ياأخى تفائل ولو مرة



رغم ان الايام دى قريت عدد لابأس به من الاخبار الى تجيب اكتئاب مزمن الا انى عندى مبدأ فى الحياة انى عمرى ماهسمح للاكتئاب انه ييجى جمبى ولما بحس انه خلاص هيقرب ويستعبط بروح عامله اى حاجة عكس المفترض يعنى لو مخنوقة اقرأ حاجة تضحك واعامل نفسى معامله المبتسمين للحياة هههههه وهكذا


وبعدين لقيت تاج جايلى من مبرمج,
المهم ان مايوم ماعمل التاج ده وانا بفكر ياترى ايه الى بيخلينى اتفائل ؟ بصراحة بذلت مجهود عشان افتكر يعنى كل يوم كل بفتكر كام حاجة عارفين ليه؟ ده لأننا ديما بنشوف الحاجة الوحشة ونخليها مالية حياتنا ونطنش الحاجة الى ممكن تعمل تأثير جميل ممكن يديلك طاقة جبارة من السعاده تفضل مبتسم طول اليوم اما تفتكرها بس للاسف مبنخدش بالنا منها ده غير اننا شعب نكدى وبيندمج مع النكد بطريقة غير طبيعه

ماعلينا نقضيها اليوم ده

تفائل

كل ايميل جديد اكسير تفاؤل

لما أقابل انتيمتى اكسير تفاؤل

كل كوباية نسكافيه اكسير تفاؤل

الساعة سته الصبح اكسير تفاؤل

لما أقرا ماوراء الطبيعة اكسير تفاؤل

لما بصلى الفجر بفضل طول اليوم مبسوطة اكسير تفاؤل

اما افهم حاجة فى البرمجة واطبقها حتى لو اله حاسبه اكسير تفاؤل

اما تبدأ تدرك نعم ربنا الى محدش بياخد بالها منه زى انك تعرف تفكر وانك تقدر تنسى الاساءة

رغم انها ممكن تكون ألمتك وان ربنا يستخدمك لنفع الناس بأى شكل اكسير تفاؤل

لما الفريق بتاعى 90 درجة او الهاكرز يحقق انجاز او حدث اكسير تفاؤل

لما احضر اجتماع لاى فريق انا مشتركة فيه اكسير تفاؤل

وأنت بتدوس على زر Publish اكسير تفاؤل

كتابة تدوينة جديدة اكسير تفاؤل

اما احضر كورس لفريق زدنى اكسير تفاؤل

اما اشوف مسلمه ناجحه وملتزمة اكسير تفاؤل

اما ابتكر او طلع فكرة فى اى حاجة اكسير تفاؤل

اما اشوف مسلم ناجح هنا او فى الغرب اكسير تفاؤل

اما اتفرج على ابراهيم الفقى وعمرو خالد اكسير تفاؤل

اما يبقى مطلوب منى تاسك او مشروع واخلصه اكسير تفاؤل

اما تبقا قرفان من نفسك من ذنوب عملتها وتسمع الايه الكريمة

"قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لَا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُِ "

سورة الزمر الآية53 تحس بكرم ربنا ويبقا اكسير تفاؤل

واما تسمع الحديث الشريف " قال من لا ينطق عن الهوى صلى الله عليه وسلم :
عجبا لأمر المؤمن إن أمره كله خير وليس ذاك لأحد إلا للمؤمن ؛ إن أصابته سرّاء شكر؛ فكان خيراً له ،وإن

أصابته ضرّاء صبر فكان خيراً له اكسير تفاؤل

اما تعلم مهارة جديدة فى أى حاجة اكسير تفاؤل

لما تظبط التدوينة فى الوورد قبل ما تنشرها اكسير تفاؤل

اما اتعلم html واطبق الى عملته فى البلوج بتاعى وعدله اكسير تفاؤل

لما اروح اصلى التروايح واشوف الناس الى جايا تصلى اكسير تفاؤل

لما محفظتى تضيع وواحد يكلمنى العصر يقولى انه لاقاها اكسير تفاؤل

لما تدعى لحد بظهر الغيب وانت عارف ان هيتقالك ولك مثله اكسير تفاؤل

لما نقعد نجهز شنطة رمضان ونكيس الرز والمكرونة والعدس والفول اكسير تفاؤل

لما تنزل توزع الشنط دى لأسر وتشوف الشكر الى فى عيونهم اكتر من لسانهم اكسير تفاؤل

لما اقف على كوبرى رغم الفوبيا الى عندى بس اعمل فيها جامدة واتفرج على النيل اكسير تفاؤل

لما تحتار فى حاجة وتصليلها استخاره او قضاء حاجة وتسيبها ع ربنا لانك واثق انه خير اكسير تفاؤل

اما اكون مسافرة واتفرج على الأرض الزراعيه على الطريق والهوى بيخبط فيا م الشباك اكسير تفاؤل


ونحب نشوف التفاؤل على وش

زورة

حلاوة

بنت الجنوب

me,myself and the world

بس اتفائلتو كفاية ارجعو اتشامو تانى

16 comments:

  1. أنا أول
    COMMENT
    عايزه أقول ان كلامك صح لو الواحد بص لكل حاجة بتحصله من الناحية الإجابية
    هتفرق معاه كتير

    ReplyDelete
  2. اهلا بنت مصر اكيد طبعا ان التفكير الايجابى بيجيب نتيجة انما اللبى بيبوظ الدنيا وبيخلينا بننزل لتحت

    ReplyDelete
  3. طب اية الحاجة اللى بتخليك تكتئب

    على فكرة مش كل حاجة بتبقى ليها ناحية ايجابية

    ReplyDelete
  4. ههههههههههههههه , فعلاً أختى م العالم الآخر .. طبعاً اجابتك حلوة بغض النظر عن بعض الأجابات اللى شفتها قبل كدة بس مش عارف فين ههههههههههه .. بجد اجابتك خلتنى مبسوط جدااااااااااااااااااااا

    ألف شكر يا هوندا .. ما شاء الله اجابتك جميلة ومتميزة

    :)

    ReplyDelete
  5. اهلا محمود
    هو فعلا ممكن يكون فى حاجات ملهاش ناحية إيجابية بس على الأقل ثقتك فى الله انه اى حاجة ربنا بيقدرها خير متوصلش للاكتئاب
    ممكن زعل كام يوم وارادتك تقدر تعديها

    ReplyDelete

  6. هههههههههه اهلا ياأخى م العالم الاخر
    انا بردو وانا بكتب بعض الاجابات قلت ياترى شفتها فين قبل كده ههههههههه
    ربنا يكرمك

    ReplyDelete
  7. السلام عليكم ورحمه الله وبركاته
    كل عام وانت اللى الله اقرب وعن المعصيه ابعد ان شاء الله
    كل عام وانتم با الف خير

    ReplyDelete
  8. ياااااااااااه رينا وعليكم السلام ورحمة الله وبركاته كل سنة وانتى بخير وإلى الله أقرب وحشتينى جدا

    ReplyDelete
  9. زى ما رسول الله صلى الله عليه وسلم ماقال " بشروا ولاتنفروا " وفى بردوا .. " تفائلوا بالخير تجدوه " .. وفعلا االلى بيتوقع حاجه بتنجذب ليه زى ماسمعت من دكاتره زى دكتور شاطر اسمه ابراهيم الفقى لو تسمعوا عنه .. يعنى الموضوع حتى من الناحية العلميه والصحيه مفيد وبينفع ..واه الواحد بيجى اوقات بيزعل ويكتئب غصب عنه .. بس برده التفاؤل مهم .. وزى ما بنقول كله يقول " الحمدلله " بتريح البااااااااال وتصلح الحاااااااال .. ويارب نفضل متفائلين علطول

    ReplyDelete
  10. moataz
    جزاكم الله خيرا انا بأيد كلامك ميه فى الميه وفعلا دكتور ابراهيم الفقى ديما يقول كده
    وطبيعى ان الواحد يزعل واوقات يحبط بس ارداتك هيا الى تقدر تطلعك من الموضوع ده وتاخد أقل وقت

    ReplyDelete
  11. بوست جميل
    احنا فعلا شعب يحب الحزن والدليل على كدة ان الفراعنة لما جم يعملوا حاجة عظيمة كانت عبارة عن مقابر وكانت عظيمة طبعا

    انا كمان بتفائل لما اقرا ما وراء الطبيعة بحس ان لسة فيه متعة كبيرة في الحياة تستاهل ان احنا نعيشها

    وبعدين انت شكلك كدة بروجرامر !!!
    طيب ده احنا كدة زملاء ولا ايه

    تحياتي

    ReplyDelete
  12. أختى الحبيبة
    كـل رمضان وانتى بخير وياااااارب يكون رمضان سعيد عليكى ويكون فيه الخير كله يااااااارب آمـــــــين

    ReplyDelete

  13. Big Code
    اهلا بيك انا او ل مرة اخد بالى من موضوع الفراعنه ده فعلا ده ايه الحزن ده هههههههه بس هما كانو بيعتقدو ان الحياة كلها اخره ومع ذلك كانو بيجهزولها كل الى يريحمه ويستمتعو بيه وده الى بنلاقيه فى المقابر

    وبالنسبة لموضوع البروجرام فانا مازلت احاول ههههههههه انى ابقا بروجرامر واستنجت من اسم البلوج بتاعك انك بروجرمر بردو :)

    ReplyDelete
  14. امانى بخخخخخخخ
    هههههههه كل سنة وانتى بخير ورمضان سعيد عليكى يارب يكرمك ويتقبل منك ويثبتك

    ReplyDelete
  15. السلام عليكم ورحمة الله وبركاتة

    كل عام وانت بخير

    غفر الله لنا ولك فى رمضان

    و ثبتنا على الخير بعد رمضان

    ReplyDelete
  16. كل عام وانت بخير :)

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore