تهييس




بمناسبة عيد ميلادي المجيد ...اطال الله بقائي على قلبكم

وبمناسبه انه جاي زي عادته كل سنة في نفس التوقيت مع عيد الجلاء _اللهي ما يقطعلكم عادة _ احب اهيس عليكم حبتين

فطرطقولي ودانكم ..لعل وعسى تطلعو بحاجة مفيدة الليلة دي


اول حاجة

بمناسبة اسبوع الرجالة اللي احنا بنمر بيه في البلد.. احب اقول لكل سي راجل موجود بيننا متقلقوووش

مسيركم حتاخدو حقوقكم زينا ..بس انتم نظمو نفسكم واعملو جمعيات و مؤتمرات وطالبو بحقوقكم اللي الستات اخدوها منكم ..وبأذن الله بابا مبارك حيجيبهلكم من ماما سوزان


لأن اكيد مكان الراجل الطبيعي الشغل ..وصدقوني لازم حيحصل خطوة ونرجع الماية لمجاريها...اصل كدة الماية طفحانة وماشية برا المجاري وكدة مش حلو عشان البكتريا والجراثيم والحاجات دي.........ايه اللي انا بقوله ده !!!!


المهم كل سنة وانتم طيبين يا رجالة وبعوده الايام

.

.

.



-----



.

.

ثاني حاجة

بيني وبينكم كدة ...بتكرهو الواسطة؟؟

كلكم حتقولو ااه طبعا بنكرها ..هو في حد بيحبها !!

أيوة في ناس بتحبها واحنا كلنا عارفينهم

ماتبصوليش كده ...ايوة عارفينهم

طب عيني في عينكم

ايوة بالزبط ....كلنا


انا عارفة ان الواسطة دي ضيعت منك الشغل بتاع الشركة اللي فاتت اللي كان مرتبها حلو عشان ابن اخو جوز اخت نائب مدير قسم المشتريات كان متقدم معاك على نفس الشغلانة..صحيح هو ساقط 4 سنين كلية ..بس يا بخت من كان المدير خاله


ايوة كمان عارفة ان الورقة اللي وقفت عشان تعملها في 4 ساعات ونص ولسة ماخلصتش والمصلحة واقفة ..جه حنكش ابن ست ستوتة الشغالة اللي بتشتغل عند جيران الست ألمظية الألمعية اللي جوزها يعرف عم حسين الساعي بتاع المصلحة خلصها في دقيقتين وشرب كمان جنبيها حاجة ساقعه بيبس


بس بيني وبينكم لو عندك خال شغال في حتة حتقضي فيها مصلحة ...مش حتكلمو عشان يمشيهالك ولا حتقف زي اللي مالوش!!

ولا تعرف حد في ايده يشغلك مش حترحله وتقوله ماتنسنيش يا عم حسين المرة الجاية


الكارثة مابقتش في الواسطة

الكارثة ان الواسطة عايزة واسطة


يعني تصور رحت للمحافظ تخلص تراخيص والمحافظ مضالك ورايح تخلص الورق ومزقطط عشان معاك امضة سيادة المحافظ...تلاقي الراجل يقولك طب ااقفلي هناك شوية تقوله يا عم انا معايا ورقة من المحافظ يقولك وريني كدة ...ويروح باصصلك كدة بقرف ويوقلك يا خويا انا جاتلي الورقة دي 100 مرة النهاردة لغاية دلوقتي..طبعا حتتصدم وتروح مدور على حد جوا المصلحة يخلصلك المصلحة اللي متعطله

وهلم جرة


سيدي المواطن ...احنا اللي سكتنا من الاول على الرشاوي وعلى الهدايا والعطايا واللي يقولك ابجني تجدني نديله

مانجيش دلوقتي ونزعل من اللي بيحصلنا

لعن الله الراشي والمرتشي


وده جزاة اللي ميسمعش كلمة الرسول قالها

.

.

.


-----

.

.


اخيرا حبة تفاريح


اللينك ده في حاجة لذيذة جدا

يارب تستفادو منها

وتدعولي كدة لو طلعت حلوة

ورايا على اللينك

.

.

.

.

.


:D
***TAMTAM BOGY***

13 comments:

  1. كل سنه وانتي طيبه يا طمطوم وعقبال 3 او 4 سنين كمان كده مهو مش معقول اكتر من كده يعني .. اي حد له طاقه
    تاني حاجه فعلا موضوع الواسطه ده احنا اللي بدعناه من اوله لاخره من اول الموظف اللي معندوش ضمير ولازم الروتين ياخد مجراه وميتحركش الا لما يكون حد معرفه او الخمسه جنيه المقدسه تتحط في الدرج

    وبيني وبينك الواسطه طعمها حلو لما حاجتك تخلص بسرعه كده دي الواسطه اللي شايفها عاديه وضروريه في الزمان ده
    اما اللي مش عاديه وحرام كمان اني اخد حق حد في وظيفه او في تقدير في كليه مثلا بسبب الواسطه مظنش اني هرضى بكده ... او ممكن ارضى معرفش لاني مجربتش لسه

    حاجه اخيره انا مبطبقش تيشيرتاتي زي ماقلتلك ولو عرفو الموضوع ده هينقلبو عليا ومش هيرضو يتلبسو تاني
    سوري طولت بس انا قلت اخد راحتي منا في الرغايين سبوت بقى
    كل سنه وانتي طيبه مره كمان
    yalla nudgat ba2a

    ReplyDelete
  2. سوري نسيت امضي
    JanKiez

    ReplyDelete
  3. يا سلام لما يبقى اول كومنت من عمرو باشا

    دي الدنيا بتضحكلي وانا ماشية ادلع املى القلل بقى

    وانت طيب يا جنكيز وعلى رأيك 3 او 4 كفاية

    على العموم الواسطة شئ اساسي في حياتنا مش حيروح من نفسه لازم احنا ناخد خطوة ونبطل نمشيها ولازم نبتدي بنفسينا وده اللي عمره ما حيحصل عشان بس مانضحكش على نفسينا

    احنا تربت عندنا الانا المحترمة

    مرحب بيك في رغايين سبوت يا باشا

    ReplyDelete
  4. الظاهر من خبرتى الشنيعة الفزيعة في البلوج بتاعكوا بقيت بعرف مين اللى كاتب قبل ما يمضي ..أنا من الأول عرفت انها طمطم


    كل سنة و انتى طيبة يا طمطم و عقبال دشليون سنة و انتى منورة على قلبنا ...هههههههههه

    طبعا بالنسبة للواسطة .....أكيد عندك حق احنا فعلا بنكرهها لما بتيجي ضد مصلحتنا لكن لو هتقضيلنا مصالحنا بنحبها جدا

    اللينك اللى انتى حاطاه جامد جدا ...أنا اتفرجت عليه 3 مرات ...للدرجة دي الناس دي بتفكر في الطريقة اللى توفر عليهم الوقت في تطبيق التي شيرت ....علشان كده هما متقدمين عننا

    يا رب نكون زيهم و احسن قريب

    تحياتي

    ReplyDelete
  5. عيد ميلاد سعيد ياطمطم عقبال 100 سنه وعقبال الجواز كمان يارب بصراحة افتقدناكي فتره الامتحانات وعةده حميده ومنتظرين مواضيعك الجامده
    يلا سلام

    ReplyDelete
  6. كل سنة وانتى طيبة الأول ..

    بعد كده احب اشكرك جداً انك مهتمة بقضيتنا وواقفة جنبنا لحد ما ترجعلنا حقوقنا المغتصبة ..

    وفى النهاية ما احبش اشكرك خالص على اللى كان بيطبق التيشرت ده .. لأنه خطفها .. وماعرفتش ألقط هو عملها ازاى

    تحياتى

    ReplyDelete
  7. كـــــل ســــــــــنة وانتى طيـــــــــبة يـاحـــــــــبى وربنا يباركلك فى عمرك ويجعلها كلها طاعة يـااااااااااااارب آمـــــــــــين ويكون سنة ســـعيدة عليكى يااااااااارب وتنجحى وربنا يوفقك يـااااااااااااااارب آمــــــــــــين

    ReplyDelete
  8. الحلم العربي
    ----------
    طب كويس انك عرفت مين اللي كاتب على طول
    انا عارفة ان هوندا ليها اسلوب مميز لما اعمل ايه مش حقدر حتى انافس عليه
    وعلى العموم حلوة فكرة الخبرة دي..بعد كدة حعمل شهدات خبرة للزوار :D

    وانت طيبه يا حلم وكفاية 40 سنة كمان انا مش طمعانة اهو

    بالنسبة للواسطة دي حاجة كدة زي السوس اللي بينخر في الخشب ..ربنا يستر علينا

    على فكرة انا بقيت خبرة في تطبيق التي شيرت ومن بكرة حنزل ادور على شغل في محل لبس :))))



    تحياتي ليكي

    ReplyDelete
  9. كبودة باشا
    وانت طيب يا كبودة
    يارب يا كبودة يا خويا ومتقلقش حبقى اعزمكم

    مستنيه مواضيعك انا كمان ;)

    ReplyDelete
  10. ياسر سليم
    ---------
    وانت طيب يا ياسر

    طبعا ياابني انا مع الحق دايما:)))

    ماتزعلش حبقى ااقولها تشرحها تاني

    تحياتي لك

    ReplyDelete
  11. اماني
    -----
    وانتي طيبة يا اماني
    ويسمع من بقك ربنا



    الا صحيح انتي فكراني طمطم ولا هوندا؟؟!!

    ReplyDelete
  12. كل سنة و انتى طيبة يا طمطم و عقبال 100 سنة

    الينك تحفة على فكرة

    تحياتى

    ReplyDelete
  13. كل سنه وانتى طيبه يا طمطم
    وعقبال مليون سنه
    ويارب تكونى بخير دايما

    ومش لازم تنكدى على نفسك فى عيد ميلادك بالواسطه وخلافه....خليها فى يوم تانى
    :)

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore