حاجة لله ياابلة

بما انى مواطنة مفقوعه م الى بشوفه فلازم احكى على حاااااااجة م الحاجات الى بتخنقتى وبتقرقض فى بقايا مرارتى المنقرضة


الشحاذووووووون

أجل انهم هؤلاء الاوناس الذين يتجولون فى الشوارع ويشدوكى من هدومك المهم انك تديهم فلوس وخلاص

سييكم من الهمبكايشن الى فات انا بقالى مدة يمكن من 3 سنين كده م اول مادخلت الجامعه وانا ملاحظة ان موضوع الناس الى بيشتحو ده زاد اوى وبقا منتشر فى كل مكان تقريبا ومن جميع الاعمار هتلاقى التفل الصغنن وهتلاقى طنط وهتلاقى عمو وتيتة وجدو كمان يعنى مهنة من جميع الاعمار منتهى الحلاوة والبقلاوة

وكلمة حاجة لله يابلة بقيت بتتقالى فى اليوم اكتر من ازيك حتى

وم الى بيان ان اغلب الناس دى واخدينها مهنة مش لانهم فقرا اصلن وحتى لو تجاوزنا الناس الكبار العواجيز بيبقا فى شباب وصحتهم كويسة ومع ذلك بيشتحو هتقولولى البطالة والبطانة هقولكم معلش الى عايز يشتغل هيلاقى شغل حتى لو حاجة بسيطة واحسن من الشحاتة وفى حديث للرسول صلى الله عليه وسلم بيقول"اليد العليا خير من اليد السفلى"

بس اعتقد انهم مستريجين ع الموضوع ده بس بجد الموضوع مستفز اوى هما بيعتمدو على عنصر الموفأجاة يعنى اكون ماشية فى الشارع كده الاقى حد شدنى من هدومى مرة واحدة اوراكبة فى الميكروباص يكون بيحمل وافوجأ بواحدة ظهرتلى م الشباك فجأة وتقولى حاجة لله اعتقد ان الخضات الى بيعملوها دى جزء رئيسى من وقف نموى والكام سم الى بحلم بيهم مش راضيين ييجو :( ماعلينا الى بيغظنى الى بتشدنى من هدومى بطريقة غبيبة وحصلت لى اكتر من مرة "حاجة لله ياابلة والله مانتى كسفانى"اقولها ربنا يديكى واكلمها براحة وانا متنرفزة اصلن عشان ماسكة هدومى بطريقة صعبة ومش راضية تزحزح اديها بكون خايفة للكم يتخلع وربنا المهم انها مصمصمة ومش بتيأس وتقولى حاجة لله لتانى مرة وانا بقا رزلة اعيدلها الاسطوانة ربنا يديكى والله ممكن تمشى وممكن نفضل شغالين فى الماتش ده بتاع كام دقيقة ولا حاجة بس كله بيعتمد على قوة رزالتك

لابد من وقفة

الاول خالث كنت بتحرج اوى لو واحد او واحدة وقفونى كان لازم اديلهم الى فيه النصيب وطبعا كنت ببقا مبسوطة وبقول انا كده كده هاخد ثوابها باذن الله سواء كانت فقيرة بجد او بتمثل بس الايام دى لما لقيت ان الموضوع وسع اوى وتقريبا ممكن تقابل فى اليوم مش اقل من اتنين تلاتة قلت لا انا كده هفلس واروح بلدنا مشى لابد من وقفة ماهى بقت هوجة وكله شغال على كله عملت مقاطعة ومبقتش بدى لاى حد خالث بقيت بحدد الى اقدر عليه شهريا حتى لو جنيه واوديها فى حاجة تستحقها بجد لانى حسيت اننا كده بنساهم اننا نخلى الناس تستحلى المهنة دى وغيرها يتشجع ومش بعيد فى يوم م الايام نلاقى البلد كلها اتحولت لشحاتين ماهو ابو بلاش كتر منه استرها علينا يارب

واكتشفت ان فى ناس تحس انهم جزء من الشارع عمود من عواميد الشارع الثابتة الى موجودة كل يوم يعنى كل يوم لازم يصبحو عليك فى واحدة عندنا بقالى 3 سنين بشوفها كل يوم وتيجى تقف معاكى وممكن تحكى كمان وتحكيلك عن ابنها الدكتور واخدينلى بالكم من ابنها الدكتور ماعلينا انا سمعت بقا حاجة ظريفة انهم بياجرو المكان الى بيكونو فيه وممنوع حد يدخل يقطع عليهم الا مايدفع الاجار ياحلاااوة الشحاته بالاجرة والله بيفهمو اشمعنا هما ميبقاش عندهم ضرايب :)

وكمان فى اكتر من شكل يعنى تلاقى واحد ماشى بشهادة المفروض انها طبية ويقولك بنتى عندها مرض مش عارف ايه والراجل ماشاء الله صحة وعنفوان يعنى مش مكسوف وهو بيشحت كده ومناظر تانية كتييير

للشحاذة أشكال أخرى!!!

مرة فى اتوبيس وانا مروحة بليل واحدة ست كبيرة كده ركبت والاتوبيس مشى عادى وفى نصف الطريق التباع بيلم الاجرة فالست دى مدفعتش ولما قالها هاتى الاجرة ياحاجة قالتله انا مقطوعة من شجرة وامى واولادى ميتين وانا معاييش فلوس وقعدت تزعق المهم قالها الاجرة ياحاجة انتى تانى مرة تعملى فيا الحركة دى قعدت تزعق وقالتله نفس الكلام متبعة طريقة المسكنة بتاعة الستات لما تحب تبين انها ضعيفة وطبعا التباع قعد يزعق ومفيش امل ولا عمر ففى واحد كان جمبى قاله خلاص ودفعلها الاجرة فالتباع مرضاش وقاله خلاص ياعم مش مشكلة تتوقعو ايه الى حصل ؟؟؟ الحاجة خدت الفلوس من ايده احنا قعدنا نضحكك التباع كان هيشد شعره قالها اديله الفلوس ياتجيبهالى قالتله انت مالك هو ادهالى صدقة لربنا ساسيدى انا بسترزقك وهومسامحلى فيها بمناسبة عيد الام (كان عيد الام قبلها بيومين ماشاء الله ست معاصرة الاحداث احنا بقا ميتين ع روحنا م الضحك وم الكلام الى بتقوله والراجل الى عمل فيها شهم ودفع الفلوس قالها طب هاتيهم عملت واقعه على ودانها ولا عبرته التباع قعد يلقح عليها ويشتم فيها قالتله انت مالك هركب بيهم توك توك ملكش دعوة مع ان التوك توك بجنيه وهيا لهفت الاجرة جنيه ونصف نصااابة

المهم التباع قالها ماشى ياحاجة دى تانى مرة تعمليها قالتله دى اول مرة قالها تانى مرة قالتله على الطلاق بالتلاتة اول مرة الاتوبيس كله مبطلش ضحكك عليها والسواق بيقولها مش مسامحينلك فى الفلوس قالتله متسامحش من هنا لميت سنة فظييييعة

شوية ولقناها بتدور على دفعلها الفلوس وتقوله شكرا جزيلا يازوق (واخدين بالكم من جزيلا دى طلعت مثقفة) يابلسم جروحى ياحبى الاول والاخيييييييييير حب هيا فيها حب كمان دى ست نتكة يادوب قالت الكلمة دى وكلنا سخسخنا ع روحنا م الضحك انا كنت بموت خلاص من كتر الضحك قالها انا متجوز ياحاجة قالتله عادى انت زى اخويا


اول مانزلنا م الميكروباص قلت والله لاشوفها هتركب توك توك ولا هتكوت جيت ابص لقيتها دخلت بيت ع طول او مانزلت يعنى مركبتش توك توك ولاحاجة انا فضلت اضحك
م الموقف لحد ماوصلت لبيتنا بس فعلا ست عثل ضحكتنى جدا قليل لما الواحد بيموت على روحه م الضحك

فى الاخر طبعا اغلب الناس هتقعد تقولك دى مسئولية الدولة والشغل ومش عارف ايه بس اعتقد اننا بردو لازم ناخد موقف عشان منريحش الناس دول لانهم بيستريحو

22 comments:


  1. الموضوع له أبعاد كثيرة يا سيدتي

    لكن تحياتي لك قلت كثيرا مما في نفسي في الموضوع ده

    ربنا يكرمك يا رب

    تحياتي لك من ماناساس البلد

    ReplyDelete
  2. مهما كانت ابعاده فهو بقا خنيق اوى بس اعتقد اننا بردو نقدر نقلله لو قطعنا الناس دى خالص

    ReplyDelete
  3. تسلم ايدك يا هوندا

    بجد الموضوع دة بقى مزهق كل الناس

    والغريبه ان احيانا فيه ناس لما ماتديهوومش فلوس يدعوا عليكى او يشتموكى

    حاجه تفقع المرارة والله

    ReplyDelete
  4. هبه فاروووقMay 1, 2007 at 11:08 PM

    ايه يا هوندا المواضيع الجامدة اللى من واقع الحياه البمبى اللى بنعشها دى

    ReplyDelete
  5. Anonymous
    ربنا يكرمك بس الافقع بقا لو اديتلهم مثلا ربع جنيه ويقولولك بس؟؟ ده الى هان عليكى؟ وامراراتاه
    -----------
    هبه فاروووق
    اهلا مسيز بوبة لازم الناس تشوف جوانب الفستان البمبى الى مصر لابساه ولا ايه رأيك :))

    ReplyDelete
  6. السلام عليكم
    والله يا هوندا انا مش عارفه ابطل ضحك
    طريقتك فى عرض موضوعك ممتعه ومتزهقش ابدا برغم ان الموضوع يخنق
    طيب انا اقولك على شحات عندنا مودرن خالص يا بنتى هو موجود طبعا طول السنه وبيشحت هو وحاطط رجل على رجل هههههه ولابس نظاره شيك وفى الصيف فى عز ما احنا حنموت من الحر وما ادراك حر الجنوب يقعد فى الضله وفى الشتاء بيقعد فى الشمس ولا كأنه قاعد فى الجنينه
    اللى يغيظك بقى ان مره بابا شافه فى السوق كان معاه باميه فى الوقت ديه كانت الباميه الكيلو ب 12 جنيه
    هههههههههه
    احنا عندنا العيال الصغيره بيشحتوا من الاجانب والله بيتكلموا بالغه يعنى اسبانى وانجليزى وكده يعنى
    بس بصراحه محدش بيمسك هدومنا
    مع انى ربنا قال بسم الله الرحمن الرحيم
    لِلْفُقَراءِ الَّذِينَ أُحْصِرُوا فِي سَبِيلِ اللَّهِ لاَ يَسْتَطِيعُونَ ضَرْباً فِي الأَرْضِ يَحْسَبُهُمُ الجَاهِلُ أَغْنِيَاءَ مِنَ التَّعَفُّفِ تَعْرِفُهُم بِسِيمَاهُمْ لاَ يَسْأَلُونَ النَّاسَ إِلْحَافاً وَمَا تُنفِقُوا مِنْ خَيْرٍ فَإِنَّ اللَّهَ بِهِ عَلِيمٌ
    ربنا ينجينا ويرحمنا من عنده

    ReplyDelete
  7. الظاهرة دى بقت مش منتشرة بس بقت وبااء

    يعنى لو نزلتى فى يوم و حسبتى كمية الناس اللى ممكن تاخد منك يبقى نعمل ميزانية للشحاتة

    دا غير ان معظمهم نصابين

    ReplyDelete
  8. هوندا
    انا اول مرة ادخل على البوست بتاعك وفعلا بوست رائع سواء من اخييارك للالوان او الديزين وطبعا دماغ اللي كاتب البوست .
    نخش في الموضوع
    بصى يا استاذة انا متفق ومختلف معاكي ، ممكن اكون متفق في تفشى الظاهرة بطريقة مزعجة جدا بس اللى مضايقني ان الواحد فينا ممكن يدخل مؤمن ولى كوك دور او اي مطعم محترم وتيجي الفاتورة 50-100 جنبي مثلاً ويدفع زي الباشا بس لو واحد واقف يشحت بره علشان الجنيه اللى هتديهولو لازم نعمل تحقيق في الشحات وكدى استحقاقة للفلوس ولى ايه .

    فهمتي قصدي انا نفسى نتعامل مع الموضوع بشئ نت اللين والرحمة اقولك على سر انا احياناً بدي العيال اللى بتشحت علشان مجهودهم حتى تخيلى الدنيا حر مووت وانت مش قادرة تقفى في الظل ولى مشغله تكيف العربية ووواحد بيشحت .

    اعتقد اننا محتاجين نعمل زي ما النبى قال انفق ولا تخشى من ذي العرش اقلالى .

    شكرا ليكي وياريت تنوريني بزيارة على البلوج .

    ReplyDelete
  9. نسرين-أمة الله
    ههههههههه حلوة شحات مودرن دى بص للامانة انا مشفتش النوع ده لسه وعجبى
    >---------<
    Ma-3lina
    عجبتنى اوى ميزانية الشحاتين ربنا يستر :)
    >---------<
    احمد رفعت
    ربنا يكرمك على الكلام ده كله
    وانا متفقة معاك بس انا قلت اننا ممكن نحدد مبلغ شهرى مثلا ونتبرع بيه لحاجة مفيدة ومضمونة عشان بس منساعدش على انتشار الموضوع مش معنا كده اننا نكون اتمين بس حلو موضوع بتديهم ع مجهودهم :))

    ReplyDelete
  10. ازيك يا قمر
    موضوع ممــتاز يا عســل
    والله ياختى الواحد بيحاول يكون موضوعى فى الموضوع ده بالذات
    انا باديهم بس هما خلاص شكلهم عرفونى وبقوا بيستغلونى وده بقى بيضايقنى جــدا
    ليه ما انا باديك ومش بأبخل عليكى لاننا مش احنا اللى بنرزق بس المشكلة دلوقتى بقوا بيشرطوا عليا المبلغ اللى عايزاينه
    شوفتى بقى اخرته ايه
    اصلهم عرفوا مكان شغلى
    هههههههه
    تحياتى لكى يا جميل

    ReplyDelete
  11. هههههههههههه انتى بقيتى مسجلة عندهم والا ايه خافى ع نفسك اهو عشان كده مبحبش الكرم الزايد ههههه :))

    ReplyDelete
  12. شكرا جدا على زيارة البلوج بتاعي
    وربنا يكرمك على تشريفى جدا انا قلت اشكرك على التعليق عندي وربنا ما يقطع لك عادة

    ReplyDelete
  13. موضوع مهم
    و بصراحة انا كمان زيك بتتفقع مرارتى منه جدا خصوصا من هؤلاء الشحاتين المستهبلين اللى بيحاولوا يعملوا مجانين علشان الناس تضحك عليهم ثم تتعاطف معاهم ثم تديلهم فلوس .
    الموضوع ليه كذا جانب ....
    الرسول صلى الله عليه و سلم قال"أعطوا السائل و لو جاءكم على فرس"
    و بعض الشيوخ أفتوا باننا نديلهم شئ زهيد يعني ميقضيش مصلحتهم لكن نكون طبقنا السنة ...
    أنا عن نفسي بستحرم أدي لحد انا حاسة انه مايستاهلش لان الفلوس دي أحق بيها حد من الذين لا يسألون الناس إلحافا و هما بردو كتير لكن مش باينين ...
    و الأحوط ان الواحد يحط الفلوس في جامع أو جمعية خيرية لأان دي أماكن بتستوثق الأول من استحقاق من تعطيه الصدقة ..
    لكن الأمر ميمنعش ان الواحد من حين لآخر يعطي لمن يشعر باحتياجه منهم
    أعتقد كمان ان أحد أسباب الظاهرة دي هي تخلف أمتنا و حبنا للاستسهال في كل شئ..
    ربنا يرحمنا جميعا
    أحيكي على الموضوع و على المدونة الجميلة

    ReplyDelete
  14. أحمد رفعت
    لا شكر ع واجب:)

    >------<

    الحلم العربى
    اهلا بيكى
    انا متفقة معاكى بردو فى نقط كتير اننا ندى للى نحس انهم مش بيتهبلو وان الاولى اننا نتبرع لجمعيات خيرة وده احق فعلا وده كان قصدى
    عارفة احنا فى الفريق بتاعنا عاملين حاجة اسمها المرتب الشهرى ان كل واحد بيدفع كل شهر مبلغ يقدر عليه ويواظب بيه ويكون فى اسرة مثلا متكفلنها نجيبلها كل شهر حاجة معينة وهى تبقا صدقة وكفالة اسرة يعنى 2 فى 1
    :)

    ReplyDelete
  15. هو فعلا اسلوب الشحاتة دلوقتى بقى مستفز بشكل كبير
    يعنى كان فى احدة ست كبيرة فى السن كانت دايما تقف عند الكلية وتستنى اى حد ماشى فى الشارع وتقوله ممكن اسألك سؤال طبعا الواحد بيروحلها ويشوف يمكن تكون بتسأل على مكان معين مش عارفة توصله ولا حاجة تفضل تحكى عن المرض اللى عندها والعلاج اللى محتاجاه وطبعا بعد الحكاية دى كلها بيقى صعب يمشى من غير مايديها حاجة
    المشكلة انك تيجى بعد كام يوم تلاقيها واقفة نفس الواقفة بس الصراحة فى مكان تانى بعيد شوية عن الأول ولسه بتسأل نفس السؤال متهيألى انها ممكن تفضل طول عمرها بتسأل

    وكان فى بردو بنوتة تلاقيها قاعدة عند محطة الترام وياعينى عاملة تعيط تروحى تسأليها فى ايه يا حبيبتى مالك بتعيطى ليه بالشكل دا تقولك اصل مرات ابويا اديتنى فلوس علشان اجيب الأكل من السوق والفلوس وقعت منى ولو روحت البيت من غير ما اجيب الحاجة هتضربنى تسأليها طيب انتى وقع منك قد ايه وتديها الفلوس علشان تروح ومرات ابوها المفترية دى ماتضربهاش ويعدى يومك وانتى حاسة انك مبسوطة انك ساعدتى البنوتة الغلبانة اللى الظروف قست عليها وتروحى زى الشطورة تانى يوم تلاقيها موجودة بردو على نفس المحطة او اى محطة غيرها بس الحاجة الأكيدة انك بتلاقيها لسه بتعيط على الفلوس اللى وقعت
    ساعتها بتحسى بالإحراج قوى من نفسك ان فى حد عرف يضحك عليكى
    علشان كدا انا افضل ان اللى عايز يعمل خير ويطلع صدقة يوديها لمسجد بيبقى فى هناك صندوق لكفالة الأيتام وبكدا تبقى صدقة جارية ويبقى عارف ان المكان اللى هتروح فيه فى فعلا ناس محتاجة بجد

    معلش انا طولت عليكى بس بجد الموضوع جميل واسلوبك فى عرضه رائع

    ReplyDelete
  16. nimo
    متشكرة اوى يانيمو بس انا نفسى اعرف انتى مين؟؟؟
    وبالنسبة للبنوتة دى ع فكرة انا قريت قبل كده عن طفل بيعمل الموضوع كل يوم باستعمال عوامل مؤثرة يعنى بيضتين كمسورين قدامه او كيس لبن واقع كل يوم فى نفس المكان ربنا يحنن :)

    ReplyDelete
  17. أنا بطلت من سنين أدي أي حد في الشارع
    وياريت كل الناس تبطل لغاية ما الشحاتين يختفوا..
    بنت خالتي بتروح كليتها بالمترو كل يوم ، حكتلي مرة عن راجل عجوز دخل عليهم المترو وقال انه عنده مرض ما مش فاكرة ، هي قالت ده راجل عجوز واديته ، تاني يوم دخل وقال انه عنده مرض مختلف ، وصلت انها شاته 4 مرات في اسبوع واحد بأمراض مختلفة.. كانت عايزة تمسكه تهزءه بس صحابها مسكوها ، بصراحة انا لو منها كنت خدته سلمته للبوليس بنفسي.
    اللذيذ بقى ان الايام دي طلع نوع جديد من الشحاتين ، العيال اللي بيخطفوا منك اي حاجة في ايدك بتكليها أو بتشربيها .. علشان لو ما صعبوش عليككي تكوني قرفتي وكده كده تديهالهم!!!

    ReplyDelete
  18. متغيرة شوية
    منورة البلوج انا بردو الحمدلله بطلت :)
    بس معتقدش انهم هيختفو دول بيزيدو كل يوم يابنتى
    الاطفال الى بيخطفو دول بقا ده لاننا فى عضر السرعة فهما بيخلصو نفسهم بسرعة هما لسه هيطلبو منك هههههههه
    وبالنسبة انك تاخدى الراجل تسلميه للبوليس معتقدش ان البوليس بيعمل حاجة اصلن ليهم ولا مؤاخذخ ربنا يجعل كلامنا خفيف عليهم

    ReplyDelete
  19. ana ha7keelek 3ala mawkef 3'areeb geddan :)

    kont mashi ana we wa7ed sa7by be 3arabeeto, we7na odam el baroon keda galna wa7ed we 2a3ad ye2ool enno ta3baan we beymoot we beylem floos 3ashan el 3elaag we keda.

    sa7by dah edaalo geneeh, we ba3deen lafeena showaya we rege3na la2enaah 2a3ed 3ala el raseef we ma3aah piece of pizza we beyshrab sagayer!!

    el wad sa7by ba2a masketsh, 2am raye7lo bey2ollo "howa enta mosh betmoot, betda7'ann leeh?!!!"...ana 2a3adt ad7ak, el mohem sa7by dah se7'enet fe dema3'y we 2am 2ayello "HAAT EL GENEEH" :D :D :D :D
    el gamed fel mawdoo3 ba2a enno a7'ad el geneeh fe3lan we ana 3agabni el mawkef awy besara7a....

    ana mo2ayed begad le fekret en e7na nebattal nedeehom ay 7aga, ella elli shaklo yesta7a2, ya3ni law 3ayel so3'ayar aw wa7ed aw wa7da shabab keda yeb2a yeroo7 yeshta3'al a7san aw yet3allem ay 7erfa...

    ReplyDelete
  20. ههههههههههههههههههههههههه انا مبطلتش ضحك ع البيتزا ده طلع شحات دماغ مش بياكل اى حاجة يعنى بس بامانة انا عجبنى موقف صحبك اوى:]

    وطبعا أنا أويدك فى انه لو شاب يروح يتعلم له حرفة كدا احسنله
    والله يبقا جميل لو اتعمل زى حملة توعية تستهدف الشباب دول وتنصحهم ممكن يبقا فى امل

    ReplyDelete
  21. تعرفي لو اي واحدة من الستات دول قلتيلها تعالي اشتغلي شغالة او عاملة في مصنع تقولك لا
    هم مش عايزين يتعبوا عايزين يكسبوا بالساهل

    ربنا يهديهم
    بجد مملين جدا
    تحياتي

    ReplyDelete
  22. اهلا سمباتيك
    هما فعلا اغلبهم استريح ع كدا شغلانه من غير تعب ربنا يهديهم فعلا

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore