عن عمل المرأة أتحدث



من زمان وانا نفسى اتكلم عن الموضوع ده ويمكن الى فكرنى بيه تدوينة الأغلبية الصامتة


من وأنا فى إعدادى مثلاً كان حلم حياتى إنى أشتغل فى نفس الوقت الى بدرس فيه
لكن طبعا كان صعب إنى أقدرأصرح بحاجة زى دى فى البيت أو العائله الكريمة
وبالفعل فى أولى جامعه بدأت أصرح بالرغبة دى وكان والدى بدأ يستجيب ولقيت فرص عمل بسيطة جداً تعتمد على إتقانى للكمبيوتر
لما قلت فى مرة قدام خالى إنى بفكر أشتغل قالى اديكى المرتب كل شهر وتقعدى فى بيتك متشتغلش قلتله انى مش عايزة اشتغل عشان الفلوس بس وكلم بابا انه ميصحش ولا ينفع إنى أفكر فى حاجة زى كده وبالتالى والدى رفض الفكرة تانى

كنت بحارب عشان مقعدش فى البيت لحظة ومشتغلش وطموحى وأهدافى والذى منه

قلت هحاول أعلى مهاراتى لحد ماتخرج عشان أقدر أشتغل فى مكان أفضل
لحد 3 جامعة سبحان الله جالى فرصة عمل فى شركة كمبيوتر كانت شغاله فى مشروع تعليم إلكترونى

وبرغم إنى دورى كان بسيط جداً إلا إنى كنت سعيدة جداً بالتجربة وكأن ربنا حطنى فى مكان زى كده عشان اقدر أفهم معانى كتير مكنتش هقتنع بيها غير بالتجربة استمرت شهرين تقريباً
ولكن أثرها فى معتقداتى كان أكتر بكتير وإنى قررت إنى لما اتجوز مش هشتغل فى شركات لا حكومية ولا خاصة
ولما بقول لأصحابى ان مش ناوية اشتغل بيستغربو جداً لكن الحقيقه إن الحياة أولويات .

ليه بقا؟


أولاً مقتنعه تماماً إن عمل المرأة مباح وفى سيدات أيام الرسول والصحابة كان عندهم ورش والسيدة خديجة خير مثال فى التجارة,وأسماء بنت أبى بكر كانت بتساعد زوجها.
وفى أمثله كتير ولو الزوجة محتاجة للعمل بشكل مميت فالاسلام أباحه لها ولكن لا اعتقد إن الإسلام أباح التقصير فى الواجبات الأسريه على حساب العمل!
كمان مقتنعه إن لو ظروف الدولة متطلبة عمل نساء فيا أهلا وسهلا,إنما فى ظل البطالة دى مين الأحق انه يشتغل؟

أنا مقتنعه تماما أن الشغل لو هيأثر على حياتى الأسرية ملوش أى لازمة
وعشان تلاقى شغل مناسب قليل أوى انه ميكنش طول الأسبوع وساعات كتيرة فى اليوم
لو فى ياأهلا مفيش ملوش لازمة

الشغل بياخد من طاقة المرأة النفسية والعصبية والذهنية كتير جداً وبينعكس على حالتها فى البيت فاعتقد انها مش هتقدر تؤدى واجباتها بكفاءة لأنها يإما مرهقة جسديا أو ذهنياً مش هينفع كفاية بهدلة المواصلات

فلأنى لأ أقبل أن أكون زوجة أو أم تقليدية أرفض إهدار طاقتى خارج المنزل أو أى شخص يحرق دمى
فالطفل محتاج رعاية دائمه حتى يكون شخصية سوية وإنه يلاقى حد يحكى معاه ويجاوبله على أسئلته ويسمعهواحتياجات نفسية طول الوقت اعتقد لو مكنتش متفرغاله مش هقدر ألبيهاله بكفاءة
مش متخيلة مثلا إن زوجى يكون جاى البيت مرهق وجعان واقوله الأكل فى التلاجة

لكن هل ده معناه إنى هيكون عقلى فاضى وهطلعه على زوجى وكده؟ إطلاقاً
ممكن أساعد زوجى فى شغله واشتغل من البيت فى مجال
ال Free lancer

وفى فرص عمل كتيرة على الانترنت لمختلف التخصصات
عندى أحلام كتير ومشاريع نفس أعملها وإن شاء الله هحاول إنى أحققها طول ماأنا حية أرزق لكن فى الوقت المتاح ليا حسب أولوياتى

م الآخر ان الواحدة دماغها تكون فاضية مرتبط بشخصيتها قبل إنها تعمل أو لاً

هيا متقدرش تشارك فى مجال العمل التطوعى الخيرى الى هو كتييييييير أوى ومحتاج ناس ايه المشكله لما كل واحدة عندها وقت تحاول تساعد بوقتها ده فى عمل خير ونهضة أمة؟

متقدرش تقرأ وتقرأ وتقرأ عشان تكون أم مثقفه وتنشأ أولادها نشأه جيدة وتقدر تجاوب على أسئلتهم؟

متقدرش تتعلم إجادة لغة؟

طول مافى كمبيوتر وإنترنت وكتاب وقرآن فى البيت فى مليون حاجة ممكن الواحدة تعملها والله طالما الواحد عنده وقت يقدر يعمل كتير المهم الإنسان يكون عنده رساله قبل كل شىء

هوندا

20 comments:

  1. والله بجد أحييكي أكبر تحية يا أخت هنادي على كلامك ده
    عين العقل والله ربنا يكرمك
    ومش لاقي كلام تاني أقوله الحقيقة

    ReplyDelete
  2. فكر غريب وجديد بالنسبة لي انه يصدر عن فتاة
    غالبا المعركة بتكون العكس
    البنت عايزة تشتغل والعريس او الزوج مش راضي
    بس برضة وجهة نظر وتحترم
    فكرتيني بصديقي النصف متزمت

    ReplyDelete
  3. لا والله خالص فى بنات كتير كده
    بس الموضوع لانه اتاخد بشكل معارك ففى بنات حبت تتمسك بيه ويمكن انا كنت منهم
    لان الناس بتقول انه حرام لكن لما توصلت انه مش حرام وتأكدت من ده
    لقيت ان الواحد لازم يقارن بين المزايا والعيوب

    خصوصا وإنى مؤمنة جداً بأن الرجال قوامون على النساء فى أحلى من كده؟
    :D

    والنساء تنشأ أجيال أقوياء زى نساء الصحابة كده

    ReplyDelete
  4. أنا معاكي جداً ياهوندا في الكلام اللي قولتيه ده
    أنا مقرره اني لما اتزوج ان شاء الله ماشتغلش لأسباب كتير أغلبها اللي انتي قولتيها
    أنا ف الأول كان نفسي أشتغل ومازلت عايزه أشتغل وفرحانه بشغلي وعايزه أكمل ف مجالي ده بس زي ما بتقولي الحياه أولويات ... يعني لو زوجي أجازه ف يوم ولا مواعيده غير مواعيدي وأنا ف الشغل أتصل بيه أقوله معلش يا حبيبي اعمل الأكل لحد لما أرجع ولا ايه
    وبعدين المفروض الزوج يرجع يلاقي بيته نظيف وأكله جاهز لكن لو الاتنين بيشتغلوا وكل يوم راجعين مرهقين الحياه هتبقى عامله ازاي
    مش معني اني مقرره اني مش هاشتغل يعني هقعد ف البيت حاطه ايدي على خدي ومستنيه زوجي وخلاص على كده زي مانتي قولتي في حاجات كتيييير ممكن تتعمل وبصراحه أنا مخططه أنا هعمل ايه بالظبط ان شاء الله و من أهم الحاجات اللي مخططه ليها اجادة لغات معينه
    وزي مانتي قولتي الاولاد برضه محتاجين الأم ف حاجات كتيره جداً جداً جداً لو البيت فيه الأم والأب شغالين هتبقى مشكله وخصوصاً في المجال بتاعنا ده اللي بيستهلك كل وقتنا تقريباً لو ماكنش شغل يبقى تفكير
    على فكره أنا زمان كنت بقول اني لازم أشتغل ان شاء الله بعد الزواج فيها ايه يعني لما أرجع من الشغل وأنظف البيت وأعمل الأكل وأغسل المواعين:) أنا قدها هو أه هتعب شويه بس مش مشكله لكن وجهة نظري اتغيرت لما فكرت للموضوع بشكل منطقي ... صحتي هتروح على الفاضي وممكن بيتي كمان يروح وأولادي مش هكون فاضيه ليهم وهبقى فشلت ف كل حاجه ساعتها... فكرت ف حاجات كتير أوي وطلعت بقرار اني مش هشتغل بعد الزواج ان شاء الله :) ممكن أبقى أساعد زوجي في شغله لو هو ف نفس مجالي هتبقى متعه ليا أكتر بجد
    شكراً كتييير على موضوعك اللي بجد حاسه انك كتبتي كل اللي بفكر فيه

    ReplyDelete
  5. هوندا حبيبتى
    وحشانى موووووت

    والله كلامك حلو ومظبوط وياريت فعلا كل زوجه تكون مش بتشتغل تفضل متصله بالعالم والاخبار والدنيا
    مش يبقى كل حياتها المطبخ والغسيل

    بس انا بقى ان شاء الله هشتغل لانى بحب الشغل بحب اشوف نجاحى بنفسى
    عارفه هتقولى نجاج المرأه فى اسرتها
    بس انا ماتصورش نفسى كل حياتى لزوجى والاولاد وبس
    ومع ذلك وقت ماحس انى مش قادره اوفق بين الاتنين انا هاستقر فى بيتى بس لفتره محدده وهارجع شغلى تانى

    وعارفه بقى بعد كل التمسك بالشغل ده هاتطلع عينى واقول يارتنى قعدت فى بيتنا
    وربنا يسهل

    ReplyDelete
  6. عن عمل المرأة أتحدث
    حلوة الدخله بتفكرني بأحمد خالد توفيق لما يحب يكتب في حاجة قلقان انها ممكن تسبب الهجوم عليه .. فبتكون كتير طريقه تعبيره عن
    يا مسهل سهلها

    اما عن الموضوع
    مؤيد بكامل جوارحي
    تحياتي

    ReplyDelete
  7. i don't think that a woman can't make a balance between
    being a good mother and wife and between working and achieving her dreams ,of course there are times that she has to care only and completely about her house as u mentioned in the case of having children but in these periods she can experience wut are her real capabilties
    then she can decide ,or another solution she can take a rest from her work until her children grow up and can depend on them selves , i dunnu if i changed my mind about this one day ,plz remind me of it :D
    any way Hanady i wish u a great ,full of happiness and successful life with your husband whatever you decide about working
    thanx alot 4 the topic :)

    ReplyDelete
  8. انتى بتهزري أصلا مش كده
    انا كنت ناوية اكتب تدوينة كبيرة عن الموضوع ده من زمان ، انتى بتسبقيني يعني؟؟؟
    طيب انا مش هحرق تدوينتى يعني لكن هقولك على رأيي
    انا تقريبا رأيي زي رأيك بالظبط بالرغم من اني بقالى 5 سنين بشتغل و بحب شغلى و بحب النجاح و اني اكون مؤثرة بجد في المجتمع لكن انا ناوية و النية لله انى أول ما يكون لي دور أهم و الدور الأهم ده هو تربية اولاد أو رعاية بيت اني اتفرغ للموضوع ده لو البيت مش محتاج مشاركتي يعني ماديا
    2- مش كل الستات اللى بيشتغلوا بيشتغلوا علشان بيحبوا الشغل أوي يعني لكن فيه ستات بيضطروا يشتغلوا علشان الحياة صعبة يا هنادي
    3- في ستات حركتهم و تفكيرهم لو قعدوا في البيت ممكن يتحولوا لسلبيات كبيرة و ربنا خلقنا مختلفين فالنوع ده من الستات بيكون الأحسن لها انها تبقى على طول مشغولة في البيت و الشغل و الأولاد صحيح بيكون متعب ليها شوية لكن هي طبيعتها بتكون
    HIPPER ACTIVE
    يعني نشاطها زيادة و لو النوعية دي قعدت في البيت بجد بتنكد على اللى حواليها كله لأنها ما بتبقاش مرتاحة فالأحسن انها تكون مشغولة و تستفيد بوقتها .
    4-زي مل قلتلك انا ناوية اعمل كده فعلا اني اقعد في البيت و اتفرغ لتربية أولادي إن شاء الله و اكون معاهم لحظة بلحظة لأن تربية الأطفال أصعب مهمة في الزمن اللى احنا فيه انك تطلعى بني آدم بجد عارف دينه و محترم و بيفيد بلده و ما فيهوش أمراض نفسية من اللى مالية الدنيا دي
    5- كفاية كده بقى هو انا هقول ايه في تدوينتى يعني؟؟
    :))))))))))))))
    مش قلتلك قبل كده احنا متشابهين كتير
    بي اس : وحشتينى و الله

    ReplyDelete
  9. كلام جمييييل يا هوندا و انا اصلا ده رأيي :]
    بس فى الاخر ترتيب الحاجات غلط .. انا عارفة اكيد مش قصدك
    بس اكيد القران الاول و الكتاب بعد كده الكمبيوتر و الانترنت، ولا ايه
    :p

    ReplyDelete
  10. الله ينور عليكى
    ربنا يكرمك يارب

    ReplyDelete
  11. مقدرش اقولك غير ربنا يكرمك
    ويوفقك .. وينولك كل اللي في بالك
    اميين .. يارب
    :)

    ReplyDelete
  12. @Rehab

    فعلا المجال بياخد وقت كتير عجبنى كلامك ان صحتك والعيال ممكن يروحو ع الفاضى :D
    اكتر حاجة بفكر فيها فعلا ان الزوجين يكونو بره البيت العيال لوحدهم مين هيربيهم هيربو نفسهم :D
    وصدقينى لو ربنا رزقك بحد بيشتغل فى نفس المجال هتبقا متعة غير محدودة انك تساعديه
    انا بردو كنت مفكره انى هقدر اوازن بس صاحب بالين كداب :D

    ************

    @Bondoka
    وحشانى يافذقه :D
    وجهة نظرك حلوة ياستى انا مش معترضة :D
    انا كل الى حاولت اوصله ان الحياة أولويات وانك لو هتشتغلى وقصرتى فى أولوياتك يبقا صدقينى شغلك ده غير فى محله
    كمان مش محتاجة انى اشتغل عشان احس بنجاحى تقدر تحسى ده فى أشكال كتير
    ولعلمك انك تربى طفلة وتربيتك تنجح احساس رائع لا يمكن تتخيلى مدى قيمته

    ReplyDelete
  13. @Ahmed دكتور احمد خالد كاتبى المفضل فاكيد اقتبستها منه :D

    @Reem احنا متفقين فى نقطة انها تاخد اجازى فى الوقت المتطلب ده صح؟
    الاعتقاد ان الطفل محتاج رعاية فى فترة الرضاعه فقط اعتقاد غلط الحلقيه ان الاولاد بيحتاجو رعاية متكملة من الطفولة للمراهقة بعد كده بقا ممكن تقولى انهم كبرو
    :D
    كمان الموضوع بيختلف من شخص لآخر حسب الأولويات بالنسبة لى مثلا احب اقضى اغلب وقتى اتعلم ازاى اخلى اولادى افضل وافضل واتطور نفسى واشتغل بردو بس بطريقة اريح
    وطالما عندى بديل مريح مش محتاجة اتعب نفسى
    والله شغل النت ده حلو اوى
    :D

    ReplyDelete
  14. بجد بجد بجد ربنا يكملك بعقلك ويكرمك يا هوندا
    اسمحيلي أحيكي واشد على ايدك يا قمر أنتي فعلا بنت مش عادية

    ReplyDelete
  15. @ الحلم العربي

    اه بهزر عندك مشكله :]
    والله وحشانى يايويو انا بس عايزة اوضحلك انى مقصدش ان الى بيشتغلو وحشين بالعكس كل واحد ظروفه مختلفه
    انا بتكلم فى الحاله العامه لو اننا نقدر نستغنى عنه يعنى منكش متمسكين بيه لمجرد التمسك
    عموما انا الى قلتلك اننا متشابهين :P

    *************

    @Safa جميل ان رايك يكون متفق معايا ياصوفى بجد
    الترتيب مش مقصود :P

    ReplyDelete
  16. @ MMF ,elahlawy

    ربنا يكرمكم ويوفقكم :)

    @نورانة

    ربنا يكرمك يانورانه انتى كمان :)
    والله فى زيى كتير انا مجبتش حاجة جديدة
    :D

    ReplyDelete
  17. بجد هاعيط من اللى بسمعه ... اللى بتفكرى فيه اكيد كويس وممتاز جدا ولو المراة حبت تشتغل مايكونش على حساب طاقتها النفسية والذهنية اللى بيستفاد منها اطفالها لكن ماعتقدش تماما ان الشغل فى المجتمع المصرى يسمح بكده خصوصا ان الظروف مختلفة تماما عن المجتمع الاوروبى اللى بيدى مساحة لعمل الست وماياثرش على عواملها النفسية ( مش كله طبعا ) ومش هاقول الكلام الفاضى ( الست مالهاش الا بيت جوزها ) (واللى هاتشتغلى بيه هاديهولك )) ما اجمل ان تحيا المراة بصفاء ذهنى مميز يعينها على تحمل مشاق الاسرة

    ReplyDelete
  18. لو كل واحدة بس تفكر دقيقة بالمنطق ده وبالأهداف السامية دي ,, أعتقد فيه حاجات كتير هاتتغير .. معاملة الأزواج ,, الأولاد فيه مشاكل كتير مجتمعنا بيعاني منها وكلها قايمة على (المناطحة) بين الزوج والزوجة ,, مع إن الإتنين بيكملوا بعض وكل واحد فيهم ليه دور عشان الحياة تبقى سوية وبالتالي أولادهم
    وفي الأخير .. الحمد لله
    :)

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore