هنعمل إيه في الأجازة ؟

السلام عليكم .

مش خلصنا امتحانات الحمد لله ! كفارة

ماشى وبعددين؟

هنعمل إيه في الأجازة ؟


مش عايزه حد يقولى هنام ولا هسافر المصيف وأقضى الصيف هناك أنا طبعا مبقولش احبس نفسك ولا متنمش ابد إحنا طبعا هنعمل كده وده من حقنا بعد شهور العذاب والسهر والدش وادح والصم على اعتبار إننا كنا بنذاكر أصلا طول السنة مش أخر أسبوع . المهم إن الأجازة متبقاش كلها نوم ولا مصيف إحنا بس نقسم وقتنا ومن أولها علشان منكسلش لو بدأتها نوم هتبقى كلها نوم أما لو بدأتها شغل هتبقى كلها شغل وطبعا أنت وزوقك والغرض من التقسيمة دي تلافى الملل وما ادراكو ما الملل ؟الموضوع ده كتبته السنه الى فاتت فى الاجازة وبحاول اقراه كل اجازة عشان افتكر يعنى انتو عارفين بقا زهازيهو "الزهايمر"عامل عميله معانه ندخل بقا فى المهم :

طب هنعمل إيه؟

لو جينا نقسم الأجازة هنعمل إيه في الأجازة هنحاول نهتم بأربع حاجات :

1-جزء روحي : إننا هنحاول نقرب من ربنا اكتر وهنزود عبادتنا في الصلاة وقيام الليل وصلاة الفجر ماحنا كده كده بنسهر لوش الصبح ونصوم اتنين وخميس نستعد حتى لرمضان و في القران أنت ممكن ع الأقل كل أسبوع تحفظ ربع حزب وبعددين تقرا تفسيره وفى نفس الوقت تتعلم أحكام التجويد فيه وبكده تكون الخطوط اتوصلت ببعضها كتطبيق عملي وتحاول تخصص لك ورد يومى ولو صفحه اى حاجة المهم صلتلك متتقطعش بالقران وأحب الاعمال إلى الله أدومها وإن قلت
نقرأ اى كتاب في الدين وليكن كتاب في الأسبوع فى الشهر حسب وقتك بقا عن الرسول أو الصحابة أو الفقه أو....... (انت وراحتك بقى ) المهم نحاول نمحى أميتنا فى الدين الى منتشرة فينا كلنا كمسلمين الا من رحم ربى

2-جزء اجتماعي: طبعا مش محتاجين انى أقولكم صلة الرحم والأصدقاء مفيش حجة بقى لا كلية ولا مذاكرة يعنى كل يوم ممكن تسال على حد قريبك أو صديقك بزيارة ولو نصف ساعة أو تليفون ولو عشر دقايق أو رنة موبيل آو ميل أو sms وياريت نبدأ باى حد منهم مريض أو جاى من سفر لو عملت كده كل يوم مع حد شوف في الأسبوع علاقتك بالناس هتبقى عاملة ازاى ده غير الثواب طبعا وتجدد علاقتك بوالديك متطنشهمش في الزحمة يعنى وصديقتك الانتيم أهم حاجة وحشتينى يابت :( .


3-جزء جسمانى
: طبعا مقصدش الأكل بس ممكن نقول الاهتمام بالتغذيه السليمه وكمان الرياضة اهم حاجة عشان تحرق الأكل حتى :) يعنى لو كل يوم نصف ساعة رياضة في البيت أو مشى في الشارع أو جيم والبنات ممكن تروح جيم شهر كده تجريب ولو زهقتى بعد ماتكونى حفظتي التمارين أعمليهم في البيت المهم تخلى بالك من جسمك وخلو بالكم هتقعدو كتير في البيت في الأجازة فرجاء خفو عن الثلاجة وبلاش تتصحبو عليها قوى .

4-جزء عقلي: بصو بقا العقل ده عاوز شغل كتير في الأجازة لو فضلتو مقضين الحياة نوم ومصيف ورغى بس , عقلك ده هينام سطيحة وعشان تصحيه ده موال عاوزله شغل جامد

طب نعمل إيه؟ طبعا كلنا عارفين إن القراءة غذاء العقل فحاولو تقرو كتيير في الأجازة والأفضل إنكم تحددو مجموعة من الكتب تكونو عايزين تخلصوها في الأجازة خطة يعنى علشان الزهيمر والحاجات دي انتو أدرى بقى

وياريت نقرا في كل حاجة ومفيش مانع انك تقرا برده في مجال دراستك طبعا لو انت بتحب دراستك أما لو مبتحبهاش فحاول انك تحبها وأمرك لله المهم تبقى متميز محدش عارف يمكن لما تقرا بعيد عن الكلية تحب دراستك

( أصلك بتقرأ بمزاجك محدش فارض عليك حاجة) .

ملحوظة للبنات فقط: متنيش البيت يعنى التنضيف والغسيل والتبيخ عشان زوج المستكبل حطي المواضيع دي في الجدول برده ماشى


وأخيرا وليس آخرا

عليكم بالانجليزى واللغات على اختلافها ولو كلمة كل يوم .

والكمبيوتر متنسوش تتعلمو حاجة جديدة في المواضيع دي ولو برنامج كل شهر هتفيدكو بعدين مش لازم نقتصر تعليم الكمبيوتر على الناس المتخصصه فيه بالعكس لازم كلنا نعرف فيه وكويس كمان.

طبعا في الأول والآخر دي مجرد مقترحات صغيرة ممكن تجيب لك أفكار كبيرة الغرض انك تفكر ازاى تستفيد من وقتك وأنت مش مقيد بيه لو بتعمل حاجات تانية مفيدة فالهدف واحد وان تعددت طرق الوصول إليه المهم منخليش حاجة واحدة محتلة الأجازة كلها سواء كانت نوم أكل سفر

ادعولى بالثبات والنجاح والإتقان والإخلاص

™`·.¸¸.·¤¦¤`··._.· ] HoNdA [ `·.¸¸.·¤¦¤`··._.·`™

14 comments:

  1. كويس اني أول واحد يعلق على الخطة الأكثر من ممتازة
    و لو إني واخد أجازة مفتوحة من ساعة ما خلصت هندسة

    لكن الخطة دي مش خطة أجازة
    دي خطة حياة
    النقط اللي اتكلمتي عنها هي اساس بناء حياة أي انسان
    و ركزي الله يكرمك على القراة
    ناس كتير نسيتها و بقت مورهاش غير الكومبيوتر و النت
    ربنا يبارك فيكي و يحفظك و يدخلك الجنة
    آمين

    ReplyDelete
  2. ولك مثله ياعلاء ربنا يكرمك واهلا بيك انا متفقه معاك فى موضوع القراءة انه مهم جدا حدا جدا اقلها غذاء العقل وانا عن نفسى بحاول امشى على التقسيمه دى طول السنة بس بوسعها اكتر فى الاجازة فى ناس رابطة اى حاجة مع الدراسه متنفعش وده غلط جدااا نصف الوقت ضايع على الفاضى والى بروح مبييجيش

    ReplyDelete
  3. أيه ده
    والله مش مصدق عينيا
    ديه فعلاً خطة حياة أستاذة هوندا
    ربنا يكرمك
    ويعينك ويثبتك
    ويرزقك الأخلاص
    ويرزقنا همتك وثباتك
    أمين
    :)

    ReplyDelete
  4. متشكرة اوى يا بينو وربنا يكرمك ويثبتك واهلا بيك :)

    ReplyDelete
  5. انا بقى مش في أجازة للأسف و مش متوقع آخد أجازة قريب لأنى خلصت من اربع سنين
    المهم
    خطة جميلة جدا جدا يا هوندا و بحد بنصح كل الشباب يعملوا بيها بدل ما هيضطروا يعملوها غصب عنهم لما يدخلوا مجال الشغل
    و في حاجات لو ما عملوهاش دلوقتى و عودوا نفسهم عليها مش هيعرفوا يعملوها أبدا زي موضوع القراءة ده

    ربنا يوفق الجميع يارب و يكرمك يا هوندا يا قمر على الأفكار الحلوة دي و يجازيكي خير عنها
    و عجبتنى أوي فكرة الانجليزي كل يوم كلمة دي ...تصدقى انها فعلا فكرة حلوة اوي لو الواحد عرف ينفذها يبقى هيحفظ في السنة تلتمية خمسة و ستين كلمة حلو اوي ...يعني على ما يتخرج يكون بقى لبلب في الانجليزي

    شكرا يا جميل على التدوينة الجامدة دي
    سلام

    ReplyDelete
  6. ana ma3akee fee modo3 el 2agaza wala wenee 7'alaset sho3'l talba men zammmmmmmmmmmman la2 eih ana mesh 3agoza ya3nee bass eshta ya welad..
    7otee lista feeha kol 7aga we kol shwyia 2e3melee 7aga menha we be keda matezha2ish
    shoftee sahla..:D

    ReplyDelete
  7. هههههههه ربنا يكرمك ياحلم يامظبطانى بس انتى كده فى اجازة طول الحياة يعنى فرصتك اكتر :) وفعلا موضوع القراءة ده بيكون محتاج تدريب كتير لانها مسأله تعود

    ReplyDelete
  8. هههههههه هلا ياسارة اانت صح اعملى ليسته ونفذى الى فيها واحدة واحدة عشان الزهايمر حتى ده غير انك بيتبقى عارفه انتى عايزة تعملى ايه

    ReplyDelete
  9. السلام عليكم

    ايه الكلام الجميل ده ..

    دا انتى تحطى خطتك على كشكولى .. صديقى إلى النجاح .. ويبقى كده وصلنا بإذن الله ..

    الله ينور

    ReplyDelete
  10. هههههههه وعليكم السلام ورحمة الله وبركاته ازيك ياياسر هو فعلا كشكولك مكمل للخطه وان شاء الله هنوصل ياريس :)

    ReplyDelete
  11. جميل البوست دة ومدونتك كمان اكتر من روعة
    تحياتي واحتراماتي

    ReplyDelete
  12. ايه الخطط الجامدة دى فكرتينى بايام الدراسة

    هيا الاجازة كام شهر باه علشان وراكى حاجات كتير

    يالا الحقى بس ما شاء الله الجدول بتاعك جميل

    ReplyDelete
  13. ماعليناااااااا ازيك يابنتى فينك ليكى وحشه الاجازة بتاع 3 شهور بس الى متعرفهوش ان انا بعتبر ايام دراستى اجازتى والعكس صحيح :)

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore