كلمة غبية اخر حاجة



ايه الكلمة دى؟

آخر حاجة

انتشرت من فترة ان اما حد قول حاجة يلحقها بتعبير آخر حاجة مش فاهمة ايه الإضافة ؟
بجد تنرفز أوى بكره الكلمات التى لا تضيف معنه ولا تنقصه ملهاش لازمة ولا حاجة
:P

انهردة مثلا واحد كاتب حركة بايخة آخر حاجة

انهردة بردو واحدة صحبتى كاتبلتى
والله وحشانى .. آخر حاجة


يعنى ايه بقا ايه محلها م الأعراب؟
:D

تفتكرو ده طبيعى ان اى كلمة نرددها وخلاص
بجد بحس انه بيقلل من منظرنا بيتجسد قدامى فى تلك اللحظات صورة بغبغان جميل اخر حاجة
حاجة مستفزة آخر حاجة
:D

*.*هوندا*.*

22 comments:

  1. :D
    ههههههه
    دى بقى اللغة الجديدة اللى بعد الفرانكو
    بس يمكن اللغة الشبابى دى منتشرة من زمان
    و كلام تانى كتير زى بيس يامان
    والكلام ده
    وعلى رأيك فعلا كلام مستفذ

    ReplyDelete
  2. بوست جميل آخر حاجة

    هههههههههههههههههه

    ReplyDelete
  3. هوندا انتي جامده أخر حاجه:))
    من يمكن سنه كده واحد كان كاتب يوم جمبل أخر حاجه قولتله يعني ايه أخر حاجه قالي يعني جامد جداً :))
    على فكره اكتشفت بعد ماسبت الكلية ورجعت أزورها كده ف مره لاقيت كلام غريييييب بجد بيتقال زي فاكس وأخر حاجه وكلام بجد عجيب أخر حاجه :))
    على فكره الكلمه دي كمان اتقالت ف اعلان.. بيقول شقه أخر حاجه بقول لماما عارفه يعني ايه أخر حاجه (بحب أسأل اللي مش عارف علشان أشوف تصوره ايه للكلمه) قالتلي يعني مثلاً أخر حاجه الواحد يتمناها قولتلها يعني حلوه أوي :))
    بس هي بجد كلمه رخمه أخر حاجه :)
    ولا ليها أي لازمه والله

    ReplyDelete
  4. تلاقيها كانت في فيلم لأحد القردة إياهم

    ReplyDelete
  5. هههههههه
    هي جت على دي :p
    انتو عندكو كمية مصطلحات عجيبة غريبة وكل يومين تلاقي حد مخترع "او مفتكس" كلمة جديدة وصارو الكل يرددوها :D
    حمادة علال حكاها في اغنية على فكرة
    بس انا عادي بالنسبة لي بحب الحيوية عند شباب مصر وفي اللهجة الشبابية
    وصباح السكلنس يا هوندا :D:D

    ReplyDelete
  6. لاالكلمة دى بالبذات من كل الكلام الشبابى اللى اخترعها بتستفزنى فعلا لان الكلمات التانية كانت بتبقى كلمة جديدة بتعبر على معنى انما دى زى ما قولتى ملهاش اى معنى

    ReplyDelete
  7. فعلاً الكلمه غبيه وانا مستتقلها كدا ,
    سمعتها من أختي قبل كدا ومستلطفتهاش بردوا
    كلمه غبيه اخر حاجه :D

    ReplyDelete
  8. الصراحه يا هوندا دى كلمهمن كلمات كتير سخيفه جدااااااا

    يعنى كلمه مالهاش معنى زى ماكانو بيقولو موت وطحن وكلام من ده

    وبعدين انتشارها بقى اسخف منها كمان
    يعنى كل واحد يسمع كلمه خلاص يرددها
    حاجه مش ممكن يعنى
    بتبين قد ايه احنا شباب تافه وهايف وفارغ وميعرفش غير التقليد الاعمى وخلاص

    وبعدين بقى تعالى اسالى حد انت بتقولالكلمه دى تقصد بيها ايه؟ طب مابتقولش جدا ليه هى مش نفس المعنى برضه

    يبصلك بقى كانك من العصر الحجرى
    وبتقولى كلام منقرض

    بس بجد الكلمة دى غايظانى جداااااااا
    ودمها تقيل كمان
    يعنى اخر حاجه وبعد كده هيقولوا ايه
    اخر حاجه اوى ولا اخر حاجه وحته

    ReplyDelete
  9. انا بصراحه مش شايفه فى الكلمه اى مشاكل الايام دى فى تعبيرات كتير جديده وانا مش شايفاها هيافه ولا حاجه لو فكرت شويه هتلاقى ان ده نتيجه طبيعيه جدا للتطور وللحياه بتاعه الايام دى اما انك تقبلها وغيرك يرفضها ده عادى جدا ولولا اختلاف الاذواق لبارت السلع
    انا شايفه ان فى كلمات تانيه اوحش بكتير يعنى زى يحلقله
    بتهيالى اخر حاجه ارحم بكتييييييييييير وبعدين تيك ات ايزى

    ReplyDelete
  10. معنديش مشاكل مع التعبير بس بتخنق منه لانه بيعملي ارتكاريا مش عارف ليه

    ReplyDelete
  11. كل ما فى الموضوع ان الكلمه دى فى فيلم اتقالت على لسان احد بطلات الفيلم وكانت بتكررها ديما وكالعاده الكلمه اصبحت اخر حاجه (اخر موضه فى الكلمات يعنى)

    ReplyDelete
  12. yeah ,i hate this expression alot

    ReplyDelete
  13. هههههههههههه انتي عسوله اخر حاجه ههههههه بالعند فيكي بقى (وش مطلع لسانه)

    ReplyDelete
  14. رائعة أخر حاجة
    هههههههههههههههه

    ReplyDelete
  15. الكلمة دي غبية فعلاً فعلاً فعلاً
    وبتستفزني جداً
    ولو حد قالها قصادي بسيبه وامشي من غير ما اسمع بقيت كلامه
    على فكرة علقت تعليق قبل ده بس طااار معرفش راح فين اول ما عملت بوست كومنت
    يلا حصل خير
    يارب تكونوا بخير وسعادة
    وتحياتنا للأمير كريم اوعي اسمع شكوى منك ..عارفك مش هتقصري رقابتنا
    :))

    ReplyDelete
  16. ولا يهمك سكايار انت عرف جوجل اوقات بتهزر انا ديما اخد كوبى من اى كومنت اعمله استعداد للتهرج
    :D
    احان بخير ولله الحمدلله طمنى عليكم بطوط وحشانى بغباء

    ReplyDelete
  17. أنا بكره الكلمة دي!

    ملهاش أي لازمة

    و كمان كلمة "جدا" أسهل و بنفس المعنى!

    ReplyDelete
  18. لولا اختلاف الازواق لبارت السلع
    بس بصراحه انا مع اللي بيقول ان البوست دا جامد آخر حاجه
    هههههههههههههههههههههه

    ReplyDelete
  19. لالا بالعكس انا باحب الكلمة دى موت جدا اخر حاجة :D
    لذيذ ان يبقى لينا تعبيرات خاصة

    اخر حاجة كلمة جامدة اخر حاجة
    واللى قال ان البوست جامد اخر حاجة
    عنده حق اخر حاجة
    امشى قبل ماتضرب ولا ايه :D

    ReplyDelete
  20. كلكو بتجاملو هوندا وتقولو ان الكلمه دى مش حلوه
    بالعكس وربنا كلمه جميله اوى بتحسس الواحد ان مفيش اى حاجه فى الجمجمه واهى كلمه يعنى هتلزق يا هوندا خليكى كول وعيشى مع المود
    الزمن دا عايز
    اى حاجه فى رغيف تتاكل

    ReplyDelete
  21. ولله العظيم معاك حق كلمه تنرفز فعلا وانتشرت بطريقه غريبه جدا يعني مثلا واحد يكتب تعليق ويقول جامده اخر حاجه
    طيب يعني ايه بقي

    زمان كنا بنقول جامده جدا او جامده كثير لكن كلمه اخر حاجه معناها اخر شيء يعني يتبعها اي كلام او اي جمله يعني مثلا لما واحد يقول

    اخر حاجه اننا لازم نعمل كذا
    اخر حاجه حصلت ان كذا وكذا
    لكن يعني ايه بقي كلمه وبعدين اخر حاجه
    بجد كلمه بايخه وكل لما تطلع موضه غبيه نقلدها ونقول روشنه وعشان كده الغرب بيضحك علينا وبينعتنا بالمتخلفين عقليا ومعاهم حق لاننا بنقلد من غير مانفهم احنا بنعمل ايه للاسف انا سايب مصر من سنتين لكن اكتشفت ان في حاجات كثير ظهرت مستفزه جدا اخرهم كلمه زي ديه ملهاش لازمه ولا ليها معني

    اقسم بالله انا اول مره قريت تعليق من واحد كان كاتب علي سبيل المثال

    انا بحب الموقع الفلاني اخر حاجه وكنت ساعتها فاكر ان التعليق بتاعه منزلش كامل لحد ماكتشفت انها بقت موضه الكلمه ديه حاجه تزهق بجد

    ReplyDelete
  22. يا جماعة بجد كفاية انتقادات بقا ف نفسنا لما احنا نقول كدة امال الدول التانية تقول ايه كل واحد فينا فيه عيوب ومميزات فنصلح الاول من شخصياتنا وبعدين نفكر ف الكلام دة لان هنلاقى كلمات كتير منتشرة وفعلا ملهاش معنى بس هنعمل ايه يعنى واحدة واحدة على نفسنا عشان اللى مأخرنا كدة ومخلينا ما شاء م الدول النامية الانتقادات دى فيا ناس يياللى بتنتقدوا صلحوا البلد احسن م الكلام

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore