مصطفى محمود



اما كنت صغيرة كان بييجى ع التلفزيون برنامج العلم والإيمان لمصطفى محمود, كنت بخاف اتفرج عليه بالذات الموسيقى بتاعته ,مكنش بيشدنى انى اتفرج ع الحيوانات بس كنت اخطف بصه كده نتيجه صوت الناس هنا الى كانو بيتفرجو عليه ومرت الايام وكبرت وعمرى مافكرت اتفرج عليه.

فى اولى ثانوى بدأت اشترى مجله الشباب كان بيتنشر مقالات لمصطفى محمود وكنت كل مااحاول اقرأله حاجة مكنتش بفهم حاجة للاسف !!

كذا مرة حاولت بردو مكنتش بفهم او بمعنى أدق مكنتش بندمج مفتكرش منهم غير حاجتين علقو فى دماغى:

كان بيقول الناس بتتباهى بالقمر ويمدحو البنات انتى قمر والقمر اصلا كله أحجار سوده جواه وشكله الى بيظهرلنا ابيض بس.

مقاله تانيه بتتكلم عن الذاكرة للانسان والحيوان ان الفيران طول عمرها تقع فى المصيده حتى لو هربت ترجع تدخلها تانى ولو كان عندها ذاكرة مكنتش وقعت لأن كان اكيد اتعلمت م الغلط

قرأت فى 3 ثانوى كتاب "الإسلام ماهو” بردو انا فاهمه الكلام بس مش حاسه انى بندمج وبحسه تقيييل اوى يعنى لو قفلت الكتاب مقدرش احدد استفدت ايه؟

لحدددددددد

يوم مارحت معرض الكتاب وكانت وسام صحبتى عايزة تشتريله كتاب رحلتى من الشك للإيمان وقالتلى ع الاسم عشان افكرها وقالتلى انه كتاب حلو جدا

اخدت نفسى وقعدت ادور ع اخبار اليوم لقيت كتب مصطفى محمود كامله هناك وجبت الكتاب وطلع فى دماغى وقتها اجيبلى انا كمان واحد لانى فتحت الفهرس وشدنى العناوين وشدنى عنوان كتاب تانى اسمه سواح فى دنيا الله


قرات اول كتاب "رحلتى من الشك للإيمان عجبنى الكلام ومنطقى جدا وبيجاوب ع حاجات فى ذهنى وإجابات لأسئله لو حد علمانى او ملحد سألهالك بس مش حاسه انى مدمجة ومندمجتش غير فى اخر فصل .


الكتاب التانى "سواح فى دنيا الله اندمجت فيه من اول صفحه للجلدة واستفدت منه جامد وبردو فتحلى سكك فى دماغى وافكار مجتش فى بالى خالص واجابات لاسئله تبين مدى قدرة رحمة وعظمة الخالق سبحانه وتعالى وشوية عن التفكير الغربى والإسرائيلى تزرع جواك كمية الخطر الى بيترصدلك كمسلم وكعربى


كتاب زيارة للجنة والنار وهو بيصورلك موت ملك ظالم وانه دخل النار وشاف ايه وشوية مواقف واحداث تخليك تندمج فى جو الجنة والنار بالذات والموت والظلم الى فى الدنيا وحاجات كتيرة تثرى تفكيرك وروحانياتك الكتاب ده أثر فيا اوى


روايه الأفيون روايه صغيرة اوى عن واحد بسيط بيحاول يسخر جان ليه عشان يكون غنى احداث الروايه صغيرة بس ممتعه وفيها لمحات حلوة


أسرار القرآن كتاب جميل اوى فيه لقطات من القرآن الكريم بنظرة مختلفه لما تتبادر إلى أذهاننا جميعا ً

الزعيم مسرحية من ثلاث فصول رائعه بمعنى الكلمة تحمل بين طياتها العديد والعديد من الأخلاق والمبادىء ضد الفساد المتجسدة فى شخص البطل الذى يكافح الاحتلال التركى

مؤخرا قرات له كتاب الخروج من التابوت أحداث الرواية مثيرة جدا ومختلفه لعالم آثار سافر الهند وشاف هناك شخص عنده قدرات خارقه ولما بيرجع عالم اللآثار لبلده بيكون عنده مهمة اكتشاف مقبره بيقابله ألغاز كتيره بيربطها فى أحلامه بين الشخص الى قابله فى الهند والكون والقدماء والحياة والقدرات توصل للرساله الى بيحالو يوصلها الكاتب فى نهاية القصة وعالم الآثار على السرير فى المستشفى


كتب مصطفى محمود بالنسبة لى دلوقت بقيت زى دينامو وشاحن للعلاقة الروحانية بينى وبين ربى يمكن لانه بيلفت نظرك لنعم وحاجات كتيرة احنا مش بناخد بالنا منها لان فى حاجات بناخد وقت كتير اوى على مانعرفها ونلاقى حلول لأسئله بنواجها فبيبقا حلو اوى انك تقابل حد يقدر يجاوبلك ع الأسئله دى لانه اكبر منك سنا وعلما وخبرة

بدأت مؤخرا اتفرج على حلقات العلم والإيمان وكنت بحاول أشجع نفسى على متابعته لأنى أول مرة أتابع حاجات علمية زى كده بس بجد استمتعت بطريقه بشعه

بجد الراجل ده ثروة فكرية وكنز


لو حد قرأله ياريت يقولى كتب حلوة والى مقرألوش ياريت يحاول بجد وهيستمتع وهيتسفيد حتى لو مش من أول مرة

31 comments:

  1. د / مصطفي محمود
    لم أنتبه لكونه ثروة وكنز حقيقي إلا من فترة قريبة جدا
    فقد قرأت له مجموعة قصصية بعنوان " الذين ضحكوا حتي البكاء " وقد وجدت في بعضها قصصا مشوقة لأبعد حد
    وبعد مشاهدتي لبعض حلقات برنامج " العلم والإيمان " تأكد لي أنه كنز يجب المحافظة عليه
    وأنا الآن أحاول أن أجد له كتبا اقرأها وقد أفادتني هذه التدوينة في التعرف على بعض كتبه
    التي سأحرص بمشيئة الله أن اقرأها

    بالمناسبة وجدت الآن في جهازي كتاب له بعنوان " حوار مع صديقي الملحد "
    وقد قمت برفعه على هذا الرابط لمن أحب قراءته
    http://www.4shared.com/file/73651245/db507f1c/mostafa_mahmoud.html

    ReplyDelete
  2. أشكرك انا كنت بدور على الكتاب ده

    دى كتب تانية ليه

    http://www.goodreads.com/search/search?search_type=books&search[query]=%D9%85%D8%B5%D8%B7%D9%81%D9%89+%D9%85%D8%AD%D9%85%D9%88%D8%AF

    ReplyDelete
  3. انا بردوا كنت بخاف من الموسيقي بتاعت البرنامج :D
    بس كنت بتفرج علي الحيوانات وكان بيقول تعليقات حلوه جداً علي القرود والتماسيح وكدا :D
    الي سمعتوا من صاحبي ان الراجل ده دلوقتي , عندوا زهايمر
    بجد حاجه تزعل لو كدا فعلاً وان كم المعرفه دي يروح

    ReplyDelete
  4. فعلا بس قبلها أصلا كان معتزل الناس وميعملش حاجة غيره انه يقرأ فقط ومكنش حد يقدر زوره من صحافه غير اصدقائه فقط

    ربنا يجازيه خير عننا

    ReplyDelete
  5. "زيارة للجنة والنار" حلو اوي .. وبرضة فيه جو كوميدي كدة لما يصور إبليس هو في النار وبيقول يا حفيظ يا حفيظ .. وبيصور فيه معاني كتير حلوة زي مثلا أن المنافقين تحت إبليس في النار بدرجات كتير .... فيه كتاب تاني له برضة مشابه لحد كبير لفكرة "زيارة للجنة والنار" اسمه المسيخ الدجال .. اقريه لو ماكنتيش لسة قريتيه ,, هيعجبك

    فيه برضة منبع جامد للنوع دة من الأدب اسمه "رسالة الغفران" لأبي العلاء المعري .. محاورة مع شعراء قدماء جداً بس في العالم الاخر .. زي زهير ابن ابي سلمي .. عنترة .. بشار بن برد .. الاعشي .. مع وصف للجنة والنار وأحوال الشعراء دول هناك

    ReplyDelete
  6. انا بحب كتاب "حوار مع صديقي الملحد" .. يمكن اكتر كتاب اعدت قراءته
    وكنت بنصح ناس كتير انها تقرأه وكان يعجبهم

    ReplyDelete
  7. اممممممم .. انا كنت اسمع عن الدكتور مصطفى محمود من زمااان
    بس بصراحة مجاش في دماغي خالص اني اقرأ كتب ليه
    ...
    عموما شكرا على الكتب الجميلة دي
    وهحاول اقرا فيهم ان شاء الله
    :)
    سلااااام

    ReplyDelete
  8. أنا فيه كتاب من حوالي 8 سنين قريت أول صفحتين منه وهوا كتاب "الماركسية والأسلام" مش عارف ليه مكملتوش يمكن عشان كنت الي حد ما صغيير وكان كبير عليا ... بس بعد التدوينة ديه أكيد أن شاء الله هروح أدور عليه وأقرأه

    أما بقي البرانج فأنا بالنسبالي الموسيقي بتاعة لما بسمعها وبدون مبالغة برتعش ... مش لأنها مخيفة ولا حاجة بس عشان بتفكرني بأيام ما كنت صغير وكنت أتفرج علي الحلقات ديه مع والدي ووالدتي بليل ... متهيقللي أكيد ما أتفرجتش عليها كلها وفيه حلقات مشوفتهاش

    ملاحظة : أنا كنت فاكر أن دكتور مصطفي توفاه الله من كام سنة ولكن لما قريت التعليقات قولت أتأكد وفضلت أدور وفعلا لاقيت أنه والحمد لله لسه حي يرزق



    (وأحب أحييكي علي المدونة الجميلة -متهيقللي كان أسمها رغــــــايــيـن سـبـوت_ علي ما أعتقد)ا

    ReplyDelete
  9. دكتور مصطفى محمود من أكتر الناس اللي أثرت فيا ومن زمان وانا بحب أتابع البرنامج بتاعه كنت بستمتع جداً وانا بتفرج عليه واسمعه وافهم اللي بيقوله
    وكتبه كمان ممتعه جداً بالنسبه ليا بس للأسف من زمان ما قرأتش له غير كتابين بس رأيت الله والمسيخ الدجال أسمأهم تخض وعلشان أسمأهم اتشديت وقرأتهم واستمتعت بيهم بصراحه

    ReplyDelete
  10. انا من وانا صغيره مفهمش حاجه بس كنت بحب أتفرج عليه اوى .
    وطبعا زى محضرتك عارفه مقرأتش حاجه بما انى لسه مستجده على عالم القراءه ههههه بس هحاول ان شاء الله

    ReplyDelete
  11. سواح فى دنيا الله

    اسم يشد ان شاء الله اشتريه قريبا:)

    ReplyDelete
  12. انا عارف ان ليه كتب قيمة جدااا

    بس الحقيقة لم أقرأ له أى كتاب حتى الأن

    وسأخذ بنصيحتك وان شاء الله أحاول أشوف مبدأيا كتاب قيم له

    ReplyDelete
  13. مش هنسى برنامج العلم والإيمان ولا إن إن الناس كبير وصغير كانوا متابعينه بشغف .. تقريبا كنت بشوف أسر كاملة بتتابعه وكنت أتمنى إن التجربة تستمر أو تتجدد
    !
    بالنسبة للكتب برضه مش هنسى إن الدكتور مصطفى كان من الناس اللي أثروا في تفكيري جدا جدا من وأنا صغير وكتير بفتكر كلمات في كتب ليه قريتها من سنين ومتعلقة في ذهني لحد دلوقتي
    ..
    وأنصحك طبعا برواية العنكبوت
    ;)

    ReplyDelete
  14. وكتاب أينشتاين والنسبية .. وحلقة الزمان والمكان , وحلقة عن أينشاتين في العلم و الأبمان‬

    ReplyDelete
  15. انا بحبه جدا من وأنا صغيره
    من أيام العلم والايمان

    مش عارفه مكنتيش بتحبي البرنامج ده ازاي؟
    ده كان حلو اوي
    (:

    ReplyDelete
  16. الراجل ده فعلا ثروة

    انا مقرأتش حاجة لغيت دلوقت
    بس متابع العلم والأيمان من على يوتيوب

    شوفى الحلقة دى :
    http://www.youtube.com/watch?v=W3v8u2lidvE

    ReplyDelete
  17. ما شاء الله الراجل ده ربنا يبارك في عمره ويختم له بالخير للأسف مقرتش من كتبه لكن كنت باحب قوي البرنامج الموسيقى بتاعته كانت بتأثر فيا بشكل ما مش قادرة احدده
    إن شاء الله أجيب الكتب واقراها جزاكي الله خيرا
    ده موضوع بأحد المنتديات مجمع حلقات للعلم والايمان للتحميل
    http://www.qratees.com/vb/showthread.php?t=2462

    ReplyDelete
  18. دكتور مصطفى محمود

    مدونتى مشتق اسمها من حلقة من حلقاته

    وحلقاته كلها هنا 217 حلقة

    وانا بنزلها

    بجودة عالية
    http://www.dvd4arab.com/showthread.php?t=904814

    ثانيا انا عندى فى المدونة كتاب العنكبوت للتحميل

    ولوعايزة كل كتبه هيا عنددى على الجهاز ممكن أرفعها

    تحياتى

    د إبراهيم

    ReplyDelete
  19. كنت لسه بتكلم فى مدونة اصطنعتك لنفسى عن دكتور مصطفى .. رجل احترمت فلسفته الدينيه و الدنيويه معا و قليلا ما يتفقان فى رجل

    زياره للجنه و النار واحد من اعظم الكتب اللى اتكلم على العذاب و جهنم من وجهة النظر الفلسفيه

    تحياتى

    ReplyDelete
  20. ahmed

    فعلا الجو الكوميدى فيه ظريف أوى , مكنتش اعرف كتاب المسيخ الدجال ده هقراه فى أقرب فرصه ان شاء الله
    رسالة أبى علاء سمعت عنها كتير لكن مقرأتهاش لسه بس اتمنى فعلا انى الاقيها قدامى

    ******************

    عـلا - من غـزة

    سمعت عنه كتير بس مقراتوش لسه فى القايمة ان شاء الله
    :)

    ReplyDelete
  21. elahlawy

    حاول بجد وانت هتلاقيه كنز بمعنى الكلمة ومش هتندم ابداً

    **************

    قليل من التفكير

    فعلا برغم ان اسلوبه بسيط جدا بس اعتقد انه بيتطلب نضج ذهنى بسيط بردو
    :D

    دكتور مصطفى مازال على قيد الحياة بس مريض ربنا يجازيه بالخير عنا جميعاً

    أشكرك على رأيك بمدونتى وفعلا ده كان اسمها القديم :)

    ReplyDelete
  22. Rehab Mostafa

    انا لسه مقراتش الكتابين دول بس فعلا اسمائهم تجذب زى مابتقولى انصحك بالمداومة على قرائه كتبه باستمرار :)

    ****************

    Butterfly

    :) زى يامارو بصى انتى لسه عندك وقت تقراى المهم انك بدأتى تقرئى ربنا يوفقك

    ReplyDelete
  23. non

    فعلا ومحتواه رائع بجد :)

    ***************

    كرم مسلم

    لا تتردد :)

    ReplyDelete
  24. كريم

    حاضر هخلص كله ;)

    انا معاك فى النقطه الى اتكلمنا فيها قبل كده ان للأسف التجربة وقفت كنت أتمنى ان يكون فى استمرارية لأجيال قادمة تكمل الرسالة

    ***************

    esraa

    مش عارفه والله بس كنت بخاف منه لما كبرت وعقلت بقيت احبه :D

    ReplyDelete
  25. MMF

    بجد حاول تقراله ده عالم تانى وفعلا ثروة متشكرة على اللينك

    *************

    نورانة

    متشكرة اوى على الحلقات لانى هحتاج انزل كتير :D

    ReplyDelete
  26. Dr Ibrahim samaha

    أخدت بالى من اسم المدونة فى نفس اليوم الى اتفرجت على الحلقة دى "المرحوم فى التلاجة "وعجبتنى جدا جدا وفكراها كلها

    أشكرك على الحلقات

    *******************

    ahmEd_H

    فعلا الجميل فيه ثقافته الفكرية والدينيه متنوعة بأكثر من اتجاه :)

    ReplyDelete
  27. بالفعل مصطفى محمود كاتب وعالم متميز جدا

    أنا قرأت له أجزاء من كتاب ماذا وراء بوابة الموت وعندي ليه كتاب تاني بس ربنا يفتحها لي بقى عشان أقدر أمشي فيهم .. لأن الكتب عندي متلتلة والوقت رايح على ميت حاجة غير القراية

    بس تدوينة متميزة سلمت يداك :)

    وأنا الخسرانة إني مش بعدي هنا كتير :$

    ReplyDelete
  28. ههههههه ولا يهمك يامها بس بجد حاولى تواظبطى ع القراءة أكتر وتحديدا لمصطفى محمود
    :)

    ReplyDelete
  29. ربنا يبارك فيك

    http://www.dmostafamahmoud.blogspot.com/

    ReplyDelete
  30. بجد انا زعلت اوي لوفاته محش ممكن يتصور تأثير الراجل ده فيه قد إيه و زعلت اكتر لتعليقات بعض الناس غلى وفاته الله يرحمه الله يرحمه الله يرحمه من كل قلبي

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore