مدخنة بالعافية والاجبار وغصب عنى

البوست ده انا كنت كتاباه من حوالى سنتيييييين بس بما ان المسلسل مستمر قلت انشره عادى وماله ميضرش.

احب اعرفكم بنفسى : مدخنة بالعافية والاجبار وغصب عنى.

بصو ياجماعة اكيد انتو مستغربين من اسمى ده بس انا بقولكم متستغربوش ، انا هحكى لكم حكاياتى وانتو تحكمو قشطه؟قشطه

انا بصحى الصبح فى امانة الله الاقى بابا قاعد اروح اصبح عليه الاقية بيشرب سيجارة الفطار وبعدين اشم لى نفسين من الهوا وبعدين اتخنق واسيب له المكان واروح اشوف مصلحتى،

اخرج من البيت وبعدين حبيت اركب توك توك علشان يودينى الموقف الاقى السواق بيشرب سيجارة (بيفطر هو كمان) وبعدين بقى فى اليوم الى كله سجاير ده!

طب اقوله ايه طب المسافة صغيرة والراجل هيكسل يرميها وبعدين مفيش لزوم مالهوا جاى لى من كل حتة يلا مش مشكلة المسافة مش مستهلة وهو مش هيسمع الكلام على اية حال "ده انا طلعت سلبيه قوى"

الحمد لله وصلت الموقف وخلصنا من التوك توك يادوب انزل من التوك توك وامشى مسافة مقدارها شبرين لداخل الموقف الاقى فى الطريق كام عمو واقف وكام عمو قاعد فى الطريق والسجاير بقى ماشاء الله متعدش هو ايه الحكاية هو فطار جماعى ولا ايه ؟؟؟

"جامعة جامعة جامعة جامعة "

الاقى التباع يقولى جامعة ياابلة وفى ايده برده سيجارة ابص له باشمئزاز واقول فى سرى حتى انت وبعدين ارد عليه من بعيد لبعيد واقوله: ايوا جامعة

اركب الميكروباص وفى قدامى حاجة م الاتنين يالاقى واحد ركب قبلى وبيشرب سيجارة يايجى واحد بس جيركن مان فيشرب السيجارة بره وبعدين يدخل بعد مايكون خلص جريمته ويكتفى بدخوله مبرفن برائحة السجائر الجذابة وده مفيش منه خوف الخوف من واحد بعد مانركب يشمر ايده ويحطها فى جيبة ويطلع علبة السجاير وده غالبا مابيكون السواق (بس ساعات بيكون حاطط العلبة قدامه عشان يفتكر )

وبعدين بقى فى اليوم ده طب انا هكح يمكن يفهم (كح كح كح ) مخدش باله لو سمحت يااسطى السجاير بتتعبنى بعد اذن حضرتك .

- متخافيش الهوا بيشيل الريحة .

وبعدين بقى طب مالهوا كده كده بيتلوث بريحته طب هستنى شوية يمكن الريحة تمشى لا كده مينفعش يا اسطى لو سمحت بتعب من الريحة

- حاااااااااااضر

وفجاءة وبقدرة قادر العربية تلاقيها بتطير فى الهوا من كتر مالسواق بقى نشيط لما رمى السيجارة( مش لانه متنرفز منى لا سمح الله) .

الحمد لله وصلنا الجامعة اخيرا ادخل البوابة الاقى الامن " الكارنية" الاقيه هو كمان ماسك سيجارة اطلع الكارنية وبعدين امسك نفسى عشان ميلقطش هوا ملوث واجرى

فى طريقى للكلية بقى متعدش واحد رايح وواحد جاى ومعاه نفس السيجارة المتحركة تقريبا الرجالة كلهم عاملين فطار جماعى بالسيجارة النهاردة،

ادخل الكلية اجرى على اصحابى وقعد بعيد شوية عن المدخنين احمدك يارب ان اصحابى البنات لسه بعقلهم ومحتفظين بصحتهم بس طبعا كل كام دقيقة لازم وحتمن ولابدن تلاقى واحد بيعدى من عندنا يمسى بالسيجارة اروح الكانتين الاقى حد بيشرب سجاير اتمشى فى الكلية سجاير سجاير حراااااااااااااام كرهت السجاير

قضيت اليوم وخلاص الحمد لله هروح "تاكس هابى لاند؟" .

" اتفضلى" افضل اراقبه من تحت لتحت عشان اظبطه وهو بيمد ايده على علبة السجاير وبكده اكون لحقته ووفرت عليه سيجارة هباء برده السجاير بفلوس ولابد من الرحمة .

الحمد لله المشوار عدى على خير وفى بنى ادم قابلته النهاردة مشربش سجاير اركب البيجو وما اجمل البيجو تحس انك طاير على الارض عكس الميكروباص تحس انك طاير فى السما ولحظى الجميل هركب جمب السواق يا مسهل يارب اشوفك بس تمسك علبة السجاير

والحمد لله اقلعت البيجو على خير امسسسسسسسسسسسسسك سجارة لو سمحت ياسطى معلش بتعب م السيجارة" انا كده لحقته قبل مايولعها "

يرد عليا ويقولى :

عشان خاطرك انتى مش هولعها بس على فكرة لو مفكرة انك بتتاذى والكلام الفارغ ده بيضحكو عليكى مفيش حاجة اسمها كده

- حصل خير انا معا حضرتك طبعا الدكاترة دول مش بيفهمو اكتر مننا بس الموضوع انى بتخنق م الريحة وبتعب وعموما تشكر ع التضحية من اجل مواطنة غلبانة مثلى،

وصلنا ارض الوطن فى سلام بلقاس الحبيبة انا همشى بقى لحد البيت ونشم شوية هوا صافيين (اى نعم الجو مترب بس نصف البلا)

وصلت البييييييييييت كفارة،

وخالو كمان عندنا وقاعد مع بابا ياهلا ياهلا اذيك ياخالو سلامات عامل ايه ؟

- الحمد لله انتى الى عاملة ايه محدش بيشوفك اقعدى يا شيخة اقعدى وانتى عامله لنا فيها important woman

- بس كده انا فعلا نفسى اقعد معاك من زمان بس انا هضطر اطلع فوق شوية لحد ماحضرتك تخلص سيجارتك انت وبابا واجى لكم ماشى

-

الحمد لله خلصنا من خالو وبابا اطلع ع السطح فى اوضتى بقى اشم شوية هوا بعيد عن العالم دى واقضى بقيت اليوم فى منأى عن البشرية للحفاظ على بقايا صحتى المبعثرة وينتهى اليوم وتتكرر الحدوتة وهكذا ايه رايكم ؟

مش بذمتكم مدخنة بالاجبار!!!!!!!!!!!!!!

ملحوظه ع جنب*: المدخن الثانوى بيتأذى اكتر من المدخن العادى ،عايز يموت نفسه براحته بس مش من حقه انه يأذينى وأقل حق ليك انك تتنفس براحتك وتبقا إيجابى وتمنع اى حد يفكر يدخ قدامك لان بباسطه مش من حقه ..............




*.*HoNdA*.*

21 comments:

  1. بـــــــــــخ
    هأضحك الاول
    ههههههههههههههههههههههههههههههههههههههههههههههههههههههههههههههههه
    ليــه بقى لانى من اعداء التدخين انا بقى معديش مدخنين فى البيت بس بقى بره حسبى الله ونعم الوكيل مفيش ادنى احترام للشخص اللى قدامهم
    انا بقى علطول اقولهم لو سمحتوا اللى معاه سجاير يرميه
    وبـس
    هههههههههههههههههه

    ReplyDelete
  2. عووووووو

    ههههههههههههههههههههه ملكيش حل يأمونة المرة الى فاتت مقلتيش بخ قلقت عليكى
    انا بكره التدخين بعد اسرائيل
    بس جدعه انك بتقولى فى ناس بتكبر وكله بييجى ع دماغه اصلا لازم نبقا ايجابيييييين

    ReplyDelete
  3. الحمد لله انا فى السليم محدش عندى فى العيلة مدخن

    لكن برا باه ياا ساتر و الله بنترحم فى ايام رمضان من الكلام ده

    تحياتى لرغاية المدونات الاولى

    :)))

    ReplyDelete
  4. Ma 3lina
    ههههههههههه يابختك تصدقى فعلا ان من الاشياء الجميله فى رمضان انه كللللللله بيبطل اه وربنا الهوا بيبقا نقى شوية ههههههه ميرسى ع الدلع التحفه ده

    ReplyDelete
  5. السلام عليكم ..

    الحمد لله .. بيتنا برده من غير مدخنين .. واصحابي مافيهمش حد مدخن ، الحقيقة ان معظمهم من مكافحي التدخين أصلا ..

    كنت باهزر مع والدتي مرة وباقولها إني نفسي أجرب السجاير دي شكلها ايه ، رد فعلها المبدئي إنها كانت تقريبا هاتشيلني ترميني في الشارع (أصلها حبكت أهزر وانا واقف في البلكونه في الدور السادس) .. :)

    طبعا أنا كذلك مدخن سلبي وبالإجبار ، زي ما كلنا بنعاني، وإن كنت باستغل كوني راجل وضخم الجثة :) في أحيان كتير عشان اللي جنبي مايولعش السيجارة ..

    البوست تحفه، قريته تاني بالكامل رغم اني قريته قبل كده ..


    ودمتم :)


    علاء

    ReplyDelete
  6. Alaa ElSemary
    ههههههههههههههههههه
    انا بقا كنت بقول لماما كان نفسى ابقا ولد عشان ادخن وابطل ههههههههه

    حلوة ضخم الجثه دى هههههههه
    منتحرمش منك ابدن يارب
    :D

    ReplyDelete
  7. لأ، فعلاً شعار البلوج الجديد بيعبر عن اسمك كويس أوي، هوندا

    ReplyDelete
  8. أنا بقول بما إنها بايظة بايظة، فالواحد يروح يشتريله باكيت و ولاعة و خلاص و أهو الواحد بيخفف الضرر عن نفسه شوية و كما جاء على لسان هالة فاخر في الفيلم الخيالي أيظن؟، انا بشتغل نفسي محدش يشتغلني. أي نعم معنديش حد بيدخن ف البيت لكن زي ما قلتي في محرقة ف الشارع
    ليه الدولة مثلاً متقفلش مصانع السجاير و تغير نشاطهاو توقف استيرادها؟ ليه كل الدول دي كلها مبتسيطرش ع الوضع بنفسها؟

    ReplyDelete
  9. هههههههههههههههه
    انا في الاول افتكرتك بتدخني فعلا


    بس كويس اني كملت البوست

    كلنا بنعاني من نفس المشكلة دي

    والناس مفيش دم خالص

    ReplyDelete
  10. عليكي بالكمامة
    الكمامة هي الحل
    البسي الكمامة الظريفة وولا يهمك من اي حد كائنا ما كان
    تحياتي

    ReplyDelete
  11. والله انتي زي العسل يا هوندا
    :D
    وعايز اقولك ان فعلا لو كلنا اخدنا الموضوع بايجابية وبكل أدب وذوق نقول لاء للي بيدخن ادامنا على الأقل ممكن يكون في أمل ان الظاهرة الغبية دي تقل شوية أو على الأقل الناس اللي بتدخن تخلي عندها شوية أحمر وتراعي شعور غيرها إن ما كانش من نفسها يبئا بالاحراج بئا

    لكن للأسف كتير الواحد بيقول زي ما انتي قلتي ف أول البوست كده (يعني جت على الشوية الصغيرين اللي قاعدهم ف المواصلة) وبالتالي سيبقى الوضع على ماهو عليه

    ------
    تحيتي ليكي
    وعندي تهنئة ليكي انا عارف انها متأخرة شوية معلش بس انتي عارفة كانت ظروف امتحانات
    كل سنة وانتي طيبة بمناسبة مرور عشرين سنة على وجودك ف الدنيا وربنا يبارك في عمرك ويارب اللي جاي يكون أفضل من اللي فات وتحققي كل اللي بتتمنيه

    ReplyDelete
  12. مشكلة فعلا موضوع السجائر لغير المدخنين..انا بقى كولد بعاني من دخان الشيشة على القهاوي

    مفيش قهوة مفيش فيها شيشة...مش عارف اخرج اروح فين يعني
    :D

    ReplyDelete
  13. بيني و بينك ....
    بس اوعي تقولي لحد
    انا بحب ريحه السجاير و البنزين و دهان العربيات
    :D:D :$
    بحب اشمها كل فترة كدا علي الماشي لكن بزهق لما تكون مركزه جامد في مكان معين ..
    ==
    و الله انا مش مدمن ولا ليا في الكلام دا
    :D:D:D

    ReplyDelete
  14. محمد فوزي آل ربيع
    :) اقتراح ظريف بردو
    بس لو الدوله قفلت المصانع مثلا والناس من جواها مش عايزة تبطل هينشر تجار زى بتوع المخدرات كده بردو بس ممكن نقول ان الدوله تهتم باتوعيه شوية او تمنع التدخين فى الاماكن المغلقه وان ميبقاش الممثلين عادى بيدخنو اعتقد ان ده هيبقا افضل والناس تبدأ تاخد موقف من المدخن لحد مايحس انه سلبى

    ReplyDelete
  15. Amr Ahmed
    هههههههه طب الحمدلله انك كملت البوست مش ناقصين اشاعات :D

    **********
    A.SAMIR
    ليه يعنى اخنق نفسى عشان هما يقعدو براحتهم لااااااا لست أنا

    ReplyDelete
  16. السلام عليكم

    ازيك يا هوندا
    انا عارفه مخنوقه منى صح صح صح اعترفى

    فاكره الكورس اللى اخدناه فى 2006 بتاع حماه؟
    انا كنت راجعه يوم منه وركبت الحمد لله ولقيت السواق بيطلع سيجاره قعدت اشاور نفسى اقوله ولا ماقولوش المهم قررت انى اتكلم واقول
    الراجل بصلى حتة بصه

    دبيت الكلمتين اللى عرفتهم جايز ربنا يهديه على ايدى
    الاقيه بيسألنى سؤال لطيف جدااااااااااا
    هو انتى فى طب؟؟؟؟؟

    اقوله ايه ده والنبى بيحسرنى مثلا

    ما علينا
    المشكله دى عاااااااااادى خااااااااااالص ولا يهمك
    هى دى صحتك ولا صحة حد تانى
    ههههههههههههههههههه

    ربنا بجد يعافينا من ده كله

    تحياتى
    منى

    ReplyDelete
  17. آلام وآمال
    ميغسى ميغسى :D

    بالظبط كده ده الى انا قصدى عليه انو يبقا فى موقف ممكن يحجم شوية من الظاهرة دى

    ومتشكرة جدن ع التهنءه وولا يمك كلنا كنا بننتحر بردو كل سنة وانت بخير :)

    *********
    Marvel
    ياسلااااااااام لازم تقعد ع قهموة يعنى ههههههههه

    ReplyDelete
  18. Ahmed Essawy
    هههههههههههههههههههههههه
    ولا كأنى سمعت حاجة انا كمان بحب ريحه الشيشه هههههه بس
    ع الماشى متقلش لحد بقا ههههههه

    **********
    Sometimes
    وعليكم السلام ورحمة الله وبركاته
    ازيك يامنمن انا الحمدلله بخير
    هتخنق منك ليه يابنتى كده ع الصبح ههههههه

    بالظبط زى ماقلتى دى صحتك مش صحة حد تانى هههههههههههه

    ReplyDelete
  19. كح كح كح
    ايه جو السجاير ده بس

    الحمد لله والدي بطلها من زمان ورحمني ورحمنا ورحم نفسه قبلنا كلنا

    طريقة سردك جميلة جدا احييكي عليها وان شاء الله هتابع رغيك علطول

    ReplyDelete
  20. السلام عليكم ورحمة الله وبركاته
    طبعا ستبقى وتظل تلك السيجارة اللعينة مشكلتنا الأزلية والتى لا فكاك منها الا بمعجزة ، فى زمن انتهى منه عصر المعجزات
    سنظل مرارا وتكرارا نتكلم ونكتب وندين دون أي نتيجة

    الموضوع وكما قلت سابقا يحتاج لتضافر جميع الجهود ومشاركة كل المنظمات والهيئات ، كما يجب التضييق على شركات التبغ والدخان وزيادة الضرائب على السجاير
    كما يجب تفعيل قوانين منع التدخين فى الأماكن العامة (القانون موجود ولكنه حبر على ورق) ، المشكلة يا أختى الكريمة أن المدخن لن يتوقف على التدخين الا بإرادته هو
    فلا تتخيلى أنه قد يترك تلك العادة المميتة فقط لأننا نتضايق منها أو لتأثيرها الضار على صحته (فهو لا يأبه بذلك) ، هل تعلمين لماذا ؟؟ لأنهم (المدخنون) ألقوا بعرض الحائط فتوي عدم اباحة التدخين والتى أصدرها الأزهر الشريف وكبار المشايخ

    فإذا كان هؤلاء المدخنون لا يهمهم الوازع الدينى ولا الأخلاقى (من باب الذوق والأدب واحترام الاخرين) فما الذي سيجعلهم يتوقفون عنها؟؟؟

    الموضوع أكبر مما نتخيل جميعا
    أصبح للسيجارة مريدين ومحبين وداعمين كبار
    لقد أصبحت وسيلة اجتماعية للتقارب والتآلف بين أفراد المدخنين
    بل انها العملة الوحيدة المسموح بتداولها فى السجون المصرية

    لا أريد الإطالة أكثر من ذلك
    وأخيرا وان كان يهمكى الأمر ، فقد كتبت فى بوست سابق بعنوان (معاك علبة نيكوتين) عن هذه المشكلة ، اذا أحببتم الإطلاع عليه فإليكم الرابط

    http://kalam-logic.blogspot.com/2007/03/blog-post_15.html

    دمتم جميعا بخير
    اسامة سامى

    http://kalam-logic.blogspot.com/2007/03/blog-post_15.html

    ReplyDelete
  21. Hawy PHP

    الحمدلله عقبال والدى هههههه ومتشكرة ع المجامله الظريفه دى :)

    *******
    كلام لوجيك
    وعليكم السلام ورحمة الله وبركاته
    انا متفقه معاك تماما فى زيادة الضرائب وتضييق الخناق بصورة عامه وكمان منع التدخين فى الاماكن العامه بصورة فعليه ،
    واحنا مش هنمنعهم يدخنو بس ع الاقل هنوعى ال مدخنوش وكمان يكون فى موقف سلبى عشان يعرف انه مش مرغوب فيه

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore