هتروح من ربنا فيييييين


من أسوء المواقف الى ممكن نمر بيها هو انك تتظلم،
والاسوء من ده الشعور المصاحب للموقف نفسه الاحساس بالظلم ،بتحس بحرقة فى قلبك ونار واحساس شبيه بالعجز لانك مش قادر تعمل حاجة.

ع قد ما الجو العام رخم وخنيق الا ان الواحد بيحاول يصبر نفسه ويتفائل عشان يقدر يكمل وميكرهش نفسه ولا يكره الحياة ولا يتعقد م البشر، ولان الحياة مبتقفش عند تجربة بس .

وده ممكن يتلخص فى حاجتين :

الحاجة الأولى :الشعور بنعمه العدل والحمدلله انى مش الشخص الى ظلمنى ،
الناس ممكن تسامحك ع غلطة لكن انت عمرك مهتسامح نفسك.

الحاجة التانية: الثقة فى الله وان ربنا بيحب العدل ومحدش حقه بيضيع والاجمل من ده ان دعوة المظلوم مستجابة ده سبب كافى ان الواحد فى المواقف الى زى دى ميقلش غير حسبى الله ونعم الوكيل ويقعد مرتاح لانه واثق ان ربنا هيديله حقه
ويزعل ع الشخص الظالم ده لأنه فى غفله ويزعل عليه اكتر من الى ربنا هيعمله فيه لأن زى ماقلت

"دعوة المظلوم مستجابة ، وكله سلف وديييييين"

وديما افتكر فى الموضوع ده قصة سمعتها من أحد الشيوخ عن إمرأة ظلمت عبد عندها دعا الله،

ربنا ابتلاها انها تصحى بليل تعوى زى الذئاب وكان الحل للمشكله دى انهم يكوا رأسها بالنار
أعاذنا الله وإياكم

ربنا يرزقنا بنعمة العدل ع قد مانقدر وفايدة الاحساس بالظلم اننا بنحس بأى مظلوم ونحاول نساعدة ونكون إيجابين اذا كان فى إمكانا طبعا.

*.*HoNdA*.*

20 comments:

  1. الظالم والمظلوم


    تراجيديا الابديه

    هو ده الوصف الحقيقى ليها

    دايما الظالم والمظلم موجودين

    بس الحق دايما بيكون فى صف المظلم حتى لو طال الزمن والظلم

    ReplyDelete
  2. samo
    اهلا بيك
    مش عارفه انا مبحبش كلمة تراجيديا بحس فيها بنوع من التمثيل
    بس ع اى حال زى مانت قلت انه كدا او كدا الاتنين موجودين فى الحياة وطبعا الحق الى بينتصر لسبب واحد ان ربنا حرم الظلم ع نفسه

    ReplyDelete
  3. معلش يا هوندا
    بجد يمكن خير
    ربنا مش بينسى حد ومش بيحب الظلم
    يمكن الظلم دا خير ليك عشان يوجهك لطريق تاني افضل ليك
    وان شاء اله تشوفي الخير دا بعدين
    ثقي في الله وهوا يعينك
    وفعلا الحق دايما بيكون في صف المظلوم ولو طال الزمن

    ReplyDelete

  4. مش كل الناس بتفكر كده

    لو كل الناس فكرت في الظلم من المنظور ده الحياة هتختلف كتير

    المشكلة ان في ناس مظلومين كتير
    بيظلموا الناس الي اقل منهم
    وهكذا
    مش بيتعلموا من الظلم الي وقع عليهم

    ReplyDelete
  5. حد يطول يكون دعوته مستجابة
    يمكن دي الفرصة انك تدعي وربنا يقبل على طول

    ودايما افتركي الدعاء ده
    اللهم اجعلني مظلوما ولا تجعلني ظالما

    ReplyDelete
  6. heba
    نورتى ياهبة :)
    انا عندى ثقة طبعا فى الله ومتأكده انه خيييييييير ليا الحمدلله على أى حال

    ReplyDelete
  7. محمود علي
    هو ممكن مش كل الناس تكون بتفكر كده لانى زى ماقلت ان الظالم ده بيكون فى غفلة
    ربنا يعيينا ويبعدنا عن الظلم
    الواحد لازم يحط ربنا قدامه ويحاول يفكر بس بلى المفروض يعمله وبحق الناس عليه

    ReplyDelete
  8. HaTiM SuM
    ده ايه النور الى بيشع عندى فى امدونة حاتم هنا يادى الهنا يادى الهنا :)
    انا طبعا مطولش ان دعائى يستجاب وانتهزت الفرصة ودعييييييييييييت

    انا عجبنى الدعاء الى انت كتبه جميل اوى
    اللهم اجعلنى مظلوما ولا تجعلنى ظالما

    ReplyDelete
  9. ربنا ينصرك على الظالم و يعزك
    و متقلقيش طول مانتي علاقتك قوية مع ربنا

    ReplyDelete
  10. هوندا حبيبتى
    وحشانى جداا اولا
    ثانيامتزعليش و باذن الله ربنا هينصرك على كل ظالم
    لا تحزن ان الله معنا

    ReplyDelete
  11. مش عارف بس انا حاس ان الصراع بين الظالم والاقل ظلما

    ReplyDelete
  12. الظلم والقهر اسوأ حاجة ممكن تحصل للانسان في حياته...وللاسف مش دايما المظلوم بياخد حقه...احياني كتيرة حقه بيضيع

    ربنا يكفينا شر الظلم والظالمين

    ReplyDelete
  13. ساعات لما الواحد يتظلم احس ان احسن حاجة هي انه حتى لو ما خدش حقه في الدنيا فعنده يوم القيامة
    احسن حاجه ان كل واحد هيتحاسب على اللي عمله ربنا يبعد عنا الظلم
    بس قوليلي من اللي ظلمك وانا اخد حقك ..ولا يهمك يا جميل...

    ReplyDelete
  14. LiNuXaWy
    متشكرة جدا يااحمد لمساندتك ليا
    وربنا يهدينى ويهدينا جميعا

    ***********
    يمنى
    ازيك يايويو وانتى كمان وحشانى جدا
    الحمدلله على كل شىء وانا مش زعلانه :)

    ReplyDelete
  15. حقى اهرتل
    يعنى ايه مش فاهمه؟؟

    **********
    Marvel

    ممكن الواحد فعلا مايخدش حقه فى الدنيا بس الاكيد انه بياخده فى الاخره
    اللهم امين

    ReplyDelete
  16. الكومنت دا انا كنت كاتبو عند واحد تاني ..كان بسبب الضغوط النفسيه .. و لكلن انا غيرت فيه شويه علشان يناسب الموضوع هنا ....
    اولا :
    انا حقول شويه كلام

    الكلام وجهه نظر شخصيه يحتمل الصواب و الخطأ .

    اولا الظلم انا شايفو انه احد انوع البلاء علي الانسان.
    علشان كدا و انا بتكلم بدلل ما حقول ظلم حقول البلاء


    ثانيا

    ومش معني وجود البلاء او المرض علي فرد في الدنيا ان الله لا يحبه ؛ بل علي النقيض تماما ....فالله سبحانه و تعالي من الممكن انه يكون عامل كدا لتكفير ذنب عن فلان .
    قال تعالى: (وَمَا أَصَابَكُمْ مِنْ مُصِيبَةٍ فَبِمَا كَسَبَتْ أَيْدِيكُمْ وَيَعْفُو عَنْ كَثِيرٍ) [الشورى:30].
    فالبلاء لتطهير النفس و القلوب الي بنعمله .

    ثالثا

    و قال تعالى: (الم أَحَسِبَ النَّاسُ أَنْ يُتْرَكُوا أَنْ يَقُولُوا آمَنَّا وَهُمْ لا يُفْتَنُونَ) [العنكبوت:1-2].
    و الايه دي بتدل ان ان البلاء او يكون اختبار من الله علشان يميز درجه ايمان كل فرد ؛ فالايمان درجات .
    !!!

    رابعا

    في الحديث الشريف للرسول صلي الله عليه و سلم "أشد الناس بلاء الأنبياء، ثم الصالحون، ثم الأمثل فالأمثل، يبتلى الرجل على حسب دينه، فإن كان في دينه صلباً اشتد به بلاؤه، وإن كان في دينه رقة ابتلي على قدر دينه، فما يبرح البلاء بالعبد حتى يتركه يمشي على الأرض وما عليه خطيئة" أخرجه الإمام أحمد وغيره، وصححه الألباني.
    اظن معناه واضح و لا و مفيهوش غموض . فان الابتلاء علي قدر الايمان . فالله يحب صوت العبد المؤمن التقي النقي و يسمعه و هو ينادي ربه فيباهي الله سبحانه وتعالى به الملائكه . ليظهر عظمه الخلق انا يعني المخيرين امام الملائكه المسيرين .

    خامسا

    قال رسول الله صلى الله عليه وسلم: "عجبا لأمر المؤمن إن أمره كله خير، إن أصابته سراء شكر، فكان خيرا له، وإن أصابته ضراء صبر، فكان خيراً له"
    هكذا تري ان كل شئ مقدر الانسان هو خير له . المصيبه خير له . البلاء خير له . كل شئ حتي العباده و الشكر .
    فأهم شئ يميز الانسان و يظهر مدي ايمانه و مدي ارتباطه بربه ؛ يظهر قد ايه الواحد فينا راضي بقضاء ربنا هو
    الصبر و الشكر
    ففي الصبر و الشكر علاج نفسي رهيب ينقي و يطهر الانسان من كل ضر و فاسد تتسامي فيه علاقه الخلق بالخالق .

    العلاج

    قال تعالى: (وَأَيُّوبَ إِذْ نَادَى رَبَّهُ أَنِّي مَسَّنِيَ الضُّرُّ وَأَنْتَ أَرْحَمُ الرَّاحِمِينَ) [الأنبياء:83].
    هكذا تري سيدنا ايوب الذي ابتلي بما لا يطيقه بشر و لرغم ذلك لم يزيد سيدنا ايوب الا الدعاء و التضرع لله لم يقوم كما يفعل البعض هذه الايام بالعصيان و الاعتراض و التمرد .

    وقال عز وجل: (وَذَا النُّونِ إِذْ ذَهَبَ مُغَاضِباً فَظَنَّ أَنْ لَنْ نَقْدِرَ عَلَيْهِ فَنَادَى فِي الظُّلُمَاتِ أَنْ لا إِلَهَ إِلَّا أَنْتَ سُبْحَانَكَ إِنِّي كُنْتُ مِنَ الظَّالِمِينَ) [الأنبياء:87].
    سيدنا يونس الذي لم يقنط من رحمه الله دعي ربه في الظلمات ..... هو في لحظات يائسه وممزوجه بإحباط لم ينسي الخلاق .

    وقال تعالى: (وَزَكَرِيَّا إِذْ نَادَى رَبَّهُ رَبِّ لا تَذَرْنِي فَرْداً وَأَنْتَ خَيْرُ الْوَارِثِينَ) [الأنبياء:89].
    و سيدنا زكريا الذي رزقه بامرأه الله عاقر لا تلد و قد جار عليه شيبه . لم ييئس من مناجاه الله في لحظات كما نسميها في عصرنا المستحيل . هكذا كانت الاخلاق و هذه هي القدوه الحسنه فلا مستحيل علي الله .... حتي و ان كنت ترى ذلك ....ادعي ربك بما تشاء و وقت ما تشاء و اينما تشاء فمن غيره يسمعك و هو مجيب الدعاء ؛ من الذي انقذ الرسول اذا هما (ابي بكر رضي الله عنه) في الغار !!!!!!!!!!!

    النهايه الدعاء و الصبر و الشكر:

    قال شيخ الإسلام ابن تيمية: الدعاء سبب يدفع البلاء، فإذا كان أقوى منه دفعه، وإذا كان سبب البلاء أقوى لم يدفعه، لكن يخففه ويضعفه.

    انا حاسس اني كتبت كتير
    اسف علي الاطاله
    :D

    ReplyDelete
  17. الظلم ظلمة

    الظلم ظلام اسود
    علشان كدة ربنا حرم الظلم
    تعرفى يا هوندا
    انا اتعرضت لظلم اكثر من مرة
    لكن كنت ادعى الله الجبار فيجبر خاطرى و ينصرنى على من ظلمنى

    ReplyDelete
  18. بنت مصر
    عجبنى تفكيرك لأن دى الحقيقة فعلا الى مش هياخد حقه دلوقتى هياخده يوم القيامة
    وشكرا ع العرض المغرى ده عيينك للتقيل ههههه

    ReplyDelete
  19. Ahmed Essawy
    انا فعلا عاجزة عن الكلام بعد الى نت قلتله
    وفعلا ان حسيت ان الخلاطة فى الجملة الى انت كتبتها دى
    الدعاء و الصبر و الشكر والواحد بيحاول يثبت المفاهيم دى لانها اوقات بتكون موجودة بس مش بنفتكرها وبنحتاج نذكر نفسنا
    متشكرة جدا ربنا يجزيك خير

    ReplyDelete
  20. امل صبحى محمد
    فعلا الظلم ظلمة لانه ناتج عن غفله
    ربنا يجبر بخواطرنا

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore