الحب وحده لا يكفى



فى ناس ديما مقتنعه انها عشان ترتبط بزوج لازم تكون بتحبه حب يولع فى الذرة
أو إنها عشان حبت شخص ما لازم تتزوجه

بس النقطه بقا والى ادركته من مدة ان الحب وحده لا يكفى بمعنى

لو الحب ده بيخسر الإنسان حاجات كتير وبالزواج يخسر أكتر يبقا مينفعش
فى حاجات أهم من الحب لوحده فى حاجة اسمها احترام وتقدير متبادل مش من طرف واحد ولو ان مفيش حب من غير احترام بس فعلا فى ناس كده تقولك بحبك وبموت فيك وتلاقيها ولا بتحترم رأيك ولا مشاعرك وبتعاملك معامله الخدامين

تمام ،النقطه التانيه
ان لازم يكون فى اتفاق فى حاجات أساسية زى الأهداف الرساله فى الحياة عشان يقدرو يساعدو بعض وهتبقا حياتهم ممتعه مينفعش اتنين يكونو بيحبو بعض ويتجوزو وكل واحد دماغه فى سكه مختلفه تماما عن الآخر وكمان فى رجاله بتتفن فى اهباط عزيمة المرأة وياتبقا معاه فى الى عايزه يإما مفيش حاجة خالص ديكتاتوريه مصرية يعنى نيااهاهاها
حتى لو سابها تعمل الى عيزاه ديما هيكون فى اختلافات بينهم ده غير انها لو مرت بفترة ملل او هبوط عزيمة مش هتلاقى حد يشجعها وياخد بايدها خصوصا اذا كان الحد
ده أقرب الناس ليها

طيب الكلام شكله منطقى بس هل ده الى بيحصل؟
لو كل واحد حاول يشوف فى الناس الى حواليه هيلاقى 80% ويمكن أكتر ماشيين عكس كده خالص
تلاقى البنت دماغها كويسه أو الولد ومرتبط بواحدة مختلفه فى حاجات كتير لمجرد أنهم بيحبو بعض بس
بعد مدة بيحصل خلافات كتير أو بتتحول الحياة لروتين ورتابه لان مفيش حاجة جديدة بتحصل لأن الحياة روتينيه والى بيقومو فيه يصبحو فيه وده بسبب ان مفيش أفكار، تجديد ،تشجيع وتجريب.
لو الاتنين دول متقاربين فى حاجة مهمه زى رسالتهم هتلاقو الوضع مختلف تماما تجديد ثم تجديد وتجديد

يبقا لازم نتفق ان أكثر المشاكل الى بتحصل سببها الاختيار

طيب ليه بنتسرع فى الاختيار بقا ؟؟؟
ده ليه أسباب كتيرة جدا بس أكتر حاجة لاحظتها حواليا :

- أغلب البنات بيطبقو مقولة ضل راجل ولا ضل حيطه (انام جمب واحد فى الشارع ع الرصيف يحمينى ولا إنى انام فى شقه واسعه لوحدى ) من مذكرات شابه غاضبة لأنيس منصور .
يعنى الرجاله بتختفى م السوق ههههههههه خايفه متتجوزش فأول مايجيلها واحد هوبا وهيلا بيلا وأسوء حاجة بقا الجواز من نوع أصله مبسوط ومعاه فلوس وفى الحاله دى يحضرنى مقولة ياواخد القرد ع ماله بكره يروح المال ويبقا القرد ع حاله وتبقى اتدبستى ياعثل.

- الفراغ العاطفى والواحدة عايزة تحس انها بتتحب وبتحب فعند أول واحد يحسسها بالاهتمام او الحب تلاقيها بقا دخلت دوامه وطبعا جزء كبير من المشكله لقلة الخبرة عندنا كبنات متعلمناش ازاى نتعامل فى المواضيع دى ،نختار شريك الحياة ،نميز بين الحب والإعجاب والتعود وكمان الفراغ العاطفى ،الحرمان االعاطفى ،الكبت العاطفى.

الخلاصة
الصبر ثم الصبرثم الصبر.
نحط خطوط واضحه لشريك حيانتا منتنازلش عنها ابدا مهما ان كان وربنا هيكرمنا صدقونى.
معرفة الحقوق والواجبات كويس جدا لكل طرف.
كل واحد يتعلم ويقرأ ازاى يتعامل مع الطرف الآخر لأن تفكير الولد غير تفكير البنت وبكده هتختفى مشاكل كتير.
الحب أفعال وتصرفات واحترام وتشجيع مش كلام وتسبيل بس ده حتى الواحد نظره يضعف كده هههههه.
إحنا الى بنقرر اننا نحب الى قدامنا ولا لا والى هتنقع عقلك بيه هيتصرف ع أساسه طبعا ده طالما فى قبول مش نفور من الطرف الآخر ومادام الشريك ده كويس يبقا متستعجلش واحكم عقلى مش لازم الحب يشنتح يعنى من أول نظرة
المهم افكر لقدام

32 comments:

  1. أعتقد لو ناس كتير فكرت بالفكر ده فيه حاجات كتير هاتختلف .. حالات الطلاق و النفور من الحياة الزوجية .. والمرض النفسي عند الأطفال اللي بيكبروا بالتالي بيطبقوا نفس الأفكار كلها بتبدأ من الأساس ده .. الإختيار الخاطىء أو التسرع في الإختيار .. او الإختيار لمجرد الإختيار .. بدون أسس بدون أهداف
    ....
    ....
    اللهم أدمها علينا نعمة
    ....
    ....

    ReplyDelete
  2. كلامك في محله انا كنت قريت مقال عن حسن اختيار شريك الحياة و كان بيقول انه فيه ناس بتحب من اول نظرة و بعد الجواز بتبتدي المشاكل عشان مبيخلوش بالهم من طريقة الحياة و التفكير و الطباع و التناغم بين الشخصيتين الحب اوقات بيعمي الانسان عن حاجات كان لازم ياخد باله منها من البداية

    ReplyDelete
  3. اكتر سبب بيخلي الناس تحب حد لمجرد انها تكون مرتبطة وخلاص ؟هو الفراغ العاطفي ..ناس كتير متعرفش تكون لوحدها لانها شايفه ان ده الطبيعي وده الصح.. مقلناش حاجة صح خالص صح جدا..بس موش عشان كدا نقوم نرتبط باي حد وخلاص ..او اننا لو ارتبطنا الموضوع طلع بايظ نكمل فيه لمجرد اننا منكونش لوحدنا

    نقطة تانية موش مهم لما اجي اختار اختار حد مناسب ليا وخلاص لازم اكون انا كمان مناسب ليه..عشان ميجيش ينفر مني هو او انفر منه بعد كدا او احس انني غلطت ف حق نفسي او هو يحس هو بكدا
    ..
    المهم بجد اننا منتسرعش والتسرع موش معناه وقت بس لكن معناه تسرع ف كل حاجة لان فيه ناس ممكن تاخد وقت كتير تفكر فيه و بردو بتاخد قرار غلط

    رانيا تايجر

    ReplyDelete
  4. صحيح يا هوندا الارتباط علاقه معقده محتاجه لاختيار مناسب من كل الجوانب الحب جانب منهم لكن لازم الانسان يراعى كل الجوانب

    ReplyDelete
  5. بجد بوست جميل
    بيدل على شخصيه جميلة
    ذو خبره
    وبالذات فى المسائل دى

    ReplyDelete
  6. اول ما شوفت للوهله الاولي عنوان التدوينه , مع الصوره فكرته ماسك سكينه ورا ظهره :D
    بس انتي في رايك يا هنادي يعني ايه ارتباط ؟ والي مرتبطين دول ايه حدودهم يعني ؟

    ReplyDelete
  7. هناك من يستسهل الإرتباط
    ويعتقد ان اساسه الحب فقط
    نعم الحب هو الأساس
    ولكن ليس فقط بالحب
    بل اشياء اخرى
    اهمها التخطيط السليم للمستقبل
    بوست جميل
    تحياتى

    ReplyDelete
  8. تحياتي على التدوينة دي الحقيقة
    تدل على عمق في التفكير ماشاء الله
    وخصوصا نقطة اتفاق الرسالة والأهداف
    النقطة دي الصراحة أنا شايفها أهم نقطة وزي ما بنقول: جابت من الآخر
    هو ده كل الموضوع ببساطة
    هل الزوجين متفقين مع بعض في الرسالة والأهداف؟
    هل عندهم وعي أساسا بحاجة اسمها رسالة وأهداف!!!!

    ReplyDelete
  9. ايه يا بنت الحلاوة دى ههههه


    قصدى العقل ده :))

    الاختيار هوا اساس كل المشاكل اهم حاجة نحكم عقلنا كويس و مش نخلى القلب هوا اللى يقرر مصيرنا

    تسلم ايدك :)

    ReplyDelete
  10. كريم

    أكيد طبعا لان أغلب الخلافات نتيجه عدم توافق بين الزوجين وده بيعمل صراعات أسريه ع االمدى الطويل وهيا بتختلف من فرد للتانى بيتجوز ليه؟؟؟؟؟؟؟

    ReplyDelete
  11. monalisa_smile

    ماهو انا بقول الحب وحده لا يفكى لو انه احساس مجرد لكن الاجمل انه يكون ناتج عن أفعال واحترام وتوافق تححسه حب مختلف عن الحب المجرد بالنسبة لى حب العقل اجمل لانه ادوم

    ReplyDelete
  12. ranya

    بصراحه انا بحس ان الفراغ العاطفى ده أصعب حاجة ممكن تمر بيها بنت وان لولا ستر ربنا مع اى بنت بتعانى منه ممكن يحصل بلاوى وبحس انه اكتر حاجة بتنتجه الحرمان من عاطفه الأب تحديدا لما بتكون الصله بين البنت ووالدها كويسه ده بيشبع رغابتها العاطفيه أكتر

    والنقطه التانيه انتى لفتى نظرى ليها وهيا صح تماما اننا نكون احنا الاتنين مناسبين لبعض عشان محدش يحس بنقص تجاه الآخر

    ReplyDelete
  13. Eman

    مش معقده اوى يعنى معقده أكتر لو مفيش توافق خالص

    **************
    مواطن زهقان

    الله يخليك ده من زوقك

    ReplyDelete
  14. Mutati0N

    هههههههههه واضح انك متفرج ع فيلم رعب قبل ماتيجى
    انا مش فاهمه قصدك بس عموما انا اقصد الارتباط الشرعى يعنى الشخص الى هترتبط بيه طول حياتك
    ودى ملهاش حدود
    ولا انت تقصد ايه؟

    ReplyDelete
  15. السلام عليكم ورحمة الله وبركاته

    اعتقد ان الموضوع الذي تتناولينه اختلف فيه الناس من قديم الزمان واختلفوا في معايير الزواج الناجح ولكن استازنك في ان تقراي ذالك المقطع من تفسير استاذ سيد قطب في ظلال القران


    (ومن آياته أن خلق لكم من أنفسكم أزواجا لتسكنوا اليها ، وجعل بينكم مودة ورحمة ، ان في ذلك لآيات لقوم يتفكرون ) ...

    سورة الروم / آية 21

    والناس يعرفون مشاعرهم تجاه الجنس الآخر، وتشغل أعصابهم ومشاعرهم تلك الصلة بين الجنسين،وتدفع خطاهم، وتحرك نشاطهم تلك المشاعر المختلفة الانماط والاتجاهات بين الرجل والمرأة... ولكنهم قلما يتذكرون يد الله التي خلقت لهم من أنفسهم أزواجا، وأودعت نفوسهم هذه العواطف والمشاعر ، وجعلت في تلك الصلة سكنا للنفس والعصب، وراحة للجسم والقلب ، واستقرارا للحياة والمعاش ، وأنسا للأرواح والضمائر ، واطمئنانا للرجل والمرأة على السواء ....

    والتعبير القرآني اللطيف الرقيق ... يصور هذه العلاقة تصويرا موحيا ، وكأنما يلتقط الصورة من أعماق القلب ... وأغوار الحس " لتسكنوا اليها " .... " وجعل بينكم مودة ورحمة " ....

    " ان في ذلك لآيات لقوم يتفكرون " ...

    فيدركون حكمة الخالق في خلق كل من الجنسين على نحو يجعله موافقا للآخر ... ملبيا لحاجاته الفطرية :
    نفسية ، وعقلية ، وجسدية ... بحيث يجد عنده الراحة والطمأنينة والاستقرار ، ويجد في اجتماعهما السكن والاكتفاء ، والمودة والرحمة ، لأن تركيبهما النفسي والعصبي والعضوي ملحوظ فيه تلبية رغائب كل منهما في الآخر ... وائتلافهما وامتزاجهما في النهاية لانشاء حياة جديدة .... تتمثل في جيل جديد ....



    سيد قطب : تفسير في ظلال القرآن / سورة الروم ، آية 21


    ارجو ان تركزوا علي ثلاث احتياجات للفرد وهي ((نفسيه و عقليه وجسديه)) فهي علاقه متكامله وجب توفر ثلاث العناصر فيها وان كانت بنسب مختلفه ولكن وجب التوازن بينهم

    ReplyDelete
  16. هو فعلا لا يكفى
    بس من غيره الحياة مستحيلة

    تعرفى لما ترتبطى بانسان تقولى عنه كلام جميل اوى وده اللى انتى حاساه فعلا بالليل
    تصبحى تلاقيه بيقولك نفس الكلام
    وتبقى مش مصدقه نفسك
    وهو خلاص يبقى نصيبك وكل واحد لقى فى التانى اللى بيتمناه

    ومع ذالك فى خلافات كتير ومشاكل وزعل وصلح
    بس كله بيعدى علشان الحب

    بجد انا قابلت حاجات كتير اوى ومكنتش قادرة استحملها ولا بطيق انى اتعامل بيها بس سبحان الله بحبه برضه

    ويارب ارزق شباب المسلمين بالازواج والزوجات الصالحين والصالحات ويملا بيوتهم الحب

    تحياتى لدماغك الجامده يا هوندا
    ومبروك نجاحك يا قمر

    ReplyDelete
  17. نفسى فعلا يفهموا حاجة زى كدة

    الحب وحده لا يكفى
    والحب مش فى اى وقت والسلام، لا الحب له وقت معين و استعدادات خاصة و تبعات
    مش شموع وتنهيدات و سهر و كلام

    ياسلام لو نبطل نحب زى بتوع الافلام و نعرف ان كل ده هجس فى هجس..

    ReplyDelete
  18. blue-wave

    انها ثقافات ونتاج تربيه

    *********
    مصطفى حسان

    جزاك الله خيرا ، فعلا بحس انها بتختلف كتير بين زوجين عندهم المعنى ده واتنين تانين لا يفقهو شىء فى شىء

    ReplyDelete
  19. Ma 3lina

    تعيشى ، شوفتينى وانا عاقله
    :))
    طبعا الاختيار أهم القرارات
    والى ياتصيب ياتخيب زى البطيخ بالظبط
    ياقرعه ياحمرا هههههههه

    ReplyDelete
  20. Ahmedmasar

    وعليكم السلام ورحمة الله وبركاته

    اكيد انا مفسرتش بالمعنى ده مجرد أفكار حسيته وتوصلتلها حبيت اعرضها
    جزاك الله خيرا انا نفسى اقرأ تفسير سيد قطب فعلا
    جميله جدا


    فيدركون حكمة الخالق في خلق كل من الجنسين على نحو يجعله موافقا للآخر ... ملبيا لحاجاته الفطرية :
    نفسية ، وعقلية ، وجسدية ... بحيث يجد عنده الراحة والطمأنينة والاستقرار ، ويجد في اجتماعهما السكن والاكتفاء ، والمودة والرحمة ، لأن تركيبهما النفسي والعصبي والعضوي ملحوظ فيه تلبية رغائب كل منهما في الآخر ... وائتلافهما وامتزاجهما في النهاية لانشاء حياة جديدة .... تتمثل في جيل جديد ....

    ReplyDelete
  21. Sometimes

    الله يبارك فيكى :)

    حلو الاحساس ده يامنمن :)
    بيبقا أجمل حاجة فعلا تفكرى فى حاجة يقولها تفكرى فى حاجة يفكر فيها فى نفس اللحظة توافق وتجاذب فكرى

    اللهم آمين

    ReplyDelete
  22. جـيـداء

    للاسف ان الحب اتحصر فى كلام الاغانى والأفلام الهابطه والناس نسيو ان ده كله تمثيل وهجص فعلا لو الدنيا كده مكنش حد غلب ومكنش حد من الممثلين متجوزش ولا اتطلق
    لكن العيب مش عليهم العيب ع الرقابه الكبيره الى مهتمتش بثقافه المجتمع

    ReplyDelete
  23. انا قريت البوست تاني , وفهمته كويس
    بس انا الي احبها في وجهه نظري لازم الاول تبقي فيها مواصفات معينه , ومش شرط اني اكون بحبها اوي عشان ارتبط بيها .
    واكيد لازم يكون فيها صفات مشتركه او بنحب حاجات مشتركه , لكن الي بيحب شخص وهوا فيه عيوب كتير ويرتبط بيه لانوا مجرد بيحبوا , اظن ان ده هيواجه في حياته مشاكل كتييييير
    ممكن لا قدر الله تنتهي بالطلاق
    واظن ان سرعه الاختيار دي بتبقي وراها دافع مادي و العريس مريش او حاجه من هذا القبيل

    ReplyDelete
  24. مشكلة الجيل هي التسرع

    يعني زي مانتي قلتي تلاقي بنات وولاد يقولو يلا بقى عايزين نحب ونتحب وحركات .. ولما بيحصل ان حد ولد مثلا يتعرف على بنت او بنت تتعرف على ولد .. تلاقيهم هم الاتنين بيستهبلو على بعض
    بيعيشو الوهم وهم معتقدين ان ده حب
    ولما حد منهم يسيب التاني تلاقيه يقول الحب وحش وحش وحش .. ويقعدو يلعنو في الحب والحبيب والليله كلها
    في حين انهم ساعتها ماكانوش بيحبو

    الحب مش مجرد ضحكه وكلمه حلوه ومسكة ايد وبس .. الحب حاجه أكبر من كل ده

    بس اللي يستوعب بقى



    قبل ما امشي .. الف الف الف مبروك عالنتيجه والنجاح .. معلش جايه متأخر بس المواصلات كانت صعبه الحقيقه
    فين الجاتون بقى؟؟؟؟



    سلاموووووووووز

    ReplyDelete
  25. بصراحة
    انا عايز البوست ده انزله عندي في البلوج ..

    بهزر طبعا .. دا أنا ببدي اعجابي بالبوست.. البوست ده عايز برواز بجد ..

    انا أول ما قريت البوست ده دورت في الكتب الي انتي حاطاها في الجنب ولقيت ضالتي

    الرجال من المريخ والنساء من الزهره

    احييكي انك قريتي الكتاب الرائع ده وحبيتي تعرفي المخلوق الغريب الي اسمه الرجل وهوا بيفكر ازاي .. وان الدماغ مش وحده
    ولكل تفكيره

    ومكدبش عليكي انا قريت الكتاب ده اكتر من ثلاث مرات .. واتمنى ان الي أتجوزها تكون عارفه الي فيه كويس جدا .. لان فعلا شتان بين الي بيقراه او لا..
    ولو البنت قرته من نفسها كده من غير ضغط من حد ده بيدل انها مهتمه بحق الزوج وانها عايزه تسعده وبالتالي هتسعد معاه .. وديه العقليات الي عندها حب استطلاع وتستطيع ببساطه تتأقلم مع الحياه والتعامل مع متغيراتها ..

    احييكي على حبك للقرأه وحب المعرفه .. بس في حاجات برضوا انا أخالفك الرأي فيها ...

    إحنا الى بنقرر اننا نحب الى قدامنا ولا لا والى هتنقع عقلك بيه هيتصرف ع أساسه طبعا ده طالما فى قبول مش نفور من الطرف الآخر ومادام الشريك ده كويس يبقا متستعجلش واحكم عقلى مش لازم الحب يشنتح يعنى من أول نظرة
    المهم افكر لقدام


    مع احترامي
    بالنسبه للبنات في الحته ديه "غالبا" بتكون مش موجوده ..حتى مع الي بيفكروا بعقل أوي من البنات .. اول ما يعجبوا اوي يحبوا حد بيلغوا العقل ..حتى أشدهم وأكثرهم عقلا..

    والواقع انا صادفت الواقع ده من اكثر من بنت شخصيتها قويه جدا وقمة في العقل والاتزان لدرجة ان البنات الحبيبه لما كان خطيبهم او اصحابهم يزعلوا كانت تقلهم يتصرفوا ازاي ودايما كان رايها صح .. إلا أن وقعت في حب شاب للمره الاولى في حياتها وانتهت قصتها بنهايه صعبه اوي قالتلي جمله غريبه بس صحيحة
    "كنت بقول للبنات يعملوا ايه ولما اتحطيت في الموقف اصبحت مش قادره ادي لنفسي القرارات الي انا كنت بديها لغيري .. الي ايده في الميه غير الي ايده في النار .."

    يمكن انا من الناس الي مش بتحب تسيب الكلام مفتوح من غير حلول لاني شايف اني لازم اكون ايجابي وادي حل

    والحل الي قلتيه ده ينفع للشباب لكن للبنات الحل ده مش كفايه في نظري لانهم لو وقعوا مش بيستطيعوا يقاوموا لان ربنا زاد عندهم حته العاطفه
    الحل في نظري انهم يقللوا العاطفه ازاي معرفش بس من غير ما يلغوها .. لان الحب جميل برضوا والعاطفه جميله ..ويكتروا الاستخاره ويفتعلوا المشاكل الي تبين معدن الي قدمهم ويشركوا اهلهم بشكل كبير اوي بحيث ميكنش للعاطفه مجال لغلب العقل هذا والله اعلم

    ووضاح اني تقلت أوي

    بوست كويس .. تحياتي

    ReplyDelete
  26. كلامك صحيح لازم كل واحد يختار صح لان اختياره ده متوقف عليه حياته كلها
    يا اما يختار حياه سعيده او تكون تعيسه عليه وده بسبب التسرع وسوء الاختيار وعدم الاختيار بعقل قبل القلب
    نقطه تانيه مش شرط تاخده وهما متفقين على اهداف واحده لان في حاجه اسمها غيره لو شافها ناجحه عنه مش الكل بس احيانا وده بيسبب مشاكل برده
    اهم حاجه يكون واخدين بعض على اقتناع واحترام وتقدير علشان يكونوا حياه سعيده والحب لو مش موجود هيجي لوحده ...
    موضوع جميل اشكرك ... :-)

    ReplyDelete
  27. Mutati0N

    وارد بردو بس انت صح انت اكيد هتحس بالاعجاب نتيجة ان فى أشياء مشتركة بينكم هتجمع بينكم فى نواحى كتير
    وحتى لو محبتهاش أوى فى الاول اكيد هتحبها بمرور الوقت خصوصا اما تحس بمدى التشابه الى بينكم

    ReplyDelete
  28. Soooo

    للاسف اننا متعلمناش ازاى نتعامل مع الأحاسيس والمشاعر ومواضيع الارتباط بشكل صحيح ، ويمكن الى أشرت إليه سببه زى ماانا وضحت الفراغ العاطفى وكمان اوقات بيكون حرمان ناتج من الأسرة نفسها

    وهما الاتنين بيستهبلو ع بعض وعارفين كده بس حابيين الوضع ده يمكن هروب من حاجة معينه

    الله يبارك فيك ولا يهمك الجاتوه مقاطعه ههههههههه

    ReplyDelete
  29. الحب له مقومات وله كمان طرق للمحافظة عليه كل الحاجات دى مهمة لاستمراره لو اغفلنا جزء او اهملنا رعاية الحب هيموت وهيتحول لاسوء علاقة فى الدنيا مفيهاش اى شىء يرضينا

    ReplyDelete
  30. Ahmed Mubarak

    مفيش مشكله تنزله البلوج بس مع ذكر المصدر طبعا
    :D

    الحقيقه الكتاب ده انا استفدت منه جامد جدا فهمت نفسى منه وفهمت تفكير الرجل بردو
    وادركت اختلافات كتيرة جدا

    ومفيش مشكله لو جبت الكتاب لخطيبتك وقريتوه مع بعض لو مكنتش هيا قراته او تقراوه تانى :)

    ممكن تكون البنات عاطفشيين شوية بس لأنهم بس متعلموش ازاى يتحكمو فى عواطفهم واعتقد ان التربيه ليها دور كبير جدا فى الموضوع ده بالذات علاقة الوالد ببنته بتفرق جامد فى المواضيع دى

    ReplyDelete
  31. M e r o

    اهلا ميرو ازيك :)

    انا اقصد الاهداف العامه ، مش الاهداف الخاصه بمعنى

    فى أهداف عامه ممكن كتر يشتركو فيها زى ان اكون مميز فى المجال الى انا فيه ،أقدم أحقق حاجة معينه فى مجالى ، أربى أولاد ناجحين ماهو ده هدف مشترك ، نحفظ القرآن مثلا فهمانى الأهداف من النوع ده الى مش خاصه بمجال العمل وحده

    ReplyDelete
  32. لو بتحب حد لازم تحترمه
    عشان يعيش الحب دى مدى الحياه

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore