الأصدقاء والأصحاب


بحب الصداقة وبحب العلاقات الإنسانية وبقدر قيمة الأشخاص لأنهم مخلوقات ربى وبحب اكتشف مزايا الى معايا واطلع منهم الجانب الطيب واشجعهم واستفيد منهم وافيدهم لو أقدر واحب اكون سبب فى مساعده أو فك كرب حد وأحب الى يقف معايا ويساندنى نفسيا لما احتاج ،وبحب الصحبة الصالحة وعندى رسالة فى حياتى واهدافى وأحب اوصلها لأكبر عدد ممكن من الناس الى حواليا وأصحابى.

وأحب اساعد حد فى تغيير وتطوير نفسه للأحسن ، لأنى فى وقت كنت كده ولقيت ناس معايا ساعدونى عشان اثبتلهم ان كلنا زى بعض 

وأتبسط لو لقيت رفيقه فى حاجة بعملها عشان تشجعنى لما تفتر إرادتى وأحب اتكلم مع البنات الى عندهم فكر واستفيد منهم ومن مناقاشتهم

مبزهقش منهم وبصاحب كل يوم تقريبا حد جديد وبحب ان العلاقات تكون جيدة وقوية وأحب اكون صديقة فى وقت الشدة وبحاول لكن ده ميمنعش ان ده جزء من حياتى لكن مبعتمدش عليه لإدارة حياتى أو ان عشان انزل كورس لازم يكون معايا واحدةيإماا مش هاخده بالعكس احب اروح واتعرف ع واحدة جمعنا هدف مشترك وبكده كل مايكون فى عمل معين بيكون فى ناس معينة ممكن تكون معايا فيه

لكن بزعل لما حد يقل أصله معايا او يثبتنى وبعدين يزحقلنى وبردو ده ليه وقته بيعدى لانى مش بالفراغ الذهنى الى هيخلينى اوقف حياتى عشان واحدة عايزة تخسرنى وبرغم انى الحمدلله ليا أصحاب كتير يعنى لو خسرت واحدة مش هتفرق لكنى بحاول أحافظ ع العلاقات دى لانها بالنسبة لى ثروة ممكن ادخل بيها الجنة لكن الحياة بتستمر عادى بأصحاب او من غير أصحاب

وكل الى ذكرته فوق مكش مميزات فيا ده انا بحاول اطبق تعليم دينا فى الحتة دى

( وَلْتَكُنْ مِنْكُمْ أُمَّةٌ يَدْعُونَ إِلَى الْخَيْرِ

وَيَأْمُرُونَ بِالْمَعْرُوفِ وَيَنْهَوْنَ عَنْ الْمُنْكَرِ وَأُوْلَئِكَ هُمْ الْمُفْلِحُونَ )

 ( لأن يهدِي الله بِك رجُلاً

واحداً خيرٌ لك من حمرِ النعَم )
 

4 comments:

  1. عارفه يا هوندا
    لما جيت معاكم صناع انا مكنتش صاحبه ليكم ولا حاجه ولا عرفتكم اوى كمان
    زعلانه على عمرى اللى فات من غيركم بجد وزعلانه اكتر لما بعدنا من غير ما اعرفكم اكتر لانى برضه حاسه انى غريبه عنكم
    المهم بجد لقيت فيكم نفسى
    عرفت اصحاب وناس زى العسل

    ولما رحت اشتغلت فى بلد بعيده بالحصه مدرسة كمبيوتر - فاكره لما ضحكتى عليا، انا فاكره- عرفت ناس والحمد لله لسه على علاقه بيهم ولسه اصحاب بس مش بشوفهم
    ولما اشتغلت فى المحمدية فترة عرفت اصحاب تانين
    ولما اخدت الكورسات عرفت اصحاب
    ولما اخدت السنه التربوى عرفت اصحاب
    وياما هنشوف اصحاب
    بجد معرفة الناس كنوز

    انا مش عارفه قلت ده كله ليه بس مش مشكله
    معلش صدعتك استحملينى

    وبرضه دماغك عجبااااااااااانى اوى

    ReplyDelete
  2. هوندا
    السلام عليكم
    ايون انا تاني عااااا
    جيت ارد عليكي على شاوتي معرفش عيب م النت ولا من الشاوت نفسه رخمن ومش كتب هبقى ارد بعدين ان شاء الله
    عجبتني حتة كده بتقوليها
    بحاول أحافظ ع العلاقات دى لانها بالنسبة لى ثروة ممكن ادخل بيها الجنة
    لكن معجبتنيش الجملة اللي قبلها حتى لو جملة اعتراضية
    انه ليكي اصحاب كتير مش هتفرق لو واحد ندّل ومشي .... لأ هتفرق ...أنا عن نفسي ليا اصحاب كتير ...وتعبت على اما بقى ليا القدر ده من الاصدقاء ... لاني وببساطة مبقبلش صداقة أي حد ... علشان اللي هيكون صاحبي هحارب علشانه بعد كده لو توقف الامر على الحرب ... شرير انا صح؟؟
    لكن بحب كده ... احب ان الشخص اللي يكون ف حياتي ده تكون روحه عندي اغلى من روحي .. حتى ولو كان صديق لانه بيتحسب عليا شخص قابلته ف حياتي ... ومش بسمح له يبقى نقطة سودا ف ملفي مع ربنا ... علشان لو هوه حب يندل ويسيبني ... هيخليني اندم اني عرفته ... وانا مش بحب اندم على حاجة عملتها عااااا ...فيتلم احسن له ويبقى جدع ... ومش هقول ان اختياراتي دايما بيرفكت ..لكن بحاول لما اختار والاقيه مش بيرفكت اساعده واخليه يوصل للدرجة اللي ترضيني
    علشان ده مرايتي ...ولكل واحد رسالة اكيد
    وجميل جدا تكون رسالتك اللي انتي قلتيها ف الخاتمة

    ReplyDelete
  3. Sometimes

    يابنتى عادى احنا كانت بينا علاقه كويسه وصحبه خير لكن مش قصة اننا اصحاب اوى وكده انا علاقتى بالناس بردو كانت مجرد صداقه شوية لكن مش قريبة اوى اوى يعنى بدليل انى مبقتش اشوفهم غير فى شنط رمضان بس وهكذا


    ضحكت عليكى لانك مش خريجة كله فيها قسم كمبيوتر ههههههههههههههه وانتى ادابا اصلا
    معرفة الناس كنوز فعلا اتكلمى براحتك بلوجنا للرغى هههههههههه

    ومتشكرة جدا لو عايزة دماغى اتفضليها بدل ماهى قرفانى ديما ههههههههههه

    ReplyDelete
  4. sakayar

    وعليكم السلام ياسكايار تنورنا طبعا :)

    ديما فاهمنى غلط انا اقصد ان لما باجى احكى لحد مثلا يقولى مش مشكله انتى ليكى اصحاب كتير وممكن بالفكر المجرد انك لو اتقطعلك بنطلون وانت عندك كتير هتقول مجتش ع واحد لكن انا مبحبش اخسر اى حاجة عندى حتى لو كتير وبحزن جدا لما بخسر واحدة صدقتى لان معناها انها كانت واحدة غير عادية بالنسبة بزعل جدا لو الغلط كان منها حتى او منى

    مقدرش اخلى كل واحد كويس لانى موصلتش للدرجة دى انا يادوب بحاول اعدل صفات فى نفسى ممكن تنتقله بالمعامله لكن لو حسيت ان الى قدامى نفسه يغير فيه حاجة لو اقدر هساعده طبعا لكن مش هفرض نفسى ع حد مش عايز علاقتى اساسا ورماها

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore