هتلبسنى تهمة؟


Hack ,Hacking ,Hackers
Crack,Cracking,Crackers

الهاك مصطلح احنا فهمينه دلوقتى على أنه اختراق لأجهزة الكمبيوتر والى بيعمل ده بيسموه ايه؟؟؟؟هاكرز برافو عليكو
ده طبعا مفهوم غلط لأن الهاكرز المقصود بيها الشخص الملمّ بعلوم الكمبيوتر ولما يهاك يعنى بيدووووس فى النظام وبيوصل لكل كبيرة وصغيرة فى الكمبيوتر او بمعنى أدق بيحاول يوصل لكن مش أنه يأذى الناس لأ عشان هو بيتعلم وبيطور نفسه

الناس بقا الى بتسرق الأجهزة وتبوظ الدنيا دول بقا اسمهم كراكرز جايه من كراك يعنى يكسر او يخرب حلو؟
دلوقتى الفريق بتاعى اسمه الهاكرز وكل ماقول لحد كده طبعا بيقولى ايه ده يعنى بتعرفى تدخلى ع أجهزة وتسرقى إيميلات؟طبعا بتفقع وبوضحلهم المعنى المقصود إننا نقصد نتعلم كتير فى الكمبيوتر بتميز.


عملت جروب على الفيس بوك اسمه خلى بالك ممكن يحصلك هاك بعد ماعرفت ان الفيس بوك مش أمان خالص وفيه ثغرات وبعد ماشفت مواقف لناس أعرفهم والاشتراكات بتاعتهم اتسرقت فقلت البنات أصحابى الى حاطين صور لو الاشتراك بتاعهم اتسرق ممكن يتأذو فعملت الجروب عشان نحذر الناس من النقطة دى ليس إلا ولو لقيت أى حاجة ممكن تفيد بحطها فيه حلو؟

من اسبوع كده مذيع من قناة ما بعتلى رسالة انه عايز يستضفينى عشان يناقش فكرة الجروب واستغربت جدا لأن اجروب مفيهوش شغل أوى وانا عاملاها خدمة مش احتراف لأن ده مش مجالى خالص، وكنت وقتها بمتحن فاعتذرت وقالى خلاص بعد ماتخلصى عرفينا ،فقلت مفيش مشكله مش بخسارة وبعد ماخلصت امتحانات عرفته واتحدد ميعاد ووو بس كل ده من غير ماأعرف تفاصيل وكل ماطلب منه تفاصيل مكنش بيفدنى المهم اتخنقت وقلت اما نشوف الاخر ،اخر مكالمة لما سألته ع التفاصيل وحضرتك هتتكلم فى ايه؟

لقيته بيقولى هسألك عن الى بتعملوه فى الجروب والهاك الى بتعملوه وعلاقتك إيه بالهاكرز ووو،انا طبعا سمعت الكلمة وتنحت قلتله لأ أنا مبعملش هاك ،قالى لا لا المفروض تقولى الحقيقة،قلتله لا والله أنا فعلا مبعملش كده ،قالى امال بتعملى ايه ؟،قلتله أنا بس بحذر الناس انهم ممكن يحصلهم هاك وأن....... وهوب الموبيل بتاعه فصل شبكه لأنه طول اليوم كات بيفصل واتغرمت ع الفاضى فقلت بركة ياجامع وكبرّت ومتصلتش تانى،
وفضلت افكر لو كنت رحت ولقيته بيقولى كده فى البرنامج كان هيحصلى ايه اعتقد إنى كنت هتقفش وأنا خارجه م التلفزيون هو ناسى إن دى فيها حبس؟؟؟انا منكرش انى قرأت شوية فى المواضيع دى بس بغرض إنى أحمى جهازى مش إنى أسرق أجهزة حد
واضح أن الأستاذ مكلفش نفسه أنه يبص بدقة فى الجروب ويفهم كويس بيتكلم فى ايه واستغربت جامد بناء ع ايه بعتلى رسالة؟؟؟

يعنى كان هيتكلم معايا كده من دماغه لمجرد تخمين من اسم الجروب عشان فيه كلمة هاك

ده أنا كنت هتظبط لو رحت البرنامج فعلا الحمدلله ربنا ستر وتانى يوم بعتله رساله اعتذار إنى مش هاجى
عجبى ع مذيعين مصر


هوندا

24 comments:

  1. ناس كتير فعلا فاهمه المصطلح غلط , سمعت مره واحد في السايبر شكله كان عامل نفسه بيفهم وبيقول للتاني : "الجهـاز ده عليه برامج هاكرز :D "
    بس بيني وبينك , كان مفروض تقولي الحقيقه يا هنادي الكدب ملوش رجلين (;
    شكرا علي البوست الجامد وربنا يوفقك

    ReplyDelete
  2. ههههههههه حلوة برامج هاكرز دى
    :D
    معلش بقا الصدمة بتوقف اللسان بردو هههههههه
    ربنا يوفقك انت كمان

    ReplyDelete
  3. طيب طلاما انتي هاكر جامد كدا

    ما تعلمينا بأه

    هههههههههههههههههههههههههههه


    موقف فعلاً محرج .. بس دا لأنه هو مش فاهم

    عامه هما فعلاً الهاكرز لمفروض انهم يعرفو كل حاجه

    وبعدين جزئ منهم بدأ يهتم بالأختراق لحساب

    ناس و فلوس و كدا

    الموضوع مغري :) برده يا جماعة

    وبعدين الناس المحترمه من الهاكرز

    خدوا جنب من الناس ديه

    وسموهم كراكرز

    وعلى راي المثل

    ابن الهاكر كراكر

    تحياتي

    ReplyDelete
  4. ع فكرة الناس الى م الاول اطلقو ع نفسهم كلمة هاكرز كانو زى لينوس ترافولتا الى عمل نظام اللينكس
    واكيد جزء منه اختراق عشان يتعلمو مش عشان يأذو حد يعنى تلاقيهم بيخترقو بعض ليس الا هههههههههههه
    اقصد ان هدفهم الأساسى مكنش الأذية

    ReplyDelete
  5. شكرا على التوضيح دا ياهوندا
    وفعلا ناس كتير واخدين الكمله زى ما انتشرت وكله بيقول هاكرز ههههههه

    بس صحيح لو رحتى التلفزيون وسألك يلا بقا بتعملى اختراق ازاى كنتى هتقولى اطلع فاصل ياكبيرنا ههههههههههه

    بس الحمدلله ان الموبيل فصل هههههههههه

    ReplyDelete
  6. هههههههههههههه
    وحشتيني يا بنتى ووحشتنى مواقفك النادرة دي
    بس بجد فيه ناس بتتعامل مع الشغل على انه سلق و خلاص و عك عك ربك يفك
    مش عارفة امال بيطلعوا في التليفزيون ازاي و هما مش فاهمين هيقولوا ايه
    بس انا لو منك و كنت رحت البرنامج فعلا كنت أحرجته قدام الجمهور بتاعه علشان ما عندوش ضمير في شغله
    عموما تعيشي و تاخدي غيرها
    و شكرا على معلومة الهاكرز دي لأنى ما كنتش اعرفها بردو كنت جااااهلة
    ههههههههههههه
    بحبك على فكرة

    ReplyDelete
  7. moataz

    العفو :)
    بس جامدة اطلع بفاصل ياكبيرنا دى هههههههه

    **********
    الحلم العربي

    وانتى وحشتينى اكتر واكتر ربنا يوفقك :)
    والله انا مش فاهمه ليه مع ان الاجتهاد بيضيف اهمية وإفادة اكتر وبيجذب ناس اكتر للبرنامج
    ربنا يسهلهم ،بس معتقدش انى كنت هعرف احرج حد فى الموقف ههههههه

    ع فكرة
    بموت فيييييييييييييكى

    ReplyDelete
  8. مسأله ان الواحد يحكم على الشىء من مجرد نوان او كلمة او كلمتين دى مشكلة
    والواحد بيعانى منها أيضافى التدوين
    تلاقى الواحد دخل قرا كلمتين متفرقتين فى الموضوع ويلغبط بعد كده فى التعليق
    جزاكم الله كل خير
    السلام عليكم

    ReplyDelete
  9. mo'men mohamed

    وعليكم السلام ورحمة الله وبركاته
    اه والله فعلا حصلت عندى كذا مرة وبتفقع اوى م الاستفزاز لانه ممكن يدخل يغلط فيك او يهاجمك ع فكرة محصلتش اصلا ههههههه

    وجزاكم مثله

    ReplyDelete
  10. مع ان في اكبر المنتديات يكون كاتب
    منتدي قسم الهاكرز
    كيف تسرق ايميل زميلك والاي بي بتاعه

    بس الشائع دلوقتي ان الهاكرز دول اللي بيخترقوا الاجهزه

    توضيح جامد يا هوندا
    تحياتي

    ReplyDelete
  11. :)))

    احمد يوسف هو اللي كلمك؟
    لو هو احنا ممكن نصححله المعلومة
    وبردو هيرحب بفكرة الجروب ان شاء الله ونخليه يستضيفك يا هووووووندا

    إذا كان هو فعلا برنامج أي تي شو قوليلي وانا ابعتله .. دي فرصة كويسة
    بس هتضطري تيجي القاهرة بقا
    :))

    ReplyDelete
  12. انا كنت فاهم المفهوم غلط
    شكراً على التوضيح
    :) :) :)

    ReplyDelete
  13. انا اول مره ازورك وبجد مدونتك جميله خالص
    بالنسبه للبوست ده فعادي جدا يعني ان يكون مذيع وهيقدم حاجه ومش عارف ولا فاهم فيها حاجه بقى ده موجود كتير وعموما ماتزعليش فيها ايه لما تكوني هاكرز علشان تعملي رعب بقى وتخوفي الناس هههههههه
    احلى حاجه قولتيها اننا فعلا نقرا عنه بس مانعلموش وانا ناويه اعمل كده صحيح انا حاسوباتيه بس ماعرفش فيه خالص بصراحه يلا بالتوفيق ليكي يارب

    ReplyDelete
  14. طيب الحمد لله انك مروحتيش علشان شاكله هو اللي كان هيبقي وحش جدااااااا وانتي برضه كان ممكن تستغلي البرنامج وتنشري فكرتك بس حصل خير
    جزاكم الله كل خير

    ReplyDelete
  15. دي كانت تبقى فرصة كويسة لو روحتي البرنامج و صححتي المعلومة للناس

    زمان المذيع لقى حد تاني يتكلم عن الهاكرز بمفهومه هو

    ReplyDelete
  16. هههه
    معاكى حق
    برضه أنا كنت بفهم أصحابى كده
    بس موقف لذيذ
    تحياتى

    ReplyDelete
  17. غريبه انه يعمل موضوع و هو اساسا مش عارفه اصله ولا هو هيتكلم فى ايه بس المشكله ان ده بيكون شغل المعد ومش بيقع فيها الا المذيع و برده يمك ان اغلب الناس فاهمه المصطلح غلط انا شخصيا كنت فهماه غلط ومعرفتهوش الا منه سنه واحده بس لما كنت بناقش حد من الاخوه الهاكرز الجامدين وشرح لى الفكره كلها من الأالف الى الياء بس جزاكم الله خيرا على التوضيح يا دودو و ربنا يكرمك

    ReplyDelete
  18. السلام عليكم ورحمة الله وبركاته
    بمناسبة الهاكر للعلم هناك شهاده معتمده دوليا اسمها
    (ethical hacking)وهي
    وترجمتها الهاكر الاخلاقي وهو من الكورسات االاحترافيه المطلوبه جدا وهي وظيفتها ان تقوم بالحمايه من اي هجوم من خلال الهاكرز حيث تهتم بسد اي ثغرات ممكن يستعملها الهاكرز

    ReplyDelete
  19. GeHaD

    نقص معلومات بقا هنعمل ايه؟؟؟

    ********
    آلام وآمال

    طبيعى هنزل القاهرة :)
    مش التلفزيون بردو
    انا مكنش عاجبنى حاجات محددة ومش متمسكه اوى بالموضوع يعنى ان شاء الله يجى فرصه أفضل

    **********
    mo5tar

    العفو :)

    ReplyDelete
  20. حاسوباتيه

    متشكرة خالص :))
    لا ياستى اخوف ايه بس هو انا بعبع ههههههههه
    احنا بنهاك عشان نتعلم مش بنتعلم عشان نهاك هههههههههههه

    ************
    الفاتح الجعفري

    ماهى النقطه انه اكيد هيكون مجهز كل حاجة بناء ع فكرته الحمدلله ع كل حال

    ReplyDelete
  21. M@RV3l

    مكنش ينفع فجأة طبعا لأنه هيكون معد اسئله معينه ،لو كان قبلها اوك بس هو حتى مكنش اتكلم بعدها فعادى بقا

    *********
    funckydoctor

    لا لا لا خلى عندك حسن ظن بعد كده

    ReplyDelete
  22. dreamer

    وجزاكم مثله ياهبهوب بصى هو اساسا معد ومذيع فاهمه فعشان كده هو الى بيجهز

    ********
    Ahmedmasar

    وعليكم السلام ورحمة الله وبركاته
    متشكرة بجد ع الاضافه دى انا اول مرة اعرفها ديما ردودك مضيفه
    ربنا يكرمك

    ReplyDelete
  23. على فكرة انا كمان ما كنتش اعرف الفرق
    خلينى ساكتة
    بلاش فضايح بقى

    الواحد اتكسف و الله
    هههههه

    ReplyDelete
  24. هههههههههههههه ولا يهمك ياجيداء انا بردو فى وقت مكنتش عارفه عااااااااادى

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore