حول أهدافك إلى عادات



من فترة قرأت مقالة عجبتنى جداً جداً ولزقت فى دماغى فكرتها


بتتكلم عن إزاى تحول أهدافك لعادات وميزة الموضوع ده انك بتحاول تعمل كل يوم خطوة صغيرة من هدفك ده فبالتالى بتتعود انك تعمله كل يوم ويصبح عادة لحد مايوم م الأيام تحقق الهدف ده بصورة أكبر
وضرب الكاتب مثال انه عايز يكسب المارثون ففضل كل يوم يجرى لمدة محددة صغيره وواظب عليها شهر بعد كده بقا يعملها تلقائى وفى الآخر كسب المارثون.

ولما فكرت فيها فى حياتى اكتشفت انى عملتها بشكل لا إرادى فى موضوع القراءة ،كان هدفى أواظب على القراءة كعادة كل يوم واستغل الوقت الضايع فى المواصلات فكان ديما فى شنطتى كتاب و90% من الوقت الضايع كنت بطلع الكتاب والسنة خلصت قرأت فى المواصلات كتب كتير أكتر من الى بقرأهم فى البيت وبقت القراءة عادة يومية عندى وفى نفس الوقت حققت الهدف إنى أقرأ وكتير واستغل الوقت

والخطوات الى اتحددت فى المقال عشان تحقق أهدافك بتحويلها لعادات:

1- هدفك لازم تكتبه بوضوح وكل ماتخيلته بصورة واضحة كان أسهل فى التحقيق
2- حدد الخطوات الى ممكن توصلك للهدف وهتلاقيها كتير

3- حدد الهدف ده المفروض يتعمل كل يوم ولا كل اسبوع ولا كل شهر، مثلا لو عايز تدخر المال هتحتفظ كل يوم بجزء معين قبل ماييجى ميعاد فواتير هتدفعها مثلاُ
4- حدد نسبة معينه من الهدف لازم تتعمل فى فترة زمنية محددة كنوع من التشجيع
5- ركز على الهدف الأول الى عايز تحوله لعادة لمدة شهر من غير ماتلبخ نفسك فى أهداف تانيه
6-بعد الشهر مايخلص تقدر تدخل هدف تانى معاك فى الجدول لمدة شهر تانى وفى نفس الوقت بتعمل الهدف الأولانى
7- لو حسيت انك بعد وقت حصل تداخل بين الأهداف أو فى هدف مش ماشى معاك زى مانت عايز جربه تخصصله شهر من جديد وتواظب عليه

دى النقط الى علقت معايا كتبتها زى ماوصلتلى

المقالة الأصلية

*.*هوندا*.*

9 comments:

  1. نفس اللى حصل معايا تقريبا وخصوصا في موضوع القراءة

    فعلا خير الأعمال أدومها ولو قلت

    اشكرك هوندا ع البوست الجميل ده

    ReplyDelete
  2. بالظبط خير الأعمال أدومها وإن قلت انا مقتنعه بالجملة دى جداُ وبحاول اطبقها ديما

    ReplyDelete
  3. انا بردوا قرئت المقاله دي من فتره ,
    كلماته فعلاً صحيحه وده الي بحاول اعمله من فتره
    هيا المدونه ااساساً مقالتها كلها جامده :D

    ReplyDelete
  4. فعلا كلام صح
    شكراا , هوندا

    ReplyDelete
  5. كلام ومقال جميل بجد يا هوندا
    ابراهيم الفقي برضه اتكلم كتيير عن تحقيق الاهداف واتكلم عن الأهداف بعيدة المدى وقصيرة المدى وازاي نقدر نحققها
    بحيكي بجد يا هوندا :)

    ReplyDelete
  6. الموضوع ده فعلا حلو اوى
    انا كنت جربته قبل كده فى الذاكرة
    عشان كنت احيانا بنسى عودت نفسى ان اى حاجة اشوفها احفظها
    لغايه مابقت عاده
    وبرده فى التحليل لغايه مابقت عادى عندى انى احلل كل حاجة من غير ما اخد بالى
    وعلى فكرة البلوج بتاعك ماشاء الله جامد
    ربنا يوفقك
    والف مبروك على كتب الكتاب
    ومعاكوا ان شاء الله فى الهاكرز D:

    ReplyDelete
  7. جميل قوي التخطيط ده وفعلا انا عملت كده في حاجات ووصلت وساعات كنت بقف بس فكره جميله وشكرا عليها

    ReplyDelete
  8. كلام جمييل جداا جدااا
    يارب فعلا نقدر نحققه
    شكرا
    :D

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore