Salam Miss HaNaDy


اييييييه الحمدلله والحمدلله والحمدلله
الحمدلله الأولى ان النت لسه جاى انهردة الساعه السادسه صباحا كويس انى صاحيه
الحمدلله الثانيه إنى بقيت بخير لان صحتى الأسبوع الى فات كانت مخستعه خالص من الجو الشمس فى المنصورة رهيبه وانا بدوخ م الجو ده وكنت كل يوم اروح انام سطيحه واقوم دايخه كمان هههههههه
الحمدلله التالته بقا والاهم إنى يوم الخميس الى فات خلصت التربيه العملى

بدأت يوم الاحد التربيه العملى المتواصل وخلصت يوم الخميس كان اسبوع ثقيييل ،طول عمرى بكره ابقا مدرسهم وتفوت الايام وتمر وادخل اداب وبعدين احول هندسه زراعيه وبعدين احول تربيه نوعيه ههههه عشان ابقا مدرسه بردو الى يخاف م العفريت يطلعله

حظى جه فى مدرسة لغات قولت الحمدلله اكيد نضيفه شوية لا وايه فى منطقة راقيه جدا احم احم قدام بيت المحافظ وجمبها امن الدوله وع اخر الشارع مكتبة مبارك فمش عايزة احكيلكم ع المعاناه عشان اوقف تاكس من موقف الجامعه لحد هناك
بس كنت بستمتع بمنظر النيل وكنت ساعات اخدها مشى وانا مروحة اصل طريق المحافظة ده نضيف وجميل ومريح

رحت المدرسة اول يوم الساعه 8 ودخت ع ماوصلت لمعمل الكمبيوتر واول يوم شرح انا الى شرحت نظرا لأنى مجتهدة وحضرت اول درس ههههههه وطلعت بقا فصل اولى إعدادى بنات الحمدلله حاولت اطبق كل الى اتعلمته فى حياتى ع العيال عشان امسك زمامهم من اول وهلة

بنات فافى بشكل يشل هو انا كنت ناقصه وتحس انهم عيال فى جامعه واقل موبيل فى الفصل 6600 الحمدلله ان موبيلى مطلعش م الشنطة , شرحت عادى وكنت بحاول ع قد ماقدر اشرح بذمه كنوع من تفادى الشرح الرائع الى كان بيشرحلنا ومازال. رغم انى بكرة التدريس لكن بحب الشرح جدا خصوصا فى الكمبيوتر بس خارج اى نطاق حكومى ، روحت ونسيت صوتى فى المدرسة ههههههه

دى كانت اول مرة وتانى مرة كانت كويسه بس مبطلتش زعيق عشان اسكتهم كل ده بحاول اصاحبهم ومش عايزة اشتم
تالت مرة والحمدلله كانت الأخيره كنت بصوت مش بزعق وف الاخر اضطريت اطلع بنات منهم للوكيله واعتقد انهم بدأو يكرهونى م اخر مرة هههههههه

استفدت قليل م التجربة بس خسايرها بشعه انا حاسه ان جالى القولون وربنا كل مرة بصداع او صوتى يروح الله يكون فى عون المدارسين المشكله ان العيال لغات بقا وفافى جدا ده غير الى اكتشفته ان الادارة مش حازمة اوى والعيال مدركين ده فبيطيحو فيها بقا يعنى مرة بقولهم الى مش نازل المعمل هكتبه غياب قالولى عادى هنشيله لا وايه تمشى فى المدرسه تحس انك فى الجامعه عادى جدا لبس خروج بناطيل جينز وكارينا وكله شغال وبنات وولاد مع بعض والشعر الحرير اصلها مدارس مختلطه من حضانه لثانوى واحلى حاجة فيها الأطفال فعلا تحسهم أطفال بجد ماشاء الله عليهم اكتر سؤال كان بيراودنى كل ماشوف حد منهم ياترى انا كنت قمر كده وانا صغيرة ؟هههههههههههه

كل يوم اتنين لازم اروح المدرسه من 8-12 بس انا بقا كنت بروح 9 عشان اقلل عدد الساعات الضايع مبعملش حاجة بقعد فاضيه لو مش عليا الدور فى الشرح بجيب معايا كتب بقا او انقل المحاضرات واعرف اخبار الكليه :)

المصيبه ان الى بنشرحه اصلا م الكتاب اغلب البنات زمايلى مسمعوش عنه شوفتو الفلاحه بنات فى 3 تربيه نوعيه كمبيوتر وبيشرحو حاجات ميعرفوهاش ادى جزاة الى ياخد الكمبيوتر مادة تعليمية للكليه بس

من خلال رحلتى دى احب أقول ان موضوع التربيه العملى ده حاجة فاشله جدا ومضيعه للوقت لأن محدش بيقلك حاجة اصلا:

1-لا المشرف بتاعك الى فى الكليه ولا الموجهه ولاالمدرسة ولا أى حد.
2-لو متعلمتش من بره ازاى تعرف تشرح ويبقا عندك بريزنتيشن سكلز هتطلع مرعوب ومكسوف زى اغلب البنات الى كانو معايا .
3- دورك تروح كل يوم اتنين حتى لو مش عندك شرح وتمسك الكتاب تحضر لوحدك لاول مرة وتطلع تشرح لوحدك وحتى لو طلع اى حد معاك يعنى المفروض اتنين يشرحو كل مرة واحدة بتعتمد ع التانية يعنى فى ال3 مرات بتوعى مفيش واحدة شرحت وف الاخر كله بياخد الدرجات كامله عشان عملنا اللوحة ويبقا مفيش تميز لحد شرح وحد ماشرحش .

بس المهم انك حاولت ترضى ربنا تشرح بذمة وتحضر بايدك م الكتاب م غير ماتنقل م حد

****ياريت تبقو تشوفو تحديثات البوست الى فات

*.*HoNdA*.*

18 comments:

  1. ربنا يكون في عونك
    انا فعلا بكره التدريس من اللي كنت بشوفه بيحصل للمدرسين بتوعنا

    هما كانوا بيقولولك "سلام ميس
    هنادي"..؟

    مش مدرسه لغات بقي العيال يعملوا
    اللي هما عاوزينه
    تحياتي

    ReplyDelete
  2. الحمد لله انك بقيتي بخير

    والحمد لله اني عرفت المدونة الجميلة دي

    وربنا معاكي في التدريس لجيل المستقبل اللي رايح في داهية رايح ..هههه

    تقبلي مروري الاول

    ReplyDelete
  3. يابختكككككككك

    انا بحب الشرح اوى

    بس بحب المشرط اكتر

    هههههههههههههههههه

    شدى حيلك كده

    عايزه ادخل اولادى

    سلسلة مدارس هوندا للغات

    ReplyDelete
  4. gehad_fci

    مبروك انك لحقت اول تعليق ههههههه هما كانو بيقولولى ياميس لغات بقا

    *******
    في حب مصر

    متشكرة جدا واحنا بنحاول ننقذ مايمكن انقاذه خيييير

    ********
    د/اجدع بنوته

    ههههههههههههههههه ربنا يخليك مشرط وبكار كمان هههههههه
    تصورى فكرى الواحد يفكر فى موضوع السلسه ده

    ReplyDelete
  5. السلام عليكم ورحمه الله وبركاته ،،

    ربنا يوفقك يا هنودتى بجد شغلانه التدريس دى متعبه فعلا أنا والدتى مدرسه بتعانى والله بس هيا فى الثانوى العام بقى فمحدش بييجى بتروح دقيقه وترجع تانى هههههه ،،معتش فيه تعليم باين فى البلد دى ،، المدرسه دى أعتقد انى عرفاها بس انتى يا بختك بقى لغات وجنب المحافظه واكتر حاجه جميله انها جنب مكتبه مبارك اللى بعانى اما اخد منها تاكسى أو مواصله علشان أروح ههههههه،،
    شدي حيلك بقى ومتتنرفزيش على العيال هههههه يلا ربنا يوفقك

    السلام عليكم

    ReplyDelete
  6. هوا انتي مدرسة ولا مهندسة ؟؟؟؟

    ReplyDelete
  7. قم للمعلم وفيه التبجيلا
    كاد المعلم أن يكون رسولا
    هوا التدريس أفضل ام الهندسة

    ReplyDelete
  8. شكلك يا هوندا كنتي طالبة مشاغبة فبيطلع عليكي بقي اللي كنتي بتعمليه

    :)


    حاجة سيئة جدا الربط بين كون المدرسة لغات واغنياء وانهم يسيبولهم الحبل ع الغارب كدة حاجة تحزن فعلا

    ReplyDelete
  9. هاتي للبنات معاكي استكرز او طباعات نجوم و اغريهم بيها المرة الجاية حيسكتوا و يحبوكي علشان ياخدو الجوايز


    اشربي زنجبيل بليمون يرجع صوتك ان شاء الله

    اوروفوار

    ReplyDelete
  10. الطبيبه الأديبه

    وعليكم السلام ورحمة الله وبركاته يارب ياستى السنة الجايه بقا هههههههههههههه انا اتوقع انهم يلغو التعليم قريبا ربنا يستر بجد والحمدلله ع كل شىء وانا هحاول ابقا ريلكسوووو

    ***********
    Ahmed Emara
    فى الحقيقه انا فى تربيه نوعيه اسما لكن حياتى فى هندسه يعنى خليط مزدوج بس انا بحب التدريس جوه الحاجة الى بحبها خارج اى نطاق حكومى يعنى بشرح فى اى فريق انا مشتركه فيه عادى لاصحابى عادى انما مدرسه اااععععععععععع بس انا بحب شغل العملى اكتر من التدريس

    ReplyDelete
  11. مصراوي أوي
    تصدق مفكرتش فى النقطه دى قبل كده ههههههههههه
    ربنا يستر

    bastokka طهقانة

    متشكرين ع النصايح الجامدة دى هحطلهم ميزانهي مخصوصه ههههههههههه

    ReplyDelete
  12. مبروك وكفارة
    انتى ايه اللى خلاكى تبقى مدرسة بس
    ربنا يكون فى عونك بقى

    سلام

    ReplyDelete
  13. لسه بعقلى

    ياااه ازيك يابنتى انا مبقتش مدرسه رسمى دى حاجة ع ماقسم كده

    ReplyDelete
  14. التدريس ده مسؤليه كبيره بجد ربنا يعينيك عليها
    أنا مش بحبه خالص :)
    تفتكري بقى هتكملي بعد ما تخلصي في موضوع التدريس ده ولا هتكوني بروجرامر كده جامده ان شاء الله ؟؟

    ReplyDelete
  15. والله يابنتى مبقاش في اطفال فعلا انا والدتى مدرسة وعارفه الحاجات دى ...ده جيل ما يعلم بيه الا ربنا تعرفي ساعات بحس اننا مكناش اطفال احنا كنا ملايكه والله اتربينا على افلام الكرتون واللعب الصغيرة كانت البنت تلعب بالعرايس والولاد بالكورة لكن دلوقتى الكمبيوتر لحس مخهم وافلام المصارعه والفيفا خلاص ضيعت البراءة اللي فيهم

    متبقيش تتاخرى علينا

    ReplyDelete
  16. Rehab Mostafa
    لا يابنتى عيب عليكى دى مناظر ممممدرسين بردو ههههههههههههه
    ربنا ييسرلنا الامور ونششتغل الى احنا عايزينه

    ***********
    فراشة

    هههههههههه حلوة ملايكه دى ممعتقدش انى كنت م التصنيف ده ههههههههبس خير خير ربنا يهدى دلوقتى يتهدو اما يكبرو

    ReplyDelete
  17. بلوج جميل , بس صاحبته أجمل وأجمل

    يا للا كله دعاية للبلوج طبعن !!!

    خالو سامي

    ReplyDelete
  18. ههههههههههههه خضتننى ياخالو وانا بقول ايه النور الى شعلل المدونة ده ربنا يخليك لينا ديما :)

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore