هؤلاء البنات مُ عَ قَ د ا ت


هتكلم انهردة عن 90% م البنات وبكده يبقو فى 10 % خاليين من العقد البناتيه وليست النباتيه
:P
بحكم خبرتى فى صداقة البنات كنت ديما بفكر إن أنا غريبة الأطوار وبحس إن تفكيرى زى الأولاد مش زى البنات لأنى بزهق م حوارات البنات والحقد الطبقى الى معشش جوه ، لحد ماتأكدت بعد مرور أعوام وأعوام إنى ولله الحمدلله طبيعيه جداَ وفى زيى كتير.

الموضوع المحورى الى هتكلم فيه هو البنات والى بيحصلهم لما يتخطبو فى حدود علاقتهم مع أصحابهم وصديقاتهم
الواحدة م دول تفضل مصحباكى ومحسساكى إن مفيش زيك اتنين وقد إيه هيا مبسوطة إنها عرفتك وإنها عمرها ماهتسيبك ابدا وإنتى الى بتحكيلها كل حاجة وإنتى وانتى وانتى .... وانتى زى الهبلة وبتصدقى
:D

ابتدى عصر الإستندال

تتعاملى معاها ع أساس انكم أصدقاء وهوبا جالها عريس والموضوع هيمشى هتشوفى الاستندال ع أصوله فى مرحلة الإتفاق مش هتجيبلك سيرة ودارى ع فرختك تبيض وامها هتشدها م ودانها وتقولها متقوليش لحد يابت لحد م الموضوع يتم لحسن أصحابك ينقروكى عين ده انتى أحلى منهم وانتى مش عارف ايه وهنا هنلتمسلهم عذر وان الرسول قال استعينو ع قضاء حوائجكم بالكتمان وانا تفهمت النقطه دى بعد سنة من الاستندال الحى برغم إنها ممكن تقول لاتنين اصحابنا مثلا وتيجى عليكى وتقف وممكن كنتى معاها امبارح وده الى يضايق .

مرحلة عصر الإستندال

حصلت الخطوبة هتيجى تعزمك واما تقوليلها ياثوثه، هتقلك اصل والله الموضوع جه فجأة واتلبخت وووووو وكتر خيرها انها عزمتك وانك معرفتيش من بره انها اتخطبت أو إنها عملت الخطوبة وعزمت نص أصحابكم وانتى لأ وقتها هتعرفى بس انك فعلا فعلا كنتى قريبه ليها جدااااااااا!!! بتحصل بردو

فترة الخطوبة تدريجى هيحصل انقطاع تام بين علاقتكم لانها أصبحت مخطوبة ووراها سى خطيبها وسى خطيبها ،وكل دقيقه موبيل هو أوفر بيها وكل مسدج خسارة فى اى بنت وحبيبى اولى بيها وكل شات بيضيع وقت الا مامع إيميل الحبيب وليه أصحاب عشر بنات لما ممكن أصاحب واحده وافرقع الباقى ؟ برغم من إننا كنا زى بعض مثلا وتبتدى تخسر أصحابها وتمركز كل اهتمامها ع خطيبها بس ولو كانت كريمة شوية هتسأل كل مدة ع أنتيمتها لما تكون متخانقة مع خطيبها أو لو أنتيمتها اتخطبت هتبقا فل الفل يعنى وممكن تكلمها يوميا وبتميل الأنثى فى الفترة دى للإنجذاب لكل بنت خطوبة أو داخله ع جواز او اتجوزت بالفعل لأنها بتحتاجها وبيكونو فى مستوى بعض والبنات العاديين دول يااااى هيحقدو عليا عشان مش اتخطبو لسه فالخرم الى يجيلك منه عين !

كمان لو كان ليها اى نشاط اجتماعى او تطوعى يعنى بتسيب ده كله ووقته خلص بقا هيا دلوقتى مخطوبة وسى السيد مش هيسمح بده ولا هيسمح انى امسك كتاب اقرأ فيه وهقرأ ازاى وانا بفكر فيه طول اليوم عيب افكر فى حاجة تانيه !!! ويبقا اما صحبتك تتخطب تعملى ايه؟؟ تترحمى على ذكريات جميله قضيتوها معا وتقولى يياه كانت أيام ربنا يمسيكى بالخير يابنتى اما اشوف واحدة مش مخطوبة تكمل معايا المشوار بقا
.

مابعد عصر الإستندال

الى كانت صاحبتك دى اتجوزت !! فى الغالب هتعرفى من واحدة زميلتك من ايام ثانوى مشوفتهاش من إعدادى انها اتجوزت وعزمتها فى الفرح وهتفكرى طب وصلتلها ازاى؟؟ ده معاها رقم موبيلى ومهنش عليها بمسدج حقيرة تعزمنى هنطلع لفوووووق قلنا قبل كده ان كل مسدج خسارة فى أى بنت ....
فترة الجواز بقا زى الى هاجر اسرائيل خلاص هيا اساسا نفضتلك فى الخطوبة وقلبتك عايزاها تكلمك بعد ماتجوزت يابنتى انتى غريبة جدا مش ممكن تقرى ع سى السيد أصله حليوة شوية او تقرى عليها عشان هيا اتجوزت ووانتى لأ لان حظك ياعينى ان الحديد وقتها بقا بعشرتلاف فالولاد اعلنو اضربهم عن الزواج فى الوقت ده ، وهتتعمد لو شافتك ديما تقولك ان الجواز قرف وتعب وهدت حيل والرجاله غريبة وكل يوم فى مشاكل وكان يوم بنفسج يوم ماتجوزت وأول مايجيلها تليفون هتسمعى أيوه ياحبيبى وحشتنى أوى مش هتيجى تأخدنى وهتلاقيها سابتك عشان تكلمه بره وهيا فى الحقيقه راحه تستناه يمرعليها وتخلع منك بالزوق
هتفهمى انتى طبعا انها كده بتشيل العين !


بإختصار90% م البنات بتخسر أصدقائها المقربين وبتقطع علاقتها بيهم تدريجى بالذات اما تتجوز لأسباب نفسنه بين البنات وبعضيها مع إن الولاد مش بيعملو كده لحد ماهتيجى فترة وتزهق الإنسانة دى لأن الصداقه شىء مهم جدا جدا فى اى مرحلة حياتيه وانا شفت ناس حافظو ع صداقتهم بعد ماتجوزو ودول ال10% وقد ايه الموضوع بيفرق معاهم جامد وأنا قرفت م البنات دول واتخنقت منهم ونص أصحابى استندلو معايا الى مستغرباله ان كله بيفكر بنفس التفكير وربنا يخليلى الناس الصافيه الصادقة العاقله ولو هتصفصف ع اتنين حلوين اوى

33 comments:

  1. ههههههههه
    ههههههههههه
    هههههههههههه
    عاااااااا
    طيب افهم
    هي صاحبتك اللي بالي بالك من أي نوع؟؟؟
    من ال10%؟؟
    ولا من ال 90% عااااااا
    انا متهيألي دي 1% بعد ال100
    لأسباب كتييير
    وبعدين اكيد انتي بالذات عندك حقد طبقي لانك عمرك ما هتطووووولي هههههههه
    بجد بوست فظيييع وبصراحة
    حقيقي جدا جدا
    انا بقرأ كلام حقيقي مش مجرد بوست ساخر
    وحتى الآن مش عارف ليه البنات بتفكر كده
    لكن فيه الأدهى بقى
    إنها تمنع جوزها او خطيبها من اصحابه ... وده لانها شايفة انها سابت صاحباتها من بعد الخطوبة او الجواز علشان خاطره
    الحمد لله الذي عافانا
    بس ابقي قوليلي ف الخباثة صحبتك اياها من اي نسبة .... متخافيش مش هقول لها
    تحياتي على كتابتك الساخرة الحقيقية جداااا

    ReplyDelete
  2. على الرغم انه لا توجد حقيقة مطلقة
    وعلى الرغم ان دة مش ممكن يكون حكم مطلق
    الا انه حكم اقرب الى الصواب
    فعلا البنات جدعاااااااااااااااان جدا مع بعضهن
    انا عن نفسي بأحس ان مفيش صداقة بين البنات وبعضهن على اساس ان كل واحدة بتبص للتانية حتى لو كانت انتيميتها في لبسها وماكياجها وشقتها وكل حاجة
    عموما
    بوست رائع وشهد شاهد من اهلها

    ReplyDelete
  3. loooooooooooll
    Very funny, yet so true Honda..

    I faced this problem before and i felt so hurt at then, because it came from one of my very best friends, then i got used to it...

    I found out that I can do nothing about it, as long as that's what she -the friend- chooses, and feels comfortable about it..

    it's not wrong to be afraid of envy, but not from the people you trust and love, and not this much too..

    rabena yehdy el gamee3 :)
    thanx 4 this nice one

    ReplyDelete
  4. sakayar

    ممكن تسألها وتخليها تقيم نفسها بصدق
    :D
    فعلا انا الحقد الطبقى عندى بيتناسب مع الطول طرديا ههههههههههه

    والله هفرح فى اى واحدة تطلب من جوزها كده ولا يعبرها لانه هيقولها انا مقولتلكيش تقطعى علاقتك بجد ههههههههههههههه
    ايون ايون انا واثقه انك مش هتقولها خاااالث

    ReplyDelete
  5. A.SAMIR

    منا عشان كده قلت 90% لانهم أغلبيه فعلا
    فعلا منكرش ان ده موجود لكن فى نفس الوقت فى بنات جدعان جدا فوق مااى حجد يتصور وقابلت كتير منهم

    ReplyDelete
  6. Nano_Baby

    المشكله ياسينو انهم كلهم بيقو بيست فريندز وده الى قاهرنى اصلا

    فعلا مفيش حاجة بتعمليها وقتها غير انك بتزعلى ع عداد الاصداقاء الى بيروحو فى الماضى ياعينى هههههههههههههه

    ربنايهدى الجميع

    ReplyDelete
  7. عندك حق والله

    اسالينى انا

    انااااااااااا

    مجوزاهم اتنين

    هههههههههه

    ReplyDelete
  8. يخربيت فقرك ياهنودا

    ههههههههههههههههههههههه

    ههههههههههههههههههههههه

    والله عندك حق ف كل كلمه

    بس مش 90% يعنى

    ممكن 90% م صحباتك اللى تعرفيهم عملوا كده

    لكن بتهيالى هما 50% م البنات اللى بتعمل كده

    ReplyDelete
  9. هوندا
    لأ بجد هكلمك بجد شوية
    هوه اللي هقولهولك من واقع تجارب شفتها ...بس مش معايا انا يعني
    لأ بجد شوفتها ف الحياة اللي احنا عايشينها دي وقابلتها مع ناس كتير
    انتي قلتي على نقطة البنت لما تتخطب وبعد كده واحدة صاحبتها تتخطب تلاقيها تطلع عليها جري وبقت صاحبتها اوي وكده وتسوري تزبل التانية علشان مش من مستواها .... اقول لك بصراحة وللأسف شفت كام حد بالشكل ده واتضايقت جدا
    بس على الوجه الآخر
    لما كنت بلاقي النموذج ده واسأل هوه ليه فلانة بتعمل كذا او كده فكان الرد ان البنت اللي اتخطبت او اتجوزت بتبقى فيه امور مشتركة بينها وبين المخطوبة او اللي اتجوزت التانية فهيتكلموا سوا بحرية ... لكن لو مخطوبة والتانية لسه هتخاف تقول حاجة تجرح احساسها او تحسسها انها ناقصة عنها حاجة فهتسكت ومش تحس انها على حريتها ... فليه وجع الدماغ ... ازبلها وخلاص
    حاجة تانية زي مهندس ودكتور اصحاب .. لو جم يتكلموا ف مجالاتهم ... لا الدكتور هيفهم المهندس بكل معانيه ولا المهندس هيفهم الدكتور بكل معانيه ... لذلك هتلاقي لكل واحد اصحابه اللي من نفس عينته ... مع الاحتفاظ بصديقه ده على دكة الاحتياطي علشان الواجهه الاجتماعية
    مش عارف اظن كلامي فيه شيء من الصح
    فيه بعض الصديقات بتقبى مقربة اوي من صديقاتها ولما صاحبتها بتتخطب بتتضايق منها جدا وتغير التعامل علشان لقت ان فيه حد أخد صاحبتها منها ... وبيبقى حاجة م الاتنين .. يا إما المخطوبة تشيل عبء التفكير إزاي متحسسش صاحبتها انها اتاخدت منها بعد الخطوبة ... أو تزبلها خالص وتريح دماغها .... وغالب البنات بتريح دماغها
    فيه كلام كتير جدا ف دماغي بس علشان مبوظش البوست الجميل ده فهحاول ابقى انزله ف بوست بعد ما ارد طبعا التاج
    او هتصرف يعني وارد عليكي ههههه
    ربنا يكرمكم
    متخافيش السر ع المدونات ف بيييير
    هههههههه ومش هقول لها برضه

    ReplyDelete
  10. ههههههههههههههههه
    انا مليش تعليق الا علي اسلوب التعبير ,
    جامد
    وبصراحه انا بحترم البنت العاقله لانهم فعلا قليلين زيي منتي قولتي
    لم يخطئ من قال ان معرفه الرجال كنوز

    ReplyDelete
  11. سمر الشافعى

    بجد طب كويس واضح ان كلنا بننسك ههههههههههه
    خير خير خير

    ************
    د/اجدع بنوته

    لا لا لا هما 90 يابنتى البنات كتييييييير يعنى العشرة فى المية كتير بردو متقلقيش

    وعموما وارد بس انا بتكلم ع حاجات حصلتلى ولأصحابى بردو مش انى بس
    :D

    ReplyDelete
  12. ايه القلبة دي؟؟
    هو حضرتك ما شوفتيش التعليق الطويل العريض ده؟؟؟
    ده سنة ويقع ع التعليق اللي بعدي
    ولا هوه انا زعلت فضيلة معاليكي لا قدر الله
    عااااااا
    ع العموم ربنا ما يجيب زعل
    وبيننا تاج وبوست هرد عليكي فيه هه
    وويل لمن يتحدى الطاغية
    ربنا يكرمكم ويحفظكم استاذتي الفاضلة

    ReplyDelete
  13. sakayar

    مقصدش والله كل مااجى ارد عليك النت يفصل ههههههههههههههههههه
    ما فى بعدك كومنت بردو ملحقتش ارد عليه
    ربنا مايجيب زعل ان شاء الله عموما هرد رد طويل مفصل ههههههههه

    بص انا معاك طبعا فى امور مشتركة بين المخطوبين والمتجوزين واكيد البنت بتحتاج تتكلم مع واحده فى نفس وضعها لانها اكيد هتكون متفهمه ده بس الى اقصده ان مش معنى كده انها تهمل صحبتها عشان هيا مش مخطوبة مش منطق طبعا!!! لان كل شىء فى الاول والاخر نصيب بالعكس هيا لما تشتركها معاها فى امورها صحبتها هتحس انها هيا الى هتتتجوز مثلا وهتشيلها فوق راسها بجد ومش هتلاقى احسن منها فى مشواير او مساعده او او وانا شفت ده قدامى فعلا من ناس حواليا وفى بنات كتير الموضوع بالنسبه لها عادى تحافظ ع صداقتها القديمة مع وجود حد يفيدها مفيش ادنى مشكله ولعلمك بقا لو النفوس مريضة هتخاف تحكى لوحدى متجوزة لتحسدها بردو عشان هيا خلفت والتانيه لسه او عشان شقتها واسعه مثلا والتانيه لسه النفوس المريضه مريضه

    منكرش ان فى بعض البنات حساسه شوية لما صحبتها تتخطب زى الحماة لما بتغير من مرات ابنها !! بس واحدة واحدة بتتعود عادى

    صدقنى البنات الى بتخسر اصحابها هيا الى هتندم بعدين سؤال بسيط ازاى ام زى دى تعلم أولادها مفهوم الصداقة؟؟؟

    لو عندك كلام قوله عادى البوست معمول للمناقشه مش لفرض الرأى وبرغم ده بردو انا للاسف بحب كل اصحابى الاندال وعارفه ان السر فى بيييييييييييييير

    ReplyDelete
  14. Mutati0N

    مش كل الرجال النداله صفة مرتبطة برجاله كتير جدا ههههههههههههههههههههه

    ReplyDelete
  15. معلش معلش بقى
    انا عايزه اعرف سبب البوست ده

    هو زى مانتى قلتى فيه وفيه
    sakayar
    قال اللى فيها

    بس صدقينى يا هوندا
    قعلا الحقد والحسد بيبانوا اوى
    كفايه لما تلاقى صاحبتك دى بتبص على الدبله وعلى ايدك طول ما انتى بتكلميها
    بس برضه مقدرتش ابعد عنها لانها صاحبتى وعارفه يعنى ايه كلمة Best Friend
    بحاول اكونها دايما
    والصداقه على فكره ادوم علاقة فى حياتنا

    وحكاية انه كل حاجه جت فجأه دى صح برضه لانى كنت فى الموقف ده
    طيب والله والله والله ماكنت عارفه ان هيتكب كتابى يوم ما كتبوا الكتاب وكنت متعصبه على الاخر لانى ما لحقتش اكلم اصحابى ولا حتى اخوالى وقرايبى والحكايه دى زعلت قرايبنا مننا ولسه لغاية دلوقتى مع انه فات اكتر من5 شهور دلوقتى

    انتى شايفه الموضوع من زاوية واحده بس انما لو كنتى مكان المخوبة دى هتقدرى اللى هى فيا

    ويارب يارب اشوفك قريب فى الموقف ده
    بس تحكيلنا بقى انتى اتصرفتى ازاى

    ربنا يوفقك يا جميل

    ReplyDelete
  16. يابنتي سبحان الله ... الكلام اللي قلتيه الأول ده أنا بجد... أنا بحس اني أصلاً مش عارفه أتعامل مع دماغ البنات وتفكيري مختلف عنهم وبرضه اللي قلتيه ده عن ال 90% منهم ده من ضمن الأسباب اللي بتخليني مش عافره اتعامل مع دماغهم
    بس الحمد لله ليا كام واحده كده تفكيرها زيي لاقيت يعني شويه من ال10% دول
    والبنات بقى هيفضلوا طول عمرهم بنات :)) مش هيغيروا تفكيرهم أبداً

    ReplyDelete
  17. Sometimes

    ايوه ايوه بقا بتصلحى غلطتك عشان انتى لسه واخده الكلمتين قريب
    :P

    طبيعى ان فى حاجات بيتجى بسرعه لكن اشمعنا فى الوقت ده بيكون نص الشله عرفت مثلا وانا لا ممممممم ده الى اقصده حضرتك

    ان شاء الله ياستى يسمع منك ربنا بس ناوية استندل ليا مزاج لكن اصحابى الانتيخ بيعرفو عنى كل حاجة
    :P

    ReplyDelete
  18. Rehab Mostafa

    ألحمدلله البنات العاقله دول نعمه يابنتى ناقصين جنان احنا ههههههههه

    ReplyDelete
  19. هههههههههههههههههه

    بوست جميل اوى هى البنت فعلا بتبقى شريرة لما تتخطب و تتفرعن لما تيجى تتجوز و تلاقيها اتغيرت

    الحمد لله ما اتعاملتش مع النماذج دى بس سمعت عنها

    غالبا لان صحباتى المقربين كلهم عوانس زى حالاتى و مافيش امل يتخطبو

    ReplyDelete
  20. ههههههة....انا متفقة معاكى 100 % يا هوندا فى كل كلمة ....بجد أصدق موضوع قريتة من زمان و ؟أحيانا بحس لن نسبة 10 % دى ممكن فى الحقيقة تكون 1 %

    ReplyDelete
  21. يب بيب انا جه
    جه افهم ايه بالضبط الحوار واللخبطه اللى على شات سكايار
    اللى وصلت تشدو لعب بعض قدام ماما بطوط
    بجد بجد عييييب
    مش عشان اطول منكو تبهدلو بعض وانا مستوى نظرى مش بيشوف ال اقل من 180سم
    هههههه
    ..
    بقى انا ياهوندا من ال90%
    ياااااه ششكرن كتير لحسن ظنك فيا
    وايه اللى مشتكره لو هدى عملت كده مع علياء او علياء عملت كده مع هدى
    اللى هو ايه كده؟ عاااا
    وهتشكريهم انتى ليه؟ عاااا
    ماهو لو سكيار مش فهم غلط
    انا مش فهمت خالص
    شكل حصل فى حاجه الايام دى هوندا مش عارف ليه احساسى بيقولى حاجه كده
    ..
    عمومن ياشريتكتى العزيزه جدن
    انا هقيم نفسى بصدق
    بص ياكميل
    انا عن نفسى برات البلاد
    يعنى اطلع من كل النسب دى لانى من قبل الخطوبه بعيده عن كل الناس لظروف كتيييره واشغال كتيره منهم البيت واخواتى والمسئوليه وان برضهمش انا بس اللى بقعد على الجهاز وفى اخواتى وكده ووقتى مش ملكى..يعنى بعيد بعيد بس اكيد بفضى ولما بفضى بطل على اصحابى وانا ال بعيد اللى محتاج صوحابى اكتر ماهما محتاجينى.. والحساسيه فىحوار محدش بيسأل بتبقى اكتر عندى مش زى عندكو حواليكو ناسكو وصوحابكو
    ولما جيت اتخطبت كان اون لاين معرفاكى فى لحظتها لان فعلن كان لسه حاصل لحظتها وكان سكايار لسه هيدخل والناس عرفو من مصر مش منى ..وطبعن خبرى وخبر سكايار سريع الانتشااار هههههه..مش اى اى ولا زى زى..ووو
    وانا عارفه نفسى مش بضحى بصداقتى بالسهوله دى واسالى كيكو عنى..ومش تنسى علياء مين برضه ياهوندا
    ..
    مش عاوز ارغى كتيير
    بس انتى جبتى الخلاصه بسؤال يجنننن
    ..
    صدقنى البنات الى بتخسر اصحابها هيا الى هتندم بعدين سؤال بسيط ازاى ام زى دى تعلم أولادها مفهوم الصداقة؟؟؟
    ..
    انا معاكى جدددددن..وحاجه كمان الاصدقاء دول مش يتعوضو..حتى الاندال لانك بتحبيهم هتسامحيهم..
    وهو فعلن كلام ساخر يجنننن ..وعارفه انا هنا صحباتى متجوزين وعندهم ماشاء الهل ولاد ساعات بيجو يوفقو كلامهم ابص كده الاقيهم بيقولو اصل عالية لسه مخطوبه عاااااا
    وانا عادى بتفهم..بس برضه بعرف بعدين فى السكرته
    ..
    عمومن برضه خلى عندك ثقه فى صوحاب انتى عرفاهم اوى واللى بينكو مش يوم وليله ..ياشريكى..ولا نستنى؟؟

    ReplyDelete
  22. قررت أكون عانس

    يابنتى انتو لسه صغيرين
    :D
    عانس ايه بس


    *************
    FTM

    خفت اقول واحد فى الميه انضرب ههههههههههههههههههه
    فقلن حاجة وسك

    ReplyDelete
  23. ♥ BaToOoT ♥

    والله وحشانى ومنورانى يارب كتر من تعليقاتها هههههههههههه

    اخص عليكى يابطوط وانا الى كنت بقول ده عمرها ماحسستى بفرق فى الطول ههههههههههههههههه
    انا مقلتش انك منهم انا قلت بالحرف انك مبتسأليش زى التسعين فى المميه ههههههههههه وبقولها بهزار يابطوط عشان انتى اما بتدخلى ياهو اصلا بتبقى اوفلاين اوقاات ولا بتقولى ازيك حتى وووكنت بعرفك م الفيرس الى عندك هههههههههه قفشتك يعنى بس مش زعلانه اوى يعنى انا معرفش ظروفك بردو

    لا منسيتش مين علياء ياشريكى ولسه مسمياكى ع الموبيل بارتنر وبعدين موضوع خطوبتك مزعلتش اصلا لانى كنت حلمت انكم اتخطبتو واعتقد انى قلتلك ده لما قلتيلى متفجاتش خالص وقلتلك انى كنت حاسه انك هتيجى تقولى ده انما لو مكنتش حلمت كنت اقعد اسبوع مششش مستوعبه هههههههههههههههههههه

    انا فعلا بحب اصحابى حتى الاندال منهم لكن لو واحدة منهم قلابنى واستغنت عن علاقتنا مش هجرى وراها يابطوط واقولها بحبك والله بس هكتفى بذكرى كانت بينا وخلاص لانن انا اصحابى من النوع ده كتير اوى وكنت بحبهم كلهم وبرغم ان معرفش عناوينهم دلوقتى لانهم سافرو لكن كان ليهم ذكرى وخلاص زى اى حد

    مش عيزاكى تزعلى بس مكنتش اقصدك ولا اقصد اى واحدة اتخطبت وقالتلى متاخر اقصد الى بيعرفو نص الناس وانا لا ودول كتير وحواليا وتعرفيهم كمان

    ReplyDelete
  24. السلام عليكم
    متاخديش في بالك يا هوندا.. المسألة أبسط من كده.. يعني طبيعي.. اش عرفك انك نفسك مش هتبقي كده لما تتخطبي و تتجوزي
    شوفي يا بنتي.. بتتعودي.. و من نفسك بتعرفي ازاي تتعاملي مع كل مرحله من غير ما تخسري صاحبتك و من غير ما تضطريها تخسرك.. عشان مش كل يوم هتلاقي صحاب..
    و بعدين بتعرفيها بجد.. و ساعات فعلا الناس في الظروف دي بتبقى مضطره تعمل حركات نداله.. غصبن عنها.. أو انا بحاول اقنع نفسي بكده
    و متبصيش للموضوع من ناحيتك بس.. بصي انها فعلا محتاجه تتعلق بخطيبها.. في الجواز بردو هتنشغل.. التمسيلها العذر.. و خليكي انتي الكبيره.. اسألي عليها كل ست شهور و للا حتى كل سنه مره..
    احنا بس عشان متعودين على الصداقه بشكل معين بنصدم لما بنشوف ليها أشكال تانيه في نظرنا اقل من الأولانيه
    و عقبال ما أشوفك عروسة يا هوندتي ;)

    ReplyDelete
  25. هوفى فعلا حالات كده
    بس الحمد لله الانتيم بتاعتى من الثانوية العامة قبل ما تتخطب بتكلمنى و بعد ما اتخطبت هى و خطيبها بيكلمونى طبعا عزمتنى على خطوبتها و قريب عزمتنى على فرحها بس انا مش عرفت اروح لانه كان فى دمياط و يوم الصباحية بتاعتها اتصلت عليا و كلمتنى هى و زوجها
    الحمد لله ان صاحبتى من ال 10% اللى عارفين يعنى ايه صداقة

    ReplyDelete
  26. imanelbaz

    وعليكم السلام ورحمة الله وبركاته
    ممكن بردو بس اكيد الواحد لما بيرفض عاده معينه بيحاول انها متكنش فيه والله اعلم
    انا يهمنى العلاقة الدائمه مش كم التواصل يعنى مش لازم كل يوم ولا كل شهر حتى بس محسش بالانقطاع التام لانى مبحبش اخسر حد

    ReplyDelete
  27. eng_romisaa

    :)
    طب كويس جدا والله دى طلعت جامدة جدا ربنا يخليهالك

    ReplyDelete
  28. الفكرة إن البنات فعلا بتكون مشغولة فى فترة الخطوبة ولا الجواز
    وحال الشغل دلوقتى بيخلى مافيش وقت اصلا للمصاحبة والخروج.. وبتقتصر العلاقات الاسرية على علاقات مشتركة مابين الزوج والزوجة، واللى بتكون فى الأغلب صداقات جديدة من بعد مرحلة الزواج

    ReplyDelete
  29. lol you are absolutely right !!

    ReplyDelete
  30. Lasto-adri *Blue*

    اكيد انا معاكى بس انا الى كان مضايقنى بس التنفضيه الى بتكون فى الاول خصوصا لما تكون الصداقه قريبه جدا او انها تتخطب ومتعزمهاش دى اكتر حاجة كانت مضضضايقانى فعلا


    *************
    ahmEd_H

    مش اوى بردو
    :D

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore