أنا والشنطة

السلام عليكم ازيكم كلكم

وحشتونى جدا جدا جدا وحشنى رغى زمان ع الرغم ان شهر رمضان عدى بسرعه لكن حاسه انه كان مش شهر بس يمكن لانى عملت حاجات كتيرة فيه الحمدلله حاجات جديدة عملتها وحاجات قديمة واظبت عليها وحاجات كان نفسى اعملها وقعت منى وحاجات قصرت فيها فى الاخر وحاجت مكنتش بعملها عملتها للاسف!

الطبيعى محدش بيعمل كل حاجة الحمدلله على كل حال ربنا يتقبل منا ويهدينا ويثبتنا

الشهر تمحور عندى فى شنطة رمضان وجمعيه رساله والتدريب العملى هحكى كل حاجة فى مرة انهاردة هخصص كلامى عن تجربتى مع شنطة رمضان

الحمدلله ع استخدام ربنا ليا فى العمل ده دى تالت سنة اشارك فى مشروع شنطة رمضان

أول سنة

كانت من 3 سنين واحدة صحبتى كلمتنى وادتنى فكرة ع المشروع وعملناها عندنا فى بلدنا وكان عددنا قليل جدا وكنا بنروح فى بيت واحدة صحبتنا ونكيس وكان جو جميل جدا وكل واحد بقا يحاول يلم تبرعات من اهله واصحابه ع قد مايقدر واهو ايد ع ايد .


كان اول مرة اشترك فى حاجة زى دى بقيت اسأل ماما وخالتى عن الناس الى يعرفوهم محتاجين عشان اوديلهم شنط ولاول مرة فى حياتى كنت بقوم بالمغامرة دى فى الاول ببقا مترددة شوية محروجة ممكن بس مجرد انى رحت ووديت الشنطة وتشوف شكر الناس ليك فى عنيهم وفرحتهم بتحس بكمية سعادة ملهاش حل تخليك متحمس اكتر انك تلم فلوس اكتر وتوزع شنط اكتر وتحس بنعمه ربنا عليك الى انت مش واخد بالك منها مع انها قدامك كل يوم طول اليوم وهو الاكل خصوصا التلاجة تفتحها بتلاقى فيها حاجة تتاكل غيرك مش لاقى حاجة خالص بس لاننا اتعودنا ع الاكل ومتعودناش نفكر ايه حالنا لو مكنش عندنا الاكل ده ؟؟لدرجة اننا بننسى نقول دعاء الطعام اللهم بارك لنا فيما رزقتنااو حتى نقول الحمدلله الذى اطعمنا بعد مانخلص اكل لان مفيش تفكر فمفيش شكر نعمه

واحساسات تانية جميله بتتحس بس متقدرش تقولها

تانى سنة

الحمدلله ربنا انعم عليا بنعمه الاستخدام واشتركت تانى فى شنطة رمضان فى مكانين فريقى فى مدينتى وفريقى فى كليه هندسه يعنى كنت مبسوطة جدا لانى بحاول اجمع ثواب من كل مكان واحد بالمجهود والتانى بالمجهود والمساهمه والتوزيع حسب الاولى فى الاحتياج طبعا

الجديد بقا انى اكتسبت خبرة شوية وبقيت بلم فلوس اكتر وبقيت بحاول اتغلب ع احراجى إنى أطلب من قرايبى او اصحابى وبقول مش خسرانه كله بثوابه لان فى ناس ردود فعلها رخمه الى يقولك ياعم احنا الى عايزين شنطة والى يحسسنى انى بشحت منه ووو بس الحمدلله عندى لسان شغال وبعرف ارد :)

الجديد بقا فى الوقت ده اننا عشان نعرف الاولوية للناس بقينا نعمل استكشاف لكل أسرة يعنى كل حد بيجيب اسر معينه يروح يزورهم يعرف ظروفهم بياكلو منين عايشين ازاى عشان تعرف الاحوج وده كان داخل انشطة تانية لاننا كنا بنودى أدوية وملابس غير الشنطة

بردو الواحد كان بيبقا متردد انه ينزل أسرة ويقولهم ظروفكم ايه والكلام ده كنت بفكر اننا كده بنحرجهم ،

وفين وفين ع ماخدت الخطوة انى اروح لاسرة ولقيت ان الناس دى بتبقا مبسوطة ان حد بيسأل عليهم وبيبقا نفسهم تساعدهم بأى حاجة انشاله ازازة الدوه الى بيحتاجها ده غير انى اكتشفت انهم يعتبرو فى دنيا منعزله

يعنى تخيل معايا اما يكون حد حياته كلها فى أوضه بس فيها سرير وكنبة وحمام !!!!

فى ناس أفقر مما تخيلو احنا بجد مرفهين فى ناس زعلانه عشان موبيلها 3310 والى حياتها جحيم عشان مش عارفه تشترى كام طقم جديد والى مخنوق عشان مطلعش رحله ،

وناس معاشها ممكن يكون 50 جنيه فى الشهر فيه كهربا ومايه وايجار الاوضه او المكان وتلاقى عندهم أمراض الدنيا بجد بجد الحمدلله الحمدلله الحمدلله،

فعلا صدق الرسول لما أمرنا اننا ننظر للى أقل مننا مكانة فى الدنيا .

طبعا كان رمضان جميل جدا وقتها ودينا شنط وهدوم وأدوية وكمان حكك يوم الوقفه فعلا احساس جميل اما تبقا سبب فى سعادة شخص كان شايل هم اكله او علاجه او هدوم لعياله

تالت سنة

الحمدلله اشتغلت بردو فيها وفى مكانين زى السنة الى فاتت فى كليه هندسه وجو الشغل هناك بيبقا ارئع ملوش حل مكان كبير كله شنط ونناس ومكرونة وزيت ورز وتمر وناس بتشيل وناس بتكيس ربنا يجازيهم خير يارب

وفى مدينتى بنتجمع بردو فى بيت بنات اصحابنا وكل واحد بيحاول يلم ع قد مايقدر ونساعد كلنا

بس للاسف انى انشغلت عنهم فى نصف الشهر سوية لان الدراسة جت وقعت منى شوية بس الحمدلله إنى متحرمتش من لذة العمل لله ومن الثواب الى لا يحصى من كل حاجة بعملها سواء مشوار او كلمه لشخص يتبرع او انى اكيس او اوزع او اشيل او اى شىء ساهمت فيه ولو بجزء صغير كان نيتى فيه ابتغاء لوجه الله والثواب ولان الحسنات يذهبن السيئات

ده غير ان مجهودى فيها كان صدقه عن صحتى

ولأن قضاء حاجة مسلم نوع من الصدقة وأحب إلى الله

دى مجموعه صور صغيرة لشغلنا فى الشنطة فى كليه هندسه المنصورة

دى صور لشكاير المكرونة السايبه بنفتحها وبنكيس كل كيلو لوحده


ودى ساعه التكييس للتمر والمكرونة والرز وكله

ودى الحاجات المتكيسة رز ومكرونة

ودى صور للشنط جاهزة

أجمل شىء فده كله نعمه الاستخدام الشنطة دى كده كده هتروح للشخص الى ريحاله بيك او من غيرك فكون ان ربنا يستخدمك انت الى تساهم فيها او توديها فدى نعمه جميله جدا جدا ناس كتير اتحرمو منها او اتحرمو انهم يحسوها

ربينا يجازى كل من ساهم فى شنطة رمضان فى كل مكان سواء بتببرع او بدعايه او بمجهود

وربنا يذيقكم نعمه الاستخدام والاحساس بالفقير وحب العمل لله ودى نعمه لا تقدر بثمن

كفاية ان انسانيتك بتزيد لانك ع الاقل بتساعد أخيك

وفعلا لو كل واحد ادى حق الزكاة والصدقة مش هيبقا فى فقر زى ماموجود دلوقتى كدا

واجما حاجة الصحبه الصالحه اصحابى الى اغلبهم مش بشوفهم غير فى العمل ده بحب كل واحدة فيهم حب لله

ربنا يكرمهم ويخليهم ليا خصوصا هـــــدى المعروفة بزورة هانم شفتى مردتش اقول روبى هههههه

اللهم استخدمنا ولا تستبدلنا

*.*HoNdA*.*

21 comments:

  1. ربنا يوفقكم لكل خير ان شاء الله
    ونتمنى ان مجهوداتكم دى تستمر لبعد رمضان

    ReplyDelete

  2. ما شاء الله يا هوندا
    بجد بارك الله فيكم يا بنتي ,, وجزاكم كل خير عن كا مجهود اي حد بيعمله لوجه الله
    نفسي فعلا اشارك بحاجة زي كدة ...

    عجبتني اوي جملتك
    "أجمل شىء فده كله نعمه الاستخدام الشنطة دى كده كده هتروح للشخص الى ريحاله بيك او من غيرك"

    وكمان قدرتك على الرد على اي حد بيستهزئ باللي بتعملوه ..أعتقد ان في ناس مش متعودة على الفكرة نفسها

    احنا محتاجين لنشر ثقافة العطاء والتطوع في مجتمعاتنا .. علشان تبطل الناس تستغرب ..

    انتو كدة طبقتوا مبدأ التكافل الاجتماعي عملي .. مش بس بكلام وتنظير :)

    كامل احترامي وتقديري :)
    وكل سنة وانتو طيبين

    ReplyDelete

  3. الباحث عن الحقيقة
    جزاكم الله خيرا ولك مثله
    احنا بنحاول ع قدنا بعد رمضان لان احنا يادوب بنلم فلوس م الناس فى رمضان مش كلهم بيداوموش قليل بيداوم ربنا يعينا واما نبقا حاجة نقدر نساهم بجزء اكبر من مالنا الخاص

    ReplyDelete

  4. عـلا - من غـزة
    ازيك ياعلا وحشتينى جدا منورانا
    وجزاكم مثله وربنا يبارك فيكى ويدوقك حلاوة العمل ده

    وفعلا رد فعل الناس ناتج ان مفيش ايجابيخ واننا بنحب نتكلم كتييييير لكن ساعه الفعل كل واحد يقول مليش دعوه ويستخسر ع الرغم اننا مهما عملنا مش هنوفى بحق ربنا
    احنا فى حاجة لكل ثواب

    كل سنة وانتى بخير :)

    ReplyDelete

  5. ربنا يكرمك ويزودك دائما من خيره

    الي انتي بتعمليه ده ليه ثواب كبير جدا عند ربنا

    ربنا يوفقق

    ReplyDelete
  6. امين يا رب و بعودة الايام و دايما مشتركين في الخير


    تحياتي

    ReplyDelete
  7. ربنا يوفقكم جميعا يارب ويجعله فى ميزان حسنتكم ان شاء الله ودائما مجموعين على فعل الخير ان شاء الله

    ReplyDelete
  8. محمود علي
    امين يارب ولك مثله ربنا يتقبل منا ومنكم


    Sampateek
    ربنا يكرمك ومتشكرة جدا نورتى :)


    رئيس جمهوريه نفسى
    امين ولك مثله ان شاء الله

    ReplyDelete
  9. ربنا يبارك فيكم وفي أعمالكم
    ودايما كده سابقين الى الخيرات
    وكل سنه وانتي طيبه

    ReplyDelete
  10. تعيشى و تفتكرى

    هههههههههههههه

    كل سنه و كل رمضان و الشنطه امكانياتها تزيد والخير يفيض

    ReplyDelete
  11. الله يبارك لك
    جعلة الله فى ميزان اعمالكم

    حقيقى جميل اوى
    ماشاء الله


    تحياتى

    ReplyDelete
  12. ربنا يجعله في ميزان حسناتك يا رب
    و جزاك الله خيرا على انك بتنشري الفكرة
    و خصوصا ان الناس دي محتاجة الخير في السنة كلها مش في رمضان بس ...
    و فعلا هوو احساس جميل ان ربنا يستخدمك في الخير ده
    ربنا يوفقك يا رب و يقدرك على الخير و على انك تهدي الناس ليه

    تحياتي يا اجمل هوندا

    ReplyDelete
  13. The regime of Mubarak and his minions is every day to transgress human rights. More than 10,000 Sudanese refugees are arrested and more than 100 have been killed.
    Illustrative of the world arrogance and the atrocities committed against the Sudanese refugees by this criminal regime of Mubarak.

    ReplyDelete
  14. ربنا يرزقكم الاجر ويتقبل منكم

    ويعيد عليكم الايام الجميلة دي والذكريات دي سنين وسنين


    انا بحب اوي الدعاء اللي ختمتي بيه بوستك
    اللهم استخدمنا تستبدلنا

    فعلا استخدام ربنا لينا دي نعمة كبيرة اوووي
    ربنا يحفظ علينا النعمة دي

    تقبل الله منا ومنكم


    دمتم بود
    تحياتي

    ReplyDelete
  15. جزاكى الله خيرا يا رب وتقبل منكم و منا صالح أعمالنا وتجاوز عن هفواتنا يا رب
    ربنا يكرمك ويجازيكى خير على نيتك يا رب
    جميله جدا الافكار والشغل بتاع جمعيه رساله
    ربنا يكرم الجميع يا رب

    ReplyDelete
  16. أوشــــــه

    ربنا يبارك فيكى وكل سنة وانتى بخير

    ********
    3ashe2elro7

    ازيك ياعاشق كل سنة وانت بخير افتكر ايه هو ماضى وراح ياسيدى بتكلم ع وقائع تفاااااااائل ياأخى ربنا يزبد زيبارك قول امين

    ReplyDelete
  17. Ahmed Al-Sabbagh
    وجزاكم مثله ربنا يكرمك

    ******
    الحلم العربي

    باشا ازيك يابت وحشانى هههههههه
    بجد انا نفسى ان مشروع الشنطة يفضل طول السنة هتبقا حاجة جميله جدا ربنا يهدينا ويقدرنا اننا نعرف نعمل حاجة زى كده

    ReplyDelete
  18. حلم الحرية
    امين ربنا يتقبل منا ومنكم فعلا الاستخدام اجمل نعمه ربنا بيديهالنا ربنا يدومها علينا نعمه ونقدرها

    *******
    Dr.Diamond86
    وجزاكم مثله تقبل الله منا ومنكم :)

    ReplyDelete
  19. ربنا معاكوا السنة الجاية
    وربنا يقدر الجميع يعمل خير

    ReplyDelete
  20. بارك الله فيكي ...
    مجهود جميل ...ربنا يرزقك الدوام كل عام و يكون خالص لوجه الله ....

    ReplyDelete
  21. الأستاذ
    اهلا بيك

    ***********
    Ahmed Essawy
    ربنا يكرمك ويبارك فيك ويسمع منك قول امين :)

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore