يجعلها اخر حبسه
    هوه النت و الكمبيوتر عموما و كتر القعده عليه مش مشكله بس لما تبقى قاعد و بتعمل حاجه عليه تفيدك وتطور بيها نفسك و كمان تاخد حاجه من كل حاجه يعنى يبقى معاك حته من كل حاجه علشان اكيد يوم هتحتاجها شويه قرايه وثقافه على حبه معارف و علاقات كويسه ممكن تنفع قدام و الله بقى لو لقيتى نفسك غاويه كمبيوتر فتخليه شغلك اللى يجيبلك فلوس

    ReplyDelete
  7. كلامك تمام ياعاشق الروح وفعلن انا مازلت باستفاد منه فى حاجات كتيرة جدااااااا بس انا كنت قاعدة طول اليوم قدامه حاجة مش ظريفة بردو مهما كان ممكن يسبب اكتئاب ع فكرة

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore