للمخنوقين فقط


ازيكم ياجماعه وحشتونى انا بقالى كتير مكتبتبش كلمتين كده من فقعتى بس بجد انا بعتذرلكم مقدما عن حاجة ان البوست بتاعى المرة دى فضفضه شخصيه يعنى انا مكنتش احب الموضوع ده بس معلش بقا اعذرونى انا مبحبش اشرك حد فى خنقتى بس يمكن استريح شوية اهو حتى تواسونى او ع الاقل اواسى نفسى

هو انا مش عارفه اكتب كلمتين ع بعض يعنى انا الحمدلله تقريبا بقالى شهر بيحصل معايا مواقف لذيذة اوى من كل الناس الى حواليا والالذ ان الى اقول عليه مش هيعمل حاجة يعمل اسخم حاجة ههههههههه الى تفتكره موسى ماعلينا بس انا بجد نفسى افهم هو البنى ادم لما بيتعمل فيه مواقف رخمة كتير المفروض يتغير ؟؟ يعنى هو طبعا محدش بيقول ع نفسه وحش ومحدش بيقول ع نفسه حلو بس للامانة انا مش حاسه انى سيئه للدرجة ان تخلى البنى ادميين الى حواليا يأذو مشاعرى كدا يعنى انا واحدة شكلى او شخصيتى بيدى انطباع للناس انى بت جامدة ومعندهاش مشاعر ولا احاسيس على راى عمو اللمبى بس يعنى ياجماعه انا مهما كان انسانة يعنى غصب عنى بحس

انتيمتى الى فعلا بتحسسنى انى لسه بنى ادمه ولولاها كنت حسيت فعلا انى بعبع وبكل الناس انا مش عايزة اطلع الناس وحشه بالعكس انا كل الى اعرفهم مجرد انى عرفتهم لانهم اشخاص محترمة ومش ندمانه انى عرفتهم بس كل الى انا عيزاه انهم بجد يراعونى شوية لو مش حاسين انى بالنسبة لهم حاجة مكنوش يوصلولى ده يعنى بلاش ياجماعه نزود اوى فى التعبير عن مشاعرنا ياريت منقلش الا الى بجد احنا حاسينه عشان منخليش حد ينتظر زيادة بناء ع الانطباع الى انت وصلتهوله

على الرغم انى اوقات كتير بحس انى لوحدى بس فعلا انا ملييش غير ربنا هو وحده الى جمبى وهو الى اعلم بنوايايا وعارفنى اكتر م البشر دى ولما هطلب العون هطلبه منه هتقولى امال كاتبه ليه?

يعنى انا كل مايحصل حاجة كده اقعد اطلع العيب فيا واسلخ نفسى انى غلطت واروح اصالحهم حتى لو هما الغلطانين بعد كده لما اكتشفت انى خليت ده ع حساب كرامتى ده خلا الى قدامى ميعمليش حساب وحاولت اتغير معرفتش لسه بطبيعتى معرفش ده حلو ولا وحش بس الحمدلله بحس انها نعمه لو الواحد اتغير للاسوء ع اخر العمر هيبقا حاجة لا تتطاق
ومع ذلك بحب كل الناس الى عرفتهم والى بعرفهم حتى الى عملو فيا الى مبيتعملش بحبهم ومازلت وسأحبهم حتى النهاية هههههههههه

انا بطلب طلب صغير لاى حد هيقرا الموضوع ياريت ياجماعه نراعى بعض اوى ونخاف على مشاعر بعض ونلتمس الاعذار لبعض مش على طول نفهم غلط ونفسر الكلام على مزاجنا يعنى لما اكون انا بحبك وطلبت منك طلب او قلت كلمة مش معناها انى بكرهك او مش عايزة اشوفك او مبقدركش بلاش ياجماعه نخسر بعض او نقول كلام يشرخ الحيطة الى قدامك لو معتبرتهاش بنى ادم بلاش تحسس الشخص الى قدامك بالندم انه اتنازل عن حاجات مكنش متعود عليها او مش مقتنع بيها او حتى شايف انها غلط لو اختلفنا مع بعض مش معناه اننا وحشين لازم نتقبل اختلافنا ده كل واحد فينا له خبرته وتجاربه الى ولدت الاختلاف ده نحاول نريح بعض ونساعد بعض

اخر حاجة عايزة اقولها انى عارفه انى محدش بيقصد يجرح حد لانه لو عرف الالم الى هيسببه للشخص الى قدامه او يجربه هو هيندم انا عايزة اقول كلمتين


انا اسفه لاى حد غلطت فى حقه وانا مش واخده بالى
انا اسفه لو كنت جرحت حد فى يوم م الايام وانا معرفتش
انا اسفه لو فى يوم م الايام مقدرتش ناس كان كويسين فى حقى ومعرفتش انهم صح الا بعدين
التمسولى العذر انا لسه بكبر لسه بتعلم لسه بكتسب خبرات
انا والله مابحب اتعب حد ولا اجرح حد
وياريت اى حد يسامحنى ع اى حاجة عملتها وانا مسامحه اى حد ومش فى قلب اى ذرة كراهيه او ضيق من حد بس مجرد خلو بالكم فى تعاملكم مع اى حد لانى الاذية فى المشاعر دى صعبه جدا

مش معنى انا قلت ع ناس م اصحابى الكلام ده ان اصحابى وحشين بالعكس انا ربنا رزقنى بناس كويسة جدااااااااااا الاجمل فيهم انهم بيعاملونى بالمعامله الصح صادقين مع نفسهم حاسين انى زميلة بيعاملونى كزميلة مش يقعدو يحسسونى انى انا وانا وانا مع اقرب حاجة اخد بووووووم فى وشى
ربنا مايحرمنى من كل الناس الكويسة ومن كل الناس الى بتحاول ع قد ماتقدر انها تتطمن عليا
واى حد عمل فيا حاجة ان كنت اتضايقت فلانى بحبك ومش حابه ان علاقتنا تبقا كده ولانى بحب اخرج الى جوايا عشان اصفا مش بحب انافق ومتزعلوش منى لو قلتلكم الى مضايقنى باسلوب مش كويس ده للاسف اسلوبى الى بحاول اغيره ولسه معرفتش ماهو البنى ادم مبيتغيرش فى يوم وليله

واخر حاجة ياريت متقلش كلمة الا ماتكون قاصدها بجد لان مواقفك بعد كده بتصدم الشخص الى قدامك لما يلاقيك بتقول كلام او بتعمل موقف يثبت العكس
هتوحشونى مؤقتا انا مضطره الم عزالى واسيب بيتا كام يوم اغير جو وادى حقوق لناس ليهم حقوق عليا وبيقدرونى وادعولى ربنا يفك كربى

اللهم إنى استغفرك عدد مأذنبت بحقك وحق خلقك وبحق نفسى الضعيفه
اللهم اجعل الحياة زيادة لى من كل خير واجعل الموت راحة لى من كل شر

كانت معكم بقايا
HoNdA


12 comments:

  1. ياااااااه يا بنتى كل ده جوه
    على العموم هي الدنيا كده و هي الناس كده و كل واحد هتلاقي فيه عيب فلازم نتحمل بعض...
    فعلا كلامك صح مشكلتنا اننا مش بنعرف نعبر عن اختلافنا مع بعض كويس فساعات بنجرح بعض من غير ما نحس ....
    أنا بتضايق جدا لما بلاقى شخصية مرحة زيك مضايقة لأن ده معناه انك اتجرحتى خالص ...
    يارب اليومين اللى هتعزلى فيهم يكونوا يومين كويسين و ترجعى لطبيعتك ..
    و ربنا يوفقك يارب ...كلنا ليس لنا إلا الله ليرحمنا

    ReplyDelete
  2. معلش علي راي نجيب الريحاني هي كده حكمه ربنا كده وهو عاوز كده
    هي دي الحياه نعيشها زي مهي وامرنا لله
    تحياتي
    ومنتظر وجودك في مدونتي

    ReplyDelete
  3. قشطة جدنننننن

    يابنتي انتي زي الفل وربنا

    مالك؟

    كلنا عارفينك عايزة الضرب صحيح

    ههههههههههههههههههه

    بس طيبة
    فكيها

    احنا داخلين على أيام سوداااااااااااا

    ReplyDelete
  4. الحلم العربي
    ازيك يابنتى وحشانى انا متنفقه مع كلامك كله هو طبعا كل واحد فيه عيوب بس احنا الى منعرفش نقنع نفسنا بده ولا بنعرف نتعامل معاه بس هيا اسوء حاجة لما متعرفيش تفهمى الشخص الى قدامك نفسك
    وربنا يوفقنا جميعا
    >----------<
    تامر حسين
    اهلا بيك

    ReplyDelete
  5. Halawa
    بقا انا عايزة الضرب ماشى
    ودخلين ع ايام سودا ياكلافظ السعد :)

    ReplyDelete
  6. Hey Honda..
    ezayekk...
    eh ya bentii da kolo, ay na3am kol kalamek sa7..
    bas bayen mno enek ma5nooo2a we metday2a gameddd mn el nas elli tegra7ek aw teza3alek mn 3'er maya5do balhom, ew3y bas akoon ana mnhom ;)

    bossy, mat5alllesh 7ad yehez sekatek fe nafsek abadan...wallahi enti mn afdal el nas elli ana 3reftohom, we rabena yebarek feki daiman ya rab,,,,

    rawa2y nafsek keda...we isa terga3y el bet wenti mazagek tamam we a7san keteeer isa...

    take care sweety...

    ReplyDelete
  7. معلش ا بنتى انتى لسه مشفتيش حاجة من اللى الناس بتعمله و الله

    وزى ما قلتى فيه صحاب كويسين فيه برده الوحش

    و كويس انهم بيبانوا على حقيقتهم على طوول علشان تبعدى عنهم و تتقى شرهم

    وانا بضم صوتى لصوتك ان كل واحد يراعى مشاعر الاخر بس المشكلة لما دايما تبتدى بالصلح بيعتبروا ده ضعف معرفش ليه مه انى بحس انه قوة

    المهم فرفشى كدا و تعالى نلعب استميشن

    ReplyDelete
  8. Nano
    ازيك يابنتى انا عودت الى المنزل اهو بعد ماايقنت ان من خرج من داره اتقل مقداره
    واطمنى انتى مش منهم حتى لو انتى منهم انا بحب اصحابى كلهم وان كنت اتضايقت من تصرفات ده لانى بحبهم اوى اوى ومحبش اخسرهم
    اما بالنسبة لموضوع الثقه ده فالحمدلله هيا لسه متهزتش هههههههه متشكرة اوى ع المجاملة دى المشكله ان اغلب اصحابى بيقولولى كدا بردو ان من احسن الناس الى قابلوهم امال لو كنت اوحش كانو عملو ايه هههههههههههه يلا خير ربنا يوفقنا جميعا انا بحبكم كلكم اكتر من نفسى ربنا مايحرمنى منكم بحلوكم ووحشكم

    ReplyDelete
  9. Ma-3lina
    ربنا يطمنك يابنتشى ههههههه بصى انا متفقه معاكى ان فى ناس بتعتبر انك تروحى تصالحى ده ضغف انا معاكى انه قوة لسبب ان التسامح ده قوة مش عندى اى حد والحمدلله اننا نقدر نعمل كدا الرسول بيقول خيركم من بدأ بالسلام

    بالنسبة للايستميشن انا نفسى اتعلمه ياريييييييييييييييييت اى كورس تعليمى ولا حاجة ولو انى عارفه ان لازم مش اقل من 4 بس بقالى 3 سنين بدور ع حدا يعلمهالى انا اتعلمت ازاى ارتب الورق الخطوة الجاية بقا هههههههههه

    ReplyDelete
  10. السلام عليكم

    ازيك يا هوندا و أخبارك ايه ...
    أنا حاسه بيكي أوي و الله يا هوندا
    و مش عارفه أقولك ايه بالظبط ...
    بس في حاجه عايزه أقولها لك
    الناس مش حلوه علي طول و باردوا مش وحشه علي طول يعني ماتتوقعيش منهم انهم يكونوا معاكي ملايكه علي طول الخط مهما كانوا الناس دي
    و مع ذلك ماتزعليش من حد أوي كده أنا حاسه بيكي و الله بس مش تخنقي نفسك كده أبدا مادام بتعاملي ربنا و بتحاولي دايما ماتغلطيش في حد
    و ربنا يبارك لك و يهديكي يارب ....

    ReplyDelete
  11. Eng.Hend
    وعليكم السلام ورحمة الله وبركاته
    ازيك ياهنوده عامله ايه وحشتينى اوى فعلا انا معاكى فى كلامك الناس مش حلوة ع طول ولا وحشة ع طول وانا الحمدلله اليومين الى فاتو دول فى عز ضيقتى اتعمل معايا مواقف جميلة اوى من ناس قريبه منى وده بسطنى جدا ربنا مايحرمنى منهم ولا منك
    وربنا يهدينا جميعا

    ReplyDelete
  12. نور الأقصىJuly 27, 2007 at 2:12 AM

    السلام عليكم ورحمة الله وبركاته
    مش عارفة اقلك ايه يانودي ربنا يخفف عنك ويرضى عنك ويرضيكي وفعلازي مقالت حلم عربي كونك متضايقة معناه انك مجروحة جدا او حاسة بحاجة بتنزف جوه قلبك اتمنى تكون الفترة دي عدت على خير وان كانت عزلتك نفعتك ابقي طمنيني لاني اتبعت نفس الطريقة وربنا يتولانا برحمته ويرضينا برضاه ويوفقنا للي يرضيه وبس ويرزقنا الصبررر.بحبكم في الله

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore