أنيس منصور




م الكُتّاب الى فعلا اسلوب كتابتهم بسيط وسلسل ومثرى فى نفس الوقت ،تحس انه بيكتب وهو مستريح خااااااااالص كتابه هاديه وعقليه وراقيه وبسيطه واحد مننا الى بيتكلم وف نفس الوقت غير متعصبه لأى فكر
، كانت بداية قرأتى ليه عن طريق مجلة الشباب كل عدد بيكون فيه مقاله له ، كنت بستمتع بالقراءة جدا وازعل ان المقال خلص واستنى العدد الجديد عشان اقرأ مقاله جديدة الكلام ده كان من أولى ثانوى لحد دلوقتى وأوقات بقابل مقالات ليه ع النت بقرأها باستمتاع جدا.. أول مرة اشترى كتب ليه فى معرض الكتاب الى فات مجبتش غير اتنين بس لانى مكنش فى دماغى قوى انى اشتريله كتبب ، كان فى دماغى ناس تانيه بس اما لقيت كتبه قدامى اشتريت كتير بعدين رجعت ف كلامى وقلت هاخد اتنين بس عشان اجيب اكتر من نوع خلصت الاتنين :

تعال نفكر معا ،حتى تعرف نفسك


عبارة عن مجموعه مقالات بسيطه جميله بتشغل العقل وف نفس الوقت ينطبق عليه مقوله خير الكلام ماقل ودل ناويه ان شاء الله اشترى كتب اكتر ليه لانه فعلا كتاباته جميله ومحترمه وبتنقد بنوع من الإيجابيه المرفقه بالحلول وليس النقد لمجرد النقد وتحس أوقات كتير انك بتلف العالم وانت بتقرأله م الحكايات الى بيجيبها عن الثقافات الاخرى والشخصيات الى أثرت ف الشعوب واوقات كتير أحدث الحلول الى توصلو ليها الغرب فى حاجات كتير كمان لفتات بسيطة لمشاكل موجودة ممكن تكبر ومشاكل ممكن تحصل بأسلوب مهذب وفيه رفق
ناس تقعد تقولى ده بيكره المراة مبتشوفيش كتابته وووو بقلهم والله هيا وجهات نظر اكيد بيكره صفات معينه فى المراة يكفى انه متزوج وعموما دى حاجة تخصه هو كنت حطيت مقاله تعب مستمر كانت عجبانى جدا
جربو تقرأو لأنيس منصور

ممكن تقرأ مقالاته ع جريدة الشرق الأوسط

ممممممممم
أول مرة اكتب بوست قصير كده اكيييييييييد مش بكتب عن انيس منصور يبقا خير الكلام ماقل ودل

11 comments:

  1. انا كنت شوفت المقاله بتاعته عندك هنا , وفعلا كات عجبتني وكن ناوي اني اقراله بس نسيت بصراحه
    علي العموم انا علي وعد ان شاء الله اني اقراله
    شكرا ليكي

    ReplyDelete
  2. ادينى فكرتك :)
    حاول تستفيد م الأجازة بقا ومتنساش

    ReplyDelete
  3. أنيس منصور صاحب العبارة الرشيقة دايما كان بيعجبني إسلوبه وإقناعه .. بس مش على طول الخط
    :D
    فيه كتب جميلة كتير ليه
    متربعا على عرشهم من وجهة نظري كتاب في صالون العقاد
    و كتابه المترجم .. العظماء 100 وأعظمهم محمد صلى الله عليه وسلم
    وحول العالم في 200 يوم
    وفي هذه السنة هؤلاء العظماء ولدوا معا
    وعلى رقاب العباد
    ولكني أتأمل
    وإقرأ أي شيء
    وقل لي يا أستاذ
    ....
    والقائمة تطوووول
    :)
    ...
    وكمان عموده اليومي مواقف في جريدة الأهرام ..

    ReplyDelete
  4. كريم

    حلوة العبارة الرشيقه اعتقد أن ده أقرب وصف ليه :)
    اكيييييييييييييييد لازم يكون مش ع طول الخط لان ليه آراء كده فى حاجات كده مينفعش ان الواحد يتقبلها كده فاهمنى كده؟؟؟
    :D
    ان شاء الله اشترى الكتب دى فى أقرب فرصه
    جزاك الله خيرا
    :)

    ReplyDelete
  5. السلام عليكم ورحمة الله وبركاته

    يمكن ردي مش عن استاذ انيس منصور بالذات ولكن عن مجلة الشباب الي كانت بتستهويني بكل كتابها حيث كانت غنيه بتشكيله من عمالقة الكتاب والمفكريين ككتابات الاستاذ انيس منصور وتأملات الدكتور مصطفي محمود وتحقيقات استاذ صلاح منتصر والكتابات التاريخيه للاستاذ جمال حماد وملفات الجاسوسيه للدكتور لنبيل فاروق ومقالات استاذ احمد بهجت
    لكني بصوره شخصيه افتقد جدا جدا جدا كتابات المرحوم عبد الوهاب مطاوع
    فقد كان رجل يمتلك حكمه وخبره كبيره جدا ويكفي بريد الجمعه في الاهرام وردوده عليها لنتعرف علي الدراما الحقيقيه في الحياه
    اسف علي مداخلتي ان كانت ابتعدت قليلا عن صاحب الموضوع الاصلي الاستاذ انيس منصور الذي اختلف معاه في كثير من ارائه مع اعترافي بثقافته العريضه وقدرته علي سرد المواضيع بطريقه شيقه جدا ولكن له مواقف لا استسيغها كموقفه من التطبيع مع اسرائيل الذي كان من الداعيين له خصوصا من عهد الرئيس السادات وايضا بعض كتاباته المتعلقه بالتنجبم والجان والعقائد المختلفه
    ولكن كلٌُُ يأُخذ منه ويرد الا الرسول المعصوم صلي الله عليه وسلم

    ReplyDelete
  6. السلام عليكم ورحمة الله وبركاته
    فعلا الكاتب أنيس منصور كاتب متميز وأنا أحب أن أقرأ عموده في جريدة الأهرام فهو كاتب متميز وخفيف الظل

    ReplyDelete
  7. جميل يكون الإنسان فى حياته أشخاص بيتأثر بيهم وبيشكلوا وجدانه
    والأجمل أن يكون هؤلاء الأشخاص على قدر مسؤلية القدوة

    بوست صغير وخفيف عن أنيس منصور
    صح
    خير الكلام ما قل ودل

    ReplyDelete
  8. تعرفى
    كفايه انى اقرأ عنوان البوست
    انيس منصور
    مهما كتبتى عنه
    بدوا هقول قليل
    احد اعظم كتابنا
    تحياتى
    علاء

    ReplyDelete
  9. انا بحب كتاباته رغم ان في حاجات انا مختلفه معاه فيها ومش من ضمنها موضوع المرأه

    لأن أنيس متجوز وبيحب زوجته

    علي فكره له كتب كتييييييييير جميله فعلا

    ReplyDelete
  10. بوست جميل جدا وفبه معانى حلوة اوى شكرا
    وياريت تشرفينى على المدونة

    ReplyDelete
  11. انيس منصور زودلي 50 سنة خبرة على عمري الحقيقي اللي موش هقول هو كام

    بحس وانا بقرأ كتبه ـ اللي تقريبا قريتها كلها الا ما ندرـ بحس انه بيكلمني او بيحكيلي انا شخصيا عشان استفيد لنفسي

    ولاني عارفه صوته؟ بحس انه بيتكلم وانا بسمع
    كلامه مقنع لما بيكون قوي ..ومفرح حتى لو حزين ..وطبيعي حتى ولو حوار شخصيات مستفزة .. و مسلم بيه حتى لو كلام فارغ
    هو صحيح بيستعبط في بعض مقالات له ف بعض الكتب خصوصا لما بيحكي عن رحلاته ف فرنسا بس ولو ..مجتش على دي

    كان ليه صديقة ايام الثانوي اسمها نشوى الله يمسيها بالخير كانت دايما تقوللي انيس منصور ده عليه شوية تهجيص يا شيخة بس والله دمه زي السكر و هقراله بردو ..وكنا فعلا ساعات نحس كدا بس بردو نكمل وكناايامها كنا بنجتمع حوالي 9 بنات نستعير كل يوم كتاب لانيس منصور من مكتبه المدرسة الثرية جدا نقراه بصوت عالي ف الفسحة ونناقشه سوا ونكمله كل يوم لحد ما يخلص و نجيب غيره
    عشان كدا بحس انه شكل كيان كبير فينا ف ايام كنا فعلا محتاجين ان حد كبير بيكلمنا بصيغة شبابية تاخدنا من الادنى للاعلى
    فارتبط معايا جدا بايام حلوة جدا متتنساش ولا هو كمان يتنسى

    رانيا تايجر

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore