مش أنى رحت المعرض

اى والله انى مبزوطة ومنشكحه اوى لانى اول مرة اروحه فى حياتى يعنى من يوم ماعرفت ان فى حاجة اسمها معرض كتاب اتمنيت اروحه وفى كل سنة مكنش بينفع لانه فى القاهرة والسفر بقا وكده وانا مبخرجش خارج الحدود المنصوريه هعهعهعهع بس الحمدلله ربنا كتبلى نصيب انى اروحه السنة دى فى رحله صغننه كده مع التيم بتاعى وصوحابى من الشركه وكانت رحله لوذيذه جدن .

المهز يعنى انى استمتعت بكمية الكتب الى شفتها وكمية البشر الى بيشترو يعنى فى امل بجد، طول مافى حد بيروح المعرض فى امل انه يشترى وطول مابيشترى فى امل انه يقرا وطول مابيقرا يبقا فى امل فى التطوير الذاتى وفى امل للنهضة الفردية عشان يكون فى نهضة جماعيه ان شاء الله قولو ياااااااااااارب .

القراءة فعلا كنز

بتاخد خبرات ناس كتيررررر من الكتب وتلمها انت ياباشا ع الجاهز ، بحس ان القراءة عامله مشروع استثمارى طويل الأجل مبيبنش انتاجه الا ع المدى الطويل ممكن انت تقرأ كتب وتنسى او تطلع م الكتاب بجمله او بتصور او او بس المهم ان فى افكار بتنتقلك ومبادىء ومعتقدات بطريقه لا اراديه عشان كده بيقولولك قل لى ماذا تقرأ اقول لك من أنت ،وكمان قالولك قارىء اليوم قائد الغد .

متعه فعلا وسهل جدا انك تعود نفسك ع القراءة لانى فضلت مده كتيييييييرة مبقرأش بس لما حبيت انى اقرأ تانى مشيت معايا واحدة واحدة مجلات بعدين روايات بعدين كتب وتبدأ بلى بيجذبك واحدة واحدة هتلاقى سكك كتير بدأت تتفتح معاك وانت لوحدك عايز تقرأ وتقرأ وتقرأ .........

انا بقا كان عندى نقص لان لحد اولى جامعه مكنتش بشوف مكتبات غير فى المفسديون وكانت امنيه حياتى اشترى كتب لان البلد الا انا فيها مفيهاش مكتبات وان لقيت كتب صدفه وده قليل كانت كتب عقيمه عقيمه تكرهك فى القرايه وده يمكن بعدنى عن القرايه مده

فدلوقتى اما ادخل مكتبه بقا ياسلام ياسلام فمابالكم احساسى بمعرض الكتاب ،اى نعم انا هنجت وفطست لان الجو كان حر والشمس وكمان لان دار النشر كتيييييره والمسافات كبيره ، متخيلتوش بالحجم ده بس استمتعت جدا، اى نعم الاسعار مش تساعد اوى فى بعض الكتب بس الحمدلله قدرت اشترى كام كتب انا كنت بحوشله اصلا من شهورهههههه.

لاحظت حاجة بقا ان الناس مقبله جدا ع كتب التطوير الذاتى التنميه البشرية خصوصا كتب دكتور ابراهيم الفقى عامله شغل مع انى بفضل محاضراته عن كتبه بس اتبسطت مجال اهتمامى بقا والتطوير الذاتى مهم جدا، بس اسعار الكتب غاليه جدا بالذات فى دار جرير للنشر .

وشفت فى دار الشروق توقيع المدونات التلاته وكتبهم عايزة اتجوز ورز بلبن وأما هذه فرقصتى أنا واتبسطتلهم بجد .

كمان قابلت مين بقا اوختشى وحبيبتشى الحلم العربى اول مرة اقابلها بس للاسف ملحقتش اقعد معاها غير ربع ساعه صافى تستاهل عشان تبقا تتأخر هههههههههه

كمان قابلت يسرا صحبيتشى دى بقا حوووبى مصحباها نت بقالنا بتاع سنة والحمدلله شفتها قبل ماموت ههههههههه بس دى عشقى ،الوجه الكبير ليا اصلها اكبر منى بس بينا نحس كتير مشترك هههههههه

اشتريت :

كتاب الفوائد ، الجواب الكافى لابن القيم الجوزى

"بحب ابن القيم جداااا وأول مرة اشتريله كتب".

رحلتى من الشك لليقين ،سواح فى دنيا الله لمصطفى محمود

"أول مرة اجيبله كتب بردو".

حتى تعرف نفسك ،تعال نفكر معا لأنيس منصور

"اول مرة اشتريله كتب بس كنت بقرأله مقالات وبتعجبنى".

عودة الحمار ،الموكوس فى بلاد الفلوس،تمام يافندم ، الطريق إلى زمش لمحمود السعدنى

"ده بقاريحاله مخصوص ودخت ع موصلت لدار أخبار اليوم عشانه ".

لا تحزن لعائض القرنى

"قرأت اجزاء متفرقه منه بس حبيت يكون عندى لأنه تحفه بصراحه".

جبت 5 أعداد مولوتوف ودى سلسله نقديه ساخره للشباب فقط بيكتب فيها أحمد خالد توفيف ونبيل فاروق وناس تانيه مش فاكراهم J

7وجوه للحب روايه بسبع مؤلفين احمد خالد توفيق،نبيل فاروق،تامرإبراهيم،محمد فتحى،تامر احمد،محمد سامى وسند راشد.

بس :D


*.*HoNdA*.*

17 comments:

  1. اول مره اعلق هنا
    ان شاء الله نكون اصحاب بعد كده
    ندخل بقى فى الموضوع
    حلو اوى تنوع الكتب الى انتى اشترتيه
    ابن القيم على انيس منصور على مدونين ...الخ
    اكتر حاجه ممكن تشد للقرايه انك تشترى كتب متنوعه لما تزهق من واحد تروح للتانى
    ولما تحب واحد تشترى له تانى وتالت وررابع
    بالتوفيق

    ReplyDelete
  2. انـا بردوا روحت المعـرض النهارده ,فعـلا الكتب دي كنـز من كنوز الحيــاه والتجمع الضخم للمكتبات ده مفيد جدا بدل المشـوره الي في كـل حته عشان تروح كل مكتبه لوحدهـا
    شكـرا ليكي

    ReplyDelete
  3. من لا يقرا ليس افضل حالا ممن لا يعرف القراءة
    جزاكم الله كل خير
    السلام عليكم

    ReplyDelete
  4. بطوط حبوب
    اهلا بيك :)
    فعلا التنويع مهم عشان تقدر تجمع اكتر من خبره فى كذا مجال

    *******
    Mutati0N
    تمام اجمل حاجة انها كلها فعلا فى مكان واحد مرة وحده
    شكرا ليك

    ******
    mo'men mohamed
    صح هما الاتنين واحد
    وجزاكم مثله :)

    ReplyDelete
  5. على فكرة
    مش كل الناس اللي انتي شفتيهم زاحمين الدنيا كدة رايحين يشتروا كتب
    عدد كبير جدا كان رايح يقضي وقت لطيف في الشمس
    عموما
    لسة برضة في امل...بس مش امل كبير قوي

    ReplyDelete
  6. A.SAMIR

    ههههههههه تفتكر كده يعنى دى ناس غاوية تعب بقا فى امل فى امل

    ReplyDelete
  7. كويس ان المعرض عجبك..وانشاء الله متكونش اخر زيارة

    :)))

    ReplyDelete
  8. كده يا هنود بتسيحيلى و تقولى انى اتأخرت عن ميعادي ...ماشي ماشي
    و انا اللى أخدت المعرض كله لف مرتين علضشان ادور على حضرتك و دوخت اختى معايا ....ماشي يا ست هوندا انا همنع معرض الكتاب من السنة الجاية
    ههههههه
    لا بجد
    كانت اجمل حاجة في اليوم ده انى قابلتك و بجد كنت مبسوطة خالص ان معرفتنا بقت على ارض الواقع

    تشرفت بيكي يا هنودة
    و ربنا يوفقك و تقرأي كل الكتب دي و تستفيدي منها بس ده بعد ما تخلصى كتب الكلية يا هانم
    ايوة مانا عارفة الحركات دي
    ههههههههههه
    تحياتي يا قمر

    ReplyDelete
  9. Marvel

    اتمنى فعلا كده :)

    ******
    الحلم العربي

    اى خدش ياباشا اقل واجب ههههههههههه انتى الى مش حافظه المعرض اعملك ايه ده انا حفظته من اول وهله هههههه
    انا اتشرفت بمعرفتك
    :)

    ReplyDelete
  10. المعرض بقى عامل زى الحديقة الدولية بالضبط او جنينة الحيوانات

    الناس كلها متركزين عند منطقة الاكل
    و تلات ارباعهم بيتفرجوا بس و محدش بيشترى عشان الاسعار المولعة

    ReplyDelete
  11. جـيـداء

    هههههههههههه هو فعلا كان فى ناس كتيره موجوده بعيدا عن دور النشر وجايبين ولادهم كاننا فى شم النسيم بالظبط

    ReplyDelete
  12. على فكرة
    انا لسه مستني ردك على التاج اللي بعتهولك في بوستي قبل الاخير

    انا نفسي اعرف ردك عنه لاني باحترم فكرك جدا

    خالص تحياتي
    احمد

    ReplyDelete
  13. موجة
    متشكرة جدا :)
    انا هجاوب عليه مش نسياه

    ReplyDelete
  14. علي فكرة البلوج بتاعك عاجبني جداا
    انتي فعلا تلقائية
    بحب ادخل البلوج بتاعك وان شاء الله ادخل علية علي طول

    ReplyDelete
  15. themighty_fci
    الله يخليك متشكرة جدا جدا ع الكلام الحلو ده فعلا بتبسط اوى

    ReplyDelete
  16. جميل

    أنا بحب كمان أقرأ لد. أحمد خالد جدا

    ^_^

    مدونتك لذيذة ما شاء الله

    ReplyDelete
  17. Maha

    متشكرة جدا
    احمد خالد ده ملوش حل فعلا :)

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore