يومين امتحانات

يومين امتحانات

احلى حاجة في البلد اليومين بتوع الامتحانات...لأ ماتفهمونيش غلط...الامتحانات دي كارثة منيلة بنيلة وربنا يستر على ولياه السنادي...انا ااقصد البلد مصر ...ايجيبت يعني...تنزل الصبح كدة وانت بتقول يافتاح ياعليم يارزاق ياكريم افرجها في وش عبادك وخلي النهاردة الامتحان كويس..تنزل بقى تلاقي الدنيا جميلة اوييي جميلة جداااً الناس كلها مركزة اللي في شغله واللي بيذاكر في ورقه واللي نفسه يلاقي مواصلة ..- اصل الصبح عادة مافيش مواصلات - ..اهم حاجة كله مركز..طبعا الناس العواطليه مش بيصحو الصبح فبيكون الناتج حياة لذيذة ..لاتسمع حد بقى بيعاكس حد ولا حد بيشتم في حد ...تسمع صوت تركييييييييز :)))
وعلى ذكر المواصلات احب ابعت تهنئة حارة مشطشطة لشرطة المرور ..لا بجد والله ناس تمام اوي ومية فل وعشرة...مابيقفوش غير الصبحية وبيركزو مجهوداتهم ايام الامتحانات اللي هي اساسا نص المشاريع ابونيهات بيودو المدارس والنص التاني بيجري ومش عايز يركب حد عشان حضرة الزابط الزبوطة المبجل واقفله ..:(
ومن هنا من البلوج العزيز احب ااقلهم كلمة صغيرة:ربنا على الظالم والمفتري ..ضيعتولي اكتر محاضرات الصبح في الجري على المواصلات ومابركبش غير بعد ما نص المحاضرة ماتخلص :(( ارحمونا في الامتحانات كفاية نص ساعة طايرة في الوقفان ولا منها ركوبة ولا منها مراجعة:(((


اللي ساكن ناحية الساعة في اسكندرية حيحس بالمعاناه دي اوي

---------------------------------

بمناسبة يومين الامتحانات واضح ياجماعة ان المذاكرة مقصرة جداً - مقصرة هنا معناها مأثرة بس طبعاً نص شعبنا العزيز بينطق مأثرة بمقصرة - ماعلينا مش قضيتنا ..نرجع لكلامنا ..كنا بنقول ايه يا طمطم ...ااااااه المذاكرة مقصرة جدا ..انها فعلا مقصرة ...مقصرة في كل حاجه

جيبات وبنطلونات وباديهات..وواضح ان كل ماالمذاكرة بتكتر ..كل ما بتقصر اي حاجة في طريقها


ربنا يستر على اخر ايام الامتحانات

--------------------------------

وبمناسبة الامتحانات برده...ياريت الشعب يتعمله توعية نضافة لحسن الناس من كتر المذاكرة بتنسى تستحمى...وياسلام بقى على ريحة البرفانات مع العرق ...حاجة ايييييييييه يع يع يع...

دي كانت تجربة ركوب ترام مريرة لأسباب قهرية وخارجة عن ارادتي...بس انا اسفة ياترام مش حركبك تاني في وقت الزحمة..ماله طريق البحر يعني

-------------------------------


في الاخر بقى ياريت تدعولي عشان الامتحان الجاي ديزين

12 comments:

  1. انا رايى يابنتى متروحيش الامتحان وتريحى نفسك بس انتى خلتينى اخد بالى من حاجة ان فعلن الالتزام المرورى والالتزام بحاجات تانيه كتيييييييير مبيحصلش غير ايام الامتحانات ههههههههه اما بالنسبة لموضوع تاثير الامتحانات على تقصير الجيبات فده بيرجع اكيد انهم معندهمش وقت يلبسو فبياخد اى حاجة قدامهم ماس دحيحيه يعنى انا اكتر شىء بيعجبنى ايام الامتحانات ان الجامعه بتبقا فااااااااضيه ومحدش بيقعد فيها وع فكرة انا بعانى م المواصلات زيم متزعليش :))

    ReplyDelete
  2. بجد انتى عسل جدا...ملاحظات في محلها..
    تركيز الناس في المواصلات ...ده حتى الولاد بقوا يمسكوا ورق مراجعات في الميكروباصات ...على الاقل أحسن من ما يقعدوا يبصوا على الي رايحة و اللى جاية..
    شرطة المرور ..أنا عايزة اقولهم بس كلمة واحدة ..ربنا يخليكوا خليكوا في مكاتبكوا الأيام دي علشان الناس تعرف تروح شغلها و الطلبة تعرف تروح امتحاناتها ....بلاش تؤدوا واجبكوا الوطنى علشان واجبكوا الوطنى ده بيعطل الوطن كتير......
    البنات و الامتحانات و الجيبات القصيرات...دي مشكلة
    بس أصل الامتحانات في الغالب بتكون آخر فرصة للبنت علشان تصطاد شاب روش لأن لسة هيبقى في أجازة طويلة ....يعني اللى بتعمل كده هي البنات الخايبة اللى بتأجل كل حاجة لأخر السنة زي ما أجلت المذاكرة لآخر السنة ...مش كنتى تصطاديه من أول السنة ...ياللا بقى معلش

    ReplyDelete
  3. ازيك يا جميل
    انا قولت اكيد البت ربنا هداها وبتذاكر ادخل الاقى بوستات الدنيا والاخرة
    بس بقى فى الصيف أخيييييييييييييي على كل حاجة بأحس بالقرف يععععععععع
    هههههههههههههههههههه
    اوعى وشك على البرفان من غير استحمام هى الناس متعرفش معنى الصابون ولا الميه
    ههههههههههههههههههههههههههههه
    على فكره ليكى تاج
    بس بعد الامتحانات عارفه لوشوفت ليكى بوست من غير ما تخلصى الامتحانات هأقطم رقبتك ان شاء الله
    ربنا يوفقك ويكرمك يــــارب

    ReplyDelete
  4. فكرتيني ايام مكنت بجري ورا عربيات السزوكي علاشان الحق الامتحان
    وبردو كان نفس ظابط المور بيقف في نفس الوقت ونفس المكان
    الكلام دة بقالوا 5 سنين
    معقولة الظابط دة مترقاش ولا حتي مسكوة ادارة مراجيح مولد النبي
    طبعا مش محتاج اقول انا بردوا بكلم على ميدان الساعة

    ReplyDelete
  5. مرسيدس
    ------
    والله معاكي حق يا مرسيدس حياتي
    انا فعلا لازم افكر ماروحش الامتحان
    مالهاش لازمة الشكليات دي

    فعلا يا هوندا الالتزام المروري والناس الدحيحة و الكليات الفاضية من الحاجات الملاحظة اوي على دخول الامتحانات

    وحشتيني ومستنية اشوف طلعتك البهية على الماسنجر

    ReplyDelete
  6. !!!بجد انتي عسل
    اكيد بتكلم هوندا..لألأ انا طمطم...ده انا ماليش في العسل اساسا

    احسن حاجة فعلا التركيز والله الواحد بيبقى مرتاح جدا من حكاية المعاكسات

    شرطة مرورنا العزيز
    دول ناس ملتزمة تحب تشتغل بس لما بيجي المزاج
    يارب امنع عنهم كل انواع الحشيش عشان مايجلهومش مزاج ابدا
    :))

    البنات اللي بتقصر الجيبات مابتصدتش غير اللي موقع البنطلون
    والطيور على اشكالها تقع

    مرسي مرورك يا حلم عربي

    ReplyDelete
  7. اماني
    ----
    ازيك ؟
    الحمد لله
    !!ياجميل
    تاني بتكلمو هوندا
    اماني يا بنت الجنوب انا طمطم

    بس بجد الصيف فعلا على اد ما الواحد بيبقى مبسوط على اد مابيقابل حاجات مرتاح منها في الصيف

    حبقى اوصل لهوندا الكلام بتاعك واكيد التاج:))

    مرسي مرورك يااماني

    ReplyDelete
  8. اسكندراني في الغربة
    -----------------
    اخيرا حد عارف معاناتي بالزبط:))

    لألأ اكيد هما رقوه
    لأن انت بتتكلم على السوزوكي يعني طريق البحر

    احب ابلغك اني اي حاجة بتوديني هندسة
    محطة سريع او محطة سيدي جابر او البحر

    لا حياة لمن تنادي
    مافيش مواصلات
    وعشان ادور على حاجة اركبها انا والله بعد الف في ميدان الساعة كله عشان الاقي اي حاجة اركبها

    وده معناه ان هما رقو الزابط
    وجابو مكانه تلاتة اربعة

    ربنا يهدهم

    طولت عليك
    شكرا لمرورك

    ReplyDelete
  9. يارب تعدى الايام الكئيبه دى بسرعه

    ReplyDelete
  10. عودا حميدا ياطمطم انا افتكرتك روحتي تعملي عمره الصيف ولا حاجة بوست حلو واحلي من الجيلي والمشبك بجد وبلاش بخل بقي واشتري عربيه بقي ان شاالله تكون بي ام بس مش شرط تفتري يعني عندك هوندا لما تعبت من المواصلات نفضت وجابت الاسبوع اللي فات عربيه نقل من كتر الزهقان قلديها وعيشي حياه الرفاهيه بقي بتاعه الشعب

    ReplyDelete
  11. احنا
    ----

    يسمع من بقك ربنا

    ReplyDelete
  12. كبوده باشا
    سماح المرادي بقى

    والله ياابني انا الحج مواعدني بعربية من وانا في ثانوي لو دخلت هندسة
    وكل مااكلمه يقولي انتي ماطلعتيش من هندسة

    ربنا يدينا طول العمر بقى

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore