ياحرقة دمى



شاميين ريحة الشياط ؟اصل انا بقالى اسبوع دمى محروق والحريقة مبتطفاش كل يوم بتتأجج :)


من اسبوعين كده ماما اديتنى مصارف الكلية عشان ادفعها بس انا كنت مستخسراها فى الكلية فكنت بكسل اروح ادفعها خصوصا ان الدفع فى الكلية القديمة فى مشعل وانا القسم بتاعى بيحضر فى بيطرى فى الثانوية ده غير انى اصلا مبرحش الكلية وكنت بروح الشغل فى الترعه يعنى م الاخر الموضوع فيه تاكسيات وانا بكسل اركب متفهومنيش صح انا الفلوس متهمنيييييش انا بس بزهق من كتر المواصلات
:D

المهم السبت الى فات بقا قررت اتهور واروح ادفع المصاريف عشان الكارنية يطلع قبل الامتحانات انت عارفين بقا الروطيييين
رحت الكلية دخلت على الشئون بعد مانطيت من فوق الحفرة اصلهم بيرممو الكلية لوووولى اصل كان طالعلها قرار ازاله من 14 سنة فقررو يزوقوها يمكن يجيلها عريس ولا حاجة

المهممممممم مش عارفه برغى كتير ليه انهاردة دخلت الاودة (الاوضة يعنى بس بدلع من نفسى )
رحت للابله الى مسئوله عن مصارف سنة تالتة فضلت واقفه قدامها دقيقتين كده بعدين بصلتى باشمئزاز وقالتلى :عايزة ايه
ابتسمتلها وقلتلها عايزة ادفع المصاريف انا تالتة حاسب
لقيتها بتقولى معاكى مادة!!!!

"اوباااااااا يظهر الكلام الى سمعته أول السنة طلع صح وقرار الى يشيل مادة يدفع 50 جنيه وصل الكلية عندنا عاااااااااااااااااااااااااا يادى النيلة كانو بيقولو من السنة الجاية وانا حتى عقدت العزم انى هموت نفسى عشان مطلعش بمادة تانى ملحقتش اتهنى بعقدة العزم :(

قلتلها: طب ممكن اتأكد بس إنى شايلة المادة
قالتلى :اسمك ايه
قلتلها :هناااااااادى
"ماهو الاحتياط واجب بردو يمكن غلطة وقعدت ادعى بينى وبين نفسى يااااااااااااااااارب خييييييييييييير الخير ليا يطلع وانا مش زعلانه لانه اكيييد خير"

طلعت الورقة وقعدت تدور هنادى هنادى هنادى ملقتش حاجة قلت يامسهل.

الا بقولك ياابله خدى شوفى الطرحة الى انا اشتريتهالك دى عجباكى ولا ايييه ايه ده دى مدندشة اوى يختى انا ملبسش الحاجات دى سبيها للينات هيهههييييه ليه ياابله فلانة دى شكلها حلو اوى والتطريز فيها مش كتير ده انا بلبس منها كتيير يختى انتى غيرى بقا بس انا معرفش البس الحاجات دى هنا يتدخل الاستاذ المبجل ويقولها ياشيخة انضفى شوية وغيرى النيولوك والكل يسخسخ

الكلام ده حصل فجأه وانا واقفه مذبهلة ولااااااااا كأنى واقفه اصلا بعد ماقتنعت بالطرحة المدندشة دى افتكرت ان فى جثه واقفه قدامها
قالتلى: اه صحيح انتى قلتيلى اسمك ايه
هنااااااااااااااااااااادى
طلعت ورقة تانية هنادى هنادى هنااااااااااااادى محمد مش ده اسمك
قلتلها: اااااااااااه اهىء اهىء
قالتلى :معاكى مادة من الترم التانى تصميم نظم وهتدفعيلها 50 جنية مع المصاريف
قلتلها :لااااااااا انا معملتش حسابى ومعييش غير ميتين خدى المصاريف وبعدين اجيبلك ال50 جنيه
قالتلى: خلاص بس لازم قبل الامتحانات هيا الترم التانى صحيح بس تدفعيها قبل امتحانات الترم الاول قلتلها ربنا يسهل

اديتنى ورقة المصاريف عشان اروح الخزنة وانا بغلى من جوايا، اليوم ده بس حسيت إنى معايا مادة وحسيت انها نقطة سودة فعلااااا اانا استاااااااااهل

فى طريقى من الاودة للخزنة بعد القفز من على معبر الحفرة الفاصلة بين الاودة والجهة المقابلة المتحوية على الخزنة، قعدت اتأمل وصل المصاريف الى معايا ياسلام

الاجمالى 163 جنية وربع بيعجبنى الدقة منهم 50 قرش تأمين على الطالب و50 قرش للمكتبة وجنية ونصف جنيه باين خدمات صحية ونيعم ،ودى كام دى 5 جنية مصارف اتحاد الطلبه دى ولا ايه وماله ميضرش وربع جنيييية كان لإية نسييييييت المهم 120 جنية خدمات طلابية واوووووووو انا محتاجة حد يفهمنى ايه هيا نوع الخدمات دى ياجدعان معلش ،هل ياترى الكتب ببلاش مثلا؟ لا لا واسعه دى الشتيات الى معاها سى دى وبندفعلها خمسة جنية غير مصاريف الكتاب مثلاا ؟ لااااااااا جهد الدكتور يابنتى ولا يكونش الكورسات الفزيييييييييعه الى بيعملوها لطلاب حاسب الى مثلاااااا ؟هو فى كورسات بتتعمل اصلن يبقا اكيد دى حق الشتيمة الى بناخدها من الدكاترة والمعيدين امال هيا بالساهل ايون هيا دى جامدة يابت ياهوندا.

ماعلينا انا دمى محروق اكتر على ال50 جنية دى يعنى فى ناس بتشيل مواد ظلم دول يدفعو فلوس ليه حرام يعنى ده غير ان المواد مقرفة اصلا مبعرفش اذاكرها فعلاا،وبعدين انا ايه ضمنى ان ده قرار حكومة معلش يعنى الواحد بيسمع طرطيش كلام كده مش ظريف فلازم نتأكد عشان حسن الظن بس.
وطبعن انا بشهامتى هدفع الفلوس من جيبى لانى مرة كنت بقول لماما انا لوبنتى الى شالت المادة اخليها هيا الى تدفع ال50 جنية وماما قلتلى جميييل محدش قال حاجة ادفعيها انتى يافالحة وبصراحة نا مرضاااااااش ان اهلى يدفعو تمن خيبتى ادفعها انا من مرتبى عشان اعرف قيمة الخيبة -الفلوس اقصد ييييييييه الماااااااادة اقصد
كله يذاكر بقا الموضوع بقا خطييييييييييير فعلاااااا المادة بخمسين جنية محدش عارف ايه الى هيحصل السنة الجاية استرها يارب

سؤال للتواصل هل فى حد اطبق عنده القرار ده غير جامعه المنزورة عفوا المنصورة؟؟

Blogged with Flock

26 comments:

  1. هييييييه اول واحدة

    استهدى بالله كدا

    طبعا انا معرفش القانون ده بس غريب اوى نظام بيعاقبوا الناس على السقوط يعنى و لا ايه


    معلش يا بنتى ادفعى الفلوس و امرك لله

    ReplyDelete
  2. في مصر القانون بيقول
    ادفع وبعد كده اشتكي
    امرك لله بقه

    ReplyDelete
  3. رداً على السؤال أيوااااااااان القرار ده موجود من ساعة مادخلت الكليه يعني من 2003 بس كانت الماده ب 25 جنيه بس لكن من 2007 بقت 50 جنيه للماده أصل أنا بعيد عنك :$ كنت بدفع كل سنه فلوس المواد اللي شايلاها
    فيه مثل شعبي بيقولك ايه: هو هيبقى مووت وخراب ديار

    ReplyDelete
  4. منهملله اللى كانوا السبب
    بس لازم تدفعى يا بنتى أحسن يشيلوا العده
    ههههههههههه
    ربنا يوفقك ويطلعك منها على خي
    تحياتىر

    ReplyDelete
  5. ازيك يابنتى
    والله انا كنت هتكلم على الموضوع ده جامعة المنصورة جامعة حرامية اساسا اعتقد انها اكتر جامعه معاها على قلبها فلوس اد كده
    كفاية كروت النتيجة دى شوفى كل واحد بيدفع اد اه مهو بيجيب النتيجة ليه ولا صحابه واللى مش طيقاهم بيدخله فى عشرة جنيه
    ثانيا القرار الغريب بتاع اللى يشيل مادة يدفع خمسين بس انا اساسا اتخرجت بس كان عاجبنى قرار بتاع خصم 50%على الكتب للى جايب امتياز وال25%على الجيد جدا كان زمانى لميت دهب دلوقتى يالا
    ده غير القرار الخطير الفظيع اللى شوهه كليتنا تخيلى حد عنده عقل يحط فى كليه علوم معهد حاسب مقلكيش بقي على الاشكال بنات بيئة جدا ولابسيت هدوم غريبة وولد يقرفوا حاجة تقرف معدتش كليتنا خلاص
    هو انت فى بيطرى ولا ايه

    ReplyDelete
  6. Ma -3lina
    ونعم بالله ياحبيبتشى

    هيا النقطة مش عقاب ياباشا انا خايفه لا السنة دى نصف الدفعه تشيل مواد عشان يلمو فلوس كتير
    انتى متعرفيش المصريين ولا اييييييييه
    هدفع بس اما يطلبوها منى رخامة بقا

    ReplyDelete

  7. Mask

    الشكوى للغير الله مذله ودول حد يعرف يقولهم بخ
    حسبى الله ونعم الوكيل

    **********
    كراكيب عادل

    ربنا يدينى طولة العمر وادفع :)

    ReplyDelete
  8. Rehab Mostafa
    ههههههههههه ماشاء الله واضح انك كفاءة زيىى كانت عندكم ب25 بس لان الحياة غليييت فنزلت عندنا مرة واحدة بخمسين جنيييييي
    فعلا انا قلت زيك كده موت وخراب ديار

    ReplyDelete
  9. الحلم العربى
    منهم لللللللللله هنعمل ايه محدش بيتعلم بالساهل ياحبيبتشى وماعلينا الا الدفع
    يابختك خلصتى

    ReplyDelete
  10. yasmine
    تصدقى بالله ياشيخة انا هطير من الفرح أول مرة اشوف واحدة من المنصورة على النت هعهعهعهع
    انا فى تربية نوعية بس القسم بتاعى بيحضر فى بيطرى وعلى فكرة عندنا اكاديمية تبع تربية نوعية بردو والى بيجو فيها بيييييييييييئه مقدرش اوصفلك
    بالنسبة لقرار الخصك ده فمش عندنا اصلا بتاع الى جايب امتياز والكلام ده هما فالحين يلمو فلوس بس

    ReplyDelete
  11. اه القرار مطبق فعلا
    ومنقدرش غير اننا نقول حسبنا الله ونعم الوكيل ههههههههههههه
    مش فاهم واحد سقط يدفع ليه هههههههههههه
    سبحان الله .. ويخلق مالااااااااتعلمون
    وانا زيك بردوا فى حتة الزهق من الكليه لان الكليات باقت مش كليات خلاص !! كله ماشى بشعار
    سمك لبن تمر هندىىىىىىى
    والكوسة كترت جدااااااا كمان
    صدق اللى قال
    لو نهر النيل صلصه .. مش هيكفى الكوسه اللى فى مصر ههههههههههههههههه

    ReplyDelete
  12. moataz
    الجملة دى ملهاش حل
    لو نهر النيل صلصه .. مش هيكفى الكوسه اللى فى مصر
    جاااااااامدة بجد ده الاساس رقم واحد عندنا فى الكلية اصلا
    هههههههههههههههه

    ReplyDelete
  13. على خمسين جنيه يا هنادي؟
    و النبي آجي عندكو و أسقط تلات سنين

    أنا في الكلية اللي أنا فيها لو فكرت إني أسقط هيدفعوني 60000 ع السنة

    تخيلي الضغط العصبي اللي أنا فيه مثلاً

    ReplyDelete
  14. محمد فوزي آل ربيع
    60000 ليه خير يعنى العلم بتاخدوه فى ازايز ولا ايه ههههههههه
    :D

    ReplyDelete
  15. عين شمس تجاره اطبق فيها
    بس انا فلت انا مخلص من سنتين باين
    بس معرفش الكلام ده يطبق في الدبلومه و لا لأ

    ReplyDelete
  16. معلش اصل انا مخلص جامعة من كام سنة كدة
    هو اللي بيشيل مواد اليومين دول بقى بيدفع فلوس؟!!!!
    طب ليه؟
    اشمعنى يعني؟
    الفلوس دي بتتحصل تحت اي مسمى
    بدل تربية مثلا...على اساس انهم بيربوا الطالب؟
    ولا تكلفة ورقة امتحان التخلفات ولا ايه؟
    عجبت لك يا زمن

    ReplyDelete
  17. ولا يهمك ..بس شدي حيلك السنة دي
    good luck

    ReplyDelete
  18. انتي من المنصورة كده و لا ايه
    اصل عندنا الثلاث مناطق دول زي الجيزة تمام
    مشعل و الترعة و الثانوية
    سلامتك من حرقة الدم
    دا الطبيعي يا فندم و الله
    خالص تحياتي

    ReplyDelete
  19. Mohamed_sobhy84
    بكرة يطبقو على الدبلومه هيصة بقا

    *********
    A.SAMIR
    والله أنا نفسى اعرف ونفسى حد فعلا يجاوبلى على السؤال ده

    ReplyDelete
  20. the others
    الشده على الله ادعىىىى

    *******
    موجة
    اه انا من المنصورة حضرتك :)
    هيا مصر كلها شوارعها واحدة

    ReplyDelete
  21. ياااه

    فكرتينا بالذي مضا

    ايام


    ما كانت المادة ببلاش

    كل حاجة غليت

    الواحد كان بياخد معاه المواد اللي تعجبه

    تلاتة اربعة خمس مواد
    ومابندفعش ولا قرش

    تحياتي

    ReplyDelete
  22. أُكتب بالرصاص

    هههههههههههه الدنيا اتطورت بقو بيشاركونا فى كل حاجة حتى الخيابهع لازم نصيب

    ReplyDelete
  23. ana fi 3 7asebat 7lwan we el qanwn dah mtba2 mn sa3et lma shoft el kolya
    danty kman bnt ana m5tysh el tarbya el 3skrya we bdf3 50 gnyh 3lyha kol sana
    el kolya di gaya 3lya be el 5osara

    ReplyDelete
  24. ah 2ftkrt kanfi wa7ed 23rfo kan s2et we daf3 msaryf tany sana bta3 400 or 500 gnyh keda mn el mwad we el trbya el 3skrya we bla bla bla
    t7ya masr

    ReplyDelete
  25. Uniqe
    هههههههههههه ايه ده اول مرة اعرف ان التربية العسكرية بيدفع لها فلوس كمان
    وربنا خراب عالمى ههههههه
    ربنا يهدى بجد ده تفنن فى لم الفلوس
    معلش رديت متأخر ع ماشفت التعلق
    :)

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore