عن تعليقات البوست الى فات

Ahmed Emara said... انا مش علق علي البوست انا هعلق علي الكومنت , أغلبهم بيقول ان شاء الله هتنجحي وربنا يستر وهتبقا كويسة , يجماعه المفروض ننبها ان اساسا احنا حسين انها مش مدية اهتمام للكلية ولا المذاكرة ولا الامتحانات , ورغم ذلك بندعلها بالنجاح , ولكن ليست الحياة تمني , الي عايز ينجح بيذاكر ويركز , بصراحة انا زعلت خالص من الموقف ده جدا , علي العموم الي عايز يخلص من حاجة بيركز علشان ينجزها مش يستهتر بيها وتفضل لازقة فيه , أقصد شهادة الجامعة , عارف ان الكومنت ده مش لذيذ , بس ربنا يعلم انا اقصد ايه , ويريت نتعلم حاجة ونهتم بأشياء هيا بداية مستقبلنا , ممكن لو تحطلنا جدول امتحاناتك واي حد يتبرع يتصل بيكي يفكرك بكرة هتمتحني ايه , أعتقد فكر كويسة علي الاقل نعيش معاكي جو الامتحانات

GeHaD said... ?????????
انا لو مكانك كان ممكن يحصلي حاجه
مع ان الحاجات دي كانت بتحصلي في الاحلام بس
انا مش عارف ليه مع ان بوستاتك كلها بتدل علي انك انسانه فاهمه ومجتهده وعاوزه تبقي حاجه بجد
انا حتي استفدت منك حاجات كتير والله من غير مجامله
ليه انتي بقي مش بتحاولي تحقيها؟؟
ولا علي رأي الكومنت اللي قابلي انك مستهتره بالكليه
المفروض انهم يادوب اربع سنين يعني الواحد يعصر علي دماغه كام لمونه كدا علشان يخلصوا بنضافه
بجد ربنا معاكي وشدي بقي انتي فاضلك سنه واحده لازم تخلص بالطول او العرض ويارب تخلصيها بسلام


التعليقين دول كانو ع البوست الى فاتت بدايه احمد عمارةوجهاد بكنلهم كل احترام وتقدير وعارفه انكم اكيد قاصدين تنصحونى ومش زعلانه منكم لكن،

أنا قرأت التعليقات حالا وبصراحه مادخلتش عليا غير كل ضيق اولا انا محبش ان حد يصدر احكام عليا وهو ميعرفنيش
ثانيا محبش بردو ان حد يتكلم معايا بالاسلوب ده ويقولى انى مستهترة لان حضرتك بردة مش دخلت جوايا وشايفنى بقول يلا تنفيض،الناس الى بتقولى ربنا ينجحك ووووو بيتمنولى الخير وبيحاولو بس يشيلو عنى الضيقه م الموقف الى حصلى الى وارد انه يحصل لاى بنى ادم حتى لو دحيح

اكيد لو اغلب الناس مرت بالظروف الى انا مريت بيها هيكون ده نظرتها للتعليم


اولا التعليم الى بناخده ده مش تعليم اصلا وكل الى بطلع بيه انى بزداد تخلف عقلى وغباء وانا من سنه لما بدأت اتعلم برمجة قعدت حوالى 3 شهور بعانى انى مش قادرة افكر وازاى البنى ادميين بيفكرو وسيبت البرمجة وبقيت اجيب كتب ازاى انمى عقلى وازاى استفيد منه ووووووو والناس الى مفكره ان التعليم فل وكله قشطات يبقا اكيد متحطوش فى موقف يفكرو فيه او فى الغالب مبيفكروش اصلا فمبيحسوش انهم عندهم نقص فى القدرات
وايام الامتحانات بضطر اسيب اى مذاكرة ليا فى البرمجة او اى حاجة عشان اعمل بيات تخلفى لعقلى عشان اقدر ادش واصم المواد الى باخدها

الى انا فيه ده مش استهتار ده احباط حضراتكم ولو حد يقولى حل سريع اعمله عشان اشيل الاحباط ده يقولى وانا مش هتأخر بدل العذاب ده

الموضوع ببساطه احباط من مصدرين المصدر الأول انى معملتش حاجة بمجموع ثانوى وحسيت انى تعبت ع الفاضى ولما راحت منى حاسبات على نص درجه ملقتش حاجة ادخلها غير اداب وتجارة والذى منه


المصدر الثانى ان اصلا اصلا المواد الى بناخدها مش مواد وطريقه التعليم غلط وعشان محدش يقول انى بتفزلك حد يجيبلى مبرمج شغال بالعربى وبيقرأ كتب عربى واتعلم البرمجه م الصفر بالعربى وبيكتب جمله الادخال
x=input("
من فضلك ادخل قيمه اكس")
مش برمجة بس اى مجال فى الكمبيوتر بس شغال كويس يعنى
ماهو بيقولو خدو العلم بلغه اهله ولا ليه بتوع طب بيدرسو بالانجلش؟

انا حاولت كتير انى اقدر اتكيف ع جو الكليه والمواد بس للاسف مش قادرة ومازلت بدعى ربنا بردو لانى محبش اكون فاشله فى نقطه صغيره فى حياتى لكن للاسف كل حاجة فى الكليه بتجبرنى انى ابقا غبيه ،اصل احنا الكليه بتاعتنا كوسه مكوسه من الدرجه الاولى وغير ده بيحبو الدش والكلام الكتير وانا مبعرفش بصراحه
وكمان ممنوع حد يمس كيسه كمبيوتر ويفتحها فى سكشن الصيانه عشان عهده لكن بتوع الاكاديميه عشان بيدفعو خمسميت جينى حقهم يفتحو السى بى يو ذات نفسه

المادة الى كنت بمتحنها انهردة مادة تخلف الدكتور مازال يؤكدلى انه مشيلهنيش وان اكيد حصل خطأ إدارى بس معدش ينفع الخطأ يتصلح ،اكيد مش سهل عليا انى اكون الوحيده فى الدفعه الى شايله المادة وامتحنها انهردة مع الدفعه الى قبلى ،واكيد مش سهل عليا بردو ان الحشاشين والى بيشربو بانجو فى الكليه فى دفعتى بيجيبو جيد جدا ،واكيد مش سهلى عليا ان الى مبيحضروش سكاشن وبيتخانقو مع الدكاترة مبيشلوش مواد وبيجيبو تقدير ،واكيد مش سهل عليا بردو ان نتيجتى تتحجب عشان مدفعتش الخمسين جينى بتاعه المادة الى انا شايلاها بالخطأ،واكيد مش سهل عليا ان والدى يكون بيصرف عليا مصاريف اد كده واجيبله النتيجه المشرفه دى

مش كليتى بس دى كل كليات الجامعه ولو حد كليته جامدة وهطلعه فهيم ويشتغل جرى لانه عارف السوق شغال فى ايه يبقا يدينى العنوان عشان اودى قرايبى فيها

انا قدامى اختيار من اتنين يإما ابقا غبيه عشان الكليه واما اخرج احط ايدى ع خدى ويإما احاول استفيد بقدراتى الى ربنا عاطيلهالى ومضيعش وقتى واتعلم علم الناس شغاله بيه والغرب بيجرى فيه واحنا المسلمين متخلفين وعايشين عاله عليهم وبنسرق نسخ الوندز والبرامج وبنتباهى اننا بنعرف نسطب وندز ونت كت

الناس الى مش حاطه فى دماغها حاجة خالص غير الكليه ومبنتتعلمش اى حاجة تانيه اقولهم بكرو تندمو اشد الندم ع الوقت الى ضيعتوه خصوص لما تعرفو انكم لا اتعلتمو ولا حاجة وقابلونى لو اشتغلتم شغلانه محترمه
انا مبقلش للناس ترمى الكليه ومتذاكرش لا طبعا انا عن نفسى امنيه حياتى اعرف ادش المواد بدل مود الاكتئاب الى بيجيلى كل ترم

بس الى احب اقوله ان الكليه عمرها ابدا ماكانت نهايه طريق دى شرطه ع بدايه الطريق وان النجاح الشخصى غير مرتبط بالنجاح الدراسى بتاتا واسألو اى حد بيفهم فى مصر لو كنا بره مصر كنا قلنا اه ده احنا متهشتكين فى التعليم

الله اعلم انى حاولت اجهاد فى موضوع التعليم ده بس لسه مش قادرة بصراحه اوصل
لكن ضميرى مابيأنبنيش ابدا لانى عارفه انه اى كلام

بوستات كتبتها عن الامتحانات

كلمتين فى الزور

سؤال كل ترم؟؟؟

الجزء التانى من سؤال كل ترم

انا لما كنت اشتغلت الترم الأول اتعلمت حاجات كتيره اوى اهمها انك فعلا عشن تلاقى وظيفه كويسه لازم تبدا من دلوقتى يكون عندك امكانيات كويسه فعلا متستناش لما تخلص وتقول ربك يسهلها
اه بالمناسبه ده اول ترم اذاكر فيه وانوى بجد انى انجح
محدش يزعل منى وانا مش زعلانه من حد ،ادعولى بدل ماتقطمونى
:D
هوندا

16 comments:

  1. ههههههههههههههه
    حلوة
    x=input("
    من فضلك ادخل قيمه اكس")
    هههههههههههههههههههههههههههه

    حلوة بجد

    أوك , ضحكنا , نتكلم جد بقة , بادئ ذي بدء انتِ هتخلصي الكلية يا هوندا وهتنتهي الفترة دي من حياتك خاااااااااالص وبعد كدة هتنتطلقي فى آفاق تحقيق ذاتك فى مجالك اللي حبيته وهتوصلي لمراتب عالية أوي بإذن الله .. ودة مش نخع أنا عارف انا بقول ايه

    بس عشان دة يحصل لازم تخلصي من أم الكلية الخنيقة الرخمة التقيلة الداهية الرمة .. لحظة مش المقصود كليتك انتِ اللي خنيقة .. دي كل كليات وتعليم مصر خنيق وعايز الحرق .. كله بلا استنثاء كدة .. لكن للأسف شر لابد منه .. عشان تبدأي تحققي ذاتك وتنتطلقي , اخلصي من هم الكلية لأنها واخدة جزء كبير من الرام بتاعتك واحتمال تكون دخلت على الذاكرة الافتراضية كمان .. وكل اللي انتِ قلتيه عندك حق فيه عن التعليم الغبي بتاعنا .. بس لازم تخلصي من هم الكلية .. مش عشان يبقي معاكي شهادة والكلام الاهبل دة .. عشان انت طلعتي سلم وقربتي تخصليه ومش باقي إلا خطوات بسيطة ويخلص .. خلصيه عشان تتطعلي السلم التاني بتاعك اللي عايزة تتطلعيه بمزاج وبكامل ارداتك مدفوعة ليه كمجال بتحبيه .

    الاعزاء أحمد وجهاد اللي قطموكي .. هما مش قصدهم دة .. دول فى الغالب معجبين بيكي جداً .. هما بس عايزين يوصلوا ليكِ فكرة أن اللي حصل دة حصل نتيجة أن الامتحانات مش فى دماغك .. يمكن بس خانهم الاسلوب .. الفكرة اللي هما كانوا عايزين يقولوهالك أن هما شايفينك ممتازة أوي وعقلك حلو فإزاي تقعي فى غلطة زي دى ..

    بس خلاص عادي انسيها أو تناسيها وكملي عادي .. بكرة هتفتكري يوم المقلب دة بتاع الامتحان وتقعدي تتضحكي وتتشقلبي من الضحك من كتر ما انت حققتي نجاح فى مجالك اللي بتحبيه .

    "يجب أن تؤمني بذلك .. وبأقصي قوة"
    :D

    ReplyDelete
  2. اهلا هنادي:
    دعيني اقول لك شيئاً و ان لم يعجبك انت تلومين الناس علي حكمهم عليك لانهم لا يعرفوك و لا يطلعوا علي نوايك و لكن هذا الناس فنحن نحكم بالظاهر لنا و الظاهر هو "استهتارك" بالكلية و لا تطلبي منا ان نعرف ما بداخلك فحقيقة انك لا تعرفي جدول امتحاناتك او حصل لخط او اي كان ما هو الا استهتار و لا يشفع لكي اي حجة او ظرف ... هذا امر.
    الامر الاخر انك لو نظرتي للكلية علي اساس انها شهادة اجتماعية تحتاج لاربع سنين للحصول عليها و لابد من الحصول عليها ستشعري بالراحة لانها بالفعل كذلك فلا تتوقعي الكثير كذلك حاولي ان تقللي سخطك علي التعليم فالسخط قد يؤدي للسلبية و حاولي اتباع نظرية "اللي يجيي منهم احسن منهم" فالتعليم السيء واقع و ايضا مدي تعلمنا هو شيء نحدده بادينا و هذا واقع لذا لا تتذمري كثيرا يمكنك البدء بتعليم نفسك و البدء بالنظر للحياة نظرة اكثر موضوعية فنحن لا نعيش في المدينة الفاضلة.
    if edu != good then
    msgbox("so what, it/'s the life /n and I/'ll do ma best to improve my skills ")
    endif

    ReplyDelete
  3. ايه يا بنتي كل دا فالكليه انتي فكلية إيه ؟؟!! ولا معهد ولا إيه اللي فهي الناس بتتخانق مع الدكاترة عادي كدا

    بس هقولك على حاجه توصلك لقمت اليأس
    و تنزلك تاني

    بصي يا سيي

    بس حابب انقلك تجربتي .. انا فكلية من كليات الجمهورية اللي شغاله بنظام الساعات المعتمدة .. هي كليه علوم المنوفية

    و طبعاً اتدايقت اوي لما فتتني حاسبات على درجه ونص فقررت ادخل جامعة خاصة و نزلت و اعدت الف شهر كامل على لكليات و الأكاديميات و في الآخر الحاجه الوحيدة اللي عجبتني طلعت غالية بما لا يتناسب مع قدراتي لأنهم أكيد فالبيت فيه غيري

    نصحوني اني اخش علوم و فيها قسم حاسب وكداللأسف لم رحت اتصدمت
    أني هخش قسم
    رياضيات بحته و علوم حاسب
    نهايته

    انا دلوقتي بقيت في 3 مخلص مواد الحاسب كلها -فالكلية عندنا يحق ليك اختيار المادة اللي عاوز تدرسها فكل ترم - و عمال اعيد فمواد الرياضه

    يعني هل يعقل اني رجل على شفا انه يكون مبرمج عنده خلفية واسعهة عن ال
    java , c# , C , SQL
    و محتاج بس 3 شهور و يبقى مرتبي في الشغل بداية من 1000 جنية

    وفي الآخر قاعد فالكليه عشان مش بعرف اكامل تكاملات غير محدودة و تكاملات الصطوح ماشي احنا مش هنختلف على ان الرياضيات هي أم لعلوم و أصل الكمبيوتر اصلاً 1 0 و بوابات و كدا

    ماشي مش مختلف مع اي حد بس في مصرنا العزيز مش ممكن درس رياضه عشان الحاسب لأن اللي بيدرسوها مع احترامي مش ملمين اصلاً بتطبيقاتها


    طولت عليكي

    بس للأسف انتي جيتي على الجرح انا ماشي دلوقتي بغني

    أنا مش عارف اتخرج .. كل ما اقول هتخرج تطلع مادة تسيني ل اللي انا بلحلم بيه

    آه و لله

    بس اللي ديماً بيطلعني من المود دا اني فعلاً فيه حجه اصاد عيني عاوز احققها

    عشان كد انا عيش عشانها و بطاع نفسي من مود خنيق و ضغط الحياة و لدراسه

    واعد اسمع منير الدنيا ريشه فهوا

    عشان هي الحياة كدا زي مهي لزم تعييشيها بكل آلامها و احزانها و كمان افراحها

    حقيقه نا كنت هكتل البوست ديه على المدونة بتاعتي و ابعت لينكبس لأن فيه دكاته من الكليه عندنا بيدخلوا مدونتي محبيتش اصدمهم بالواقع
    :)

    اللي هما اكيد عارفينة بس اهه

    Mr.Xprt

    ReplyDelete
  4. اوك يا هنودة
    انا معاكي في كلا كلامك التعليم في مصر شيء غبي وخنيق جدا
    بس بردة دي شهادة ولازم تاخديها على الأقل علشان الجماعة عندك في البيت مش ناقصة مشاكل اكيد وانتي عارفة
    ربنا يوفقك

    ReplyDelete
  5. بصي ياهوندا

    التعليم في مصر شيئ فاشل وكلنا عارفين كده

    بس انت مضطرة تتعلمي وتعملي عملية انتحارية تخلصي بيها

    بعت لك رسالة على فيس بوك فيها كلام كتير قوي

    ياريت تقريها وتسيبي النت خالص اليومين دول وتركزي في دراستك علشان تخلصي لان كرهك للكلية او عدم رضاك عن مستوى التعليم مش حله انك تفضلي قاعدة في الكلية وتطلعي بمواد

    لازم لازم تخلصي باي طريقة

    روحي بقى شوفي الرسالة بتاعتك

    وياريت ماتدخليش النت الا بعد الامتحانات
    علشان انت محتاجة كل ثانية

    ربنا يوفقك ويفتح عليكي

    بعدين بقى نبقى نناقش مشاكل التعليم ونشوف تتحل ازاي

    ربنا يوفقك يارب

    ReplyDelete
  6. بصى أنا لسوء الحظ قريت البوست اللي فات دلوقتي

    أنا عارفه ومتأكده ان دماغك كويسه أوي في البرمجه والحاجات دي ومش معنى انك تشيلي ماده يبقى انتي فاشله ولا مستهتره خصوصاً انك شايلاها ظلم
    ثانياً: انتي عارفه اني برضه كنت ف حاسبات حلوان ودي أصعب حاسبات في أي جامعه وعارفه ان في فرق كبير بين انك تصمي المواد وانك تشتغلي بدماغك
    عارفه انك بتركني ذكائك لما تيجي تذاكري وبتدمري غبائك لما تيجي تبرمجي
    مشكلتنا اننا مجبرين ناخد مواد بنحبها ومواد مش بنحبها، مواد عارفين نذاكرها ونتعامل معاها ومواد تانيه كارهين اصلاً اننا نمسكها وحاسين انها مالهاش لازمه
    والمفروض علينا اننا نجح في كل ده

    أنا مش بشجعك على انك ترمي المواد دي ...بس عايزه أقولك ان في مواد بتفضلي تقولي انا نفسي أعرف انا باخد الكلام الأهبل ده ليه ... لكن لو دورتي ايه فايدته هتلاقي علاقته بالبرمجه كبيره
    احنا كنا بناخد
    statistics, Calculus (integration, differentiation,) physics ...... وحاجات تانيه كتيييييييير وماكناش عارفين احنا بناخد الحاجات دي ليه ساعتها لكن بعد كده وكل ماكنا بنطلع سنه كنا بنعرف ان الحاجات دي مهمه جداً جداً وعلاقتها بالبرمجه قويه كمان

    أنا رغيت كتيييير أنا أسفه :$

    من الأخر حاولي تحبي اللي بتذاكريه ... ماتنزليش لمستواه ... طلعي الماده لمستوى ذكائك انتي وهاتيلها أي علاقه بأي حاجه انتي بتحبيها علشان تقدري تحبي الماده وتعرفي تذاكريها
    وعلى فكره الماتلاب بجد ماده لذيذه جداً جداً جداً

    وربنا معاكي ويوفقك :)

    ReplyDelete
  7. :$:$:$:$
    مش عارفه أودي وشي منك فين :$ بعد الرغي ده كله ونسيت أقول حاجه ممكن تكون مش مهمه

    الكلام اللي أنا قلته ليكي ده لأني حاسه بيكي واتحطيت في مواقف شيل المواد دي كتيير ومنها كتيير ظلم برضه
    يعني أنا ولا بتفزلك ولا بتاع ... أنا بس الكلام ده عن تجربه

    :$ خلاص مش هاجي تاني هنا :$:$:$:$ا

    ReplyDelete
  8. صراحه مش عارف اقول ايه
    بس دا قدرك انك تدخلي الكليه دي

    انا اهوه في حاسبات بس تقريبا مليش علاقه بالبرمجه الا من كام شهر كدا علشان حاولت اذاكر بنفسي وبمساعده ناس تانيه

    مش هقول غير ربنا يكرمك
    وياريت متزعليش من الكلام دا
    بالنسبه بقي للتعليم يعني هنعمل ايه قدرنا برضه

    وبالنسبه للدش اللي في الكليه لازم
    ترضي بيه علي الاقل علشان تخلصي

    للمره التانيه متزعليش من كلامي
    واعتبري ان السنه اللي جايه شربه مره علقم لازم تشربيها علشان تخفي

    ربنا يوفقك دايما

    ReplyDelete

  9. كلامك ينطبق عليا 200 بالميه
    كل كلمه صح
    كليه كووووووووسه عندى
    معيدين ضايعين
    مفيش نظام
    هجص ع المكشووووف
    مواد ملهاش علاقه بالمجال
    انا مش بحب المجال اصلا
    دخلت الكلية بناء على المجموع
    بتعلم مع نفسى ديزاين وجرافيك
    بحاول انجح كل سنة والحمدلله بنجح صافى
    ودى اخر سنة
    ويارب اتخرج على خير وابقا خلصت الجامعه فى 4 سنين بالتمام والكمال ورا بعض
    وربنا يهيأ خير ويكرمك ويكرمنا يارب ان شاء الله ..
    وبصى ياهنادى بجد
    حاولى تذاكرى على قدر المستطاع وانا متأكد انك هتعملى كدا عشان تخلصى من الهم دا زى ما انا بعمل وكتير بيعملوا
    وان شاااااااااااء الله هتفرحى بالنتيجة ان شاء الله

    ReplyDelete
  10. السلام عليكم جميعا ورحمة الله وبركاته
    ادعوا جميع المتشائمين من التعليم أن ينظروا الي البوست الي عملته في البلوج بتاعي , بصراحة انا كنت هعلق هنا لكن لقيته هيبقا كبير أوي , جتلي فكرة اني أحطه في بلوجي وهو يبقي موضوع الناس تستفيد منه , واسف يهوندا لو كنت زعلتك
    Ahmed M Emara
    Security Service Provider
    Softlock

    ReplyDelete
  11. من امتى التعليم بيعلمنا ان احنا نهتم بيه ومنستهترش بيه وباللي بندرسه و بالأمتحان
    تعليم فاشل صحيح ومقرف
    خلينا واقعيين الأجتهاد الشخصي افضل من التعليم مليون مره اللي حيودينا ابو زعبل قريب

    ربنا يوفقك وعادي يعني ايه ماده ولا اتنين
    مش تفرق كتير !!

    ReplyDelete
  12. EncrYpted said...
    تعليم فاشل صحيح ومقرف

    نعيب زماننا والعيب فينا=وما لزماننا عيب سوانا ونهجوا ذا الزمان بغير ذنبٍ=ولو نطق الزمان لنا هجانا وليس الذئب يأكل لحم ذئبٍ=ويأكل بعضنا بعضا عيانـا

    هوا انتا حولت ومعرفتش حاول تذاكر وتحب المواد , ومتبصش دايما لنص الكباية الفاضي , بص للنص المليان , أرجو من الجميع ترك هذه الحالة من التشاؤم والهجوم علي التعليم والمعلمين , ولننظر للأنفسنا ماذا قدمنا وماذا فعلنا , يعني الدكتور ده اساسا كان معيد واساسا كان الاول علي الدفعة واساسا حضر وتعب وسهر لحد مبقا دكتور , انتا عملت ايه يباشا ؟؟!!!!!!!!

    ReplyDelete
  13. هوني عليكي يابنتي
    باما دقت علي الراس طبول
    مش عايز اكون محبط لكن افتكر اني سمعت مثل اجنبي بيقول (تمتع بالسيء فالاسوء قادم)
    انا بضحك اوعي تصدقي
    بس فعلا ايام الجامعه كان الواحد بيعد الايام عشان يخلص ولما خلصت تمنيت لو ارجع لها ولو ليوم واحد
    الحياه العمليه بعد ما ربنا يكرمك وتخلصي اصعب بكتير ومحتاجه نفس طوييييييييييييييييييييييييييل
    ممكن احكيلك مثال صغير واحكمي
    عن واحد مجبش مجموع عالي في الثانويه عشان يرروح كلية الهندسه
    فقرر انه يروح معهد سنتين مع انه كان قدامه كلية تجاره والحمد لله جاب تقدير في المعهد والتحق بكلية الهندسه
    وخلص الكليه بتقدير والحمد لله
    والتحق بمنحة وزارة الاتصالات وحصل علي شهادات محترمه في مجال الشبكات
    وبعدييييين!!!!!!
    مفيش شغل
    وبعد طول لف شغال حاليا في كال سنتر في شغلانه مش محتاجه هندسه من اصله فتخيلي مقدار الاحباط بعد المشوار الطويل ده
    وعشان الواحد يشتغل في مكان محترم اما
    واسطه او خبره
    لكن الحل ايه؟؟؟؟؟؟؟؟؟؟؟؟
    اهو مفيش الا انه يحاول ويدعي ربنا انه ييسر ليه ولجميع المسلمين الخير حيثما كان ثم يرضيه به

    ReplyDelete
  14. Ahmed Emara
    لا يا باشا حضرتك بقه المعيد اللي انت بتكلم عليه ده اتعين " بال ك و س ه "
    انا والله العظيم "احلف امام الله " اعرف حوالي 4 او خمسه حالات من المجتمع اللي حوليا معيديين بالكوسه والأول عليهم متعينش هااا اظن حضرتك مصري وعارف
    ثم مش لازم اقولك انا عملت ايه !!

    فرصه سعيده *_*

    ReplyDelete
  15. السلام عليكم
    ازيك يا هوندتي : )

    بقالي شوية مشفتش البوستات بتاعتك..اتاري الدنيا هيصه

    بصي بقى.أكيد انتي دلوقتي في جو ضغط..ده عادي..اعملي اللي عليكي دلوقتي و لما تخلص الامتحانات اقعدي شوفي ايه المشكله على رواقه و حليها مع نفسك عشان مهما حاولتي دلوقتي فقراراتك أكيد هتبقى ناتجه من الضغط..سواء كانت قرارات ايجابيه او سلبيه..و في الآخر الموضوع يخصك لوحدك..ميخصش حد تاني..عشان ده مستقبلك

    و بصي كمان يا هوندا..أنا مش هقولك انتي مستهتره..و للا هقولك انتي شاطره و للا مظلومه..دي حاجات انتي بس اللي تقدري تحدديها..لأنك أدرى واحده بظروفك و امكانياتك..بس لازم تكوني صادقه مع نفسك..يعني تشوفي فعلا لو مقصره في جانب ما تعالجي التقصير ده

    و انا بقولك ان اتس اوكى..يعني انتي مش اول واحده تروح ماده و تطلع ماده تانيه..أنا مره اكتشفت ان عندي امتحان بدء بقاله ساعتين و انا في بيتنا و فاكراه بعد يومين..رغم اني نقلت الجدول و مكلمه صاحباتي ليلة الامتحان و مراجعه الجدول كذا مره..بس أكيد في غلط حصل..و الموضوع ده حصل عشان ينبهني لشيء ما..يعني لحكمة ما..و جايز الحكمه دي اني اكون مقصره فعلا..ليه لأ. بيقولك
    Whenever u make a mistake u can take it back the moment u choose.. for the thing we call failure is not falling down..but staying down

    و أكتر حاجه تخليكي ستاي داون انك تكوني مش صادقه مع نفسك..آند آي نو انك عندك الشجاعه الكافيه انك تكوني صادقه مع نفسك يا هوندا

    و تحت الركام يا هوندا الا ما تلاقي حاجه تستاهل..يعني الدنيا صدقيني مش قاتمه اوي كده..و نظام التعليم مش سيء عندنا بس..صدقيني حتى في امريكا الموضوع كله حفظ..المهم في الآخر الانسان عنده رغبه انه يتعلم و للا لأ..و حتى الحفظ نعمه,,و ملكه متعلقه بصورة كبيره بالذكاء..مش عايزه اطول عليكي..بس واحده زيك يا هوندا تعرف تخلي الفسيخ شربات...و تعرف تخلي المواد اللي ملهاش لازمه ليها..أو على الأقل تاخد اللي ليه لازمه فيها..يعتمد على رؤيتك في الآخر يا هوندتي ;)..
    و كوني دايما بخير..دايما في سعاده و دايما في نجاح : )

    ReplyDelete
  16. السلام عليكم ورحمة الله وبركاته
    اتفق معك تماما أن التعليم في مصر متخلف تماما وأن الطلاب يتخرجون وكل همهم هو الشهادة ولا ينظر أحدهم بماذا خرج من التعليم فالتعليم يحتاج إلى تعليم آخر وكل ما يُدرس في الكليات يكاد يكون أشياء غير نافعة للطلبة أبدا في حياتهم العملية بعد ذلك وللأسف الشديد
    أعانك الله وأعان كل طالب في هذه الأيام ولا تحزني على تعب تعبتيه فلم يؤتي ثماره إن كان تعبك هذا لله فإن ما عند الله لن يضيع حتى ولو لم تدخلين الكلية التي تريدين أو تحصلي على التقدير الذي تبتغين فاحتسبي عند ربك فهو حسبك ونعم الوكيل
    لي تعليق آخر على كلمة قد صدرت منك وهو التي دفعتني لأن أعلق هنا وهي قولك " الشىء المشترك يوم امتحان الشفوى ويوم امتحان النظرى انهردة انى كنت لابسه نفس الاسدال +نفس الطرحه وعجبى " .... فإني أخشى عليك أن تكوني قد عصيت أمر رسول الله صلى الله عليه وسلم فعن أَبَا هُرَيْرَةَ قَالَ
    سَمِعْتُ النَّبِيَّ صَلَّى اللَّهُ عَلَيْهِ وَسَلَّمَ يَقُولُ " لَا طِيَرَةَ وَخَيْرُهَا الْفَأْلُ قِيلَ يَا رَسُولَ اللَّهِ وَمَا الْفَأْلُ قَالَ الْكَلِمَةُ الصَّالِحَةُ يَسْمَعُهَا أَحَدُكُمْ " رواه مسلم فالمسلم لا يتشائم وأحب أن أوضح أني أخشى عليك ذلك ولست أقول أنك تتشائمين فالله أعلم بما في القلوب فلا تسمحي للشيطان أن يدخل إليك من هذا الباب أبدا فيوقعك في ذنب والسلام ختام

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore