هو لسه فى كده !

انهردة بنضف الايميلات الى مبعتوالى من زمان على الهوت ميل لانى مش بفتحه كتير

فلقيت رساله من سخص معرفوش

تقريبا كان ضافنى وعملتله بلوك معرفش والله

المهز الرسالة فطستنى م الضحك

"

مساء الخيرعلى الناس اللى عملالى بلوك هو كدا ينفع يعنى

انا بحزر الناس دى وبقولها من على ايمالى ان المسنجر هيقفل ايمال اى حد عامل بلوك لايمال عنده

وبعدين انتوا عاملين الايملات ليه اصلا لما انتوا مقضينها بلوكات

الرساله دى لحد بعينه هو عارف نفسه

بس انا قولت اشرد بقى

ومساء البلوك والبلاك الاسود عليك يا بيكو انت والالفى حبايب قلبي والله

ياريت كل واحد عامل بلوك لاخوه يشيله علشان الايمال شكله وحش قوى من غير الاون لاين



"
اللذيذ ان الرسالة مبعوته ييجى لميت واحد ياترى كل دول مبلكينه؟

مش قادرة اصدق بجد ان لسه فى ناس حياتها كده اصل الواحد اقلع عن التفاهة من زمان قوى فحستها موضة قديمة ومش متخيلة ان فى حد يبقا كل تفكيره ياترى مين بلكنى
هههههههه
ماشالله ماشالله

لا وانا كنت بستغرب قوى م اصحابى الى بياخدو موقف منى عشان مش بكلمهم ع الماسنجير ويفتكرونى منفضالهم بس الحقيقة انى لما بفتح الماسنجير بفتحه كمالة انترنت
:D
اتعودت انى افتحه يعنى حتى لو مبكلمش حد
:D

طلع فى الافظع من اصحابى
:D

عارفين اوقات بحس ان الامل الوحيد الى ممكن يفوق الشباب الأمور ده ان مصر يبقا فيها حرب نياهاهاهاهاهاها

والله الشعب بقا مدلع اوى ومريح
اللهم اهدنا واهدى شباب وبنات المسلمين

هوندا

10 comments:

  1. بعد السلام والتحية والأمور الحلوة ديا

    فعلا يا هوندا عندك حق والله

    انا متعودة على ان الماسنجر ده فعلا حاجة كمالة وبكلم فيها صحابى اللى اعرفهم من زمان او بتوع الكلية وكدة يعنى


    طب افرض بعد ما اتعرفت عليكى وبقيت اكلمك لاقيت نفسى مش مرتاحة معاكى .. او مش بلعاكى ... او مش نزلالى من زور

    او مثلا لاقيتك بتجيبى فى سيرة الناس كتير ونفسيتك مش تمام

    طب مش انا حرة فى انى اكمل المعرفة دى ولا لأ؟

    هل ماليش الحق اساسا انى اختار اكلم مين ومكلمش مين حتى من البنات؟؟؟

    للأسف لما عملت كدة الشخصية دى مالقتش أمل من النت قاملت اتصلت بيا هاتفيا وأصرت تواجهنى وانتى عملتيلى بلوك من على الماسنجر ليه وبتاع ايه وكدة

    حسستنى انها جوزى مثلا وغلطت غلطة فادحة زى دى فى حقه .. او قريبتى وفى بيينا صلة رحم وحرام نقطعها

    لا يا جماعة اى انسان حر يصاحب مين وميصاحبش مين

    مافيهاش اى مشكلة يعنى

    ده حتى الإسلام بيقول لو قيل لكم ارجعوا فأرجعوا

    واكيد حصلت لناس كتير فينا لما بتتعرفى على اى جروب مثلا فى ناس منهم بتتوافق معاكى وتولفوا على بعض وفى ناس تانية لأ .. انتى مش التيب بتاعهم او مش من النوع اللى بيستريحوا معاه

    لان الأرواح جنود مجندة اساسا ما تعارف منها أأتلف وما تنافر منها اختلف

    وبيبقى باين ومش محتاج توضيح يعنى انها مش مهتمة تبقى صاحبتك .. وعادى لأن عندك اصحاب تانية كتير فمش مشكلة واحدة يعنى


    فالبنت دى حاليا هيا أكبر مثال للى انتى قولتيه فى البوست ده ولا تزال بتبعتلى حاجات توجع بيها ضميرى لحد دلوقتى انى مش بتواصل معاها زى زمان ههههههههههههههه

    زمان ده بجد لو قولتلك من امتى حتستغربى انها لسة فاكرة اساسا

    يلا ربنا يهدى الجميع وسورى طولت عليكى ياقمر

    سلام

    ReplyDelete
  2. هههههههههه

    أنا عمري ما ضفت و لا كلمت حد معرفوش علي الماسنجر أصلا
    الناس اللي أعرفهم بس و أصدقائي أو زملائي من الكليه و الشغل

    و أصلا أنا مش من النوع اللي بيقدر يفتح الماسنجر 24 ساعه و يكون أونلاين طول الوقت و مركز في مليون حاجه كمب بعض
    مستحييييييل بالنسبه لي

    عشان كده الناس برضه دايما تلومني إني مش بادخل كتير و لا باتكلم كتير

    و معاكي حق طبعا انا مش عارفه الناس اللي دماغها فاضيه دي ، فاضيه ليه ؟؟
    دي الدنيا فيها مليوووون حاجه نشغل بيها دماغنا و تكون حاجه محترمه و ذات قيمه في الدنيا و الأخره

    بس ضحكتيني و الله يا هنادي
    :D :D :D

    ReplyDelete
  3. ههههههههه
    ايوة لسة فيه كتير يا أختى و الله
    للأسف بقول كده كتير مش في المواقف دي بس في مواقف كتيرة قوي
    للأسف الهيافة هي الغالبة على البشر بالعكس دي بقى ليها فلسفة كمان أه و الله
    ربنا يرحمنا يا رب

    ReplyDelete
  4. بتحصل بتحصل ... :]

    و بعدين يا هوندا انا مرة شفت على الـ
    Facebook
    الحملة القومية عشان نرجع ال
    E-buddy !!!!!

    ReplyDelete
  5. @إنسانة
    بجد الله يكون في عونك ,, الشخصيات اللي ذي كدةالرد عليها ظلم ليهم

    ReplyDelete
  6. شر البليه ما يضحك :)

    ReplyDelete
  7. أنا.بختلف.معاكي.في.حتة.الدعوة.الدعوة.تختلف.من.مستمع.
    إلي.مستمع.ومن.متلقي.لأخر.يعني.مثلا.فيه.ناس.بتاخد.
    بالتهديد..والوعيد.وناس.تانية.بتقرقيق.القلوب.
    وبتفق.معاكي.إن.الله.الهادي.ولكن.ربنا.خالي.لينا.دور.كبير
    وإلإ.كان.لازمتها.إيه.الصبر.والابتلاء.

    ومش.معني.إن.الواحد.بيصلي.مثلا.إنه.كده.خلاص.لكن.أكيد
    هوا.أحسن.من.شخص.مش.بيصلي.ودليلي.من.كتاب.الله
    (قل هل يستوي الذين يعلمون والذين لا يعلمون إنما يتذكّر أولو الألباب). [الزمر9]

    ReplyDelete
  8. This comment has been removed by the author.

    ReplyDelete
  9. ده تعبان فى دماغه سيبك منه
    Fkrny

    ReplyDelete
  10. يفتح باب بيت المدونين ذراعيه لكل الموهبين في :
    1/ القصة القصيرة
    2/ الشعر بشتى أنواعه
    3/ الرواية "رواية سنوية سنقوم بنشرها في الجريدة"
    4/ المقال الصحفي
    إذا وجدت في نفسك القدرة على المشاركة أرجوا التواصل معي على الميل التالي
    arabicsabah@yahoo.com
    شروط المسابقة
    1/ ..............................
    2/ .............................
    3/ ..............................
    لا يوجد شروط الشرط الوحيد هو العمل الجيد , والعمل المحترم البعيد عن الإسفاف
    المقالات أرجوا أن تكون تخص الانسان العربي , تاريخه , عاداته وتقاليده , مقالات إجتماعية وثقافية ....
    أرجوا التفاعل معنا في الجروب على العنوان التالي
    http://www.facebook.com/group.php?gid=45202724108#/group.php?gid=78080770039

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore