طقوس أيام الامتحانات



م وقت مادخلت الجامعه وأنا الى بعمله ده مش اسمه مذاكره ده لف ورق محشى ، أنا نفسى اقدر اذاكر انا نسيت المذاكرة دى ازاى ده انا لو بذاكر بمذاكرة ثانوى ولا اعدادى كان زمانى مرتبه ع الدفعه لا سمح الله بس ماعلينا نيجى لطقوسى الرائعه أيام امتحانات الترم حيث تمثل لى الفرااااااااااغ الذهنى القاتل والغباء المستحكم والملل المستمر عشان اقدر استوعب التخلف الى بدرسه تلاقونى بقا :

- اول حاجة لازم وحتما ولابد اوضتى فوق السطوح يتعملها نظاافه شامله والكمبيوتر يتفك ويتضف والدولايب والحيطان

- بنام من 10-12 ساعه وابقا عايزة انام العصر واحس بكسل بشعععع بالرغم إنى طول السنه بنام بعد العشاء واصحى قبل الفجر

- لازم اهتم بصحتى اعمل كوبايه شاى بلبن واخبطلى بيضتين وكل شوية ادخل القط رزقى باى حاجة فى التلاجه تصبيره للغداء وبعد الغداء ادور ع اى حاجة حلوة وبعدين ادخل اعمل سندوتشات وهكذا طول اليوم وتلاقونى بقا فى الكام يوم بتاع الامتحانات زدت فى الوزن الحمدلله الاسدال بيستر هههههههه

- عرق النضافه بيزيد عن حده وطول اليوم كل يوم بدور ع ورقه بس مرميه ولا طبق مش مغسول ولا سرير مش مترتب ولا اى حاجة من دولايب اخواتى مرميه واهتم انى انضف الشقه جدا بحاول مقعدش فى الشقه وافضل فى الأوضه بتاعتى فوق السطوح عشان اقلل الوقت الضايع ده اصلها حبكت بس الكمبيوتر؟

- الكمبيوتر حبيبى بقاومه بصعوبه ،بغسل وشى واطلع أصبح عليه وافتحه واشوف اخباره لازم ادخل ع الوندز كل يوم اعمله سكان وانضفه ، وادخل ع الينكس واتصفح ايميلاتى كلها واه لو لقيت ايميلات مش مقروءه يحصلى حاجة لازم يخلصو ،بعدين الريدر لازم اقرأ كل الجديد ،بعدين الفيس بوك الى مبقعدش عليه كتير غير أيام الامتحانات اصحابى بيلاحظو انى نشيطه جدا فى الفترة دى هههههههه بعد الامتحانات مش اكتر من ربع ساعه فى اليوم وحياتكم وبعدين احاول انزل تحت عشان ابعد عنه ارجع اطلع فى وسط اليوم ونزل واطلع وهكذا

- بيجيلى كميه أفكار بوستات غير طبيعيه فاطلع اكتب العناوين فى ملف وساعات الافكار تتصارع فاضطر اكتب الموضوع واخزنه وساعات يلح بغباء فاكتب بوست الى لازم يكون قبل الامتحان بيوم او يوميها الصبح عادى جدااااااا وكل البوستات الى فاتت دى بلا استثناء كان تانى يوم عندى امتحان واحب اعدل ف البلوج جدا ف الوقت ده

- عرق صله الرحم يفضل ينط وينط فتلاقونى المغرب البس واروح ازور حد من قرايبى مزروتش من زمان او زرته من اسبوع عادى جدا

- ياترى هعمل ايه فى الاجازة؟ كل شوية يجينى فكرة هعمل كذا وكذا وكذا واجيب ورقه واسجلهم اصل الحاجات دى بركه ايام الامتحانات مبتحصلش فى الايام العاديه

- كل ده كوم بقا واما احن ع الكتاب واقرر اذاكر عم السرحان والتوهان يشتغلو، ربنا مايورييكم قعد افتكر فلانه وعلانه واوقات فلان وعلان والى مشفتهمش من زمان والى اتجوزو والى اتطلقو والى تعبانين والى والى اخر مازهقت بقيت بعمل ستوب واتش جمبى عشان احس ان فى حد بيجرى ورايا

- لازم اوصل الامتحان الساعه 10 الصبح واقعد فى الامتحان لحد 11 بالظبط ولو طويل شوية ممكن 11 وربع لانى مبحبش اغش ولومش عارفه حاجة بسيبها واطلع جرى ع الموقف ليه بقا؟؟
لأنى يوم الامتحان بكون صاحيه من الفجر وبطبق فبجرى عشان انام ، واول ماروح اشيل كتب الماده الى خلصت بورقها والامتحان واعينهم فى مكان مهجور

الترم ده حاولت اعيش فى جو الامتحان شوية لزقت جدول الامتحان ع الدولاب وجدول مذاكرة ع الدولاب التانى وكتبت عليهم بخط كبير

لازم انجح نضيييييييييييييييييييف
وعملت النيكنيم ع الميل بتاعى كونت داون للأيام الباقيه ع الامتحان يعنى
5 4 3 2 1 0
عشان كل مادخل عليه احس ان عندى امتحانات ههههههههههههههههههههههههه

قبل مانسى كان معايا مادة م السنة الى فاتت دكتورها بيقولى اول امبارح شيلاها ازاى انا مشيلتكيش حاجة انا مبسقطش حد واكيد حصل خطأ قلتله مفيش حل يادكتره دول دفعونى حتى الخمسين جنيه قالى لا احنا اخر السنه امتحنيها بقا وخلاص وطلعت انا الوحيده الى شايلاها فى الدفعه هعهعهعهعهعهعهعهع

وسمعنى احلى سلام للتعليم المصرى
إن مكنتش انت تعلمنى مين هيعملنى ،إن مكنتش انت تبهدلنى مين هيبهدلنى

دعواتكم هبدأ يوم السبت ادعولى ربنا يفتح نفسى للمذاكرة ويفتح عقلى للاستيعاب ويحافظلى ع فتافيت مرارتى
وانتم طقوسكم ايه او كانت ايه؟

29 comments:

  1. انــا تلات اربـاع الحاجات دي بردوا بتحص معايا بالظبط , تلاقيني ماسك الكتب وعمال اقرء فيها وفعـلا بيبقي انتظام رهيب مني , في القراءه وتلاقيني بقي كل شويه اقول انضف الجهاز وشويه اقول انا بقالي كتير مجربتش الماندريفـا عايز ابقي اجربهـأ وخمسين ملوين حاجه يبجوا في دماغي في ايـام الامتحانات دي بالذات
    واديني بداءت وامتحنت مادتين وربنا معايا ويخلصوا كلهم

    ReplyDelete
  2. انا بقى بيجيلي كرشة نفس اول ما اسمع سيرة الامتحانات والمذاكرة
    (وش بيطلع دخان من ودانه)

    ReplyDelete
  3. بتعملي كل ده في اليوم
    24 ساعة
    منهم 10 نوم
    يبقي 14 ساعة
    بجد فيه بركه جامده جدا
    ربنا معاكي , بس اسلوب لذيذ جدا بجد

    ReplyDelete
  4. Mutati0N

    ربنا يوفقك بدأت بدرى يعنى ههههههههه
    مطلعتش انا بس الحمدلله

    ***********

    آلام وآمال

    ههههههههههههه طب مين جابك هنا طيب اعمل نفسم مسمعتش حاجة

    ReplyDelete
  5. Ahmed Emara

    هههههههههههههههه
    متشكره جدا بس المهم الواحد ينجز حاجات كتير فى وقت قليل

    ReplyDelete
  6. يعني شايفاكي بتردي على الناش برضه أهو ... ولا جدول مذاكره نافع ولا جدول امتحانات ولا استوب واتش ولا كاونت داون يعني :))

    أنا كنت زمان بعشق المذاكره والله مش عارفه في الكليه كنت بعمل زيك كده ... بقاوم الكمبيوتر بالعافيه والبوستات كانت بتجيلي افكارها كتيير أوي أوي
    وكنت أحب قوي أكتب بوست ليلة تسليم المشاريع خصوصاً مشروع التخرج

    الحمد لله أنا خلصت عقباللك
    وبمناسبة الماده اللي انتي شايلاها ... عارفه انا النحس ده حصلت معايا كتييير :))

    روحي ذاكري بقى ربنا معاكي

    ReplyDelete
  7. Rehab Mostafa

    لا يابنتى دى محاولات هههههه والواحد بيفك عن نفسه ليس الا ،
    يارب يختى انا نفسىىىىىى بجد اخلص واخلص ربنا ييسر كده دعواتك

    ReplyDelete
  8. آآآآآآآآآآآآآآآآآآآآآآآه يا هنادى
    والله أنا نفسى أذاكر بس ماليش نفس
    هو صحيح مش كل الحاجات دى بتحصلى
    بس والله زهقت بقى نفسى أغمض وافتك ألاقينى خلصت الكليه خااااالص مش السنه دى بس
    :(

    ReplyDelete
  9. ازيك يا هوندا
    عاوزة تعرفى انا بعمل ايه ايام الامتحانات

    ما بلاااااااااااااااااش احسن تتعدى و تدعى عليا فى الاخر :)

    عموما انتى حرة
    خدى يا سيتى
    انا كنت عملت توبك عندى فى البلوج عن التوهان بتاع ايام الامتحانات
    توبك اسمه هو فى ايه ...؟؟
    http://romapixicat.blogspot.com/2008/05/blog-post.html
    نوووووووووووووووووم نووووووووووووووووووم
    و يا مااحلى النوم ايام الامتحانات
    الواحد بينام براحته جدا جدااااااااااااااااااااااا

    ربنا يستر السنادى
    ادعيلى بقى يا هوندا
    اصل انا زهقت من هندسة جدا جدا جدا
    عاوزة اخلص بقى
    و ادينى بصبر نفسى ب هانت هانت فاضل شهر و ارتاح
    و نص شهر كمان لمشروع التخرج
    و فنيتو بقى

    ربنا يوفقنا كلنا

    ReplyDelete
  10. Butterfly

    لاحول ولاقوة الا بالله مالك يامروة ههههههه هو انا قلبتهم عليكى ولا ايه ياستى بكرة نخلص خالص ونقعد فاضيين بس اكيد هنكون مستريحين شوية

    *********
    eng_romisaa

    الحمدلله بخير ازيك ياروما بصى ياحبيبتى انا بنام زيك ويمكن اكتر كمان
    وبعدين الى زيك المفروض ميتكلمش ده انتى هتتخرجى خلاص ههههههههههه اموت نفسى انا بقا

    ReplyDelete
  11. ربنا يعدى الايام دى ع خير يا هونده
    الحال من بعضه يا جميل !!!
    ربنا يستر بجد

    بس احنا قدها وقدود برضه يا هنادى!!!
    ولا انتى ايه رايك !!!!
    هههههههههههههههه

    ReplyDelete
  12. ياست هنادي مشي حالك
    على فكرة المذاكره في مصر اهانه للعقل البشري ،،،
    لانها بتؤدي لتخلف حاد مستقبلا
    :D
    انا توبت ومعنتش بذاكر
    عادي يعني شئ طبيعي قال يعني حنشتغل

    ReplyDelete
  13. ايه يابنتي ده كله

    لما بتعملي كل ده قبل الامتحانات

    امال اثناء الامتحانات بتعملي ايه

    ههههههههه

    كلنا مرينا بالامور دي ومايحلاش الاكل وشرب اي حاجة الا اثناء المذاكرة

    خلى عندك عزيمة علشان تنجحي وتخلصي

    ليكي على اول مااشوفك على الفيس بوك اشخط فيكي واقول لك قومي ذاكري

    ههههههههههههههه

    بالنسبة للمادة اللى بتقولي عليها تقديم الالتماسات له مواعيد لاتزيد عن 40 يوم بعد اعلان النتيجة

    ولو عدت المدة دي ليس من حقك تقديم التماس لاعادة رصد درجات اي مادة تشكي في درجاتك فيها

    ربنا يعينك
    وشدي حيلك

    تحياتي

    ReplyDelete
  14. طقوسى

    انا تقريبا خلصت على مخزون كينيا من الشاى
    بس بجد زى ما انت بتقولى
    كل الحاجات بتبقى حلوه
    سرعة النت بتبقى خطيره
    والجرايد بتبقىممتعه والتلفزيون
    والماتشات
    الناس دى بتستقصدنى ايام الامتحانات
    ـــــ
    على فكره انا برضه معايا ماده فى التيرم الاول
    انا الوحيد فى القسم اللى شايلها والباقى امتياز وجيد جدا

    ReplyDelete
  15. تقريبا معظم الناس بتعمل كدا وانا زيهم
    انا كل شويه وانا بذاكر افضل ابص للكمبيوتر اقعد اتحجج بقي اما اذاكر كام سلايد من علي الكمبيوتر وكدا
    لحد اما اليوم يخلص من غير مذاكره ولا ماده
    وارجع اندم
    بس مش عارف ايه حاله الامبالاه دي اللي ماسكه فينا
    انا عاوز ربنا يخلصني من السنه دي عاوز اعمل حاجات كتير
    بالتوفيق لينا كلنا ان شاء الله
    تحياتي

    ReplyDelete
  16. يا بنتى انتى قلت كل اللى بيحصلى

    رجعتينى لايام زمان والله

    ياااااااااااه

    ربنا يكرمك بجد فكرتينى بذكريات حلوة اوى


    ربنا معاكى فى الامتحانات و الحقى ذاكرى باه قبل يوم السبت

    ReplyDelete
  17. aya

    ايووووى ربنا معانا يابنتى احنا طبعا ياحبيبتشى قدها وقدوووووووووووووود هههههههههه ربنا يستر


    *************
    EncrYpted

    ماشى حاضر عنيا انا ممشياه من زمان اصلا ههههههههه بس فعلا فعلا انت عبرت صح واانا عشان كده مبعرفش اذاكر بقالى سنتين

    ReplyDelete
  18. Bella

    اثناء الامتحانات بقا بندم ع الوقت الى ضيعته هههههههههههههههههههههههههه
    والله انا بحاول بس تعملى ايه بقا فى الملل
    الدكتور كان قالى كده بس اسبوعين بس هيا النقطه انه بيقول انه مشيلهنش اساسا بس يلا خخير
    ع فكمرة اصحابى بعد ماقرو البوست بقا كل الى يشوفنى ع الميل يقولى قومى ذاكرى

    ReplyDelete
  19. e7na

    ايوه فعلا كل حاجة بتتظبط وتتعدل هههههههههههه واضح ان الدكاتره بيعزونا جدا ربنا مايحرمهم مننا ابدا


    *************
    gehad_fci

    انا بردو بتحجج فى المواد الى تكون فيها اسطوانات ولا تطبيق ع الكمبيوتر بنا مايوريك هههههههههههههههه
    ربنا يوفقنا ويسترها معانا

    ReplyDelete
  20. mostafarayan

    يارب :)

    ******
    Ma 3lina

    ياسيدى ياسيدى ع الذكريات تعيشى وتفتكرى هههههههه
    حاضر بحاول اهو حاسه انى هنضرب

    ReplyDelete
  21. ربنا معاكي وبالتوفيق إن شاء الله في الامتحانات وربنا يسترها مع كل الطلبة يارب أصعب حاجة في نظري إنك تكون طالب

    http://abo-marwan.com/

    ReplyDelete
  22. أبو مروان

    ياااااااااارب دى فعلا اسوء حاجة :)
    دعواتك

    ReplyDelete
  23. أنا عندى امتحان يعنى مذاكرة يعنى طحن
    ممكن أذاكر 18 فى اليوم
    حكم القوى بقى

    ReplyDelete
  24. ههههههههههههه

    ياعيني

    معلش يابنتي

    اهم يومين نستحملهم وربنا يعديهم علي خير وخلاص

    ربنا معاكي ياجميلة ويوفقك يارب

    ReplyDelete
  25. و الله يا هوندا كنت أيام الامتحانات تحصلي حاجات غريبه..تلاقيني بذاكر الحاجات اللي الدكتور مقالش عليها مهمه..و بضمير جامد جدا..و أنا مقتنعه تماما ان المهم اني اتعلم مش انجح..و كأن العلم محبكش غير ايام الامتحانات..و تلاقيني سايبه الكتب و مش جايبه ورق للماده و قاعده أدور على النت..و بما إني كنت آداب انجليزي...فكانت المصادر على النت شيء مهول..و الله كنت بلاقي شرح للحاجات اللي الدكاتره عمرهم ما فكروا يشرحوها

    أما ليالي الامتحان..اقعد انا و اختي نغني و احنا بنذاكر اغنية شادية..في الوقت ده من كل عام..اقضي طول الليل ما نام..افتح كتاب و اقفل كتاب

    و يوم الامتحان الصبح مقدس جدا..ممنوع لبس اي حاجه تدل على الفرحه و انا راحه الامتحان..و لازم الصبح اشرب كباية قهوة باللبن..أنا أعملها بنفسي..و مع ذلك و رغم كل شيء...أحلى أيام و أجمل ذكريات ..فكرتينا يا هوندا : )..

    ReplyDelete
  26. funckydoctor

    بسم الله ماشاء الله ربنا يقوييييييييييييك ادينى ربعهم بس ههههه

    ***********
    esraa

    ماعلينا الا الاستحمام ههههههههههه
    اللهم امين متحرمش :)

    ReplyDelete
  27. i believe

    ههههههههههههه والله انتى عثل يابنتى انا بردو بجى فى مواد الكمبيوتر واحب اتعلمها من ع النت واتوسععععععع
    قال ايه حبكت بس هتعملى ايه بقا داء

    بالمناسبه انا بحب اغنيه شاديه دى جدااااااااااا بتفكرنى بأيام زمان وانا طفله

    بس انا ديما بتألق ايام الامتحانات والبس الوان وفاتحه واتأنق جدا هههههههه

    ReplyDelete
  28. السلام عليكم
    أنا أول مرة أدخل مدونتك وعجبتنى جدا
    أما عن طقوسى
    أنام كثيرا + القراءة لكثيرة لكتب خارجية + سدة نفس من الكتب الدراسية + الأكل الكثير + دعوات الوالدين
    والأخيرة هى اللى من بعد ربنا بتعينا لسنين
    إسلام

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore