الكتب السوفت كوبى

فى بوست
who moved my chees

فى زميل نبهنى لنقطة انى لا أضع لينكات تحميل للكتب لحماية الملكية الفكرية للمؤلف ودار النشر , فى الحقيقة الموضوع ده فعلاُ كان بيحيرنى جامد لأن فى ناس قالتلى حرام وناس قالتلى مش حرام وفعلاُ أنا محتارة جداً بسبب تعدد وجهات النظر والموضوع ده فى نقطة الكتب فقط

لكن فى حاجات تانية تخضع تحت بند السرقة لو اعتبرنا أننا بنسرق الكتب الموجودة على الأنترنت كنسخة إلكترونية

هناك سرقة الوندز الى احنا بنستخدمه لأننا مش بنشتريه

وفى سرقة للبراااااااااااااامج الكمبيوتر الى بتشتغل على الوندز

وفى سرقة للصور الى بنحطها فى البلوج والبوستات وووووو لأنها أيضاُ تخضع لملكية فكرية وحقوق نشر

طيب ايه العمل؟

بالنسبة للوندز فهناك البديل ببساطة اللينكس بجميع نسخه بسيطة
وممكن نشترى أسطوانة وندز أصلية

برامج الوندز فى حالة اللينكس فأغلب البرامج الى هحتاجها موجودة بشكل مجانى وفى منها شغال على الوندز عادى

بالنسبة للصور فى مواقع كتييييييييير بتقدم صور كتير مجانية

طب بالنسبة للكتب بقا؟

المفروض ان الى ينطبق على الى فات ينطبق عليها صح !
واضحة مش كده؟
بس مش عارفه ليه فى صراعات فى عقلى بين وجهات نظر كتير سمعتها

فى واحدة صحبتى لما سألت فى مرة عن كون الفلوس الى بتقبضها من شركتها حرام لأن البرامج الى شغاله عليها غير أصلية
والشيخ قالها على حسب هيا لمسلمين ولا كفرة
فهل ده ينطبق على الكتب؟

طيب اشمعنا الكتب الى فى المكتبات العامة بتتقرأ مليون مرة من غير ماحد يشتريها طب فين حقوق الناشر؟ ولا هو بيكون عارف

ايه رأيكم فى الموضوع ده ؟

بس عموما كحل سلمى أنا هحذف لينكات الكتاب ومش هبعت لحد كتب مؤقتاُ لحد ماالاقى حل نهائى
:D


*.*هوندا*.*

15 comments:

  1. السلام عليكم

    من أقل من سنة ... كنت بجيب كتب كتير و أقعد أقرأ ولا همي
    بس لما أخدت كورس اللينوكس ووعيت للدنيا

    بطلت أجيب أي حاجة ليها سيريال ... و بطلت أنزل كتب كتير و بجد ببقى محتاجها جدا ... بس مابرضاش

    الكتاب الوحيد اللي مسروق عندي دلوقتي هو كتاب Offensive Security ... جبته عشان حاجتين
    أولا صاحبه اسرائيلي!!
    ثانيا مش لاقيله بديل كويس ممكن أشتريه


    اما بالنسبة لبقيت الكتب اللي بحتاجها
    ببساطة جدا بجيب الـ contents بتاعة الكتاب و أستنجد بالحاج جوجل

    و انا عرفت مكتبة في مصر ممكن أديهم الـ ISBN و يجيبولي الكتاب
    بس لسه ماعرفتش ايه نظامهم

    فبصراحة انا مقتنع ان اللي بنعمله ده مش صح
    و بحاول أصلح الموضوع ده بالنسبة ليا عشان اعرف اصححه للناس

    مش عارف ايه كل الكلام اللي انا قلته ده
    بس اهو ممكن يشجع الناس شوية :)


    سلام

    ReplyDelete
  2. الكتب في المكتبات العامة لا تخرق حقوق الملكية الفكرية، لأن المكتبة العامة تشتري الكتاب وتتيحه للقراءة
    الفرق هنا يتضح إذا ما اشتريت كتاب بـ 10 دولار مثلاً وقرأتيه مرة ، ثم أردتِ قراءته أخرى هل ستشترين نسخة أخرى من الكتاب أو تدفعين 10 دولار أخرى للمكتبة ؟
    حقوق النشر والتأليف تحمي الكتاب من إعادة طباعته أو تصويره، أو ترجمته أو سرقة نص الكتاب .. لكن لا أحد يقول أنها تمنع من قراءة الكتاب أكثر من مرة
    هذا يعني أن شراء الكتب بثمن أرخص كونها مستعملة، أو اهدائها أو وقفها (كما في المكتبات العامة) كل هذا لا يخرق حقوق الملكية الفكرية للمؤلف ودار النشر ولا يعتبر سرقة ..
    الذي يدور في رأسي الآن تساؤل بشأن الشيخ الذي أفتى زميلتك بأن الأموال التي تقبضها يختلف حلها وحرمتها إذا كانت لمسلمين أو كفار .. هذا غريب جداً ... لم يبح الإسلام أموال الكفار وأعراضهم إلا إذا كانوا حربيين .. هذا يعني أننا لا نبيح لأنفسنا سرقة البرامج ولا الكتب بحجة أن أصحابها كفار.. لو كان منطق الشيخ صحيحاً فليست سرقة البرامج المنسوخة حراما لأن أصحابها كفار وأولهم مايكروسوفت .. !ـ

    ReplyDelete
  3. انا ريحت نفسي من الموضوع ده خاالص
    وبروح اقرأ في المكتبه لاننا جيران , وعاده بيكون فيها اي كتاب في اي مجال انا عاوزه
    او شوفته ع النت
    اما بالنسبه لحقوق ملكيه الكاتب للكتب اللي في المكتبه
    فانا اللي اعرفه اني دافع اشتراك للمكتبه وكمان
    دي مسؤليه المكتبه بقى مش مسؤليتي
    بس برده بشوف من باب اضمن واريح اني اروح المكتبه

    ReplyDelete
  4. انا بحب جداً ان انا اجمع الكتب الألكترونيه , وبالتالي بحب أشارك بيها الناس , بس سألت شيخ قبل كدا قالي إن العلم مش مُحتكر علي فئه معينه , بس الشرط أنك لو حصلت علي الكتاب ده متدهوش لحد, وضربلي مثال ,قالي لو واحد بيوزع فلوس علي الناس وقدامك الفلوس دي , تقدر تاخدها من غير ما يكون عليك حرج بس الشرط إنك متديهاش لحد تاني , يعني الي عايزها يدور هوا بنفسه
    فمبشاركش بالكتب عشان كدا

    ReplyDelete
  5. بالنسبه للكتب أنا كنت مستغرباكي بصراحه انك بتنشريها كده
    أنا مشاركتي بالكتب سواء باخد أو بدي مع ناس محدودين جداً والاغلب باخد بصراحه :))
    بالنسبه لموضوع البرامج الشركه نفسها عارفه ان برامجها بتستخدم من غير تصريح والا أغلب الشعوب تتحكام بسبب سرقة البرامج يعني مثلاً مايكروسوفت عارفه ان أغلب البيوت مش معاها نسخه أصليه من الويندوز بس ساكته علشان الموضوع ده برضه بيفيدهم بأي شكل والا ماكنتش سكتت
    قوليلي كده مين هيجيب نسخة ويندوز بتتجدد كل فتره بكام ألف علشان يشتغل عليها إلا قله قليله جداً من الناس وبصراحه بحترم مايكروسوفت جداً ف كده لتعاطفها مع الناس :)
    لكن بالنسبه للشركات ... الشركات نفسها بتفضل ان يكون معاها نسخ أصليه من البرامج وبحترم أوي الشركات اللي بتعمل كده
    وأغلب المؤسسات التعليميه والكلام ده بيكون معاهم تصريح أو نسخ أصليه يعني من البرامج اللي شغاله بيها

    ReplyDelete
  6. @ كريم
    الواحد اللي بيوزع فلوس ع الناس دي بتبقى فلوسه
    لكن اللي بيحط كتاب ع النت مش بيكون بتاعه , الا اذا كنت تقصد بقى ان صاحب الكتاب نفسه كان بيوزعه ع النت وببلاش ,

    @ rehab
    نسخه الويندوز مش بتجدد بكام الف ولا حاجه على فكره
    بس فعلا الشركات عارفه ان منتجاتها بتستعمل من غير ماتتباع , وساكته علشان ده جزء من الدعايه بتاعتها , بتهيالي كده !!!

    ReplyDelete
  7. @boody
    يمكن لأن الكتب حاجة محببه للعقل فاحنا مش مقتنعين انها غلط مثلا,, ويمكن لان الكتب متوافرة بشكل بشع فمش بناخد بالنا ,, طب ليه السايتات الى قايمة بالكامل على انها تحط كتب كده مبتتقفلش؟

    @ كريم

    الشيخ ده ثقه ؟؟:D

    @noura

    ماهيا تقصد برامج ميكرسوفت

    @ rehab

    فعلا زى ماسيد بيقول نسخة الوندز مش بتتكلف الف ولا حاجة وبعدين انتى ععندك بديل الى هو اللينكس وبغض النظر عن ان ميكرسوفت عارفه او لا فهى تعتبر تحت بند السرقة مالمؤلفين بتوع الكتب عارفين بردو ان كتبهم بتتححط

    !

    ReplyDelete
  8. اه كلامه موثوق فيه بجانب اني شوفت قبل كدا فتوي للشيخ العثيمين في نفس الأمر , بس من فتره طويله ومش عارف أجيبها تاني , بس كلهم بيجمعوا علي نفس الشئ دي باذن الله

    ReplyDelete
  9. والله انا شايف ان الموضوع دا غلط
    لأن الكتب دى ليها حقوق طبع وكدا فمعنى انى اعملها سكانر اصلا وانزلها على النت دا هيضر الكاتب اللى ليه حقوق طبعا
    لكن الدافع بتاع الموضوع دا ان الكتب غالية جدا
    وانا عارف ان دا مش مبرر
    بس مثلا كتب البرمجة والشبكات سيسكو او اى كان ماهو احنا بنطبعها او بنشتريها من المكتبات اللى بتبقى نسخة عادية ودا برضه يعتبر سرقة
    فأظن ان الحل ان اللى عايز حاجة يشترى النسخة الأصلية بتاعتها ودا طبعا اصح حل من وجهة نظرى
    بس مين معاه فلوس عشان كل حاجة يحتاجها يشتريها اوريجنال؟؟؟؟

    ReplyDelete
  10. انا معرفش حاجة اسمها حقوق ملكية فكرية :)))

    لو فكرت في كل حاجة اشوف اذا كانت اصلية ولا لأ.. او اذا كانت بتحترم حقوق الملكية الفكرية ولا لا.. هتكون النتيجة اني امشي عريان

    كتب.. افلام.. اغاني.. مجلات.. وحاليا جرائد.. كله بجيبه من الانترنت.. وقريب هعمل هدومي من الانترنت بس بدور على مطبعة كويس تعرف تطبع صور نضيفة على تي شيرتات

    فكرة الكتب الاكترونية هي نفس فكرة المكتبات العامة.. واحد بيشتري الكتاب و بيعرضه للجمهور لو يحبوا يقروه.. زي نوادي الفيديو زمان .. واحد يشتري الفيلم ويعرضه للناس بسعر اقل ولو يعرف صاحب النادي ممكن ميدفعش فلوس خالص

    :D

    ReplyDelete
  11. موضوع جميل جزاكِ الله خيرًا

    وجميل أن يتحرى الإنسان المكسب الحلال في كل شيء يكتسبه .. في العلم والمال والطعام، حتى لو أدى ذلك إلى أن يمشي عريانًا في الشواع .. فهذا أفضل من أن يكون مجموعه من الحرام

    وأهدي هذا الجزء من الحديث النبوي إلى صاحب الرد الأخير:

    ثم ذكر الرجل يطيل السفر أشعث أغبر يمد يديه إلى السماء يارب يارب ,
    ومطعمه حرام ومشربه حرام وملبسه حرام وغذي بالحرام ,
    فأنى يستجاب له "رواه مسلم .

    فما أجمل يا أخواني أن نتحرى الحلال في كل شيء

    جزاكِ الله خيرًا صاحبة المدونة

    ReplyDelete
  12. بعيدا عن جميع مع ذكر من آراء
    فنسخ و توزيع الكتب و البرامج مخالف للقوانين و الاعراف و معصية لولي الامر و بذلك هو يخضع لقوله تعالي
    " يَا أَيُّهَا الَّذِينَ آمَنُوا أَطِيعُوا اللَّهَ وَأَطِيعُوا الرَّسُولَ وَأُولِي الْأَمْرِ مِنْكُمْ "
    و دع نفسك مكان المؤلف أو المبمج هل ترضي بأن يتم سرقتك

    و بالنسبة لمن يقول ان من يقوم بشراء البرنامج او الكتاب و اعداة تزيعه فهو حلال علي الا تقوم بتوزيعه انت مرة اخري فأقرأ اتفاقية البرنامج التي تقوم بالموافقة عليها اثناء التثبيت و أعلم ان كسر هذه الاتفاقية خيانة للعهد و المسلمون علي عهودهم

    ReplyDelete
  13. أنا كمان محتارة في الموضوع ده من فترة
    شوية اقول انه من حقنا لأن العلم مش حكر على حد و شوية أقول لأ صاحب الكتاب لما نزله كان علشان يبيع نسخ منه مش يوزعه بالمجان

    لكن انا مرة سمعت من أستاذ كان بيديلنا كورس في زدني إن في بلاد برة بيدرسوا الموضوع ده علشان يخلوا الملكية الفكرية على الكتب محددة بسنين معينة علشان الطريقة دي هتخلى العلم يضيع لأن مش هيقدر يحصل عليه غير ذوي الأموال فقط و لأن العلم ده ملك للبشرية كلها
    يا ريت لو وصلتى لحاجة في الموضوع ده تقوليلى لأني محتاجة اعرف فعلا

    ReplyDelete
  14. ممممممممممممممم للأسف لحد دلوقتى لسه موصلتش لحاجة ياآيه واديكى شايفه الردود أخلفهم معارض الفكرة والقليل يخالف الكل لديه أسباب ولكن لم أتوقف عن البحث

    ومازال البحث مستمر ....
    :D

    ReplyDelete
  15. الحقيقة أنا ماقدرش افتي
    ولا اعرف فتاوى في الموضوع دة

    لكن اللي أقدر أقوله ان دة مش واقعي
    الفقه لازم يتسع عشان يعرف يتعامل مع الوضع دة بأسلوب الزمن دة
    و القوانين المدنية برضة لازم تتسع أو تتغير عشان تتعامل مع الواقع اللي احنا فيه

    و إلا كل دة يبقى شعارات أفلاطونية فارغة
    و مستحيل تؤدي في يوم من الأيام إن الناس خلاص كلها تنزل تشتري مواد أصلية

    الواقع بيوضح -ببساطة- إن الخطأ في القوانين مش في الناس

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore