للرغى فنون



ايه رأيكم فى التيمبلت الجديد شكل المدونة اتغير صح؟

حاسه انه بقا هادى شوية التانى كان مشعنن حبه
بس ده منظم أكتر وبصراحه بيريح العين
هو كان فيه لخبطه كتير بس حاول اعدلها ع قد ماقدر وباقى حاجات بسيطه جدا زى البدج الى جمب اسم البوست لسه مش عارفه اظبطه
كمان ممكن تلعبو بالحاجات الى فى الجمب وتحركوها زى مانتو عايزيزن وتقلبو شكل البلوج يعنى الارشيف فوق الشاوت بوكس تحته وهكذا
التعليقات فوق ع عكس المعتاد بس هحاول انزلها تحت!

اكيد أخدتم بالكم إنى كمان غيرت اسم المدونة من رغايين.سبوت ---للرغى فنون

ممكن ناس تحس ان الاسم الأول أظرف ويمكن انا لسه متعودتش ع الاسم الجديد ومنكرش انه كان سبب كبير فى شهرة المدونة وناس كتير من اصحابى كان بيعلقولى عليه طب ليه أنا غيرته؟
لسببين :

السبب الأول: إنى بصراحه بكره الفرانكو ارب جدا ومع ذلك أوقات كتير بتتسرب منى مصطلحات فى وسط الكلام وكمان انا مركزتش اوى وانا بختار اسم المدونة ان سبوت ده اسم انجليزى فى الأصل وبعدين اما كنت كل شوية اتكلم مع حد انى بكره الفرانكو اكتشفت فى مرة اسم المدونة واتكسفت جامد من نفسى وكل مرة اقول أغيرها واتردد عشان هيبقا اسم جديد وتاااااريخ المدونة ههههههههههه
المهم كان لازم أخد خطوة خصوصا انى كل ماقرأ فى كتاب الاقى الناس بتتكلم ع الاحتلال الثقافى الى طغى علينا كشعب وخلانا بنستعمل الانجليزيه فى كتير من كلامنا ودى حاجة مش حباها نفسى ان اقل حاجة فى حياتى تبين انتمائى للغتى للدينى لبلدى وهكذا فدعوه لإحلال المصطلحات الإنجليزية باللغه العربية الى فعلا ليها مذاق خاص لما نصفالها بس ونندمج فيها

السبب التانى :ان الاسم الأول كان عااام شوية يعنى متحسوش ليه هدف أوى وكمان كان بيدى انطباع لبعض الناس الى دماغهم جامدة جدا ههههههههه فيدخلو يهرجو وبصراحه انا اخر حاجة اكرهها التفاهه ومحبش ان حد يتعامل مع مدونتى كده لأن الموضوع ده بيضايقنى جدا المدونة بالنسبة لى رسالة احتسب بكل فكرة بكتبها ووجهة نظر بقولها النيه ف الثواب فكنت محتاجة احدد الاسم شوية يعبر عن معنى واضح
للرغى فنون
يعنى هرغى بس بفن ،مش هحكم ع نفسى انى فنانه بس باسلوبى والى اقدر عليه هحاول انى اتكلم براحتى بأسلوب كويس بأفكار كويسه بكل حاجة كويسه لو حاولت انى اعملها اكيد ربنا هيقدرنى وهوصلها

هذا كل شىء مارأيكم؟؟؟؟؟
ياريت نساعد بعض فى منع موضوع الفرانكو ده قدر الامكان وتذكرونى ديما لو غلطت

28 comments:

  1. مبروك يا هنادي علي الاسم الجديد والاستايل , فعلا احلي من الاولاني , والاسم كويس ولذيذ مش غريب يعني
    انا معاكي في نقطه اننا نستخدم مصطلحات عربي وده الي بحاول اعمله دلوقتي عندي في البلوج
    بحاول اعرب حاجات كتير , بس ساعات بتتتعارض مع حجم الخط وده احد الاسباب الي مخليني مش راضي احول البلوج للقرايه من اليمين للشمال
    لكن انا معاكي جدا في فكره عدم استخدام المصطلحات الاجنبيه
    بس لازم العمليه دي تاخد وقتها ,لان كلوا بيبهت عليه الطابع الاجنبي , عشان ثقافتهم المنتشره عندنا والي بتزيد مع الوقت بصوره كبيره

    ReplyDelete
  2. الاول مبروك على القالب الجديد

    انا باحب درجات اللون الازرق مريحة للعين وبتوحي بالصفاء

    ومبروك على تغيير اسم المدونة

    عجبني جدا بوست التعليم من فوق

    وح ارد عليه بالتفصيل

    بس حبيت اجي اهنيكي الاول على التغييرات دي

    ومبسوطة قوي علشان بتعملي حاجات حلوة وكمان بتنقلي تجربتك

    دي مفيدة قوي
    وانا باحب اتعلم فبيعجبني الناس اللى بتحب تشرك الناس في تجاربهم

    عارفة
    بيبقى تعليم جماعي

    تتعلمي وتعلمي في نفس الوقت ناس تانية

    مبروك كمان مرة ياست الكل

    تحياتي

    ReplyDelete
  3. نسيت اقول حاجة مهمة جدا

    عجبني جدا التطرق لموضوع التغريب وطبع ثقافتنا العربية بتقافات اخرى اثرت علينا وجعلتنا اشخاص باهتين

    لا نحن غربيين
    ولا عرب

    حاجة لا طعم لها ولا ملامح

    للاسف الشديد هذا مايحدث في حياتنا ونحن نساهم فيه بقصد او غير قصد

    موضوع الغزو الثقافي والحفاظ على الهوية من الموضوعات الهامة ويحتاج لنقاش كبير

    سأعود لاحقا

    تحياتي

    ReplyDelete


  4. جدعة يا بنت

    حركة شجاعة جدا انك تغيري الاسم .. بس شوفي انتي عشان غيرتيه بالنية دي .. ربنا هايباركلك وبكرة المدونة دي تبقى اشهر مما تتخيلي :)

    واللون الازرق .. سبحان الله على الصدف .. انا لسه كاتبة بوست عن اهمية اللون ده في حياتي :D

    بس ملحوظة زغنتوتة بالنسبة للتمبليت (أو نقول القالب ههههه ) ... انا اتلخبطت شوية لما جيت اكتب التعليق .. احنا متعودين ان لنك التعليقات يكون في اخر البوست .. يعني افتكرت ان البوست ده اتكتب فيه 22 تعليق وقلت ايه ده البوست لسه نازل دلوقتي ... لحقو يوصلو 22 ؟؟ هههههههه

    انتي فاهمة عليا مش كدة ؟
    :p

    انو بس لو تحاولي تخلي اللنك باين اكتر من كدة ,, او تنقليه تحت البوست

    ومبروك يا ستي النيولوك (ملهاش كلمة عربي دي )

    تحياتي :)

    ReplyDelete
  5. السلام عليكم ورحمة الله وبركاته

    الف مبروك التمبلت ده هايل بجد

    اما تغيير الاسم عادي هاناخد شويه وبعدين هانتعود

    ولا يهمك


    سلام

    ReplyDelete
  6. بتجيبي الحاجات الحلوه دي منين؟؟؟
    علي العموم مبروك
    هو انتي عامله ان الضيف يعني ممكن يرتب الحاجات اللي في الجمب علي مزاجه
    لفته لطيفه منك

    علي فكره يعني انا مبحبش الفرانكو ارب دا
    مدام اللي بيحشر كلام انجليزي في النص دا شاطر اوي كدا ميتكلم انجليزي علي طول ولا لازم يقول للي قدامه ان ثقافته عاليه بالحشر

    ReplyDelete
  7. Mutati0N

    الله يبارك فيك :)
    اكيد طبعا الموضوع بيحتاج وقت بس احنا بنحاول قدر الإمكان لحد ماهنوصل فى يوم اننا نظبط كل حاجة
    انا مجربه فعلا موضوع الخط ده خصوصا انك بتستعمل مصطلحات انجليزى
    بس واحدة واحدة تظبط
    ان شاء الله

    ReplyDelete
  8. Bella

    الله يبارك فيكى :)
    انا كمان بحبها لانها فعلا مريحه،
    انا فعلا بحب التعليم الجماعى عشان الثواب ههههههه
    بحب اننا نتبادل الأفكار والآراء لان كتير مش بنكون واخدين بالناس من نقط معينه فلما حد ياخد باله من واجبه انه يقول للناس الى حواليه ع قد مايقدر عشان ننشر الأفكار الصح

    بالنسبة لموضوع الثقافه الغربيه أصبح جزء من ثقافتنا احنا كشعب مصر للأسف الموضوع ده شغلى بالى جدا من 5 سنين أول مااتلفت نظرى للنقطة دى بحاول احارب نفسى فى الموضوع ده لانه منتشر بغباء بشكل ينتقلك تلقائى

    تنورينىىىىىى ديما

    ReplyDelete
  9. عـلا - من غـزة

    ياسيدى ع التفاؤل متحرمش ابدا منك :)

    صدف جميله الى تجمعنا ع لون حلو زى ده
    تصدقى لفتى نظرى لكلمة تيمبلت جاسوس هههههههههه
    متشكرة ع اللفته دى وانا حاولت انزله بس مرضيش ههههههههههه
    بس تخنت الخط شوة

    ReplyDelete
  10. خمسة فضفضة

    وعليكم السلام ورحمة الله وبركاته

    الله يبارك فيكى متحرمش من زوقك اكيد هو وقت وكله هياخد عليه

    *******
    GeHaD-----(male)

    الى يدور يلاقى :)
    دى فى التيمبلت نفسه الاجاكس هو الى بيدى امكانيه لكده
    صح بس فى ناس بتحب تتمنظر ع الفاضى ربنا يهديهم

    ReplyDelete
  11. ميروك الاسم الجديد

    اسم جميل ... بس على فكرة
    انا شايف ان التاني كان احلى

    اما الثيم - القالب - فهو جميل - أخيراً

    عن موضوع فرانكو آراب ..فيه حاجات

    واحنا بنتكلم مش بنهرف نقولها غير انجليزي
    يعني عاوز اقولك روحي على البرتشن سي

    وانقلي حاجه للبتشن دي

    اقولك روحي على الجزء- ماهو برتشن يعني جزء- سي و اعملي كذا

    و حاجات زي كدا

    مش كل الناس للي بتككلم بتكون بتتظاهر او بتترسم على اللي ادامها

    تحياتي

    ReplyDelete
  12. Mr.Pro

    الله يبارك فيك هو كان حلو فعلا بس انا قلت أسبابى

    انا مبتكلمش ع كده فى الفرانكو بتكلم عن الفرانكو الى ملاوش لازمة وفى كلامنا العادى مش فى الكلام التقنى بالعكس

    خد العلم بلغة أهله

    ReplyDelete
  13. بالتوفيق إن شاء الله

    قالب رائع

    والاسم جديد رغم اختلافي معك في التغير إلا أنه يحمل وجهة نظر سديدة بالتوفيق إن شاء الله

    ReplyDelete
  14. الشكل بجد تحفه جداً جـــداً وأنا بحب اللون ده... أكيد عاملاه علشاني طبعاً :)) عارفه عارفه من غير ماتقولي ... الأزرق ودرجاته جميل أوي ومريح للعين لون السماء يعني صفاء وحاجات حلوه كده... بس التعليقات اللي فوق دي تجنن شويه :))
    والاسم الجديد كمان حلو أوي بجد بجد بجد
    بس هو فيه أغنيه انجليزي شغاله ولا أنا اللي حوله في وداني :-؟.. بجد في ولا ايه؟؟؟

    ReplyDelete
  15. أبو مروان

    الاختلاف فى الاسم لا يفسد للود قضيه
    :)
    المهم يخدم اهدافنا

    *******
    Rehab Mostafa

    عاملاه عشانك طبعا بتتكلمى فى ايه يابنتى هههههههههههه
    انا حاولت انزل التعليقات بجد معرفتش بس وراها لحد ماتنزل رقبتها ههههههههه
    فى اغنية شغاله بالفعل ياستى
    :D

    ReplyDelete
  16. مبروك على التصميم الجديد يا هوندا..جميل ما شاء الله.. مع ان الدرجة دي من الأزرق لوحدها..بضايقني : )

    و جميل انك غيرتي الاسم..أنا الاسم الأولاني مكنش عاجبني بصراحه..

    كل تصميم و انتي طيبه ;)

    ReplyDelete
  17. التيمبلت الجديد جميل جدآ و هادي و مريح اوي للعين مبروووك عليكي

    و الاسم الجديد عاجبني اكتر تصدقي انتي معاكي حق الرغي ده فن انك ترغي و الي بيسمع مايزهقش منك

    تحياتي

    ReplyDelete
  18. imanelbaz

    الله يبارك فيكى ياايمى :)
    اول واحدة اشوفها مبتحبش اللون ده ههههههههههه
    كويس ان الاسم عجبك كل اسم وانتى بخير هههههه

    *********
    EmY

    متشكرة جدا ياايمى :)
    للرغى فنون
    ;)

    ReplyDelete
  19. مبروك على الأسم الجديد هو فعلا احلى من الأسم التانى وماشى مع اهداف المدونه ال اسال الله ان يرزقك فيها الأخلاص بس بصراحه الألوان الفديمه كانت احلى بس عموما المهم تكون عجباك انت و مقتنعه بيها و من ناحيه الفرانكو اراب الكلمه دى الناس تظن انها تعنى الكلمات الانجلزيه المحوله الى العربيه و لكنها تعنى الفرنسيه المحوله للعربيه وده غلط شائع زى ال انت عرضتيه قبل كده عن الهاكرز اما الكلمات المحوله من الانحليزيه الى العربيه اسمها انجلوا اراب و عموما انا مش هبقا معاك اصل مش معقول يبقا اكل عيشى و اقف ضده ول انت رايك ايه :)

    ReplyDelete
  20. انا معرفش موضوع الانجلو
    ده بس عموما هدور على الأصل وأصحح المعلومه لو فعلا أخطأت اشكرك على لفت النظر

    انا بطلب اننا نتمسك بانتمائنا وهويتنا الأصليه فى حياتنا العامه مش بقول اننا لانتعلم انجليزى ولا لو مجال دراستنا انجليزى نهجره ابدا لكن المواقف التى ليست بحاجة للتحدث والفذلكه
    ممنهاش فايدة

    ReplyDelete
  21. مبروك اللوك الجديد
    انا بعد ما فتحت البلوج استغربت
    افتكرت انى غلط فى العنوان

    بجد هايل

    ReplyDelete
  22. الله يبارك فيكى
    طب كويس انك عرفتى تتاكدى هههههههه

    ReplyDelete
  23. انا متفق مع كلامك والف مبروك على اجمل مدونه

    ReplyDelete
  24. مبروك يا هوندا على المدونه الاكثر من رائعه واكيد مش لسه مكتشفين الكلام دا انهارده والقالب الجديد جميل فعلا ربنا يبارك لك يارب

    بالنسبه للفرانكواراب باتفق معاك جدا وكلا الاسمين رائعين لكن لك الحق في التغيير

    ربنا يبارك لك يارب

    ReplyDelete
  25. مبروك يا هنادي
    ولو انك كده هتجبريني اني اغير الثيم بتاع البلوج بتاعتي

    يلا اهو كده كده كنت هعمل ثيم خاص بيا
    و بالمناسبة اسم المدونة الجديد جامد جدا

    ReplyDelete
  26. schritte

    الله يبارك فيكى

    ************
    heba

    الله يبارك فيكى ياحبيبتى متشكرة جدا

    *************
    osama_gma

    الله يبارك فيك يااسامه،انا مااخدتش بالى م الثيم بتاعك خالص ههههههههه معلش بقا انا كمان ناويه اعملى واحد
    :D

    ReplyDelete
  27. مبرووك يا هوندا والله الشكل الجديد تحفة
    وانا شوفت التامبلت ده ف حتة قبل كده بس مش فاكر فين

    والإسم الجديد بردو كويس وانا عن نفسي كنت مستغرب الإسم الأولاني ده شوية
    وفاكرة طمطم صاحبتك اللي كانت ساعدتك تقريبا في انشاء المدونة؟
    كنت الأول بقرأ اسمها ـ تمام ـ مش طمطم
    فكنت فاكر انها ولد وانتي وهو عاملين البلوج ومسمينه رغايين سبوت ههههههه

    يللا المهم الف مبرووك

    ReplyDelete
  28. آلام وآمال

    الله يبارك فيك :)
    هو التيمبلت منتشر عموما

    انا مكنتش اعرف ان الاسم مضاق ناس كتير كده هههههههههههه
    طمطم كانت المفروض معايا بالفعل بس بعد كده انشغلت اتمنى عودتها ههههههههههه

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore