امبارح كان عمرى عشرين



فى نهاية كل سنة بحتفل بانتهاء سنة من حياتى وبداية سنة جديدة فى حياتى بردو حيث انه عيد ميلادى
كملت 21 سنة خلاص بقيت رشيدة ومستنية بكار
:D

بصفة عامة السنة الى فاتت سادها جو نفسانى كئيب لأنى حسيت بتراجع روحانياتى بطريقة غبيه وللأسف لحد الآن مقدرتش أرجع للمستوى الى كنت وصلته ولكنى مواظبه على الدعاء لأن ربنا الوحيد الى هيقدر يخلينى أفضل مما كنت وده أكتر سبب كان بيتعبنى نفسياُ طول العام وبدعى ربنا انه يارب يكون ابتلاء و
لا يكون عقاب لتقصير عملته وأنا معرفوش بتمنى السنة الجديدة ربنا يهدينى ويهدينى ويهدينى ويعزنى بطاعته ولا يذلنى بمعصيته


بدأت السنة الى فاتت بآية قرآنية شعار للسنة كلها :
"قل إن صلاتى ونسكى ومحياى ومماتى لله رب العالمين " وحاولت اطبقها طول السنة نجحت فى مرة وفشلت فى مرات ولكن مازلت مصرة على الشعار وبإذن الله هوصله

بدأت 3 عادات أول شهر والحمدلله واظبت عليهم لنهاية السنة بوجود سقطات خفيفه فيه زى

1- حافظت على استخدام
calender جالى هدية فى مجلة الشباب
كنت بعلقه على الدولاب بتاعى باجى كل أول شهر اكتب الحاجات الى عايزه اعملها فى الشهر والكتب الى هقرأها وهكذا
ساعدنى كتير إنى أعمل خطة شهرية يومية

2- است
عملت
organiser
شفته مع منى صحبتى وعجبتنى الفكرة بتاعته بكتب فيه بردو كل حاجة بتيجى فى ذهنى أفكار , أهداف , خطط كل حاجة ومكنتش بمشى من غيره ونظملى تفكيرى جداُ

3- إنى أعود نفسى على القراءة يومياُ وفى الوقت الضايع وانا بره البيت والمواصلات وممشيش غير لما يكون معايا كتاب فى شنطتى والحمدلله حققت ده بنسبة 95% وقرأت كتب كتيرة أوى كتب اشتريتها , وكتب استعارتها من الأهل والأصدقاء أجمالى ماقرأته 50 كتاب متنوع
15 كتاب فى مجال الكمبيوتر
ومن أجمل المواقع الى
بتشجعنى على القراءة
www.goodreads.com
ممتع بدرجة لا مثيل لها خصوصا مع أصابتى بسعار للقراءة
:D
وأصبحت مجنونة بكثير من الكتاب أعتبرهم كنز لايفنى أمثال مصطفى محمود،أنيس منصور,محمد الغزالى ،أحمد خالد توفيق,محمودالسعدنى

4- زرت معرض الكتاب لأول مرة فى حياتى

5- شاركت فى
CAT SCOPE
عن ال Presentation skills
ومستوايا كان شغال

6لكن الى راضيه عن أدائى فيها واستمتعت بيها
Presentationskills workshop

7- أجمل الحاجات إننا عملنا شنطة رمضان فى البيت عندنا عملنا 250 شنطة تقريبا وجمعنا تبرعات بقيمة 10 الآف جنيه عشان ال250 شنطة دول
وكنا حوالى 15 بنت بالكتير الى بيجمعو التبرعات فالحمدلله حمداُ كثيراُ

8- عملت جروبين على الفيس بوك استفادت منهم جامد أهمهم
أنا وأصحابى والثواب لأنى جمعت أصحابى فيه عشان لو فى اى عمل خير نقدر نعمله وناس كتير استجابت الحمدلله

وخلى بالك ممكن يحصلك هاك الى نزل فى كتاب دولة الفيس بوك

فى الجزء التقنى :


1
- اشتغلت السنة دى لأول مرة على نظام اللينكس بدل الوندز المعفن وجربت توزيعتين ماندريفا وأبونتو ماأجملهم

2- اتعل
مت
Css &Php&Photoshop
بس موصلتش لسه للاحترافية

3- دخلت مع كريم فى عالم ال
Freelancer
كنظرة عامة لكن لسه ماقتحمنهوش لكن ناوية اكمل فيه ان شاء الله الفترة القادمة

4- عملت مدونة عالمى الإلكترونى برغم كسلى فيها إلا أن الى بيشجعنى بصراحة لما ناس بتبعتلى إيميلات او تكتبلى فيها انهم استفادو بتحمس أكتر دى غير ان ليها معزة خاصة فى قلبى
:D

5- وصلت لدرجة العشق لبعض التقنيات الجديدة زى
Rss
GReader
مماترتب عليه زيادة متابعتى لمواقع ومدونات تقنية أغلبها أجنبية واستفدت منها جامد
و
Firefox متصفح
بإضافاته وخدمات جوجل كلها

6-شاركت فى
Hackers day
عن ال web apps
لكن أسلوبى كان سىء فى التقديم وكمان اللابتوب علق كذا مرة

فى الجانب الاجتماعى:



مررت بفترة كرهت الرجالة فيها وتحديداُ صفات قابلتها كت
ير زى الأنانية والجهل وانه يقول كلام مش قده والكذب وعدم احترام المرأة والتقليل من شأنها كنت بفكر خلاص انى متزوجش خالص
بس فى نفس ذات الوقت كنت بدعى ربنا يرزقنى بزوج صالح لأن عارفه إن مفيش حاجة اسمها كل الرجالة كذا ورزقنى الله بأجمل نصف آخر لى كريم واتعلمت بجد أن الواحدة لازم تصبر وتتمسك بالصفات الى هيا عايزاها وتدعى ربنا فقط

وده طبعا قلبلى الجزء الثانى من السنة بس كان تغيير حلو بلاشك وحسيت انى داخلة مرحلة جديدة من حياتى والأجمل من كده إنى حسيت بقيمة الدعاء لربنا لأنه هو الى اختارلى فعلا أحلى هدية وبقيت متشوقة للعب الجزء الثانى من حياتى كزوجة وأم وبدأت أقرأ فى كتب تساعدنى فى تحقيق الهدف الجاى كزوجة وأم صالحة
لأن المفروض يوصل لأولادى دول نتيجة كفاحى فى الفترة الى فاتت دى كلها
وطبعا أهم حاجة لن أنساها ان اول يوم رحنا لكريم فى بيتهم

جالى ضربة شمس فى عين شمس
:D :D

بس بجد أحلى إحساس وصلى من أصدقائى وقرايبى الى كانو فرحانين لى بجد أسعدنى أوى كمان أصدقائنا المدونين

كمان من أجمل الفترات قضيتها فى جمصه مع خالى وأولاده ومع خالى التانى وزوجته
ولما قضيت فى رمضان أيام فى القاهرة مع خالى وأولاده كانت أيام جميلة أوى


فى السنة الجديدة باحتفل بيها بالمذاكرة لأن امتحاناتى بعد 3 أيام
بتمنى انى انجح واخلص اخر سنة ليا
واتجوز
واتعلم الحاجات الى نقصانى واشتغل بقا
واقرأواقرأواقرأ
وربنا يستخدمنى ديما لعمل الخير وأنا متفائله السنة دى جامد ومتأكده ان مستقبلى الأيام الجاية هيكون ممتع لوجود كريم معايا
ربنا يوفقنا لما يحبه ويرضاه


هوندا


17 comments:

  1. بأذن الله 2009 هتبقى اجمل واجمل
    كل سنة وانتي بخير

    ReplyDelete
  2. ماشاء الله
    ربنا يجعل السنه الجايه أحسن وأحسن يا هنادى .

    وادعيلى :)

    ReplyDelete
  3. Woowww
    great achievements Honda.. Mahsa'llah..
    Wish that the new year 2009 will be much better for you Isa...

    Happy birthday, and happy new year and from success to success always ya rab

    ReplyDelete
  4. كل عام وأنتِ بخير

    وأنتِ أفضل وأجمل

    وأنتِ خرّيجة بإذن الله

    وأنتِ مع من تحبين

    كما تحبين

    تحياتي

    :)

    ReplyDelete
  5. جميل جدا يا أخت هنادي والله إن الإنسان يبدأ يعد إنجازاته
    فعلا بيبقى ليها طعم جميل
    بالتوفيق للجميع
    وربنا يجعلنا سنة جميلة وسعيدة

    ReplyDelete
  6. ماشاء الله عليكي يا هنادي
    لأ سنتك كانت حلوة ما تقوليش عنها كئيبة
    الحلو فيكي ان عارفة ايش بدك.. وماشية في الطريق الي حاتوصلك لحياة حلوة وناجحة في كل امور حياتك ان شاء الله

    ReplyDelete
  7. ماشاء الله يا هوندا
    ربنا يكرمك كمان وكمان
    وكل سنه وانتى طيبه والسنه الجديده تكون احسن واسعد بأذن الله :)

    ReplyDelete
  8. كل سنه وانتي طيبه يا هوندا وان شاء الله السنه دي تبقى أجمل من كل سنه
    ربنا يكرمك يارب وتخلصي أخر سنه على خير وتتجوزي :) ان شاء الله يارب

    ReplyDelete
  9. كل سنه وانتي طيبه يا هوندا هانم
    وربنا يخليلك كريم
    ما شاء الله عليكي بتخططي صح وفعلا ربنل يزيدك من اصرارك على التعلم والقراءه انا بحترم الناس الي بتقرا وتحب تجرب جدا لان احنا فعلا محتاجين كده ونادر محد بيعمل كده

    ربنا يوفقك ويزيدك ويسعدك مع كريم

    ReplyDelete
  10. جميلة أوي أخر صورة في البوست ,, كيبورد واحدة بتجمعنا كلنا
    :D
    إن شاء الله السنة اللي جاية تكون نجاحتنا فيها مع بعض أكتر وأكتر -طبعا ده كمان بالقوة الجبرية- صحيان بدري وقراءة وشغل بلا رحمة إن شاء الله ,,
    :D
    في إنتظارك في مطار المدينة
    X
    :D

    ReplyDelete
  11. كنت سعيد وأنا بقرء التدوينه, بحس ان تدوينة أخر السنه دي بمثابه الجايزه الي أنت بتحصل عليها عن طريق تجميع كل حاجه حلوه انت علمتها السنه دي , وايه الي أنت اتعلمته جديد , وبتحيي فرحه شعرت بيها قبل كدا في المناسبه لما حصلت ساعتها , بتمني ليكي بأذن الله السعاده ودائماً في تفوق وتقدم وإن شاء الله هحضر الزيجه السعيده السنه دي :D

    ReplyDelete
  12. ربنا يكرمك يارب
    ويتحقق كل اللى نفسك فيه

    ويارب تكون سنة سعيدة على الكل

    ReplyDelete
  13. كل سنة وانت طيبة يا هوندا
    وربنا يحقق لك امنياتك ويوفقك للخير دائما

    ReplyDelete
  14. كل سنة وانت طيبة و ان شاء الله السنة اللي جاية تحققي اهداف اكتر و من تقدم لتقدم ان شاء الله
    بالتوفيق
    سلام :)

    ReplyDelete
  15. Happy birth day honda ,i wish 2009 will be a very happy and successful year 4 u :)
    masha2allah gr8 achievements in 2008
    rabna ywafa2ek :D

    ReplyDelete
  16. كل سنه وانتي طيبه يارب وعقبال 100 سنه ياقمر وكل الي نفسك فيه بتحقق السنادي

    ReplyDelete
  17. كل سنة و انتى طيبة يا هنودتى
    و السنة الجاية تحققى كل اللى نفسك فيه إن شاء الله
    عاجبانى أوي الطريقة اللى بتقيمي بيها السنة علشان مفيش وقت يهرب منك
    شدي حيلك السنة دي ، و ربنا يتمم لك بخير و تتجوزي و تكونى أسعد إن شاء الله

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore