جرد نفسى


عندى 3 مشاكل مأزمنى من فترة ولحد دلوقتى مش قادرة احس انى باخد خطوة إيجابيه نحيتهم عشان احسنهم

1- المشكله الأولى : أغلب الناس ديما تقولى ان عقلى اكبر من سنى والكلام ده من زمان بس انا مكنش فى دماغى حاجة ،بس اكتشفت الجانب الصعب فى هذا الموضوع الى بيأثر جامد فيا ،إن اوقات كتيرة بمر بتجارب أكبر من سنى ولأن الناس بتعاملنى معامله واحده كبيره وعاقله ومختلفه عن الاخرين بينتظرو منى رد فعل معين تجاه اى تجربه او مشكله يكون صارم وقاطع ،لكن انا ممرتش قبل كده بالتجارب دى يعنى عند نقص خبره فمبعرفش اتصرف اوقات كتير وبحس ان تفكيرى اتشل فى اللحظة دى ،بحاول اسأل اصحابى والناس الى اثق فيهم اتصرف ازاى ؟ ومحدش بيخل عنى بنصيحه لكن بحس انى بواجه قصور فى رد الفعل واوقات اتأخر فى التصرف وده بيأثر عليا بعد كده وكمان الاقى كل الى حواليا بيتعامل مع القصور ده او الخطأ احيانا انه جريمه انا عملتها وان انا بالذات المفروض مكنتش اعمل كده ومكنوش يتخيلو إنى كده وسيبت ايه للاخرين
بس هما نسينو انى بمر بسنى الطبيعى؟ وان فى حاجات بتمر عليا لأول مرة واكيد عن جهل بأجزاء كتيره لأن لسه بتعلم وبكتسب خبره ،ببدأ اضغط واحاول ابقا قويه واتعامل مع الموقف بحزم عشان اتفادى الفشل بس ده بيسببلى ضغط نفسى جامد وبيخلينى ابان قويه قدام الناس عشان هما شايفين انى المفروض اكون كده ،فبكتم مشاعرى وصراعاتى جوايا وممكن أعانى منها وأوقات افضل اتجاهلها وده بيكون له أثر ع المدى البعيد وتكون النتيجه ان استحمل المواقف الشديده واما شوف طفل صغير بيبكى فى الشارع او بينضرب اعيط ،او يحصل اى موقف تافه من اصحابى اعيط لانى مبخرجش كبتى فى المواقف الكبيره فبتخرج فى حاجات صغيره

2-المشكله التانيه :ان بقالى فترة بتفهم غلط جدا وكل ماكون بتعامل بطريقه معينه مبتوصلش صح للشخص الاخر اكيد ده تقصير منى فى اسلوب التعبير ،انا اول مره اواجه حاجة زى دى فى الغالب بتكون مع الأشخاص الى مش عارفنى شخصيا او لسه متعرفين عليا جديد فمش بضايق الأول ،لكن بضايق لما احس ان الموضوع قلب بخسارة وإنى اتفهمت غلط ويتاخد عنى فكرة غيرى وبالتالى بحس إنى اتظلمت وبتخنق جامد واوقات من عجز الكلام احس انى مخنوقه ومش قادرة اتنفس !!!! بتصدم من الفهم فاوقات كتير معرفش ارد او ارد غلط وده لأنى مبكنش عارفه اعبر عن الى جوايا بالظبط من ضيقه وبحس انى اتحطيت فى قالب الخطأ ده ومش هينفع ابرره بالكلام ،غير ان اوقات الناس مبتحطش فى الاعتبار انى بنى ادمه وبغلط ،وبينجذبو لصفات كويسه فيا واول مايظهر صفه وحشه طبعا بيكون رد الفعل صعب اوى عليا مع انى دى انا خليط من الحاجات الحلوة والوحشه !!!

3- المشكله التالته:عندى كام حاجة كده غلط بكررهم كذا مرة ،وكل مرة اقول دى اخر مرة ،وكل مانضرر منها نفسيا اقول مش هسمح بده تانى والمرة الجايه هتفادى الى والى والى لكن بمر بنفس المشكله واوقات كتير بتصرف بنفس أسلوب الغباء الناتج عن تكرار الخطأ ،اكتشفت ان مش انا بس الى بعمل كده ناس تانيه كتير بس إزاى اتعامل مع حاجة زى دى من غير ماخسر نظرتى لنفسى واجلدها ؟غير إنى بدعى ربنا؟

مبحبش اكون سلبيه ،بحب احسن من نفسى مش هوصل للكمال بس هحاول اتجنب صفات مش صح او فيها جوانب نقص يمكن لما حط المشاكل دى قدامى اقدر الم بجوانبها واتعامل معاها، وممكن حد يقرأ الموضوع يكون اكبرمنى خبره ويقولى فكرة معينه او نقطه انا مش واخده بالى منها

افيدونى افادك الله

هوندا

19 comments:

  1. ازيك يا هنـادي , شو الاخبار وايه ااخبار الامتحانات الملعونه ؟؟
    مبدئيـا يا هنادي الكلام الي انا هكتبه ده اكيد انتي فاهماه كويس وانا متاكد من ده
    بس الي احب اوضحه بدايه ان الانسان طوال ما هوا عايش بيعدل ويقوم في نفسه لحد ما يموت
    وان الناس لما بيقولولك انك عقلك اكبر من سنك , هما زيي منتي قولتي بيتعاملوا مع العقل الي قدامهم , لكن انتي عشان تتجنبي موضوع انك ذو خبره قليله دي ان تراقبي الناس في تصرفات ومواقف شبيه من الي انتي اتحطي فيها وشوفي رده فعلهم ايه , يعني اسالي الناس هوا لو حصل كذا ايه ممكن يحصل ؟؟؟؟ !!!!
    بعد كدا ممكن تاخدي النتيجه دي وتطوعيها زيي منتي عايزه وتشوفي هل تتماشي مع تفكيرك ولا لا , واكيد ان كل واحد منا علي اختلاف عمره بيتحط في مواقف مبيبقاش عارف انهي تصرف سليم هوا الي يعمله , والكلام ده بينطبق علي اكتر الناس الي مجبوش ال 60 سنه , لان سمعت ان الانسان عمره بيبدء عند ال 60 لانوا بيكون فهم الحياه بالظبط , الا اني معارض شويه الرقم ده فالنصيحه الاولي انك تحاولي تشوفي الناس وتعملي زييهم .
    النصيحه التانيه بقي انك الكلمات الي انتي مش عارفه توصليها عشان تشرحي للناس بوجهه نظرك او يفهموكي صح , الحل انك تستخدمي اسلوب بسيط جدا ومصطلحات واضحه اكيد الناس مش هتفهمك غلط ساعتها , وهيفهموا الصح , وكل انسان معرض للخطـاء ومفروض كل واحد يعرف الجمله دي كويس لان احنا مش ملايكه , لازم نغلط ونتعلم من غلطنا ده , مشكله الناس دي بقي مشكله تانيه في انهم مش متقبلين الغلط في الحته دي يبقي دوري اني اوضحلهم كويس وهمـا حرين يفهموا زيي ما يحبو بس يبقي عملت الي عليا ووضحت انا ليه عملت كدا ,
    النقطه الاخيره لازم اكون قوي عشان مكررش الغلط مرتين وصراحه القوه دي مبتجييش مره واحده , مره تيجي واقول خلاص مش هعمل كدا تاني وتلاقيني عملت كدا , الحل بقي مش اني اقعد احطم في نفسي الحل , اني اقول اني اقدر اعمل كدا واكرر الجمله دي وان فشلت احاول تاني وعاشر ومليون وباذن الله اتخلص من الحاجه دي , لكن تانيب النفس ده مبيجبش نتيجه الا عكسيه فسيبك منوا .
    معلش طولت عليكي في الكـلام بس اتمني انوا يفيدك وباذن الله يكون دافع للتحسن دائمــا

    ReplyDelete
  2. ازيك ياكريم ،انا بخير الحمدلله متشكرة جدا ع ردك
    انا متفقه معاك طبعا ان الواحد هيفضل يعدل لحد مايموت ونقطه انى اراقب التصرفات فانت اوقات فعلا بتاخد بالك م تصرفات الناس الى حواليك وممكن تنصحهم ،بس مجرد انك تتححط مكانهم ممكنش متعملش الى انت قلتهم عليه فى الاول لان الى ايده فى المايه غير الى ايده فى نار واوقات بتحط تصرف صح قدامك انك تحققه بس متقدرش ومن هنا بيكون الاحباط

    ونقطه التانيه انى احاول استخدم مصطكلحات واضحه فده فعلا الى انا محتاجاه وبحاول اوصله
    بس طبعا محتاج منى وقت ....مش هييأس

    ReplyDelete
  3. بحب كلمة جميلة لبيل جيتس .. بيقول فيها الخطأ معلم ناجح جدا ..
    لإنه كلنا بنغلط .. بس إمتى يكون الغلط ده فعليا ؟؟ لما مانحاولش نصلحه .. ونفضل جاعدين جنب الحيط بنقول إحنا منتقصين وغالطانين !! الحياة مش هاتستمر بالطريقة دي !! حاولي تفهمي للأشخاص دول وجهة نظرك بصراحة وبوضوح .. من غير ما تقولي كلام يجرحهم .. لإن وقتها الوضع هايزداد سوء .. وبالنسبة للخبرة ماتقلقيش .. المهم متسيبيش المحاولة .. وإنك تتعلمي من كل موقف يحصل
    تحياتي
    :)

    ReplyDelete
  4. كريم

    بس اما نحاول وفى نفس الوقت نرجع نغلط تانى حاجة تخنق ،مبقاش اقصد اجرح الشخص الى قدامى فده بيحصل غصب عنى
    :(
    بس اكيد محدش بيحب يبقا غبى
    وادينى بحاول اتعدى المرحله دى هههههه

    ReplyDelete
  5. انتي فعلا انسانة كويسة , لكن في نفس الوقت حساسة جدا , ولوو حولتي ترضي كل الناس مش هتعرفي , لكن طالما معملتيش حاجة غلط متلوميش نفسك , بس هسأل سؤال البلوج ده فيه جزء يخص الحادث الاخير صح ولا غلط , يعني من نوع الفهم الخاطئ وحجات كده , لا انا بكررها ربنا يكرمك انتي انسانة كويسة ولا نذكي علي الله أحد

    ReplyDelete
  6. بالنسبة للمشكلتين الأولانيين يا هوندا والله انا كنت بعاني منهم لحد وقت قريب
    بس بفضل الله الحكاية بدأت تتظبط معايا شوية
    وبناء على تجربتي انا اقدر اقولك ان احتكاكك بالناس ـ وخصوصا الناس اللي اكبر منك ـ ده هيغير في شخصيتك كتير وهيفرق معاكي اوي
    وكمان انا اعرف ان بتشتغلي يعني ان شاء الله المسألة مسألة وقت وكسب خبرة وكله هيبقى تمام بإذن الله

    المشكلة التالتة بقى مش هقدر افيدك فيها لأني زيك بالظبط ف القصة دي

    :)

    ReplyDelete
  7. الاولي أنا مش مشترك معاكي فيها لكن في الثانية والثالثة أنا زيك تمام

    بسن مش عارف أعمل ايه بصراحة

    ReplyDelete
  8. هوندا بصي يا ستي المشاكل اللي انت بتقولي عليها دي مش مشاكل كل الموضوع خليكي واثقة في نفسك و اللي مش عارفاه او ممرتيش بيه قبل كدا قولي انك ممرتيش بيه قبل كدا حتة انك بتتفهمي غلط هييجي الوقت عليكي و تتفهمي صح بس خليكي واثقة في نفسك خليكي انسانة قوية ان الله يحب المؤمن القوي اما بالنسبة للاخطاء اللي بتتكرر مين في الناس ملوش اخطاء كل اللي عليكي في كل اللي قلتيه انك تعملي عملية تصالح مع نفسك و متبقيش قاسية عليها عشان القسوة دي هتولد عندك تبلد بعد كدا ابدئي صفحة جديدة مع نفسك و واجهي الحياة و الناس بقلب و بنية سليمة و بصي فيه حديث حلو اوي مش حافظاه بالنص بيقول ان لو اجتمع اهل الارض انسهم و جنهم مش هينفعوكي الا باللي ربنا كاتبهولك و لو اجتمعوا عشان يضروكي برده مش هيضروكي غير باللي ربنا كاتبهولك طول ما نيتك سليمة ماتخافيش من حاجة و ابتسم للحياة تبتسم لك

    ReplyDelete
  9. مش عارغه أقولك ايه يا هوندا
    بس المشاكل اللى انتى بتقولى عليها دى أنا مش شايفاها مشاكل خالص
    وفى ناس كتير كده
    كل اللى أقدر أقولهولك
    ربنا يوفقك ويقدرك على فعل الخير

    ReplyDelete
  10. الاستاذه هوندا
    احب قبل ان اعلق علي هذا الموضوع ان اهنئك علي شجاعتك في سرد افكارك وتجاربك وايضا علي ان اصبح للمدونه"مريديون" يتجاوبون معه ويتبادلون النصح والافكار معك ادامها الله عليك نعمه

    بالنسبه للنقطه الاولي علي قدر ماهي نعمه في ظاهرها الا اني اتفق معكي علي انها احيانا تصير مشكله لصاحبها ,عن تجربه شخصيه كنت سعيد طول عمري اني كان يطلق علي اكبر من سني وكانت صداقاتي كلها لاناس اكبر مني. صحيح استفد من خبرات هؤلاء الناس وجعلني هذا الامر لا اقع في كثير وليس كل الاخطاء التي ممكن ان يقع فيها من هو في سني ولكن لم اشعر بمشكلة لهذا الامر الا بعد ذالك حينما احسست اني لم اتمتع بسني واعيشه باخطاءه وتجاربه وصداقاته وتمنيت الا احاسب علي اخطائي الا علي قدر خبرتيي وسني وايضاولدت عندي صراعات مابين الرغبه في ان اصبح كما انا لا كما ينتظر مني الاخرين ان اكون

    ولكن ازكرك وازكر نفسي واخواني بحديث النبى : " إن لله عباداً اختصهم بقضاء حوائج الناس ، حببهم فى الخير وحبب الخير إليهم هم الآمنون يوم القيامه" نرجو الله ان نكون منهم كما ازكرك بقول "يثاب المرء رغم انفه" الهم تقبل منك وسددك للصواب

    اما بالنسبه للنقطه الثانيه فصدقيني انت لن تستطيعي ان تجعلي كل الناس راضين عنك فاهمين لكل تصرفاتك لكن ان صلحت النوايا وتوافر الاخلاص فيسهل ان تصححي للاخرين بكل لين وحب انك اسيء فهمك

    اما بالنسبه للنقطه الثالثه فلست بافضل حال منك ولكن اظن انك ماتفعلينه الان بدتوين تلك الاخطاء حتي ولو بصوره شخصيه بينك وبين نفسك سيساعدك كثيرا علي عدم تكرارها فتذكير المرء لنفسه لتلك الاخطاء ومحاسبتها عليها يجعله دائما متيقظا لها ولو بصوره لا شعوريه محاول ان يتجنبها دائما ولكن يبقي اننا بشر نخطا ونصيب وخير الخطائين التوابين

    ReplyDelete
  11. ازيك يا هوندا ان شاء الله تكوني بخير ،، انا كمان بعاني من مشكلة العقل اكبر من السن وسببتلي مشاكل فى مواقف مريت بيها وبردو موضوع اني اتفهم غلط حصل وبيحصل معايا ومش عارف ليه ..

    انا للاسف مقدرش افيدك لاني محتاج الى يفيدني فهتابع التعليقات ان شاء الله علشان استفاد منها

    ReplyDelete
  12. Ahmed Emara

    متشكرة جدا ربنا يكرمك،هو فى الحقيقه انا كنت بتكلم عموما لانها بتحصلى كتير ولكن ده ميمنعش انك بردو كنت فهمت غلط بس حصل خير
    :D

    *************
    آلام وآمال

    بإذن الله هو الحمدلله اغلب اصحابى اكبر منى :)
    بس فى حاجات مبتنعلمهاش جامد غير اما نمر بيها

    ReplyDelete
  13. فعلا يا هوندا
    حكايه انك اكبر من سنك دى مزعجه اوى
    اصلى مجرباها
    كله يبصلك كده ويقول ايه اللى بتعمليه ده ماحدش عاجبه حاجه خالص

    سيبك منهم

    المشكلتين التانيه والتالته بقى امرهم سهل
    وهيروحو مع الوقت يعنى مسير الناس تفهمك ومش تزعل تانى

    بس كده
    :)

    ReplyDelete
  14. أبو مروان

    بصرة :D

    **********
    monalisa_smile

    متشكرة جدا يامنمن ربنا يكرمك بجد ياحبيبتى بس صدقينى الموضوع ملوش دعوه بالثقه فى النفس لان الواحد بيحاول يحسن نفسه ويكيف نفسه ع التعامل الجيد مع الاخرين والمشاكل
    بس ده ميمنعش انى متفقه معاكى فى كل حرف لان جلد الذات شىء قاسى جدا عليها

    ReplyDelete
  15. بتأسف على التأخير في الردود على البوستات اللي فاتت
    بس بجد البوست ده في 3 مشاكل مش عندك لوحدك انما كتير بيواجهه ع الاقل نوع واحد منها
    وانا منهم بس دايما بحاول اتصرف بطبيعتي واكون تلقائيه حتى لو كلامي هيزعل غيري ولو تصرفاتي مش هتعجبهم بس لو واجهت تناقدات بفعل ما بحاول اتجنبه وحتى المواقف اللي بتواجهك مهما كانت صعوبتها حاولي برده انك تتصرفني بطريقه تريحك انتي وترضيكي لان كل واحد لي وجهة نظر في حل مشكله ما ..
    وربنا يبعد المشاكل عنك يا رب وتتحل ان شاءالله

    سلام ياقمر

    :)

    ReplyDelete
  16. Butterfly

    هيا ممكن بتختلف انها مشاكل من شخص للتانى
    :)
    ربنا يوفقنا جميعا

    ***************

    Ahmedmasar

    متشكرة جدا :)
    انا بحب اننا نتبادل الافكار عشان نستفيد من بعض

    اشكرك ع ردك جدا خصوصا انك لفت نظرى لحديث الرسول صلى الل عليه وسلم وانا مفكرتش فى النقطه دى قبل كده بجد جزاك الله كل خير

    وانا فعلا اما حطيت الموضوع ده قدامى عشان يبينلى جوانب المشكله اكتر وعشان افتكرها ديما

    ReplyDelete
  17. Hawy PHP

    الحمدلله بخير ازيك انت ،ولا يهمك واضح اننا كلنا كده ههههههههه عموما تابع فى ناس هنا بتقول كلام جميل جدا

    ******************
    بندقه

    مش مزعجه اوى اوى يعنى ساعات بتكون كويسه
    :D

    ReplyDelete
  18. M e r o

    صح ياميرو فعلا مفيش اريح من انك تكونى ع طبيعتك وبمرور الوقت الى قدامك هيفهم ان دى انتى
    بعد كده لو مش عاجبه هو حر بقا هههههههه

    ReplyDelete
  19. بالنسبه للمشكله الاولي احب اقول بس ان الخبرة مش عندد الموافق الي اني وجهتيها بس ...
    لا الخيرة هي عدد الموافق الي واجهتيها و المواقف الي شوفتيها بتحصل قدامك ...بس مكنتش ليكي و المواقف الي الواحد بقراها لناس قبل كدا ...او بيسمعها ...

    حل المشكله من وجهه نظري و دا الي انا كنت بعملو شخصيا اني مش بخوض موقف كبير الا لما استشير اصحابي .. لان اكيد كل واحد حيبص للموضوع من وجهه نظر مختلفه ...
    اتعودي علي كدا في المواقف الكبيرة ...
    حاولي خوضي المواقف العاديه لواحد و كوني علي ثقه انك قدها...و متندميش علي حاجه طلاما انت عملتي الي عندك .. و هو دا اخرك ساعتها ...
    و بعدين مفيش حاجه بتيجي بالساهل ...
    :)

    الموضوع الاخير دا بيعتمد علي ثقتك في الله و قوه الاصرار و الاقتناع باللي بتعمليه ...
    و كل واحد ادري بنفسه و عارف هو يعرف يدخل لنفسه من فين ...علشان يهذبها

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore