محسودة أنا !

امبارح وانا مسافرة المنصورة وببص جمبى عشان اعدى الطريق خبطتنى عربية فى ركبتى
محستش بيها لدرجة انى فعلا مش فاكرة كانت ايه ولا لونها ولا اى حاجة وحسيت برغبة شديدة فى البكاء لكن مسكت نفسى عشان اعدى الطريق اركب الميكروباص الى واقفلى
ألم ركبتى كان بيضغط عليا عشان ابكى وانا فضلت ماسكة اعصابى لحد متخف الألم

ليومين فاتو دخل فى رجلى مسمار فى الشارع حسيت بنفس الرغبة فى البكاء
بعديها بيوم دخل فى رجلى ابرة وحسيت بنفس الرغبة وبكيت لانى كنت فى البيت
!!

كل من حولى بيفسرو ده بالحسد ! من يوم ماوعيت و70 % من الحاجات تفسيرها حسد لدرجة انى كنت بستهزء بهم !
وبمرور الوقت بدأت اقتنع بالحسد لكن مش بعرف اميز ازاى افترض انه ده حسد أو لا
بعدين قلت اسيبها ع ربنا والى يحسد حسابه مع ربنا هعمل ايه يعنى؟

دلوقتى بجد مبقتش قادرة كل حاجة مليون حد يقولى متقوليش عشان الحسد
كل حاجة تحصل تفسيرها إنى محسودة

بجد انا حاسة انى خلاص هتحول لموسوسة
وبدأت ازهق فى نفس الوقت هو خلاص مفيش حد فى الدنيا غيرى عشان يتحسد؟
طلعلى حبوب فى وشى يبقا اتحسدت لأن واحدة قالتلى احلى حاجة فيكى وشك
مخنوقة ومزاجى وحش يبقا اتحسدت
العربية خبطتنى يبقا اتحسدت عشان قبلها واحدة قالتلى بان عليكى الخطوبة هكذا فسرها من حولى!

كل حاجة فى تفاصل الخطوبة لو طلعت لحد هتحسد أو هتنظر
!!
هو محدش مخطوب غيرى؟
واحدة صحبتى اتخطبت بتقلع دبلتها فى الكلية عشان متتحسدش!!
واحدة تانية بعد خطوبتها حصلت مشاكل قالت لها اصحابها انها فسخت خطوبتها تمويه عشان الحسد !!


اقعد فى بيتنا وابطل اتكلم مع حد عشان الحسد يعنى !!؟؟

تفتكرو لما اموت هيكون حد قر عليا بس
:@

حد يفيدنى ياناس

أنا ماشى مؤمنة بأن الحسد فى القرآن وربنا أمرنا نقول ماشاء الله لا قوة إلا بالله لما نشوف اى حاجة ومستوى الغبطة أفضل من الحسد

بس هل ده معناه انى افسر كل حاجة انها حسد؟

طيب الى شايف ان فيا ميزة جبارة يعنى وتستاهل الحسد ممكن اديلها بقيت الميزات وظروفى عشان يعرف انى مش مختلفة عنه فى حاجة يعنى
أصل ربنا قسم الارزاق كلها ع الناس ومفيش حد أحسن من حد ولا يظلم ربك أحد


12 comments:

  1. عسل يا هوندا والله
    أولا الف ميليون سلامه عليكي من العربيه والدبوس والابره كمان ، أهم حاجه يكونوا بخيير
    :D
    الحسد طبعا موجود ، وأكيد بيأثر فينا ، الفكره في انك مش كل موقف مش ظريف هتتعرضيله هتفضلي تفكري ده حسد ولا ايه ، ومين حسدني و امتى و ليه
    مش هتلاقي نفسك كده اصلا

    بس زي ماربنا خلق داء الحسد ، قالنا على دواء الوقايه منه وهو القرآن -المعوذتين - خصيصا

    لما تكوني بتحكي موقف حصلك كويس مثلا ، فاعملي حسابك انك متعرفيش الناس نفوسها ايه من جواها ، و في الأول والآخر ربنا اللي بيسلمنا من كل ده

    أقولك ، متحكيش الا على الخناقات والمشاكل اللي بتحصلك
    آه و متنسيش تلبسي الخرزه الزرقاء
    ههههههههههههههه

    ربنا يحميكي من أي سود يارب

    ReplyDelete
  2. ههههههههههههههههههه

    وكمان جاية تقولي ع النت كدا ؟

    عشان تتحسدي إنك بتتحسدي؟

    هههههههههههههههههههه

    لأ أنا مش مقتنعة بتأثير الحسد طالما بتقولي أدعية الحفظ، الناس مش بتسيب حد في حاله، ومش عاجبها اللي في ايدها ولا عايزة حد يبقى معه حاجة


    انت ركزي وانت بتعدي الطريق بلاش تهور :@

    ReplyDelete
  3. @Nano
    الله يسلمك واطمنى كل حاجة سليمة الا انا ههههههههههه

    انتى صح طبعا بس عارفه من كتر اللخبطة ومن كتر م الناس بتقول قدامك بتلاقيكى بطريقة لا ارادية بتفسرى كل حاجة كدهاو تفكرى فى ده لدرجة انى فعلا مش بعرف اميز

    وفكرة المعوذين سليمة بس المشكلة انى بنسى اقولها وقتها
    :D
    جزء المشاكل دده والخناقات فى قواعدنا انه رد للحسد
    هههههههههه
    يعنى لما اشك ان واحدة حسدتنى فى حاجة اروح اقولها دى باظت او اتخانقنا او تعبت
    وهكذا
    :D

    ReplyDelete
  4. 77Math
    تصدقى فكرة جامدة ههههههههههه
    يارييييييييييييييت

    انا متفقة معاكى فى الرأى الخوف اننا نكون بنحسد نفسنا هههههههههه تبقا ندالة اوى
    :D

    حاضر هركز المرة الجاية متزعقيش بس
    :@

    ReplyDelete
  5. قال رسول الله صلى الله عليه و سلم:
    "إن عظم الجزاء مع عظم البلاء، وإن الله إذا أحب قوماً ابتلاهم، فمن رضي فله الرضا، ومن سخط فله السخط"

    ReplyDelete
  6. بصي ياحبيبتي الناس بتحسد علي اسباب اتفه مما تتخيلي
    وعشان كده انتي اقرأي الرقيه الشرعيه علي طول
    لو مش عندك قوليلي وانا ابعتهالك

    هو اكيد مش كل حاجه سببها الحسد بس فعلا بردو في حاجات مش بيكون ليها سبب غير الحسد

    ضحكتيني لما حكيتي عن صاحبتك اللي قالت فسخت الخطوبه
    فكرتيني ببلوجر عملت كده بردو
    (:

    انتي بس قولي الاذكار كل يوم والرقيه وان شاء الله كله يعدي علي خير

    وسلامتك وسلامة كريم ألف سلامة

    ReplyDelete
  7. أنا قعدت فترة الموضوع زاد معايا وبدأ يتحول لوسوسة
    وبعد مرور بأشياء كتير وقراية وتجارب وجدت إن بكل بساطة المطلوب إني أحافظ على أذكار الصباح والمساء كويس
    ولو حسيت إن فيه حاجة فعلا برقي نفسي بالإخلاص والمعوذتين وانسى الموضوع
    والحمد لله مرتاح جدا بالطريقة دي
    وبرضه تخللي بالك وتحافظي على نفسك ومش أي حاجة تحكي عنها لأي حد لأن فيه ناس فعلا الحسد في قلبها وما تقدرش تتحكم فيه وأنا شفت ناس كدة بشكل بشع

    ده اللي عندي وأتمنى أكون أضفت شيء للموضوع

    ReplyDelete
  8. @ Honda :
    سلامتك ألف سلامة ياهوندا
    ####################

    @ مصطفى حسن
    كلام جميل جداا

    ReplyDelete
  9. الف سلامه عليكي
    هو طبعا مش كل حاجه بتتفسر بحسد
    بس احيانا بيكون فيه حاجات بتحصلنا مش بنلاقي ليها اي تفسير , فبنقول عليها حسد . هو ممكن يكون صح ,
    بس برده احيانا الشخص اللي بيحسد ده بيكون من غير قصد
    المهم خالي بالك من نفسك , وحاولي ماتنسيش المعوذتين باستمرار
    ربنا يحفظك

    ReplyDelete
  10. لأ طبعا الوسوسة دي غير صحيحة بالمرة ,, صحيح احنا الفترة اللي فاتت كانت فترة جميلة جدا جدا جدا بس الحمد لله على أي حال ! قل لن يصيبنا إلا ما كتب الله لنا ! وبعدين حل الحسد معروف وبسيط جدا جدا يبقى ليه نوجع دماغنا بس؟
    بصرف النظر عن الإصابات وحالة النصب والتسمم والذي منه ,, مع التركيز على الذي منه
    ;)
    بس بجد كلها زي ما إنتي قولتي وسوسة ,, وطالمة إنتي موظبة على العلاج يبقى مفيش داعي نشغل دماغنا بالمرض ! ونفضي دماغنا لأحداث أهم وأكبر قريب جدا إن شاء الله
    :)
    صحيح .. بصي في كتابك
    :D

    ReplyDelete
  11. BooDy

    صح :)

    ***********
    esraa

    الله يسلمك يااسراء هيا عندى وان شاء الله اواظب عليهم :D

    ************
    مصطفى

    انا فعلا قررت انا ابطل احكى اصلا
    :D
    والحقيقة انى فعلا بقالى فترة غير منتظمة فى الاذكار وان شاء الله احاول اواظب عليها تانى فربنا خير حافظ :) وجزاك الله خيراً

    ReplyDelete
  12. MMF

    الله يسلمك :)

    **********
    Sayed fat7y

    الله يسلمك ,,, فعلا اغلب الى مش بنلاقى له تفسير بنحسبه حسد لكن اوقات كتير بيكون قدر
    لكن فعلا الواحد لازم يحرص على نفسه شوية ربنا يحفظنا

    *************
    كريم

    جميلة جدا هههههههههه الحمدلله الحمدلله :)
    صدقنى انى ناوية فعلا ابدا صفحة جديدة مع نفسى ومع الاخرين
    :D
    وهبطل اتكلم مع حد
    :D
    ههههههههههههههه

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore