الكبت الروحانى

من سنتين اما بدأت ادخل فى كورسات التنمية البشرية واندمجت فيها اخدت توزيعه لجوانب احتياجات الانسان وكانت بتتركز فى أربع جوانب:
الجانب الروحانى
الجانب العقلى
الجانب االجتماعى
والجانب الرياضى


أربع محاور اساسيه لشخصية اى انسان ع وجه الأرض كل ماهتم بيهم كل ماكان افضل وكل ماقصر كل ماالاحتياج زاد وممكن يظهر أثار نفسية نتيجة النقص ده ،
ع سبيل المثال الجانب الروحانى الى بيتلخص فى علاقتك مع الله عزوجل غير ان ربنا خلقنا عشان عبادته اصلا الا ان ده احتياج اساسى لكل فرد بيحتاج اشباع ،واذا تغاضى الفرد ده عن إشباعه بينعكس على حالته النفسية والمعنوية بطرق مباشرة او غير مباشرة وممكن يوصل للإنتحار وده يمكن من الاسباب الرئيسيه لنسب الانتحار فى الغرب فى حاله عدم الانتماء لعقيدة معينه او الغفله عموما ومش بيكون عارف هو ليه مكتئب او يائس؟

طب ليه انا قلت كبت روحانى فى عنوان البوست؟؟
الكبت ديما بنقوله لما بنخفى شىء بعمق او بمعنى أدق بنكتمه فديما نقول فلان ده مكبوت او عنده كبت يعنى مقيد محبوس....إلخ
فلأن الاحتياج الروحانى جزء من الانسان لازم إشباعه عن طريق الصله بالله فى مشاعر روحانيه لو فضلت اكتمها واكتمها واكتمها بيحصل الكبت الى هيظهر بعد كده بخنقه وضيق طب ليه ؟

اطلق مشاعرك تجاه الله عزوجل بالعبادة والشكوى لله اقعد فى اوضه لوحدك وكلم ربنا واحكيله عن مشاكلك، ده بيزود طاقه الانسان الروحانية وبعدها بيحس بالراحه
يعنى مثلا :
جرب فى مرة تكون مخنوووووق اوى تتوضى وتقرأ قران أو تسمعه أوتصلى ركعتين وتبكى فى السجود وتشكى لربنا وتدعيله وانت ساجد فأقرب مايكون العبد من ربه وهو ساجد ،وقارن بين مشاعرك قبل الصلاة وبعدها.

(ومن اعرض عن ذكري فان له معيشة ضنكا ونحشره يوم القيامة اعمى )

أوقات كتير بنمر بأزمات نفسية مش عارفين سبب محدد ليها ممكن نبرر الضيق بأسباب ظاهريه غير حقيقيه لان فى أسباب خفيه متعلق بالكبت الروحانى بدليل انك لو قعدت تشكى لشخص معين انك مخنوق وووو ممكن تلاقيك تتخنق اكتر بعدمااتكلمت ع عكس ماكنت متوقع
ويمكن أكتر ناس تحس بده الى لمست لذه العبادة او القرب من الله فى لحظة من لحظات حياتها وبعدت عن ربنا زى الفرد الى بيكون مواظب ع الصلاة وييجى مدة ويبطلها ودى بتفرق عن كون الصلاة كانت بالنسبة له عادة أم عبادة؟؟
الخلاصة إننا منكبتش نفسنا ومنستكبرش عن أداء واجب واحتياج ومتتأخرش فى اللجوء لربنا كل ماتقابل مشكله او ضيق فالشكوى لغير الله مذله واذا طلبت العون فأطلبه من الله

قال أحد الائمة:
"لا تسئم من الوقوف على بابه ولو طردت"

"ولا تقطع الاعتذار ولو رددت"
"فان فتح الباب للمقبولين فادخل دخول المتطفلين ومد اليه يدك وقل له مسكين فتصدق عليه فإنما الصدقات للفقراء والمساكين"


*.*
HoNdA*.*

19 comments:

  1. كــلامك صحيح 100% وانـا مجربه شخصيــا , وفعـلا التقرب من الله بيريـح جدا جدا
    جـزاك الله خيـرا
    :D

    ReplyDelete
  2. كالعادة بوست اكثر من رائع
    وفعلا لازم الانسان يكون علي اتصال دائم بالله عزوجل
    شكرااا

    ReplyDelete
  3. كلامك مريح اوى يا هوندا
    تسلمى يا جميل

    ReplyDelete
  4. كلام جميل جدا ومريح .وهوا ده الطريق الصح.

    ReplyDelete
  5. فعلا السؤال لغير الله مذلة وحتي لو كان سؤال معنوي زي الشكوي لاحد او الفضفضة للغير عن المشاكل النفسية فهي لاتساوي الفضفضة لله عز وجل

    ReplyDelete
  6. عشق الروح مالوش آخر لكن عشق الجسد فاني

    وجهة نظر راسخة عندي
    إن الروح هي قائد الحياة
    وأهم النعم وأعظمها

    ودرجات الناس وتباينهم فيما بينهم يعتمد على الروح

    كلامك عاجبني جدا

    تعرفي انك متسمة باتجاه إيجابي جدا في الحياة والتطور ؟؟
    استمري على كده .. لأن ده لون جميل اوي لشخصيتك
    وبجد انتي من الشخصيات القليله ف حياتي
    اللى الاحتكاك بيهم مبيكونش محبط ولا اكتئابي ولا سلبي
    وكل كلمة بيقولها بتنبض حركة ونمو وتطوير


    تسلم روحك
    :)

    ReplyDelete
  7. ازيك يا هوندا دمك زى العسل انتى عارفه ان كل اللي بتحكى عليه تقريبا هوه ده اللي بيحصلي كل يوم وبالذات موضوع المواصلات ده
    وعلى فكره ربنا يكرمك يارب بجد
    لان الواحد لما بيقرب من ربنا بيستريح وان الروح بتتغذى زى ما الجسد بيتغذى
    وغذداء الروح ........ ههههههه حلوة غذاء الروح دى المهم مش بعرف اتكلم كلام كبير
    ميرسي على المدونة بتاعتك دى وعلى فكره انا ضيفتك على زمايلي في الشقاء في المدونة بتاعتك عشان اقرا المدونة على طول ياريت نبقي اصدقاء
    صاحبة مدونة يوميات موظفة استقبال
    http://receptionist-daily.blogspot.com/

    ReplyDelete
  8. حلو قوي البوست ده
    روحي يا شيخه الهي ربنا يكرمك ويزيد ايمانك
    تحياتي يا قمر

    ReplyDelete
  9. مولاى انى ببابك قد بسطت يدى ..من لى ألوذ به إلاك ياسندى

    بس هى دى الخلاصه

    تحياتى يا هوندا

    ReplyDelete
  10. طيب لو قلتلك إنى سبحان الله كنت محتاجة الموضوع ده دلوقتى تصدقى
    أحيانا الإنسان فعلا بيبقى مخنوووووق جدا , ومش لاقى سبب
    حاسس إن حياته كلها متلخبطة مع إنه مفيش حاجة وحشة

    لكن بيبقى محتاج نص ساعة
    نص ساعة بس ياخد الخطوة الأولى ويقرب من ربنا
    مدونة لذيذة ومتميزة وممتعة كمان

    نويت إنى أقيم عندك هنا
    زهراء

    ReplyDelete
  11. الله الله الله
    موضوع بجد في الجول
    ربنا يكرمك بجد

    انت عارف ان الجانب الروحاني ده تقريبا هو الجانب الوحيد الل بنتعامل معاه بالعكس ؟
    يعني لما نبقى مقصرين فيه بنحس بالفراغ الداخلي و الضيق , لكن ما بنحاولش نرجع و نسد الخلل , لكن بنتمادى في الغلط اللي احنا فيه و اللي سبب الخنقة دي أصلا ....

    ألف شكرا على الموضوع الجميل :)

    ReplyDelete
  12. البوست اكتر من رائع وجه فى وقته لانى حاسه انى زهقانة وقرفانة وطقانة لدرجة بشعة
    فعلا نقريبا انا عندى كبت روحانى
    عايزة اسألسؤال هو مين احمد سليمان معلش بقالى كتير مدخلتش وكنت بقرأالبوستات اللى فاتتنى
    سلام

    ReplyDelete
  13. هو كلام حضرتك رائع فعلا
    وقد علمت ايضا ان للروح غذاء كما للجسد غذاء فغذاء الجسد الطعام وغذاء الروح العباده والاتصال بالله
    علشان كده الله عزوجل يصف الحاله النفسيه للمشرك فيقول الله تعالي
    ومن يشرك بالله فكانما خر من السماء فتخطفه الطير او تهوي به الريح في مكان سحيق
    علشان كده فعلا في الغرب بسبب الالحاد والشرك وعدم الاتصال بالله يكثر حالات الانتحار والقتل وغيره
    اللهم اجعلنا متصلين بك دائما ابدا
    وجزاكم الله كل خير

    ReplyDelete
  14. بحب اوي الجملة الأخيرة دي يا هنود
    جزاك الله خيرا بجد
    عارفة كمان وصفة تانية
    ادخل من كل الأبواب اللى تقدر عليها مش من باب واحد بس ...بجد ده بيصعب على الشيطان انه يدخل لك
    يعني لو صيام صوم و ل وصلاة صلى و ل وصدقة علشان تحصن نفسك من كل اتجاه

    احبك في الله يا هنودة
    سلام

    ReplyDelete
  15. Mutati0N

    وجزاكم مثله :D

    ***********
    themighty_fc

    عفوااااااااااا :)

    ***********
    Desert cat
    الله يخليكى ياعثل
    :))

    ReplyDelete
  16. تــــايه ومش تـــايه

    ربنا يهدينا للطريق الصح فعلا

    *****************
    Hawy PHP

    فعلا بسس فى حاجات بتكون عاديه معتقدش انو غلط انك تتكلم مع حد فيها بس فى الاول الاخر الله اقرب طبعا

    ******************
    ثورة
    اهلا ياباش عشق الروح لعبتك انا عارفه :P

    ربنا ميحرمنى منك يامظبطانى انتى وانا بتعلم منك كتير وبستمتع بالكلام معاكى
    ;)

    ReplyDelete
  17. فراشة
    ازيك ؟ انا بخير الحمدلله :) متشكرة جدا ع الكلام اللذيذ ده :D
    فعلا الروح ليها غذاء زى الجسد بالضبط
    تشرفت بمعرفتك :)

    *************
    أوشــــــه

    امين ياشيخه هههههههههه

    *************
    Sometimes

    فعلا دى الخلاثه
    ;)

    ReplyDelete
  18. فزلوكة

    الحمدلله نورتينى يازهراء ربنا يفك كربنا جميعا

    *******
    Timmy

    متشكرة جدا ربنا يكرمك انت كمان :)
    مش كلنا بندرك سبب الفراغ ده الا متأخر سواء غفله او جهل

    **********
    yasmine
    طب الحمدلله :)

    احمد سليمان الى أسس فريق الهاكرز الى انا فيه بس شخصيه ممتازة جدا

    ReplyDelete
  19. الفاتح الجعفري

    وجزاكم مثله فعلا للروح غذاء مثل الجسد

    *************
    الحلم العربي
    وجزاكم مثله ياحبيبتى فعلا انتى صح جدا انا كنت محتاجة اخد بالى من النقطة دى اكتر شكرا اوى
    احببك الذى احببتنى فيه

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore