عن الإضراب وكده

هيهيهيهيهيهيه أنى فرحانه ومبزوطه جدن اى والله ياحلاوة ياولاد وربنا ماكنت اعرف ان فى ناس لسه إيجابيه كده

الاول هنتفق ع حاجة
ان مفيش حد بيصحى م النوم مرة واحدة فى ناس بتصحى بالضرب وناس بتصحى بالمايه وناس بتصحى بعد نص ساعه من كلمة اصحى يلا وفى ناس بتصحى ع طوووووول لانها منامتش اصلا عادى يعنى بقول ده ليه
عشان الناس الى قاعده تحكى وتقولك مكناش متوقعين ان ده الى يحصل وناس قليله الى اضربت ووووو

ده غير ان فى ناس كانت معارضه الفكرة اصلا عااااادى عمرنا ماهنتجتمع ع حاجة واحدة
بالنسبة لى عرفت عن الاضراب من حوالى شهر باين وعجبنى الفكرة لانى مخنوقة م الاسعار والغلاء وكل الى بيحصل ليس الا كمان ده حاجة سلميه مبتضرش حد ولا هنموت حد بس كفايه اننا نبدا نتحرك بدل ماحنا مكتومين كده وكل حاجة تغلى وندفع من غير مانكح

ماعلينا كان نفسى اقعد فى البيت
بس اجبرت انزل الكليه عشان سى الدكاتور يمضى ع الكتاب ويدينى الشيت فقلت امرى لله انا مضربه فى الايام العاديه اصلا ههههههههه اجى يوم الاضراب مضربش بس قلت كويس اهو نتابع اليوم هيبقا ازاى طبعا رحت المحاضرة وبعد ماخلصت لقيت الجو جميييييييييييييييييييييييل ومليان تراب وغيم خالص قلت ياسلام المصريين دول حظهم نار احسن عشان نبقا نخرج من بيوتنا يوم الاضراب هههههههه اليوم كان شغال عادى والمواصلات موجوده هو بس تحس ان الدنيا خفت يعنى محلات كتيره كانت قافله وطبعا دول نوعين:
نوع مضرب
ونوع خايف من الاضراب

الاول قلت الاضراب متعملوش دعايه غير ع النت بس وكده مش هيكون فى اجتماع م الناس م كافه المستويات بس سبحان الله انتشر فى الاخر يعنى قبل الاضراب بيوم كنت راكبه تاكس السواق قالى هتطلعى فى المظاهرات بكره استغربت انه عارف وقلتله هو فى ناس كتير عارفه قالى اه الناس مش طايقه روحها
قلتله والله نفسى بس اخاف اتاخد فى الرجلين
قالى ياابله عادى انا اتاخدت 3 سنين ودماغى وارمه م الضرب
قلتله والله انا عاااااااادى بس الناس الى فى البيت ذنبهم ايه ههههههههه وحكالى ان فى واحد من طلخا رمى نفسه م ع الكوبرى عشان مراته جابت ازازة زيت بعشرة جنيه وهو محلتوش العشرة جنيه وطلع الموضوع حقيقه
:(


المهم كنت مبسوطة وكنت بتخيل اليوم ده تاريخى مش هنحقق كل الى عايزينه من مرة واحدة المهم الاستمراريه بردو من غير اضرار ولا اذيه الشعب المصرى لو اتحد وقام كله محدش هيقدر يوقفه المهم ان احنا نبقا عايزين نتحسن ونحسن ظروفنا وربنا هيكرمنا
واهو الرز نزل 600 جنيه والطماطم نزلت جنيه بقت ب3 جنه ههههههه ومزيد من الوعود والتسهيلات الى اتمنى انها تحصل فعلا ومتكنش كدبه إبريل بيقلك هيلغو الجمارك بعد شهرين باين اما نشوف ربنا يوفق الناس

طبعا اسوء حاجة ان يكون فى تشابكات بصراحه كنت اتمنى ان ميبقاش فى اصابات لمجرد اننا بنفس عن خنقتنا بس ده محصلش الموضوع كان محتاج نظام كمان فى اعتقالات كالعاده
لقيت ده فى موقع العربيه

100 مصاب بصدام بين الامن ومتظاهرين

ده فيديو للاسف الموضوع كبر هناك وفى 6 قتلى
إضراب المحله

ده إحصائيات الإضراب ع الفيس بوك الى عمل شغل جامد فى نشر الموضوع

الناس استحلت الموضوع وعايزين يكملو المسيرة ويعملو إضراب فى 4 مايوم يوم عيد ميلاد الريس

عندى إحساس ان ممكن اختراع المدونات والفيس بوك يتحجب فى مصر هههههههه بالمناسبه فى 2 مدونين اتاخدو بردو

فى الاخر احب اقول
"واتقو يوما ترجعون فيه إلى الله ثم توفى كل نفس ما كسبت وهم لا يظلمون"
صدق الله العظيم

تحديث*****:المحله حصل فيها مجازر فعلا وحرقو مدرسه والبلطجيه هناك قامو بدورهم واستغلو الموقف

*.*HoNdA*.*

11 comments:

  1. سبحان الله يوم الاضراب كان اجازه عندي
    بس محصلش حاجه في الزقازيق
    لو كنت سمعت حاجه كنت هنزل جري اتفرج
    يلا حصل خير

    ReplyDelete
  2. معقول محصلش حاجة خالص؟؟؟؟
    بس حلوة هنزل اتفرج دى هههه يعنى مكنتش هتشارك باى حاجة طيب

    ReplyDelete
  3. انا كمان مبسوطة يا هوندا ان الناس ابتدت تتحرك و ان النظام حس قد ايه الناس ممكن تعمل حاجة
    انا مبسوطة بمصر الجديدة و إن شاء الله هتكون أحسن بالناس الإيجابية لما يكتروا يوم بعد يوم
    بس بجد زعلت من اللى حصل في المحلة
    ربنا يستر

    ReplyDelete
  4. والله يا هوندا انا مش شايف اي حاجة نقدر نقول بيها ان الفكرة اتت بثمارها
    الناس كانت متحمسة وخايفة في نفس الوقت
    لكن هي أكيد بادرة أمل جديدة في التغيير

    ربنا المستعان

    مين الاتنين المدونين اللي اتاخدو؟

    ReplyDelete
  5. الحلم العربي

    بالظبط نفس السبب الى بسطنى بس انا دلوقتى مضايقه جدا م الى بيحصل فى المحله :((

    ReplyDelete
  6. آلام وآمال
    مفيش حاجة بتيجى مرة واحدة كفايه ان فى ناس اتحركت هتشجع غيرها انها تتحرك

    المدونين واحد اسمه مالك وواحد اسمه اكرم تقريبا

    ReplyDelete
  7. البوست جميل كالعاده هوندا ,
    وامتي يجي اليوم الي نخلص فيه من القرف الي في كل حاجه في الدوله , انـا كمان كنت مضرب ومروحتش الكليه بس بصراحه عشان مكانش ليا نفس اروح :D
    وده كويس لان الشعب في حاله غليان بس علي ما اظن ان الحكومه مبتجيش بلوي الدراع , الحكومه عايزاكي تولعي في البلد وتكسري في المحلات عشان يخافوا !!!!!!!
    اتمني ان احنا نتقـدم ونخلص من الراجل الي كل ما نفتح الراديو نلاقيه
    "اخترناااااااه اخترناااااااااه " , امتي يقولك توفي الي رحمه الله :D

    ReplyDelete
  8. هوندا ياختى معلش بقي انا خااااااااااااااااينة
    اهئ اهئ
    هههههههه معلش بقي كان لازم انزل الشغل والا هما اللي هيضربونى اصلهم مش هيفهموا يعنى ايه اضراب " عراقيين "
    اصحاب الشغل عراقيين يعنى شغل صدام حسين وابنه عدى هيطلع عليه
    وده على اساس ان العراقيين مش بيحبوا المصريين ومش بيحبولهم الخير يعنى

    انتى فاهمانى طبعا
    بس والله قلبي كان مع الانتفاضه اقصد الاضراب
    ويارب ازازة الزيت ترخص

    صاحبة مدونة يوميات موظفة استقبال "استهبال "

    ReplyDelete
  9. أ/هنادي

    ربنا يجزيك يخير عن المدونة دي

    انا بس كنت عايز الفت انتباه الناس للجروب اللي اصلا عملت الاضراب في مصر
    واللي كانت امبارح تحت رقابة غرفة عمليات وزارة الداخلية وجهاز امن الدولة
    ومازالت

    وبرضه كل شباب مصر عليها

    ومن الاخبار اللي مهم تعرفوها ان اللي عمل الجروب دي وحرك كل شعب مصر بنت
    اسمها اسراء عبد الفتاح
    وهيا دلوقتي معتقلة ومقدمة للمحاكمة امام محكمة عابدين النهاردة

    ادعولها وياريت نشوفكم على الجروب

    http://www.facebook.com/group.php?gid=9973986703

    ربنا معانا شباب مصر

    ReplyDelete
  10. المحلة ولعت من تانى النهاردة الساعه 5.30
    والله هما فعلا اللى اثبتوا انهم رجاله
    ربنا معاهم

    ReplyDelete
  11. لسه شايفه العاشرة مساءا حرايق وتوقيف قطر ..البلطجية -الحكومة - لعبتها صح

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore