إنه لأسبوع

وكما تمر الايام سريعاُ ها قد مر أسبوع على زواجى ووصولى الرياض وددت ان أسجل هذه اللحظات وماقبلها بلحظات قليلة أخرى

كما قلت سابقاً أشعر بانى أضع اللمسات النهائيه لبدء فصل جديد من الحياة بدأت مراسم هذا الإستعداد بتوديع كل ماأحبهم من أصدقائى وأقاربى منذ أكثر من شهر وأنا أقوم بال
خروج مع الأصدقاء واستمتعت بلقائهم ومشاعرهم الجميلة تجاهى فهذه أول المواقف السعيدة التى تكشف مدى حب من حولى ومشاعر الافتقاد

ومن أجمل المفاجآت هيا الهدايا الكثيرة التى قدمها لى الأصدقاء والأقارب فأنا أحب الهدايا جداً وكانت هذه المرة الاولى التى أحصل فيها على هذا الكم من الهدايا إلى جانب الصور التذكارية ،وتندهش حين ترى لهفة الكثير لمقابلتك لم تكن تتوقع اهتمامهم بأمرك فى حين تجاهل من كنت تظنهم مقربين ،ولكن صدق مشاعر من حولك يغنيك عن القليل الذى لم تتوقع فعله

يوم الحنة كان اليوم الرئيسى لتوديع الأقارب وبعض الأصدقاء
يوم الزواج قام بتوصيلى للمطار المقربين لى وبدأ الإستعداد بتجهيز فلوس للوزن الزيادة للشنط
:D
وكانت المفجأة ان الوزن زيادة 7 كيلو لكن لإنى عروسة عدوهالى بعد سؤال غتيت ليه مش لابسة الزى الرسمى بتاع العرايس اكتفيت بالإبتسامة البلهاء هقعد اشرحله ليه فضلت تيير أبيض عن الفستان أصل السؤال ده الأمه كلها كانت مهتمة بيه وعايزين يقنعونى إنى لازم ألبس فستان حاجة تفرس بجد.

فى
الدور الثانى ضيعت وقت انتظار الطائرة فى الفرجة ع المحلات وتحديداً التى تبيع أشياء فرعونية وفرع مكتبة الشروق لا يصح تجاهله
:]

وقمت بشراء هدية الزواج لكريم "
الأعمال الكاملة لتشيخوف " أصل كان نفسه فيها

لحظات داخل الطائرة للمرةالأولى وكلما ارتفعت الطائرة انقبض قلبى ولكن ظللت أتماسك واعد نفسى بمكأفاة على هذا التماسك برؤية شروق الشمس فها أنا بجوار النافذه كما نصحنى أصدقائى بروعة المشهد وكان أكثر من رائع والنهار بيشقشق ،ورؤية السحاب من فوقة ثم مرور الطائرة بجواره ثم دخولها فيه!!
بجد كمية مناظر طبيعية ملهاش حل لم يكف لسانى عن قول سبحان الخالق سبحان الخالق وقمت بأخذ بعض اللقطات استمتعو معى











بعد وصولى الرياض استقبلتنى المدينة بتيار حااااااااااار وكانت بداية مبشرة وحقيقة واقعة كان لابد ان استوعبها منذ ان خطت قدامى بوابة العمارة ومن بعدها باب شقتنا :(
الجو ولعة مش هوصف غير كده وكان من النتائج من تانى يوم ظهور أعراض برد بسخونية قلب بالتهابات فى الزور حتى الآن
:S
مابين تكييف وجو سخن والماية كمان سخنة مفيش ماية سقعة والماية الى بتتشرب غير الى بتيجى م الحنفية
:(
ياحبيبتى يامصر كانت نعمة والله ده حتى اما تخرج بليل الهواء سخننننننننن

كمان حاسة انى فى الهند مش السعودية لا فعلاً الهنود فى كل مكان محلات مولات صيدليات كتير اوى

والمشكلة الى منرفزانى جداَ صعوبة التعامل مع البائعين لانهم مبيعرفوش لا عربى ولا انجليزى كله مكسر
الأسخم بقا امبارح مثلاً لما ازدادت السخونية رحنا مستشفى جمبنا بعد الفجر نلاقى الى فى الاستقبال هندى فين وفين ع مانفهم حرف منه

مش المفروض الى فى الاستقبال ده يكون بيعرف عربى كويس ؟
يتكلمو باللغة العربية حتى كحل وسط

ندخل للدكتور نلاقيه هندى ويصبح التعامل بالإشارات وبعض المصطلحات الإنجليزية

بجد الموضوع ده فاقعنى اوى يعنى تيجى تشترى حاجة تكون شايل هم التعامل مع البشر

من المناظر المقززة بالنسبة لى لما دخلنا جرير ومول جمبه تلاقى ستات كتير رافعين النقاب طيب ليه لزوم اللبس طالما كده وهما مش مجبرين يلبسوه فى الرياض بجد منظر مستفز

بالنسبة لمكتبة جرير دى بقا حاجة خيال فعلاً عايزلها بوست لوحده فكرتنى بفيرجن سيتى ستارز بس على كبيييييييييييييييييييير وكريم جاب لى من هناك هدية الجواز لاب توب
:D

ادعولى ربنا يشفينى لأنى متبهدلة اوى من الدور ده ومبعرفش انام بجد ومبهدلة كريم معايا كل واحد بينام ويصحى معافى فى نعمة لا تساويها ملايين البلايين

ومن انهردة بدأت أجرب الطبيخ فى كريم واسوه بقا
:D

16 comments:

  1. الف مبروك الزواج ياهنادي
    وربنا يوفقك في حياتك ويسعدك دايما يارب

    كان نفسي اشوفك قبل ماتسافري

    بس معلش بقى ماليش حظ

    عجبني قوي البوست وطريقة وصفك لكل التفاصيل

    خصوصا وصفك للطسارة وهي بتشق السحاب

    فكرتيني باول مرة اركب الطيارة واشوف السحاب وهي بتدخل فيه وبتطير فوقه

    خللى بالك من صحتك بقى علشان تخفي بسرعة

    تغيير الجو دايما بيعمل كده

    عايزين بقى بوست حلو كده عن مكتبة جرير علشان نشوف الفرق بينها وبين جرير اللى بتيجي في معرض الكتاب

    ربنا يوفقك وييسر لك العسير ويبارك لك في كريم ويجعله قرة عين لك ويجعلك كذلك له

    تحياتي

    ReplyDelete
  2. ربنا يشفيكي يا هناي , واعتادي بقى علي الوضع الجديد وربنا يوفقك بأذن الله في حياتك الزوجية

    ReplyDelete
  3. يا حبيبتى

    ما تتصوريش انا فرحت قد ايه لما قريت البوست .. كنت عايزة اطمن عليكى اوى ، مع انى واخدة على خاطرى منك جدا عشان بطلتى تدخلى الماسنجر والفيس بوك كمان

    ما علينا

    أكيد طبعا وضع جديد وبلد جديدة بس انتى ان شاء الله قدها وقدود ... اهم حاجة تحاولى بشتى الطرق انك تبسطى نفسك وماتزعليهاش خالص

    اما بقا بالنوسبة للأكل فرمضان قرب اهو خلاص وهو أول رمضان يعدى عليا بردو بعد الجواز فربنا يكون فى عونهم بجد وربنا يسترررررررر
    :D

    ربنا يوفقكوا ويكرمكم ويخليكوا لبعض يارب اللهم آميييييييين

    ReplyDelete
  4. ربنا يسعدك ويشفيكِ .. وبكرة تتعودي على الجو وتتقني لغة الهنود، هناك بالذات ما ينفعش تقولي حقاطع الفرانكو آراب .. وحتلاقي نفسك بتتكلمي لغة جديدة ملهاش أي علاقة بالعربي أصلا :D:D

    بس اللي مستغربة له إن الدكتور هندي ! على أيامي كلهم كانوا مصريين أو شوام !!


    ربنا يكون في عونك .. حاولي تدوري على الحاجات العدلة ف البلد بقى :D

    تحياتي

    ReplyDelete
  5. ربنا يشفيكى ياهنادى وإدعى لى أنا كمان لأنى من يوم السبت وأنا أخدت دور برد إنما إييييه والله ماخرجت من بيتنا من ساعتها حتى التدريب معتش بروح وسخونية وكحة وإلتهاب فى الزور ومكنتش بتكلم إلا من إمبارح بدأ صوتى يطلع صحيح ربنا يديم علينا نعمة الصحة ياااارب وكل سنة وإنتى طيبة ياهنادى أمانة عليكى أول مرة تزورى فيها الحرم تدعيلى بالهداية والنجاح وإن ربنا يكتب لى زيارته السنة دى يااااارب

    ReplyDelete
  6. هنووووووووده حبيبتى الف الف مبروك
    زواج مبارك ان شاء الله
    انا لسه عارفه حالا
    بجد بجد انا فرحانه ليكى اوى
    ربنا يسعدك ياحبيبتى

    سلامتك من البرد يا جميل
    وشوفى كده انتى نزلتى السعوديه ولا الهند ركزى كويس
    ههههههههههه

    ReplyDelete
  7. الف مبروك يا هنادى
    ربنا يتمم لك بخير يارب
    والف سلامة عليكى
    سيبك انتى اهم حاجه الطيارة
    بجد مبروك يا هنوده
    ربنا يكتب لك كل الخير يارب

    ReplyDelete
  8. الف الف مبروك يا هنادي و اتمني لكِ الشفاء و رمضان كريم

    ReplyDelete
  9. ألف مبروك والف سلامه عليكي
    بجد بجد بجد ربنا يفرحك دايماً يا هوندا
    ربنا يستر بقى على كريم من تجارب الأكل :)ا

    ReplyDelete
  10. الف الف مبروك يا هنادي على الجواز
    وربنا يباركلك في حياتك الجديدة
    اما بالنسبة لدور البرد فربنا يقومك منه بالسلامة وده طبيعي لان جو البلد مختلف حبتين
    اديكي شوية كلام هندي بقى
    ماسي ماما انتا بكرة خلاص ما في مسكلة : كله ابقى مية مية :انا في روح كل علسان مغرب اذن خلاص

    ReplyDelete
  11. انا اسمى حسين من مصر 23 سنة بس عشان مكسل اعمل دخول و بتاع...

    فكرة البلوج جميلة جداً و رايقة
    بس انا صعبان علىّ حاجة واحدة بس...معلش يعنى لغتك العربية ضعيفة شوية...او يا ريت تركزى شوية و انتى بتكتبى...
    عشان انتى بتقولى هتتجوزى و كده و بعد شوية ان شاء الله هاتبقى ام...انا بيبقى صعبان علىّ حال الجيل اللى هايطلع من تحت ايدينا و احنا مش عارفين عربى كده...
    يعنى مثلاً (ومن أجمل المفجآت هيا الهدايا الكثيرة) المفاجآت...و هى
    و كلمة (،وتندهش حين ترى لهفت)
    لهفة...

    انا اسف بجد مش قصدى ابقى "خنيق" او كده..بس انا معجب بفكرة الموقع عموماً و هاقرأ فيه اكتر فى المستقبل بعد كده..بس انا باوصيكى يعنى عشان بعدين..
    و عموما مبارك ان شاء الله على الزواج

    ReplyDelete
  12. حياه جديده
    ستعيشي كل تفاصيلها
    وتأكدي أنها خطوه مميزه ورائعهتحياتي ليكي وبالتوفيق دائماً

    ReplyDelete
  13. @Bella الله يبارك فيكى وربنا يسعدك انتى كمان
    انا كمان كان نفسى اشوفك جدا بس قدر
    الله

    وان شاء الله ابقا اكتب بوست عن جرير بعد زيارة تفصيلية لها

    *******

    @كريم عبد المجيد
    الله يكرمك :)

    ********
    إنـســـانـة

    الحمدلله على كل حال انا مبفتحش شات كتير
    ربنا مايجيب زعل الحياة جميلة والله المستعان :)

    ReplyDelete
  14. @77Math

    ولكِ مثله
    هو فعلا فى لغة جديدة بتطلع فى النص وبعدين لو هستخدم فرانكو فى التواصل ده مفيش مشكله طبعاً لأنه أمر يستدعى ذلك

    ربنا يعينا ع التواصل الفظيع ده معاهم
    وهحاول ادور متقلقيش :]

    **********
    @ majda

    اتمنى انك تكونى شُفيتى من دور البرد الصعب ده وان شاء الله ادعيلك عن قريب :)

    **********
    @Bondoka

    الله يبارك فيكى يابندقه ليكى وحشه والله
    ربنا يسعدك

    ReplyDelete
  15. @Sometimes

    الله يبارك فيكى يامونمن عقبالك عن قريب :)

    *********
    @ Ahmed Mahmoud

    الله يبارك فيك ياأحمد عقبالك , كل سنة وانت بخير

    *********

    @Rehab Mostafa
    الله يبارك فيكى يارحوب ويسعدك
    فى أمل فى أمل :D

    ReplyDelete
  16. @HaTiM SuM
    الله يبارك فيك عقبال فرحك هو الجو مش مختلف حبتين بس لا حبات تلاته أربعه

    وبالظبط هما بيتكلمو كده عايزين حد سنانه مكسورة
    :D

    ***************

    @Anonymous
    شكراً على النصيحة بس فى فرق بين ضعف اللغة والأخطاء المطبعية :D

    **************
    @مـحـمـد مـفـيـد

    اكيد طبعاً الحمدلله وربنا يرزق شباب وبنات المسلمين بنعمة الزواج

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore