نضافة شعب .. ثقافة شعب



ليه مش بنتعود على النضافة من واحنا صغيرين الا فى نطاق المنزل لكن بره كده بنرمى فى الشارع فى الكلية فى الطرق فى فى فى

من زمان وانا نفسى احل أزمة الزباله فى مصر وحلمت بآمال وأحلام وجربت أساعد انى احط علب فى الشارع عندنا لكن للأسف الناس عملته تجمع زباله وبقت ترمى أكياس الزباله عندها وماما هزقتنى فى الآخر وخلت أخويا يفكهم من العمود

آخر ماستطعت أن أواظب عليه إنى مرميش ورق فى الأرض وأحطه فى شنطتى والحمدلله الموضوع ده مظبوط معايا من كذا سنة لدرجة انى لما الاقى حد بيرمى بستغربه جدا هيا الناس هتتعب لو اتحركت شوية ورمته فى العلبه المخصصه لذلك؟؟ ديما ياأخى تلاقى علب الزباله فاضية !!!

المهم كذا مرة وانا فى الميكروباص ومروحه الاقى بنات يدونى ورق ارميه من الشباك بحس انهم بيشتمونى وبتغاظ جدا وبحطه فى شنطتى فى الآخر :D المهم اكتر حاجة حرقة دمى انهردة كان فى بنت جمبى فى الميكروبا من وقت ماركبنا لحد ماوصلت البلد لمدة نص ساعة بتاكل لب وفول وترمى من الشباك طبعا اضايقت وقلت ربنا يهدى الى مش عااااااادى بقا انى لما اجى انزل من الميكروباص وبشيل الشنطة من على رجلى الاقى الإسدال مليان قشر فول سودانى طبعا دمى اتحرق جدا رحت منفضاه قدامها يمكن تحس

بالله عليكم متشاركوش فى زبالة البلد ولو بورقه ارموها فى لااماكن المخصصه او احتفظو بيها معاكم لحد ماتلاقو علبة زبالة ولا حاجة صدقونى ورقة واحد بتفرق واحد + واحد + واحد = شعب مصر

وده احسن دعوه توصلها للى حواليك لما كله يكون بيرمى قدامك وانت مبترميش زيهم قدامهم حتى لو سخرو منك
قلهم ده قصر ديل

هوندا

9 comments:

  1. انا شخصياً مبرميش في الشارع , لكن لما بعمل كدا قدام اصحابي , بيقوليلي يا عم ما كله بيرمي ويحس ان الناس هتدحك عليه لو رما في علبه الزباله !!
    بردوا واحد صاحبي خلص الكانز فهيرميه فبقوله خليه معاك لما تلاقي زباله , قالي وانا افضل ماسك زباله في ايدي وراح رماها , علي اساس يعني ان كدا نضافه:D
    هيا ثقافه شعب

    ReplyDelete
  2. أنا معاكي جــــــــــداً والله يا هوندا
    أنا بقرف جداً وببص بقرف للي بيرمي ف الشارع وبحس انه بيعمل حاجه غريبه
    ورقة أييي حاجه بحطها ف شنطني ان شاء الله حتى الهولز وف الكليه بما انها كانت نظيفه بجد فعلاً مش تهريج وكان فيها زي ما بتقولي سلات في كل مكان كنت لما بلاقي حاجه مرميه ورق يعني بجبهاوأحطها في السله
    أنا بجد نفسي الناس تنضف شويه وتبطل ترمي ف الشارع ومن المواصلات

    ReplyDelete
  3. عارفه يا هوندا لما كنت في الامارات ماكانش في حد بيرمي في الشارع عارفه ليه اولا كان الي بيرمي حاجه بيدفع فلوس وكانت سله الزباله في كل مكان ياريت نعمل كده في مصر والي يرمي يدفع ويكتروا سلات الزياله صحيح عجبني بوستك بلاش نكد ربنا يرجعهولك بالسلامه يارب
    تحياتي

    ReplyDelete
  4. 3andek 7a2 ya honda wallahii...
    ana el 7amdolellah mn zamaaaaannn awyy wana moktane3a en maham kan el share3 msh nedeef mazawedosh ana, we army fe basket ya a3en el 7aga till i find a basket.

    msh 3arfa leh el nas bte3mel keda, we nerga3 neshteky en el balad msh nedeefaa , !!!
    heya fe3lan sakafet sha3b,

    bas law el wa7ed msh hayermi el wara2 elli fe 2edo 3al ard 3shan msh yedfa3 feloos, teb2a 7aga teza3al, heya 7al kawy, bas nefsy el nadafa tekon mn gowa el ensan, msh 3shan 7ad 5ayef yedfa3 3'arama..

    thanx honda

    ReplyDelete
  5. مامتي من واحنا صغيرين وهي بتقولنا مانرميش حاجه في الشارع

    واحنا طبعا كبرنا علي ده
    بنحط الورق في شنطتنا او جيبنا لحد مانروح

    بس بجد مش عارفه ليه الناس كلها مش بتعمل كده يعني؟

    مش الورقه دي هي اللي هتقل الشنطه

    ReplyDelete
  6. أنا ديما كنت اتمنى انهم يدفعو غرامة للى يرمى ورق او اى حاجة بس زى ماسينار بتقول لو النضافة تنبع من داخل الانسان بجد حاجة حلوة اوى اوى

    عارفين لما احنا بنحافظ على الموضوع ده انا شايفه انه بيدل على شخصياتناوبيئتنا

    ReplyDelete
  7. فعلا والله اللي بيرمي حاجة في الشارع ده بيبقى حاجة تضايق فعلا

    عارفة انا ساعات لما بكون مع حد من صحابي ومعاه حاجة وهيرميها على الارض .. ابقى عايز احرجه علشان ميعملهاش تاني

    بس بصراحة .. هو لو في مكان ومفيش فيه سلة او صندوق او علبة فاضية يرمي فيها

    غصب عنه هيرمي على الارض .. هيقولك هو انا هفضل شايلها لحد اما الاقي صندوق زبالة

    وبصراحة ليه العزر في دي
    :)

    ReplyDelete
  8. اكيد بس الاكيد اننا نقدر نعالج ده باى شكل مش عازة احط استمبات يعنى المهم النية تكون موجودة

    ReplyDelete
  9. بصى يا هوندا انا الحوار ده فكرت فيه كتييييييييييييير
    و ساعات بقعد اسكت نفسى بشوية تحليلات عبيطة :] يعنى مثلا كنت بقول ممكن الكبت فى البيت انه لازم تكون نضيف بيطلع فى الشارع بقه و بتبقى القذارة كده لله ف لله ... و ممكن عشان مفيش انتماء و مبيحسوش ان الشارع ده زيه زى البيت (بس ده كان اهبل التحليلات يعنى فكك منه:])... و ممكن عشان الشارع اصلا مش نضيف مبتبقاش غريبة قوى انهم يرموا فيه حاجة
    مش هى دى اللى هتأثر يعنى !!

    و بعدين يا هوندا الحكاية مش حكاية نضافة بس ، دى عملية تحضر ، الشعب المصرى (كشعب) مش متعود عليها
    زى اليوم اللى اتشعلقنا فيه ده فى الاوتوبيس :] و زى لما بيبقى فى شارع جديد و المحافظة ربنا يخليها عاملة اماكن لعبور المشاة ، بس الناس مبتقتنعش بيها و تكسر حتة من السور جمبها بالظبط عشان تعدى !!!
    و حاجات تانية كتيييييييير نبقى نتكلم فيها بعدين :]

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore