أبى مريض منذ عشرة أيام "بجلطة فى القلب"حٌجز أسبوع فى المستشفى وبالتالى لا يوجد استقرار فقط ندعو الله أن تمر محنتنا على خير وأن يسترها الله معنا ويعود أبى سالماً
وخرج أبى منذ يومين بعد زوال هذه الجلطة ولكن مازالت الآلام خروج النيكوتين من جسمه
فقد كان أبى مدخن شره إلى جانب القهوة والشاى
طلب منى أمس أن احسب له بعض الأرقام وصدمت عندما عرفت دلائل هذه الأرقام
120 ج ماتم توفيره منذ دخل أبى المستشفى لعدم شراء سجائر فى مدة 8 أيام
60 سيجارة فى اليوم =15 ج
إلى جانب القهوة والشاى
وكانت الاستنتاج أن الله كريم لطيف عظيم بأن أعطاه فرصه للحياة مرة أخرى وكانت هذه الجلطة بمثابة إنذار
من يعرفنى عن قرب يعلم بمدى كرهى للسيجارة فهى فى المركز الثانى بعد كرهى لإسرائيل
وليعلم الله كم دعوته ليعين أبى للتخلص منها !
ولكم رجوت والدى بأن يحاول أن يقللها ويتوقف عنها
الآن لم يصبح أمامه اختيار والحمدلله إنها جت على قد كده !
لا يحدث للآخرين فقط
كنت فى زيارة لأبى فى المستشفى واقف أمام قسم القلب "العناية المركزة " حيث يرقد بداخلها ضحايا للسجائر ومنهم أبى,أجد أقاربى الشباب يدخنون السجائر !
لماذ لا نقدر قيمة الصحة؟
لماذا لا نتعظ من الآخرون وهم امتداد لنا؟
لماذا نستعجل بالانتحار البطىء؟
لماذا لا تمنع الدولة التدخين والسجاير وتخاف على صحة الشعب ؟
ساذجة أنا صح؟
كلكم راع ومسئول عن رعيته
تصدقوا بالله والله الرئيس والمسئولين دول صعبانين عليا اوى يوم القيامة هيكونو شايلين ذنوب ملايين من البشر ان لم يكن مليارات
دعواتكم بان يخفف الله آلام أبى
ونخلص بقا من الزوار الكتيير الرغايين دول
ويابخت من زار وخف بالذات لو مريض :@
أغلى من الصحة مفيش حافظو عليها وقدروها
July 11, 2009 5:33 AM
عندك حق و الله يا هوندا
انا بردو بفكر كتير في الناس اللى حواليه و بيشربوا سجاير مع انهم بيشوفوا كل يوم ضحاياها بالملايين لكن مش بيتعظوا ...بجد حاجة غريبة
ألف سلامة على والدك وو يارب يتم شفاه على خير
حاولت اكلمك علشان اطمئن عليه لكن مارديتيش قلت اكيد مشغولة
ربنا يعينكوا يا رب و يعدي الفترة دي على خير و لعله خير
July 11, 2009 6:27 AM
ربنا يتم شفاء والدك على خير
July 11, 2009 8:19 AM
الحمد لله على صحه الوالد وعلى رجوعه من المستشفى
كما قلتي انه لا يزال به بعض آلام المرض ولكن كله هيهون بإذن الله
أما عن السجاير فهي في الاصل محرمه في كل مكان في الخارج عدا اماكن محدده للمدخنين وسوف يلاحظ هذا الأمر في الطائرات بصورة واضحه
ولكن في مصرنا الحبيب فمن الطبيعي انك تلاقي واحد مولع سجارة جنبك في العربيه ال 25 راكب - الي هي اصلا 14 راكب أو 11 - و تبقى انت الغلطان انك تقوله لو سمحت طفيها :(
الدنيا اتقلبت بس المهم اننا نكون لسه عارفين ايه الصح من الغلط
شكلي طولت
عموما الف حمد لله على سلامة الوالد
تحياتي
July 11, 2009 11:08 AM
حمدلله على سلامة والدك
ربنا يتمم شفائه بخير ان شاء الله :)
انا ليا تعليق بسيط بس على الجملة دي...
"ولكن لم يخذلنا الله وخرج أبى منذ يومين بعد زوال هذه الجلطة"
ياريت تعدلي في الجملة دي و تشيلي حتة "لم يخذلنا الله"
July 11, 2009 11:32 AM
ربنا يشفيه تماما يااااارب
ويرجع البيت بالسلامة ان شاء الله
:)
والله السجاير دي عادة منيلة انا عندي قرايبي كتييير برضه مبطلوهاش الا لما حصلهم كده واكتر
يالا الحمد لله على كل شئ .. وربنا معاكي
:)
July 11, 2009 12:48 PM
آآآآآآآآآآآآآآآه يا هنادى
أنا بكرهها أكتر منك مليون مره
معظم خناقاتى مع بابا بسببها والمهم انه بيبطلها شويه ويرجع يقول مش قادر ويرجعلها تانى بجد زهقت :((
وربنا يشفيلك باباكى يارب ويبقى فى أحسن حال :)
July 12, 2009 2:36 AM
أشكركم أصدقائى
@boody
انا مش فاهمة انت فهمتها ازاى لكن طبعاً أنا مقصدش اى حاجة وحشة وبما ان فى احتمال للفهم الغلط للمعنى فهشيلها مفيش مشكلة
July 12, 2009 4:27 AM
اولا
حمد الله على سلامة باب يا هوندا ويارب يتم شفاه على خير و يفضل منور دنيتكم دايما يارب
ثانيا
ربنا يارب يهدي المدخنين كلهم و يعرفوا كمية الدمار اللي بيسببوه لصحتهم و صحة اللي حواليهم
اسوأ حاجه عندنا هنا ان المدخنين مش معترفين بخطوره التدخين ده
لدرجه انك لو في مكان مقفول زي اي مول مثلا بتلاقي ناس مدخنين برضه
على الرغم من كمية اللوحات اللي بتعلن ان التدخين ممنوع
و لو اعترضتي على حد منهم طبعا مايعجبوش !!
ربنا يهديهم
الاسوأ والاسوأ زي ماقولتي كمان هو المدخنين اللي امام العنايه المركزه
عايزين اكتر من كده ايه عشان يتعظوا
لا حول ولا قوة الا بالله
ربنا يشفي و يخفف عن مرضى المسلمين يا رب
July 18, 2009 8:11 AM
ربنا يشفيه شفاء تام بأذن الله تعالى ,
وفعلاً مدخن شره 60 شجارة كتيير اوي اوي , والحمد لله انوا قام بالسلامة