تسمم - نصب وأشياء أخرى

كريم خطيبى بقاله 6 شهور تقريباً وفجأنى انه جاى اخر الاسبوع الى فات لمدة اسبوع ومسافر تانى طبعاً كنت مبسوطة لأنى كنت مفتقداه جداً ولأنى ملحقتش اشبع منه من يوم ماتخطبنا غير اسابيع وسافر ويصدف انه ييجى فى اسبوع الامتحانات بتاعتى مع كورس الانجليزى الى باخده يعنى كانت كركبة بس قلت تتنظم ان شاء الله انا ماصدقت لكن للأسف ملحقناش نتهنى

1- أول يوم يوصل مصر نسمع خبر سعيد عن شقتنا الى كنا هنستلمها اشهر ده اتنصب علينا ومطلعش فى شقة بح
طبعا لكم ان تتخيلو الموقف الى احنا فيه
مش محتاجين اوصفلكم كمية الحقد الى جوايا تجاه الحكومة بجد ان مسكن لينا مش قادرين نحصل عليه ومحتاجين الافات عشان نتجوز ونلاقى شقة !

طبعا بندور على سعر مناسب لينا لكن واضح اننا محتاجين نحوش شوية او شويتين الله المستعان وربنا على الظالم

2- من يومين كان المفروض كريم يزورنى لكن اعتذرلى عن السفر لانه مريض وسخن ووو طبعاً اضايقت وبعدين قلت دلوقتى يطيب وييجى لكن المفجأة الدوخة والسخونية بتزيد ومايصاحبها من أعراض اترك لعناكم الخيال او الخيال لعناكم زى ماتحبو يعنى

فى اخر اليوم كريم كشف واتضح انها حالة تسمم !!وطبعاً التعب كان مستمر امبارح وقدامه شوية لكن بيخف الحمدلله
يعنى الراجل ينزل اسبوع يتيم مصر يتبهدل كده؟
بجد أنا حزينة عن الى وصلناله ده
!
وطبعا ملحقتش اتنهى ولا اشبع منه:( ربنا يعوض علينا

وطبعاً كل الناس الى حوالينا بلى حصل لكريم والخبطة الى حصلتلى بيقسمولى اننا واخدين عين متينة بس السؤال بيفرد نفسه هنا

هو احنا نتحسد ع ايه بالظبط؟ ع الشقة الى بندور عليه
ولا محدش اتخطب غيرنا ؟
خير يعنى ان شاء الله
يعنى انا ياجماعة لما اكون فرحانة شوية واكتب انى مبسوطة حبة او بحب خطيبى حبة هل ده سبب كافى اننا ناخد العين المتينة؟
مش كفاية ان الحكومة مطفشاهولى ومسافر بعيد عنى عشان نقدر نبنى حياتنا؟
والله كل واحد عنده مايكفيه

طب م بلال فضل اتسمم م البطيخ امبارح تفتكرو اتحسد بردو
:D

بجد انا محبطة اوى اوى من وضع بلدنا ومبقتش بستحمل أى حاجة انا تقريبا طول اليوم بمشى اعيط فى الشوارع م الناس الى بشوفها
امبارح اخدت بالى فى المترو ان مفيش ولا واحد مبتسم ! اه وربنا فى كل العربيات الى ركبتها مفيش واحد بيبتسم !

ده غير الراجل الى شفته فى عبود والناس بتتمألس عليه وهو مشى يعيط

ده غير الست الى بشوفها كل يوم فى طريقة للموقف وهيا مقعده ابنها على رجليها من الصبح للبيل وبتنش ع العيش الى بتكسب رزقها منه

ده غير الراجل الى شفته ماشى فى الشارع وشعره منكوش وماسك رغيف عيش كانه كسب معركة ومش معاه غيره بياكله

ده غير كمية التسول الى فى الشوارع من أطفال لعواجيز

بجد اعصابى بدأت افقدها يارب هونها علينا يارب
دعواتكم لينا وربنا يحفظنا ويفك كربتنا ويهدينا ويرزق المسلمين والمسلمات بأزواج وزوجات صالحات
عشان محدش يشيل فى نفسه حاجة
:D

*.*هوندا*.*

12 comments:

  1. بصي يا هوندا
    اللي بيتحسد دهمش معناه ان عنده كنوز الدنيا بحالها
    ابدا، ممكن يكون اللي عندك حاجه واحده بسيطه بس النفوس اللي حواليكي مستكتراها عليكي
    المشكله انك هتتعبي جدااااا لو فضلتي تفسري كل حدث سئ انه من الحسد، طب بنتحسد على ايه، طب لييه، طب ميين؟؟

    بصيلها انها ابتلاءات، وهي فعلا كده، ، فالصبر وشكر ربنا عليها مهما كان سوءها هو اسلم حل
    لكن حال البلر والتسمم والتسول و و و و ..
    للأسف معنديش رد له :)

    وعلى فكره، هو اه، انتي ممكن بسهوله تتحسدي لانك كاتبه انك بتحبي خطيبك و هو بيحبك و حاجات زي كده
    ده لأن في ناس نفوسها مش مسامحه ، او بتحسد وهي مش عارفه اصلا.... الله أعلم
    بس حطي دايما في دماغك ان الله خير حافظا وهو ارحم الراحمين
    سواء في الحسد او الضيق او سوء الاحوال

    والحمد لله و الف سلامه عليكم :)

    ReplyDelete
  2. سوري انا هعلق على جزء من البوست عشان الجزء التاني كئيب شوية و انا بقالي فترة واخد على نفسي عهد اني ماكتئبش كتير!!
    :D

    حبيت بس اقول الف سلامة على كريم و عليكي
    ربنا ييسرلكوا حالكوا ان شاء الله
    عليكوا تصبروا بس :)

    ReplyDelete
  3. معلش يا هنادي انا بجد زعلانة عشانك قوي , ظروف و هتعدي و ان شاء الله هتبقوا كويسين
    انا عارفه انتي بتفكري ازاي عشان انا عارفه قد ايه الحسد ده شيء بشع و ازاي بيقلب حياتي كلها و برده كنت لسه بقول زيك "ليه انا بس اللي بيحصلي كده "
    و مش فاهمه الناس بيحسدوني على ايه بالظبط !
    بس بجد مفيش حل غير انك تبطلي تتكلمي
    عشان الناس بجد بقت مش كويسه
    و اكيد قولي اﻷذكار
    دي نصيحة من واحده الناس بقوا بيحسدوها في وشها مش بس من وراها :D:D
    متزعليش نفسك و ألف سلامه عليكوا

    ReplyDelete
  4. !!!!!!
    معرفش انا حوار النصب ده
    و ربنا يقوم كريم بالسلامة
    و انشاءالله هييجى تانى و يقعد معاكى شهر مش اسبوع
    بالنسبة للبلد لازم يبقى فى تفاؤل(ب ايه بالظبط معنديش فكرة)بس لازم يبقى موجود و خلاص عشان تنسى المناظر دى
    و ربنا يستر...

    ReplyDelete
  5. بالرغم من ان البوست كئيب الا انى بضحك ..
    اظاهر انى فعلا فقدت الاحساس بكل حاجه - لسه قايلاها لبابا من شويه -
    المهم ألف سلامه عليكى وعلى خطيبك قصدى جوزك :) ويارب تتجوزوا وتفضلوا تحبوا بعض برده هههههههههههه .

    سلام ;)

    ReplyDelete
  6. بجد يا أخت هنادي نصيحة لوجه الله
    بلاش طريقة التفكير دي
    لأنها مع الوقت بتتضاعف ومش بتستفيدي حاجة بل بتخسري والعياذ بالله
    غيري نظرتك للأمور وبدل ما تدوري على الكآبة اللي في الشارع دوري على الحاجات اللي تفرح
    نظرتك للأمور هي اللي بتحدد حالتك
    وحالتك السلبية دي مش هتفيدك بأي شكل من الأشكال إلا تعاطف بعض الناس اللي بتحبك وده مش مستاهل إن الإنسان يأذي نفسه

    سامحيني على كلام لكن والله ربنا يعلم أنا بقول الكلام ده لأني بحترمك وعارف إنك إنسانة متميزة ماشاء الله وهتقدري كلامي ده

    وأتمنى لو تشرفيني في المدونة وتقري موضوع المكسب الثانوي

    ReplyDelete
  7. متفكريش في موضوع كده

    وسيبك من موضوع الحسد ده

    هو الحسد موجود مفيش كلام
    لكن التفكير فيه وانه السبب كل حاجة ده أكيد غلط كبير
    قولي الحمد لله

    واستعيني علي قضاء حوائجك بالكتمان

    ReplyDelete
  8. المشكله انك لما بتتكلمي مع حد بتتكلمي بصفاء وبتكوني واثقه ان اللي قدامك هيفرح لفرحك وتبقي عايزه تقولي اللي في قلبك علشان ماتفرحيش لوحدك وتفرحي الناس معاكي
    تصدقي في ناس معينه لمابتكلم معاهم في حاجه مفرحاني بتبوظ والله حتى لو الحاجه دي مضمونه زي ان كريم نزل مصر يبقى أكيد ان شاء الله هتشوفيه ومحصلش
    طبعاً كل حاجه بايد ربنا بس في ناس بجد حسوده أنا الحمد لله ماعنديش وسوسه من الحسد بس بتحسد وبصراحه من كتر اللي الحسد عمله فيا من صغري بقيت أحااااااول ماتكلمش مع ناس معينه في كل حاجه أصل دول بيكونوا معروفين :)
    وبعدين يا ستي اللي يقولك حاجه من غير مايقول ماشاء الله لاقوة إلا بالله ابقى قوليها انتي :)
    ربنا يكرمك يارب ويمنع عنك الحسد وكل حاجه مش كويسه

    ReplyDelete
  9. السلام عليكم

    أولا ان شاء الله ربنا حيساعدك انتى وخطيبك وحتلاقوه واقف معاكم دايما فى كل وقت ان شاء الله

    ثانيا بالنسبة لموضوع الحسد
    رأيى انك تشوفى أذكار الصبح والمساء وتواظبى عليها وان شاء الله ربنا يقيكى شره وده أحسن الحلول


    بالمناسبة بالنسبة لموضوع السكن أنا مليش خبرة فيه أوى بس اللى أعرفه ان فى مجموعة مشاريع اسمها " مبارك " معمولة فى كذا محافظة
    وأعرف ان اصحابى فى بنى سويف خدوها بسهولة ومبسوطين منها جدا
    وصدقينى والله الما نيتكم خير وعايزين ترضوا ربنا الأمور حتتحل

    وتكلمى حتى مع والدك ووالدتك وقرايبك ووووو

    رغم انهم بيقولوا ان ظروفهم كانت أحسن
    بس شوفى بدايتهم كانت صعبة ازاى

    وخالص تمنياتى بالتوفيق والسعادة والذرية الصالحة لكما ان شاء الله

    ReplyDelete
  10. جزاكم الله خيراً على المساندة المعنوية واستفدت جدا من ارائكم انا كنت محتاجة حد يشاركنى بالافكار فعلا
    ومن يوم ماكتبت االبوست قررت ان ارمى اعتقدات الحسد وراء ظهرى واكتفى بالتحصن بالله واذكاره
    :)

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore