مشروع الخمسين قرش

كل سنة وأنتم طيبين بمناسبة شهر رمضان الكريم

أول استعداتى لرمضان بصراحة هيا شنطة رمضان الحمدلله دى رابع سنة نجهز لها ربنا يقوينا ويقدرنا اننا نقدر نحقق أهدافنا فى إطعام أكبر كم من الأسر

بالذات السنة فى موجة الغلاء زى ماهيا غلاء علينا غلاء على الناس المحتاجين أضعاف فى ناس فعلا مش هتلاقى حاجة تفطر بيها

المهم انا حاولت اجمع فلوس من أول شعبان تقريبا اى نعم ناس كتير قالت انها هتساعدنى لكن لحد الآن الى جابلى فلوس حوالى أربع أو خمس أشخاص

فى ناس بتكسل أوى وناس شايفه انها عشان تتبرع لازم يكون مبلغ جامد ياجماعه إن الله لا يكلف نفس الا وسعها

أى حاجة بسيطة لو كل واحد اتبرع بحاجة ضغيرة هتكبر الجبل عبارة عن مجموعة كبيرة من الأحجار الصغيرة

عشان كده جتلى فكرة مشروع لاخمسين قرش وبدأتها بنفسى الحمدلله وبعض أفراد عائلتى ان كل يوم أحط خمسن قرش على جمب لحد إنتهاء شهر رمضان تحديدا ويبقا كده بساهم ع قد ماقدر وبقيت أقول لأصحابى عليها وبحاول انشر الفكرة على قد ماقدر سواء الفلوس هتجيلى او تروح لأى ناس بيعملو مشروع شنطة رمضان الى موجود فى مصر كلها

ده إيفنت على الفيس بوك ابعتوه للناس كلها

الدال على الخير كفاعله

والى يحب يشارك معايا ممكن يتبرع بفلوس أو تبرعات عينية أو مجهود

والى مش من المنصورة وعايز يشارك

فى أنحاء مصر كلها فى جمعيات بالهبل

وممكن يسألنى وأحاول أدورله

نقول تانى

قليل خير من العدم
ما نقص مال من صدقة
أحب الأعمال إلى الله أدومها وإن قلت
وحطو نفسكم مكان أسرة فقيرة مش هتلاقى حاجة تفطر بيها فى رمضان واحنا بناكل وبنحلى

*.*هوندا*.*

16 comments:

  1. جزاك الل خيراً
    انا ان شاء الله هظبطها مع جوب الفيس بوك
    ربنا يكرمك وكل عام وانتي بخير

    ReplyDelete
  2. جزاكى الله كل خير
    احنا برضه فى منطقتنا هنا فى الهرم عاملين حاجه زى كدا
    ربنا يقدرنا
    وتحياتى ليكى

    ReplyDelete
  3. بارك الله فيكي يا هنادي علي التفكير بالطريقه الايجابيه دي , وباذن الله علي قد ما الواحد ربنا يقدره هيعمل ويقدم لوجه الله , باذنه تعالي

    ReplyDelete
  4. السلام عليكم ورحمة الله وبركاته


    ماشاء الله علي الافكار الهايله

    جزاك الله خير وجعلها في ميزان حسناتك

    ReplyDelete
  5. وكما يقولون في المثل
    سكاياااار سكاياااار
    والله بعودة يا سكااياااار
    اقصد رمضان يوووه دايماً بتلخبط بينهم
    جزاكي الله خير هوندا
    والله بحاول اظبطها هنا مع الشباب اللي عرفتهم وإن شاء الله نساعد معاكم
    دعواتك
    ربنا يكرمك ويبارك فيكي ونشوفكم دايما متجمعين في الخير

    ReplyDelete
  6. @ محمد مفيد

    وجزاكم مثله
    متشكرة جدا ربنا يباركلنا ويقوينا

    @blue-wave

    كويس جدا والله ربنا ينشر الخير فى كل مكان اكتر واكتر
    وجزاكم مثله

    ReplyDelete
  7. @Mutati0N

    اللهم امين :)

    ************

    خمسة فضفضة@

    وعليكم السلام ورحمة الله وبركاته

    الله يخليكى ربنا يكرمنا كلنا :)

    ReplyDelete
  8. sakayar

    هههههههههههههههههه وجزاكم مثله ياسكايار ايوه انا عرفت الموضوع ده مسنين المعونة ياريس ههههههههه

    ReplyDelete
  9. الحمد لله ان موضوع شنطة رمضان بقى منتشرر أوي و الحمد له فيه ناس كتير بقت ماينفعش رمضان يدخل من غير ما يعملوا شنطة رمضان
    ربنا يكرمك يا هنودة و يجازيكي خير يا رب
    و يبلغنا رمضان جميعا
    ادعيلى بقى علشان انا أول مرة أقضي رمضا نبعيد عن مصر و طبعا انتى عارفة مصر ليها روح تانية في رمضان ،، ربنا يستر

    ReplyDelete
  10. جزاكى الله كل خير يا هنادى على كل اللى بتعمليه .
    انا للأسف مش عارفه اعمل حاجه :(
    مش معايه فلوس وكمان مش بخرج من البيت .
    فى حاجه ممكن اعملها وانا قاعده فى البيت ؟!

    ReplyDelete
  11. الحلم العربى

    الحمدلله فعلا لان العجز كبييييييييييير

    فعلا مصر ليها جو حلو اوى فى رمضان وانتى حاولى تخلقيه عندك على قد ماتقدرى اكيد هتلاقى تصبيره

    :D

    ReplyDelete
  12. ربنايقويكي ويقدرك علي فعل الخير بس خللي بالك لاتلاقي بتوع الشؤن الغير اجتماعيه والنيابه بتقولك لميتي ليه فلوس بدون اذن الدوله وليه تساعدي الغلابه مش عيب اناكمان هعمل زيك بس علي اكبر وكمان في السر

    ReplyDelete
  13. Butterfly

    ممكن يامروة تكلمى اصحابك الى ينفع يتبرع وممكن لو قدرتى تنزلى الكليه حتى تساعدى فى فريق 90 درجة

    ReplyDelete
  14. شمس النهار

    انا مش بلم غير من اصحابى وقرايبى منعا للمصايب هههههه
    يعنى ايه فى السر؟؟
    الصدقه ع فكرة مش حرام انك تديها قدام حد عشان تشجعى الناس تتصدق
    يعنى معتقدش انك غلط اما تقولى لحد عشان تشجعيه لعمل الخير
    الدال على الخير كفاعله

    ReplyDelete
  15. كل سنه وانتم طيبين

    ReplyDelete
  16. وانتى بخير يامنمن

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore