يخربيت النكد


من عادات الشعب المصرى انه بيعيط فى الفرح والحزن بصراحه أنا مش بعرف اعيط فى الفرح وأوقات كتير فى الحزن إلا الشديد القوى

ده مش معناه انى مش بعيط خالص لا لا لا أنا بعيط فى حاجات تافهة كتير هههههههههههه

امبارح نصفى الآخر كان مسافر السعودية كل الى شافنى من قرايبى قبل ماسافرله القاهرة يقولى هتعيطى بقا ياهنادى؟؟

طب المفروض أقول ايه يعنى؟

حتى ساعة مابنسلم عليه فى المطار والده قالى نفس الكلمه أوعى تعيطى وأنا أضحك

وأنا راجعه مع ابن خالى قالى ها ياهنادى عيطتى ؟

لا هو لازم؟

قالى اصلى مراتى كانت بتعيط قبلها بعشر أيام!!!


رجعت بليل بقا على بيت خالى حيث كانت العائله مجتمعه كلهم سألونى نفر نفر عيطتى؟؟؟

قلتهم فى ايه ياجماعه هو قانون لا معيتطش

قالولى كلهم مفيش دم

وكل واحدة تروى قصتها مع البكاء لما جوزها يكون مسافر

أنا كنت بقولهم يعنى هو لازم أنكد عليه وهو مسافر يكون آخر حاجة شايفها الحزن والكآبه طب أنا مكنش معايا مناديل وقتها كان ايه النظام بقا ؟؟

لما كنت فى المطار كان فى جمبى ستات كبيرة بيعطو ولادهم مسافرين باين المهم انا فعلا قعدت أفكر كتير فى موضوع العياط حيث أنه منتشر قوى كده

ليه ؟
هو الى مسافر ده رايح فين لو رايح يحارب ماشى

اه اكيد هزعل شوية عشان هفتقده فى حاجات كتير وهكون مستنية رجوعه بس مش لدرجة إنى أنكد عليه وهو مسافر طب محدش عارف الى مسافر ده مشاعره بتكون عامله ازاى بدل ماحاول أسانده اخليه يعيط هو كمان ونقلبها مناحه؟

وكل مايفتكر شكلنا مثلا يرجع يعيط

صلو على النبى كده وفرو الدموع

هوندا

27 comments:

  1. :D
    كل ده حصل من ساعة ما مشيت ؟؟؟؟
    :D
    أعتقد الموضوع داخله جزء كبير (إعداد) نفسي للعياط .. وده في حد ذاته نوع من الكدب على النفس وعلى الشخص وعلى الناس .. لإن حاجة مخلتكيش فعلا تبكي وقتها مش من الطبيعي إنك تحضريلها من قبلها !!!
    وعموما الحمد لله .. فيه حاجات كتير ممكن تتعمل بدل تضيع الوقت في الحزن والبكاء .. والتحضير لما هو قادم إن شاءالله
    :)

    ReplyDelete
  2. زى ايه مثلا ياكيمو

    :D

    تصدق انا حسيت ان ممكن من كتر الكلام افتكر بقا انى لازم اعيط فقعد استدعى الدموع تيجى عشان اكون مريت بالمراحل الطبيعيه للحاجة الساقعه

    :D

    ReplyDelete
  3. ههههههههههههههههههههههههه
    تصدقى ده فعلا عرف وخصوصا الشعب المصرى
    انا عن نفسى لما كان بابا يجى يسافر ماما هى اللى تعيط وانا عاديه خالص حتى اول مره عماتى كانوا عندنا واستغربوا اوى انى معيتش عشان يعنى مرتبطه ببابا اكتر .
    هنعمل ايه بقى كتر الأسيه بقيت مخليانى مبتجاهل كل حاجه هههههه
    يرجعلك بالسلامه ان شاء الله .

    ReplyDelete
  4. ههههههههههههههههههههههههه كتر الأسية يانهار أبيض

    ممكن الموضوع يكون نوع من التعبير عن المشاعر ناس مبتعبرش غير كده

    ReplyDelete
  5. يخرب بيت اللسع !

    هو كل حاجة المصريين يعملوها يبقى لازم تتعمل؟

    دا أكبر سبب إننا ما نعملهاش أصلا !

    عصيّ الدمع يا وطني

    وفعلا معك حق يا هوندا .. مش عايزين ننكد على المسافر، يكفي الألم الداخلي مش محتاجين نعيط

    لأ والحلو .. مع إنهم قالو عليكِ مفيش دم .. لو كنتِ بكيتِ

    حتلاقيهم كلهم بيقولوا لك كلام مواسي كي يوقفوكِ عن البكاء !!!


    تحيا الشيزوفرينيا

    ReplyDelete
  6. ههههههههههههههههههههههههههههههههههههههههههه جامدة ياإيمى بجد

    ويطقطقو عليا ويشترو مناديل بقا وانا اعيييييييييط
    وبعدين يقولو عليا نكدية

    :D

    ReplyDelete
  7. نادراً لما مواقف السفر دي بتخليني اعيط ,
    بس الأغلبيه بيعيطوا لان بيبقي في هواجس في دماغهم ان هوا ممكن ميرجعش او منشوفوش تاني او كدا , والأغلبيه بيعيطوا كدا لوحدهم

    ReplyDelete
  8. looooooll
    لا طبعا... مش لازم أبدا انك تعيطي ولا معنى كده انك معندكيش دم....
    بس برضه مش معناه ان الناس اللي بتعيط دي غاوية نكد و حزن !!!!
    لأن زي منتي مش من السهل تعيطي في ناس طبيعتها انها دموعها قريبة جداا
    في الفرح و في الحزن .... مالوش علاقة دول غاويين نكد وأو لا...
    النكد عمره ماكان بالعياط والدمووع..... له أساليب تانيه كتيييررر
    :D

    أنا لما بابا كان يبقى مسافر كنت بعيط, و لما كنا نسافر السعودية كنت برضه أعيط وانا سايبه عائلتي ....
    و أكيد لما أحمد سافر.... عيطط طبعا.... أنا بعيط لو سمعت أو شفت قصة مؤثرة
    أبقى نكدية؟؟؟
    مفتكرش.... أنا بس دموعي قريبة

    مش معنى ان الكل سألك ان هما بيدوروا على النكد يا هوندا ... بس هي طبيعة, و منتشرة عند غالبية الناس

    عدم عياطك مش دليل انط صح ولا اللي بيعيطوا هما الصح
    مجرد اختلاف في التعبير عن المشاعر

    غريبه فعلا انك معيطيش

    :D

    ReplyDelete
  9. @كريم عبد المجيد

    ممكن بردو بس محدش ببعد عن قدره


    ********************

    Nano

    ياحبيبتى انتى نكدية باين عليكى جدا
    :D :D

    منا قلت فوق ان فى ناس مبتعرفش تعبر عن مشاعرها غير بكده انا فى مواقف بسيطة اوى ممكن تخلينى ابكى ابسطها احوال مصر الفزيعه :D

    بس الفكرة انا رافضه فكرة الفرض انو لازم اعيط وان الناس تعاملنى انى حاجة غريبه عشان مش بعيط

    !!!

    وهو بقا نكد وخلاص :P

    ReplyDelete
  10. هو زاي مانت قولتي كدة "يخربيت النكد" اصل تقريبا الناس متعودة علي النكد او في ناس تنية بتخاف تفرح او حتي بيحسو ان في حاجة ناقصة لو مفيش نكد

    انت صح جدا و المفروض
    "صلو على النبى كده وفرو الدموع "
    :)

    ReplyDelete
  11. هههههههههههه

    لأ ملاحظة هايلة الصراحة
    احنا عموما طبعنا غريب في كل حاجة ههههه
    في الفرح نعيط وفي الحزن نضحك
    شعب مبالغ فيه على رأي اللمبي

    المهم ربنا يرده بالسلامة سالم غانم إن شاء الله
    :)

    سلام

    ReplyDelete
  12. احنا مش شعب مبلغ فيه..
    يا جماعة مش نكد قد ما هو أسلون تعبير و طبيعة عند كل شخص......

    مش غلط اني أعيط في أي موقف كان ..
    الغلط اني الوم الناس على طبيعتهم أو استنكرها واحس ان اللي بعمله هو العادي والغير شواذ....

    سواء بنعيط أو لا...

    thanx

    ReplyDelete
  13. يابنتى فى نوعية من الأشخاص بتتفنن فى الدموع وبتكون مبالغ فيها فعلا

    لكن لو دمعتين مزنوقين مفيش مشكله ان اقصد الزيادة خصوصا انهم شايفين ان ده المفروض

    انما البنات الحثاثه اوى يعنى فملناش دعوه بالصنف ده ولا ايه
    :D

    ReplyDelete
  14. السلام عليكم
    أهلا بهنادى
    وأسف على التاخر فى زيارة المدونة الرائعة التى حزنت كثير لعدم متابعتها فى الفترة السابقة
    أستمر فى أستمتعنا بالحكايات المثيرة
    تقبل أحترامة وتقديرى
    الاخ
    أحمد مجدى رمضان
    http://schritte.wordpress.com/

    ReplyDelete
  15. تقولي الي تقوليه البكاء اساسي عند الوداع

    وانا حودعك الان عشان كذا حبدأ موشح البكاء وانتي جهزي نفسك بعلبة مناديل

    :D

    ReplyDelete
  16. Still ya honda...
    el domoo3 de very private thing,maleesshh abadan a7kom da mobala3' fe 3eyato we da la2...
    aw da nekady wala ma3andosh dam, 3shan 3ayat keter aw ma3aytsh 5aless,,
    de feelings, kol wa7ed FREE ye3ayat yekta2eb yed7ak...
    ma7komsh 3ala 7ad byez3al ezay wala byefra7 ezay, 7ATTA LAW HAYBALE3'.. it's his/her own feelings...

    so, my point is.. I can't and not allowed even to judge any one on the way they expresses their feelings ... and I can't also criticize someone doing something (crying for example) cuz I don't express this feeling in that way...

    It's my own feelings, i'm free to express, what i agree with you is no one should be so astonished for not doing what is common by nature... that's all..

    ReplyDelete
  17. نفرح نعيط نحزن نعيط فى ناس كدة تدور على النكد كدة وتحبو زى عنيهااااااااا وانا من ضمنهم ههههه ابقى نورى مدونتى المتواضععه

    ReplyDelete
  18. ماشي انتي صح انك ماعيطيش عشان ماتنكديش عليه

    لكن الامانه الامانه
    ماعيطيش بعد مابقيتي لوحدك عشان عارفه انه هيوحشك؟

    ReplyDelete
  19. ماشيى ياسينو انا متفقه معاكى والله

    انا قصدى م الحوار ده كله ان محدش يحط قالب وقولى انتى ليه مش فيه فهمانى؟

    انا بالنسبة لى لما اعيط وانا بوصله ده نكد عليه ده رأى انا ممكن تكون رومانسية للناس آخرين ده بردو رأيهم هما ويحترم

    أنا زوجى ميحبنيش أبكى وانا بوصله وليه نظريه فى كده ومتفق معايا فيها فى أزواج شايفين ان مراته لو مبكتش معندهاش دم ده رأيه

    الفكرة زى ماقلتى ان محدش فرض عليا حاجة معينه او يقيسها انا بحكى البوست ياسينو كنت بتكلم عن نفسى وتبريرى للموقف لأنى بجد ذهلت جدا من كمية الناس الى قالولى كده لكن لو اخدتى بالك لتريقت عليهم ولا اى حاجة انا اتكلمت ع صفة غالبه بس مش فيا وبقول ياجماعه مش لازم ابقا كده

    ReplyDelete
  20. esraa

    بأمانة بامانه لسه

    :D

    بصى هقلك يمكن لأننا أغلب الوقت بنتكلم على النت بسبب المسافة بين بلدى وبلده أصلا

    فلما يسافر أهم حاجة عندى انه يكلمنى نت لو مكلمنيش نت بقا هفتكر وقتها انه سافر
    :D

    ReplyDelete
  21. gamed awy mwdoo3 el 3yat dah :D,bs f3ln el msryeen by7bo y3yto awy y3ny fy el matar matla2eesh 7ad by3yat 3'er el masryeen :D ymkn e7na sha3b 3ateefy :D
    bs sa3at ya honda bgad byb2a 3'sb 3n ay 7ad
    el safar dah f3lan 2ala2 w momakn to3dy fatra tweela matshofeesh ely msafr fa btb2a 7aga tday2 shwya:s:s
    la7san akoon nkdt 3leeky wla 7aga w 5leetk t3yty la sama7 allah :d

    ReplyDelete
  22. ههههههههههههههههههههههههههههههه

    وربنا انتى جامدة ياريمو
    بصى مرات خالى قالتلى كلمة جامدة

    قالتلى انا اعيطك لوحدى ماشى لكن ميبقاش اخر حاجة يشوفنى بيها انى اعيط عجبنى اوى الموضوع وده الى انا اقصده

    ReplyDelete
  23. اعتقد ان الحكاية بتفرق من شخص لآخر في التعبير عن المشاعر و متفرحيش انك مش بتعيطي .... ده السبب اللي بيخلي الرجاله اكثر عرضه للأزمات القلبية و خلافه
    و في نفس ذات الوقت :) العياط مش دليل علي مشاعر و عدم العياط برضه مش دليل علي عدم وجود مشاعر و و الكلام ده عن تجربه و باختصار كان فية حد عزيز عليا جدا كان تعبان اوي و بصراحة اللي كان يبصلي كان يلاقيني في قمة البرود في حين انه داخليا ان كان هيجيلي ازمة قلبية و كنت تعبان جدا بس اعمل اية انا طريقتي في هندله المشاعر بتكون كده

    ReplyDelete
  24. وانت مين قالك انى مش بعيط طب اسأل كريم كده

    :D

    بس زى مانت قلت كده كل واحد وليه طريقه محتلفه فى التعبير عن مشاعره

    ReplyDelete
  25. هههههههههههههههههههه جميلة أوى التدوينة دي

    تقبلي مروري

    ReplyDelete
  26. :D)))))
    لما وصفتى المشهد دلوقتلا اتخيلته واتخيلت كمان مين اللى قالولك .... المهم يا هوندا المشاعر مش لازم تعيطى عشان تبينيها
    و يمكن لو مكنش حد سألك كنتى عيطتى فعلا
    :]

    يللا حصل خير و يرجعلك بالسلامة
    ;)

    ReplyDelete
  27. Safa

    ازيك يابنتى وحشانى جامد
    تصدقى كان ممكن مفكرتش فى النقطه دى قبل كده هههههههههه
    (K)

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore