أربع صابونات وبومبة خيييييير

مش تباركولى الحمدلله فقت م الغيبوبة بقالى يوم سطيحة متأثرة ببهدلة يوم التلات كان يوم جااااااااامد ربنا مايورده ع حد اتفضلو اتفقعو معايا اشمعنا انا

اليوم بدأ معايا م الساعة عشرة لما كان فاضل خمس دقايق واوصل موقف الجامعه عشان اروح كليتى المصونة بس حصلت مفأجاة واحنا داخلين ع الكوبرى الى خلاص هيوصلنا الموقف نوفأج ان الطريق كان مقطوع ودوريات وزعقو فى السواق وقالوله ادخل من طلخا الطريق مقطوع تقريبا حد قصه

عرفت من البنت الى جمبى ان سر الازمة المرورية دى ان الدكتور زويل فى المنصورة النهاردة وهيبقا فى نادى الحوار الساعة 8 قلتها امممممممم قولتيلى

قلت بينى وبين نفسى والله فرصة يابت ياهوندا تحضريله يمكن نفسك تتفتح ع الحياة شوية وتخرجى من جو الاوحباط ده هنشوف الموضوع لما نوصل لول


السواق فى لحظة استعباط !!!!!

بعد مالسواق لف تانى فى نصف الطريق يقولنا ايه بقا بصو انزلو هنا وامشوع طول وبعدين احودو ع الكوبرى وامشو لحد السلم وبعدين تنزلو وهتوصلو الجامعه.

نهارك ملوش لون بيستعبط ده ولا ايه!!! انا طبعن مسكتش انتو عارفين العلاقة بينى وبين السواقين كلها محبة قلتله نعم ننزل فين حضرتك؟؟ قالى انزلو هنا ماهو الطريق مقطوع قلتله ياسلااااااام ننزل هنا ازاى بتهرج سيادتك ده طريق مفيهوش مواصلات عايزينا نمشى كل المساااااافة دى لحد مانوصل للسلم انت ملزم انك تنزلنا فى الموقف قالى اعملكم ايه يعنى، قلتله معرفش مش هنزل اتصرف قالى انزلكم القنطرة (دى محطة فى طلخا )اى نعم هيا لفة ام العروسة وهتأخربس ع الاقل فى مواصلات نركبها

الخنيق فى الموضوع ان مفيش حد اتكلم الا بنت معايا والولاد كانو مخروسين، ماعلينا نزلنا القنطرة وياريتنا مانزلنا اكتر من نصف ساعة فى الشمس لا سرفيس ولا حتى تاكس تقولوش مش مستنصفين !!! انا مش قادرة اقف حاسة ان جالى ضربة شمس وجت فى الجون يامسهل يارب اخيييييرا تاكس ركبت وانا حاسة ان دماغى تقيلة اوى وطول الطريق بقا الاعلانات مش عارف مين يرحب بالعالم الجليل احمد زويل نادى ايه يرحب بالدكتور ياسلام كل دول فرحانين بيه طالما حاسين بقيمته اوى كده مفيش حد بيطلع فالح غيره ليه ولاحنا بنحب نشاور ع الفالحين ومبنحاولش نطلع زيهم وفى عز تاملاتى للاعلانات وفرحتى بيها بالجو ده افتكرت حاجة

ياربى كان المفروض اسلم شيت الساعة 10ياجماااااالى


4 صابونات دفعة واحدة

الحمدلله وصلت الكلية 11 وربع مش مصدقة نفسى ،الدكتورة مشيت بتستهبل اصلن قعدت من 10 لعشرة ونصف وبعدين فى ام الشيت الى مش راضى يتزحزح من عندى ده تانى مرة ملحقش طنط يلا خييييييييير ------->1

حضرت سكشن والتانى اتلغى مع انى نازله عشانه بس عادى قلت خييييييييييير-------->2

قعدت افكر فى موضوع النادى وحاولت اكلم اصحابى الى مشتركين فيه ع اساس لو حد رايح اروح معاهم احتياطى بردو الدخول ممكن يكون للاعضاء بس فدخل ع قفاهم ولا مؤاخذة المهم ان عملت كذا مكالمة (تقوليش يابت مهمة انتى) ولا حد عبرنى ورد معلش خييييييييييير--------> 3

مش ممكن الصداع هياكل نافووخى يااااااارب دماغى تقيله اوى رحت الجامعه قلت اشوف كده اخبار يكون الدكتور زويل فى طب اكتشف انه كان هناك من عشرة والساعة دلوقتى واحدة زمانه مشى قلت يلا خيييييير----------->4 الحق الساعة 4 فى حقوق بدل موضوع النادى ده موال


من هندسة لحقوق ياصابعى لا تورم

فوت ع البت بتاعتى وقعدت معاها شوية وبعدين رحت هندسة احضر الكات سكوب برنامج جامد اوى تبع فريق كات كان تانى يوم بس كان جميل لحقت بريزنتيشن e-commerceالحمدلله اخيرا حضرت حاجة

المهم وانا خارجة من هندسة قابلت واحدة صحبتى راحة الندوة قلت تمام يلا بينا الندوة كانت فى مدرج بدراوى فى كلية حقوق المفروض رحنا لقينا فى محاضرة شغالة قلت ازاى استحالة ندوة للدكتور زويل ومتبدأش 4 قلت ماعلينا يجوز بردو المهم المحاضرة خلصت 4 وربع باين والمدرج اتفتح وسراب الطلبة خرج قلنا ندخل نشوف كدا لو مكان الندوة نلحق نقعد قدام دخلنا المدرج واووووو تحس انك فى الاستاد المهم مكنش فى حد واقف بره استغربت ازاى اومال مين الى جاى الندوة قلنا المسألة فيها اننة طلعنا نسأل بره قالولنا دى فى المبنى الرئيسى الدور التانى قلت اه تمام كده زمانهم راحو مدرج تانى لما لاقو ان ده مشغول عشان يبدأو فى الميعاد المهم نجى نروح للمبنى الرئيسى من ورا كل البيبان مقفولة لفيناله من قدام بردو البيبان مقفولة قالو يمكن معدوش هيدخلو حد قلت ازاى يعنى ؟

لقينا دادة راحة تفتح الباب هجنا عليها كلنا وقلنالها عايزين ندخل قالتلنا من ورا قنلها ورا مقفول ولا عبرتنا ومشت فضلنا مشينا وراها ام نشوف اخرت الليلة دى


البومبة الكبرى تاتاتاتا

لقينا عمو واقف قلناله عايزين ندخل الندوة رد علينا وقال وياريته ماقااااااال:

الدكتور اعتذر وسافر القاهرة اصله مسافر امريكا الصبح حرام عليك ياراجل ده الواحد لف لفة ام العروسة ودماغى وارم م الصبح وبعد ده كله اعتذر ومعنى كده ان مفيش ندوة فى النادى والمنصورة اتغرقت اعلانات لطفحها امال النادى يعمل ايه زمانه قاعد يجهز ويظبط والناس هتروح وكله ياخد بومببببببب هييييييييييه عشانمبقاش انا بس بالهنا والشفا

خدت نفسى كده من سوكاات وقلت اروح بيتنا احثن روحت ونمت سطيحة بعد ماكتشفت ان الضعط كان عليا م الصبح استغربت جدا مع ان اليوم كان ظريف خالث الحمدلله

بس ايه رأيكم مش انفع افتح مصنع لانتاج الصابون ؟؟؟

14 comments:

  1. هو من ناحيه انك فقريه يا هوندا يا حبيبتى دى حاجه انا مش هقدر اتكلم فيها طبعا
    انتى عارفه
    وتقدرى تفتحى 10 مصانع صابون مش مصنع واحد

    بس فى حاجتين عايزه اقولك عليهم
    اولا واحده
    ايه هى لفه ام العروسه دى؟

    تانى حاجه بقى

    الدكتور الكبيير اللى البلد كلها اتقلبت علشانه
    واعلانات وترحيب
    وتنظيف شوارع ومدرجات وكل اللى حصل ده مكنش يعرف انه عنده معاد سفر من قبل كل ده؟
    ولا افتكر فجاه وساب كل مواعيده فى البلد وسافر
    ولا نسى
    ولا الناس اللى عاملين كل ده علشانه هما اللى اخروه علشان كده سابهم وسافر؟

    واضح يا هوندا انك مش انتى لواحدك اللى فقريه يا حبيبتى

    ReplyDelete
  2. انا بصراحه مش عارف اقولك ايه؟؟

    يوم غريب فعلا..
    وانا اول ما قريت بصراحه مقدرتش امسك نفسى من الضحك.. احم احم..متفهميش غلط
    بس انت لما اكمل هتقعدى تضحكى اكتر ما انا ضحكت..


    هو فعلا د.زويل كان فى المنصوره
    وفعلا كان فيه محاضره الساعه10 فى طب
    وفعلا كان فيه محاضره الساعه 4..
    ..
    ..
    ..
    ..
    ..
    بس فى طب برضه :))
    وانا حضرتها وكان فيه عدد كبير جدا من الناس موجود ..
    معنى كده كمان ان الراجل بتاع حقوق مكنش يعرف حاجه اصلا..
    ومع احترامى الكامل طبعا..كان بيضحك عليكوا :))

    وده كمان ملخص المحاضره بتاعه الساعه4
    واللى كانت فى كليه طب :))

    http://forum.lifemakers-eng.net/viewtopic.php?p=8385#8385

    ReplyDelete
  3. مرسيدس يا حبيبتي
    ده العادي بتاعك ياامي
    هو انتي كدة وش فقر ...طب نعمل فيكي ايه؟؟ نغيرك مثلا؟؟!! لاسمح الله

    احنا بنستحملك عشان تستحملينا برده:))

    حصل خير وخيرها في غيرها
    ____________
    rere
    ----
    ريري اللي مش بتظهر ظهرت
    لولولولولي
    الف مبروك علينا

    خطوة عزيزة ياامي
    _____________
    alaa
    ----
    ممممم
    انت جاي تغيظ البت بقى وتضحك عليها
    لألأ خلي بالك ياابني
    البت دي في منطقة حمايتي

    وخد بالك انا عندي عقدة مع معيد وكان اسمه علاء
    وبقت عندي عقدة مع كل الناس اللي اسمهم علاء ومهندسين

    ياباشمهندس علاء
    خد بالك من نفسك:))

    ReplyDelete
  4. عااااااااااااا ريرى داخله شمال فيا كده ليه براحة انا مش موستحملة كفاية الصدمة الى علاء ايدهالى انا هعيط اشوف فيك يوم ياراجل اومال الاعلانات الى كانت متعلقة دى حطوها ليه طالما كان فى طب ولا هو غباء لا وايه الراجل لما قالى اعتذر وبصيناله كده قام قايل ايه كلااااااامى ثقة وطلع فشنك اه لو حد يناولنى رقابته بس كويس ان فى ملخص تمااااااام
    طمطم حسابنا بعدين:)))

    ReplyDelete
  5. ايه ياريرى نسيت اقولك لفة ام العروسة دى مش لفة طرحة :)) دى نسبة لام العروسة لما بتيجى تعزم الناس ع فرح بنتها تلاقيها بتلف فى الشوارع كلها عشان تعزمهم وممكن من لبختها تلف من شارع وترجعله تانى عشان نسيت حد فيه اى خدش بنثقفكم اهو:))

    ReplyDelete
  6. woow ana bgad mashoftesh kda wallahi ya 7abibty ana mest3`raba mn sabrek da w bttkalmy 3n elmwdo3 k2nk konty mabsoota ana kan zamany etshaleet mn badryyyyyyyyyyyyyyyyyyyyyyyyyyyyyy

    ReplyDelete
  7. هههههههههه يانانو ياحبيبتى صحتك بالدنيا :)))اعصابك خثارة انتى لو كنتى شوفتينى وقتها كنتى هتعرفى الشلل الى ع اصوله:))

    ReplyDelete
  8. ههههههههه

    هوندا


    انتي اسمك على اسم عربيتي

    بس بلوج حلو تحياتي للهوندا او المرسيدس ولطنطن او طمطم

    ReplyDelete
  9. انا بردو بشبه ع الحصان الاسود فيه ملامح م الحصان الى عندى فى الشطرنج :))
    اهلا بيك فى ماركة السيارات :)

    ReplyDelete
  10. معلش ياجماعة عشان انا ظلمت دكتور زويل انا لقيت الموضوع ده وقلت للامانة احطه عشان انا بحترم الشخص ده جدا
    ============================
    رفض الدكتور زويل إقامه ندوته العلمية والتى كان من المزمع اقامتها فى نادى الحوار بالمنصورة بسبب التدخل والتعنت الأمنى الشديد لمنع الحضور من الدخول ، حيث بدأت المشكلة قبل حضور زويل لمقر النادى بأكثر من أربع ساعات عندما رفض الأمن الخاص بنادى "الحوار" دخول أعضاء هيئه تدريس جامعة المنصورة وبعض الصحفيين ومنع أيضا دخول أعضاء النادى ، واقتصر الحضور على أعضاء الحزب الوطنى وبعض الدعوات من نائب الحزب ، مما أدى لاستياء كافه الحضور خاصة أعضاء هيئة التدريس الذين أصروا على على الدخول
    وقد استدعى نائب الحزب الوطنى السابق ممدوح فودة الشرطة لمنع دخول اعضاء هيئة التدريس القاعة الرئيسية على الرغم من وجود أماكن عديدة
    وقام الأمن بالتدخل بالقوة مستعينا بعدد من البلطجية وقد تعرض اعضاء هيئة التدريس وبعض الصحفيات للضرب المبرح من قبل بعضهم.
    واستغل بعض البلطجية الموقف وقاموا بابتزاز أعضاء هيئة التدريس ومساومتهم بمبلغ 20 جنية مقابل الحضور على الرغم من أن الدعوه مجانية ، ما حمل زويل بعد أن فوجئ بالحراسة الأمنية المشدد على الاعتذاره عن القاء محاضرته
    وكان زويل قد القى صباح أمس كلمة فى كلية الطب أكد فيها أن مصر يجب ألا تبقى فى هذا الوضع والتغيير قادم وحث الشباب على التفاؤل
    ووجة رسالة لرئيس الجامعة الدكتور مجدى ابوريان مؤكدا أن سبب نجاح أعضاء هيئة التدريس فى الخارج هو عدم شعورهم بأن هناك رئيس جامعه أو توجد سلطة أعلى منهم تحد من صلاحيتهم
    وأكد على تفوق إسرائيل نوويا وتكنولوجيا مشيرا إلى أن التكنولوجيا التى تملكها إسرائيل لا تملكها البلدان العربيه مجتمعه كما أشار إلى أن 300 عالم عربى لا يساون عالما اسرائيليا واحدا كما أن القوة العلمية والمعرفية للعرب لا تساوى شيئا وهذا سبب خضوعهم للدول الأخرى
    كما أشار إلى أن أول مؤتمر انعقد له بعد جائزة نوبل (مؤتمر برلين ) عن الفمتو ثانية لم يشهده عالم عربى واحد على الرغم من أن معظم الحضور كان من الإسرائيليين
    أكد ا"زويل" أن من حقِّ الدول العربية ,ومن بينِها مصر تنفيذَ برنامج لإنتاج الطاقة النووية، للاستخدامات ,والأغراضِ السِلمية
    وألمح إلي أن أخلاقيات البحث العلمي عندنا ضعيفة جدا ، ودعا كل العلماء إلي استخدام الأمانة العلمية الدقيقة وليس الفهلوة ولابد من منظومة علمية متكاملة من الحضانة حتي الجامعة وبالنسبة له فقال بأن المسجد والأئمة بالمسجد كانا هما الدافع للنجاح في بداية حياته
    وأكد على أهمية امتلاك مصر للسلاح النووي السلمي لأن العالم كله في حاجة إلي هذه الطاقة ولا يوجد لها بديل ولابد من بذل الجهد للحصول عليها وأكبر مشكلة تواجه الشرق الأوسط هو الطاقة والمياه .
    وأضاف في مصر لا نتمتع بأخلاقيات البحث العلمي، وجائزة نوبل التي حصلت عليها نتاج جهد جماعي شارك فيه ٢٥٠ عالماً، فليس كل من حصل علي الدكتوراه عالماً، وأكد زويل أن خصخصة التعليم بالمفهوم الذي يمارس في مصر وبعض الدول العربية، ستؤدي إلي انهيار التعليم، لافتاً إلي أن الجامعات الخاصة في أمريكا والعالم المتقدم لا تهدف إلي الربح. كما شهدت ندوة الجامعة تدخلا أمنيا شديدا حيث تم اغلاق القاعه قبل حضوره بأكثر من 3 ساعات ، ومزق الأمن لافتات طلاب الاتحاد الحر والتى كانت ترحب بزويل وتم تهديد طلاب الاتحاد الحر من قبل أمن الدولة والتى كانت حينها تملئ الحرم الجامعى

    حضر اللقاء محافظ الدقهلية د أحمد سعيد صوان ود مجدي أبو ريان رئيس جامعة المنصورة والسيدة كاثرين جارلكا سكرتير أول السفارة الأمريكية في القاهرة
    نقلا عن جريدة المصريون

    ReplyDelete
  11. Hey Honda (Nice Nickname though I have Toyota ;) )
    ana kont mawgood yomeeha fel nady we besar7a el kalam el maktoob dah ma7asalsh, ya3ni el nas kanet betod7'ol smoothly we mashofnaashh wala seme3na ay mashakel wala security wala ya kalam men dah, ana begad delwa2ty bada2t asada2 elli bey2olooh 3ala el naw3eya deh men el newspapers.

    bas really really nice blog, ana makontish mota7'ayel en feeh bloggers 3andena kteer keda, I bet you hardly know me ;) I'm Ahmed Soliman.

    ReplyDelete
  12. منور ياتويوتا قصدى يالينكساوى:)) بصراحة الجردة دى كويسة وبعدين انا سمعت الكلام ده من ناس اصحابى بردو راحو النادى بس يمكن انت مأخدتش بالك ماعلينا خيرها فى غيرنا :(

    ReplyDelete
  13. hmmm..
    hey [ honda ]
    i was there too with Ahmed S. and before El-nady ..[ Dr. Ahmed zwil ] was in Faculty of medical in mansoura Univercity not in [ Faculty of Law ] !!
    he started there in 5:15 i was in the same presentation [ e-commerce ] ( Eng. Alaa ) than me and ( 3abdel ra7man 7egazy )go to there i think the hall name was ( Dr. Mahmmed 7afez ) !! anyway .. i hope that you could attend in the Next T!me :) ..

    على فكرة انا و اللي كانوو معايا دخلنا بكارنيه الكلية فقط لا غير بدون اشتراك او عضوية أو رسوم أو غيره !!
    و أعتقد السبب انه كان مرهق لا أكثر ولا أقل ( و العلم عند الله ) لأنه كان قبلها مباشرة في كلية الطب بجامعة المنصورة .. و بصراحه كانت محاضرة جميلة جدا !

    BTW : Congratulations for ur Board Membership :/

    Regards,
    Anas G.

    ReplyDelete
  14. Ghost
    اهلا بيك ومتشكرة اوى ع التهنئة
    الصراحة الموضوع ده سمعت عنه كلام كتييييييير لما مبقتش عارفه ايه الصح م الغلط بس الاكيد ان مكنش لينا نصيب واتمنى ان تتيجى فرصة تانية بس زى ماقلت قبل كده ان كان فيه غلط م الجامعه لان انا ذات نفسى شفت اعلان مكتوب فيه مدرج حقوق يعنى مكنش فيه تنظيم وربنا يسامحهم واهلا بيك مرة تانية :)

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore