كيف تكسب الأصدقاء

أجمل الكتب الى قريتها الاجازة دى كان كتاب كيف تكسب الأصدقاء وتؤثر فى الناس وهو مترجم للكاتب ديل كارينجى ولانى سمعت عنه كتير وانه محقق أعلى ايرادات بعد الكتب السماوية كان عندى فضول إنى اقراه قوى والحمدلله جالى

المهم

انا مش هقدر اقول كل الى فيه بس هقول على النقط الى علقت معايا قوى وبدات احطها قواعد ليا زى ايه؟

1- "لاتشكو من الثلج المتساقط على سطح جارك فإن مدخل بيتك ملىء بالقاذورات " الفيلسوف الصينى (كونفوشيوس).

احنا بنقعد طول حياتنا نطلع القطط الفطسانة فى الناس وعيوبهم كذا وكذا وفلان عمل مصيييييييبه يختى مكنتش اعرف انه كان كده مكنش باين عليه ياما تحت السواهى ومبنسألش هو عمل كدا ليه ياترى؟؟؟ ماممكن يكون عنده مشاكل محددة انعكس على تصرفه ده

والجاهل الى يقعد ينتقد الناس بدل مايقعد ينتقد نفسه ويحاول انه يصلحها .

2-إن كل إنسان ألتقى به يفوقنى بطريقة أو بأخرى ,وأنا أتعلم منه انطلاقا من ذلك.

كل واحد مننا مميز فى مهارة ما طب ليه منحاولش إننا نستفيد من بعض وااخد مهارة فلان ده على علان ده وكل ماقابل حد اكون حريص على كده شوف انت اكتسبت كام مهارة بدل ماتقعد تختلف معاه وتبدأ تحقد عليه من تميزة فى مهارة معينة انت مميز فى حاجة غيرها ونكمل بعض بدل مانختلف مع بعض.

3-اظهر اهتمامك بالاخرين

طول ماأنت بتهتم بالناس الى حواليك هتلاقى الى يهتم بيك وتحس بقيمتك لأنك مش عايش لنفسك بس وحاول تتكلم معاهم فى الحاجات الى تهمهم او هواياتهم هتلاقيهم انسجمو معاك جدا لأن كل واحد بيحب يتكلم عن نفسه جرب أنت تتخلى عن الكلام فى الى يخصك واتكلم معاهم فى اهتمامتهم هتبقا انسان قريب ليهم جدا.

4- تجنب الجدل

"أفضل أسلوب لكسب الجدل هو تجنبه فالإنسان الذى تجبره على الاعتقاد بما هو ضد إرادته من غير الممكن ان يتخلى عن اعتقاده الأول"

وده لأن أغلب الناس الى بتجادل بعضها بيكونو ضد بعض محدش بيسأل التانى عن رأيه كل واحد بيحاول يفرض رأيه على التانى لانه معتقد انه رأيه الأصوب فمن المستحيل أن ينتهى سوء التفاهم بالجدل ولكن بالأدب واللباقه والتفاهم

5- لا تقل لأحد أنه مخطىء

ايه الى بيحصل لما تقول لحد انت غلط؟ هو كده اقتنع برأيك او فهم وجهة نظرك وغير رأيه ؟ابدأ مش هيقتنع حتى لو انت بررت له بأسلوب أفلاطون انت مش هتقدر تغير أفكاره ومعتقداته ليه؟؟ لأنك ببساطه جرحت كبريائه .

"المرء يجب أن يتعلم ولكن بطريقة لا تبدو وكأنه يتلقى درسا أو نصحا فكن أكثر حكمة من الناس إذا أردت ولكن دون أن تخبرهم بذلك"

احنا ممكن نعترف بغلطنا لو الى قدامنا اتعامل معانا بذكاء وفى الغالب بنبقا فاخورين اننا بنعترف بالغلط بس الأمر بيختلف لو لقينا حد قاعد يحدف فينا كلام زى الطوب يبقا لازم نحترم اراء الاخرين ونبيلهم أخطائهم بطريقه غير مباشرة

6- نقطة عسل واحدة تصيد ذباب أكثر من برميل علقم

لو حبيت إنك تجذب الناس لرأيك أو طريقة تفكيرك لما يحصل أى خلاف حاول إنك تتكلم معاهم بطريقة وديه مش تتنرفز وتطلع الشحنة الى جاتلك من تصرفهم مثلا او رأيهم لان ده هيوصل لنتائج سلبية جدا جدا

7- استدرج الاخرين ان يقولو نعم

ده كان أسلوب سقراط فى التعامل مع الناس أنه عمره ماكان بيواجهم بأخطائهم كان ديما يحاول يطرح عليهم أسئله إجابتها نعم بيدور على حقائق او نقاط اتفاق تخلى الى قدامه يقول نعم ميقولش لا وكسب اكتر اعدائه بالطريقة دى لانها بتوضح للشخص الى قدامك انكم متفقين اهو فى نقط كتيرة وانك بتتكلم فى حقائق لمصلحتكم انتو الاتنين

الطريقة دى بتبين نقط الاتفاق بينا الى ممكن تكون 90% والاختلاف 10%

8-دع الشخص الاخر يشعر دائما أن الفكرة التى اقترحتها أنت هى وليدة أفكاره هو

من الحكمة انك تقدم اقتراحك كمجرد فكرة وتسيب الشخص التانى يفكر فى الى هيترتب عليها إذا نفذها على أرض الواقع ومنفرضش رأينا على حد.

9- حاول أن ترى الأشياء من وجهة نظر الشخص الاخرين

لو حبيت أنك تغير أى انسان من غير ماتتعب ولا تزعجه حاول أنك تفهم وجهة نظره وتحط نفسك مكانه عشان تقدر تتكلم بلغته . أى حد ممكن يغلط بسهوله لان فى الغاب بيكون من جهل بالغلط فمتحاولش انك تنتقده لانك لو قدرت تكتشف سبب أخطائه المتكررة عرفت بسهوله مفتاح شخصيته من غير تعب وحاول تسأل نفسك لو أنا كنت مكانه كنت هعمل ايه؟؟؟؟

10 – الناس لا تحب أوامرك

لما تيجلى تاخد رأى حد او تطلب من حد حاجة حاول تطلبها منه عن طريق انك تسئله اسئله بدل ماتديله أوامر مباشره زى ايه رأيك فى كذا؟؟؟ او تحب تعمل كذا؟؟؟ هل تعتقد...؟ انت كدا حافظت على كبريائه لأنك منحته الشعور بالأهمية وكمان هزيت روح التعاون الى جواه

دى كانت اكتر النقط الى عجبتنى وبجد ياريت الى يقدر يشتريه يجيبه وهيستفيد منه قوى لأنه بسيط وأسلوبه حلو وبأمثله حياتيه كتطبيق للكلام الى موجود

*.*HoNdA*.*

17 comments:

  1. أول تعليق
    فعلاً الكتاب ده قريته بس ماكملتش قرأه :$ لظروف ما مش علشان الكتاب مش كويس
    وفعلاً النقطه الي لفتت نظري أوي من اللي قرأته موضوع الاهتمام بالناس

    ReplyDelete
  2. فعلا كتاب جميل جدا
    و عرضك كلن رائع لافكار الكتاب المهم ده
    و كارنيجي طبعا عامل مركز سياسي لابحاث السلام في الولايات المتحدة الامريكية
    خالص تحياتي

    ReplyDelete
  3. تسلمي ياجميلة بجد افدتينى

    ربنا يسهل والاقي الكتاب

    جزاكى الله خيرا ياجميلة
    ;)

    ReplyDelete
  4. بــــــــــخ
    وحشتينى اوووووى يا عســــــل
    وواحشنى ارض الرغى
    ههههههههههههههههههه
    يا واد ياواد يا بتاع القراية والحركات
    هههههههههههههههه
    ربنا يكرمك يااارب ويوفقك

    ReplyDelete
  5. جميلة أوي الخلاصة دي
    فتحتى نفسيانى أقرأه
    قوليلى جبتيهمنين يا بنت بسرعة علشان اجيبه

    لابجد تسلم ايدك و يا رب نعرف نطبق الكلام ده لأنه كلام عايز شغل على جوة الأولو بعدين يطلع على تعاملاتنامع الناس

    تحياتىو كل سنة و انتى طيبة يا قمر

    ReplyDelete
  6. Rehab Mostafa
    الاهتمام بالناس شىء جميل لأن الانسان بطبيعته اجتماعى ولا زم يعرف ازاى يتعامل مع الى حواليه عشان ميتخنقش ولا هما يتخنقو منه

    حاولى تقريه تانى :)

    ReplyDelete
  7. موجة
    متشكرة جدا
    ديل كارنيجى فعلا ملوش حل جامد جامد يعنى

    *************
    إنـســـانـة
    وجزاكم مثله ان شاء الله تلاقيه بس بلاش تقوليلى جميلة دى تانى بلييييز :(

    ReplyDelete
  8. Blogger أمــانــى
    باشا وحشتينى جداااااااااا
    وارض الرغى افتقدتك بردو ههههههه
    ربنا يكرمك انتى كمان ان شاء الله

    ********
    الحلم العربي
    اهلا معالى الوزير بيه هههههههه
    الكتاب مرمى فى المكاتب كلها لا تقلقى هو فعلا الواحد مش بيطبق بين يوم وليلة بس ادينا بنحاااااااول
    كل سنة وانتى بخير

    ReplyDelete
  9. كـل سنة وانتى طيبة وبالف خير وعافية يارب آمـــــين واعاده الله علينا وعلى الامة الاسلامية بالخير واليمن والبركات

    ReplyDelete
  10. كل سنة وانتى بخير ياامونة

    ReplyDelete
  11. ديل كارنيجى كاتب قدير جدا ومميز.. كنت قد قرات له كاتب "دع القلق وابدا الحياة" واعجبنى فكره ولكنى لست مقتنع بان بامكان الانسان ان يتعلم مثل هذه الاشياء عن طريق الكتب.. اعتقد ان الوسيلة الوحيدة لتعلمها هى الحياة نفسها

    مجرد راى

    ReplyDelete
  12. شكرا أختي الفاضلة هوندا على تلك النصائح الممتازة وطريقة عرضك في منتهى الروعة.

    جزاكي الله كل خير، وربنا يبارك فيكي

    ReplyDelete
  13. عم توهان
    اهلا بيك ،ديل كارينجى فعلا ملوش حل وكتابه بتاع ده القلق جمييييييييييييل جدا جدا
    اما بالنسبة لراى حضرتك فيستحق الاحترام طبعا وانا متفقه معاك فى ده بس هيا النقطة ان الكتب بتقصر عليك السمة وبتقلل المدة الى ممكن تعانى من مشكلة معينه من غير ماتعرفها خالص الكتاب على الاقل بيديك مقدمة عنها حتى

    ReplyDelete
  14. mms911
    وجزاكم مثله متشكرة اوى على الكلام الجميل ده
    :)

    ReplyDelete
  15. ماشاء الله ماشاء الله تحفة جميل جدا الكتاب دا مش تقولي يا وحشة :( ماعلينا المهم بجد ماشاء الله اراء الكتاب اراء بناءة فعلا و بجد مش عارفة دلوقت بس حاسة انه الكمبيوتر بدا يبلعني بجد معنتش شايفة قدامي غيره بس بجد هايل و هحاول ان انا اقراه باذن الله و اشوف كتب الكاتب دا علشان بجد شكل اراؤه هايلة جزاكي الله خيرا يا هوندا

    ReplyDelete
  16. monalisa
    وجزاكم مثله ياعثل انت ياطعم هههههه
    معلش عندى المرة دى ان شاء الله فى الاجازة هظبطك متقلقيش انتى بس حاولى تخصصى وقت ولو مرة فى الاسبوع لانى كنت زيك كده بالظبط

    ReplyDelete
  17. ماشاء الله مقال رائع إستفدت منه كتير جدا

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore