متبقاش بخييل مع الناس



من الأشياء الجميلة انك تكون سبب فى سعادة شخص ،بأى شكل من الأشكال،
حتى لو يوم لو ساعه لو أى حاجة .

طالما تقدر تعمل كده ليه تتأخر ؟
فى حاجات بسيطة اوى ممكن نعملها من وجهة نظرنا شايفينها عادية لكن من وجهة نظر الشخص الى محتاجها ممكن تكون حاجة كبيرة اوى ممكن تبقا سبب سعادة ليه او تحمسه او تخليه ياخد خطوة لقدام او تزود ثقته فى نفسه او يحس ان فى حد بيحبه ومهتم بيه.

اما تخصص يوم ف الاسبوع ، فى الشهر لحد بيحبك سواء كان صديق زميل أخ قريب
وتخرج معاه وتروحو تاكلو فى اى حتة حتى لو محل فول وطعميه
:D

وبعدين تتمشو شوية فى الشوارع وياحبذا لو يوم خميس هتروح مبسوط عشان انت اتنفست شوية وعشان الى كان معاك اتبسط بردو.

العلاقات الانسانية أغلبها بيبوظ لاننا مبنهتمش بيها ولا ازاى نقويها فى ناس كتير بنخسرها مع إننا بنحبهم وفى ناس وقت مانفتكر اننا محتاجين نشوفهم ونفضفض معاهم منعرفش نوصلهم.

عايزين نحاول نستفيد من الوقت ونستغل كل ثانية ممكنة . هدية بسيطة لحد قريب منك فى أى مناسبة او من غيرها حاجة جميله. مكالمة صغيرة بردو بنسأل على اى حد هتسبب سعادة للشخص ده. لو رساله بردو فيها ازيييييك وحشتينى يابت عامله ايه يانيله انتى نفسى اشوف خلقتك البهية دى ابقى عبرينى ونتفق نتقابل حاجة كدا يعنى :)

المهم اما تحس بحاجة اعملها حد وحشك كلمة حد بتحبه قوله وخليك دايما الى بتبدأ طالما قادر لأن فى ناس مشغوله ممكن تكون تعبانة نفسيتها مش متظبطه فبلاش نحاسب الناس من خلال تفكيرنا احنا ونحاول نحط نفسنا مكانهم وديما حاول تعرف السبب قبل ماتعاتب.

الحب ده إحساس جميل اما تحسه من ناس حاواليك او تحسه لناس حواليك بردو دى الطبيعه الإنسانية

اكتر 3 حاجات ديما فى دماغى وبحاو أعملهم ع قد ماقدر:

-كلمة لإبرهيم الفقى كان بيقول انك اما تبقا سبب فى سعادة شخص بيجيلك طاقة سعادة كبيرة عشان الشخص ده فرحان اكتر مايكون هو الى عمل معاك الحاجة دى وفعلا أن حسيتها كتير

-حديث للرسول صلى الله عليه وسلم :"تهادو تحابوا".

-حديث تانى مش فاكرة نصه ان كان فى واحد بيقول للرسول إنى أحب هذا الرجل
فقال :أبلغته؟
قال: لا
قال: أذهب وبلغه.

فبلاش نبخل على بعض بالمشاعر الناس مش محتاجة مننا فلوس ولا أكل عايزينك بس تسأل عليهم تحسسهم بقيمتهم حاجات معنوية اكتر ماهى مادية. يعنى الحياة مش مستهلة اننا نقضيها زعل وقمص وخصام يلا كله يكلمنى بقا ويبعتلى رسايل ههههههههه


*.*HoNdA*.*

22 comments:

  1. اول كومنت
    للاسف فى زحمه الدنيا وضغيان اماده نسينا حجات كتير وقعت مننا رغم انها سهله منها حديث الرسول صلم
    تبسمك فى وجه اخيك صدقه
    مجرد ابتسامه لا اكتر ولا ااقل صدقى بس للاسف نسينا الابتسام وبقيت التكشيره هى الاساس

    ReplyDelete
  2. يوم الخميس لأصحابي الا اذا عيان

    ReplyDelete
  3. رئيس جمهوريه نفسى
    فعلا زحمة الدنيا هيا الى لبختنا
    وفعلا الابتساكة حاجة بسيطة جدا بس تأثيرها فعال جداا
    ده غير انه بيضفى جمال على الشخص المبتسم وجاذبية من نوع خاص
    :)

    ReplyDelete
  4. Mohamed_sobhy84
    حلوة اوى التقسيمة دى
    :)

    ReplyDelete
  5. أول شيء سمعه عبد الله بن سلام من النبي صلى الله عليه وسلم حين هاجر النبي إليها
    يا ايها الناس اطعموا الطعام وافشوا السلام وصلوا الارحام وصلوا بالليل والناس نيام تدخلوا الجنة بسلام

    ReplyDelete
  6. بجد بجد
    جزاكى الله الف خيررررررررررررر
    وحشتينى

    ReplyDelete
  7. Ahmed Essawy
    جزاكم الله خيرا ربنا يقدرنا فعلا ونقدر نعمل كده ونبقا قدوة للناس بعملنا

    ReplyDelete
  8. رينـــــــــــا
    وجزاكى مثله :)
    انتى كمان وحشتينى جدا جدا يارب تكونى بخير

    ReplyDelete
  9. انتي فعلا حد كويس انك تفكرينا بالحاجات دي اللي ممكن نكون عارفينها وللاسف مشغولين بالدنيا عنها
    جزاكي الله خيرا

    ReplyDelete
  10. ولــــــــــو
    متشكرة جدا انا بردو مش كفاءة يعنى كلنا بنحاول نذكر بعض كلنا
    وجزاكم مثله

    ReplyDelete
  11. تعرفي ان في حاجة غريبة جدا مفارقة عجيبة في نفس الوقت
    فمن المعروف عن الشعب المصري انه شعب ودود وحبوب ومليان حب وحاجات كده
    وحتى لما تشوفي اي برنامج من اللي بيعملو حوارات سريعة مع السياح والمذيع يسأل السايح عن رأيه في المصريين أول كلمة تطلع منه تلاقيها
    فري كايند بيبول
    :D
    وتيجي بقى تبصي بمنظار كده على اللي بين المصريين بالفعل تلاقي عكس كده خالص
    ووطبعا إلا من رحم ربي لأن الحمد لله بردو في ناس كويسين
    لكن مش ننمر ابدا انهم قلة

    واللي قلتيه ف البوست ده من ضمن الحاجات اللي احنا معروفين بيها ولكنها ف الحقيقة مش موجودة بكثرة بيننا
    وهي دي المفارقة

    تحيتي ليكي
    ----------

    صحيح مش ناوية ترحمي الكمبيوتر اللي ف الصورة بتاعتك دي؟
    :D

    ReplyDelete
  12. فبلاش نبخل على بعض بالمشاعر الناس مش محتاجة مننا فلوس ولا أكل عايزينك بس تسأل عليهم تحسسهم بقيمتهم حاجات معنوية اكتر ماهى مادية.


    لا فض فوكي يا أم اسماااعيييييييل
    والله يا بنتي انتي دماغ والله
    بستغرب انك كده وانتي برج الجدي
    ههههههههههههههههه

    ربنا يخليك ليا يا واد
    عشان كده جبتلي هديه كتاب الراجل الارهابي ده ؟؟
    ياااااه للدرجه دي بتحبني ؟
    بموت ف شكل أهلك
    بكرهك

    ReplyDelete
  13. لا بجد كلامك جميل
    وعندك حق
    أنا هحاول أطبق كدة
    أنا أول زيارة ليكى فى مدونتك
    لأنى جديدة فى عالم المدونات
    بس بجد جميلة
    أتمنى تزورينى
    ويارب نبقى أصحاب

    ReplyDelete
  14. كلام جميل ...شكرا يا هوندا

    ReplyDelete
  15. آلام وآمال
    عجبتنى اوى المفارقه دى وانا متفقه معاك تماما انا عارفه ان التقصير فى التعامل بيكون غير مقصود والواحد بيتصدم لما حد يقله انت مش بتسأل عليا ومقصر معايا بس يمكن ده لاننا مش بنركز فى قيمة التواصل ومبنفكرش فيها وسيبينها مفتوحة جت عادى مجتش عادى انما اما تكون اولوية اعتقد انها هتبقا افضل وهتبقا الحياة لذيذة كمان :)
    -------
    بالنسبة للكمبيوتر فده جزاته انه بتاعى

    ReplyDelete
  16. ثورة
    ام زعبلة باشا منورة ياابلتشى احم احم هنلم الدور عشان الاجانب

    تعرفى انا ببقا منشكحة اوى اما حد يقولى انى دماغ اما بالنسبة لبرج الجدى يافندم فهما تاج راسك وكل الى تعرفيهم منهم جامدين زى حالاتى فبطلى حقد سوية

    بالنوسبة للكتاب بقا فانا كنت عايزة اجيبهولك من زماااااااااان بس تقريبا طلع خسارة فيكى هعهعهعهعهع
    :P

    ReplyDelete
  17. مروة الزارع

    اهلا بيكى يامروة نورتينى ان شاء الله هزورك واعتبرينا بقينا اصحاب :)

    ReplyDelete
  18. the others

    العفو يافندم :)

    ReplyDelete
  19. كل سنه وانتى طيبه وربنا يجعله خير على المسلمين اجمع

    ReplyDelete
  20. كل سنة وانتى بخيييييير يانسرين

    ReplyDelete
  21. بالرغم من اني قريت البوست دا من مدة بس معرفش ليه حسيت اني عاوزة اقول كومنت النهاردة يمكن من تاثير موسيقى رافت الهجان اللي قاعدة اسمعها اليومين دول اللي خلتني اقعد افكر في الفرق بين ناس زمان على حسب الحكايات و على حسب ما كنت حاسة من عشر سنين ايام التسعينات هل فعلا الحال اتدهور بينا بجد و لا ايه بس دا اللي انا شايفاه و اللي كل الناس شايفاه كان زمان رغم انها كانت ايام حروب و كانت الحالة الاقتصادية مهببة كانت الناس مع بعضها كويسة امال ايه اللي جرالنا مينفعش نقول الزمن و كلام من دا على راي المثل نعيب زماننا و العيب فينا الفساد بقا منتشر زي الجراد بالظبط و لا يمكن عدوة بقا و لا ايه الله اعلم النفسيات بقت زي الزفت اي حد عارف حاجة زيادة يبقا عدو و ناس محطوطة في اماكن غلط على انهم رؤساء بالرغم من ان اللي تحتهم بيفهموا عنهم نقول ايه بس .....
    حسبي الله و نعم الوكيل اي حد يحاول انه يقول جديد اي فكرة جديدة اي مشروع جديد اي اختراع جديد يا عم روح اجري معدش فيه اي مجال لاي حاجة بس لازم يبقا فيه حل ياما هنبقا امة محكوم عليها بالانقراض ....
    انا عارفة انه فيه اكيد ناس كويسة في حديث الرسول عليه الصلاة و السلام الخير في امتي الى يوم القيامة بس حاسة انه السئ في كل حاجة بقا صوته اعلى السئ في كل المجالات حتى في الفن احنا في النازل في كل حاجة مش في الطالع بس هنحاول دايما و اكيد طول ما فيه ناس زيك يا نودا هيبقا فيه خير يللا صدعتك النهاردة :P
    سلام

    ReplyDelete
  22. monalisa
    سورى يامنمن شفت التعليق متأخر
    بس انا زيك مش عارفه ليه الاختلاف ده يمكن لان لغة المصلحة بقت هيا السائدة
    بس أى ان كان الى انا متأكده منه
    انه كما تدين تدان وان الخير هيفضل موجود
    :)
    المهم تكونى كويسة هتلاقى الكويسين

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore