مش هحتفل بأكتوبر

اصل هحتفل ليه؟ من يوم مادخلت الحضانة وبنحتفل مفيش جديد يعنى
بعدين الناس كلها نازلة فى حب مصر وأغانى وطنية وأشعار
أنا بحب مصر طول العام مش انهردة بس والأغانى الوطنية دى بسمعها كل يوم وباخد تريقة قد كده بس مبيهمنيش لأن ذوقى كده ومهما حصلى قرف فى مصر هفضل احبها لأن فى فرق بينها وبين حكومتها

قالولى ده كلام ولما تسافرى بره وتشوف البلاد دى عاملة ازاى هتقرفى منها ومقرفتش منها بس حزنت عليها
وحزنت على شعبها الى بيزداد سوء يوم عن يوم مش كله طبعاً بس أغلبه

مش معقول لمدة 36 سنة هحتفل بنصر كان وقتها فيه رسالة وهدف للشعب ودلوقتى مفيش اى هدف يجمعنا ولا يربطنا ببعض
استفدت ايه من نصر أكتوبر لما نص الشعب بقا بيكره بلده لأننا انتصرنا على إسرائيل ومنتصرناش على مشاكلنا

استفدت ايه من النصر لما إسرائيل دلوقتى دولة متقدمة فى كل المجالات تقريباً وأنا مش فالح غير أقول ده احنا الى هزمناهم فى 73

لحد امتى هنفضل نعيش سنين على انتصارات ماضية ومنحققش انتصارات جديدة؟
هنقضى عمرنا كله نحتفل بما فعله الآباء والأجداد فى الماضى؟

واحنا فين؟ والى يحببنا فى بلدنا ايه دلوقتى واحنا مش قادرين نعيش فيها
فين الدروس المستفادة من أكتوبر؟
ايه الى ربوه فينا من نصر أكتوبر غير الفشخرة على الفاضى

الناس وصلت لفين واحنا فين دلوقت !

دى مشاكل الناس الى ساكنين فى سيناء متحلتش لحد دلوقتى

ايه الى يفرحنى دلوقتى والمسجد الأقصى بيتآكل تدريجى لحد ماهيختفى يوم فين قوتنا وشجعاتنا؟

ايه الى يفرحنى وبقينا بنصدر الغاز ليهم وهو مش كافى عندنا أصلاً؟

بدل الأفلام والبكاء على الأطلال ياريت يحمسونا شوية بأى مشاريع تفيدنا ياريت يكون في أى إنجاز قريب نحتفل بيه
نفسنا نفرح فى حاجة فى حياتنا الحالية وليست الماضية

هفرح فى حالة واحدة بس لما يكون حاضرنا أجمل من ماضينا ونكون عندنا شخصية فعلاً ومبنخافش من حد وقتها بس اقدر احط رجل على رجل وأقول احنا الى هزمنا واحنا الى عبرنا
وياريت اننا فعلاً نحب مصر فعلاً وليس قولاً ونحاول نساعد بعض يمكن تكون دى بداية التغيير الحقيقى


وشكراً

31 comments:

  1. السلام عليكم
    ازاي متحتفليش باكتوبر؟
    ده بغض النظر عن الاحترام العظيم الذي حصل عليه المصري لاصراره على استرجاع حقه
    وتحطيم اسطورة الجندي الذي لا يقهر
    ففي سبب مهم جدا لازم تحتفلي بيه باكتوبر

    :P اننا بناخد أجازة اليوم ده

    بس قبل ما أمشي أفكرك بمقولة الصحة تاج على رؤس الأصحاء لا يراه الا المرضى
    فكري فى المقولة دي وشوفي حالة سوريا والجولان

    ReplyDelete
  2. كارثه ان يكون اخر مناسبه تجمع المصريين كلهم على قلب رجل واحد هى حرب حصلت سنه تلاته وسبعين
    طبعا اذا استثنينا ماتشات نهائى كاس الامم

    ReplyDelete
  3. على رأيك يا أخت هوندا
    الواحد نفسه يفرح بحاجة في البلد دي قبل ما يموت :D

    ReplyDelete
  4. اذا ما احببتي الاحتفال بحرب اكتوبر انتي حره في اختيارك

    اما عن نفسي فا افتخر وافرح بما فعله اهلي وما فعله شعبي مهما كانت الظروف التي نمر بها لابد من الاحتفال بذكرياتنا الجميلة

    هل تستطيعين ان تقولي لن تحتفلي ب عيد الفطر او رمضان

    هذه اعياد دينية جعلها الله لنا
    وايضا حرب اكتوبر جعله الله لنا عيددا قوميا نحتفل به ونتذكره ونتذكر ايماننا بالله في ذلك اليوم

    كان الله قادر ان يجعل مثل هذا اليوم حزن علي المصريين ولكنه جعله مفخره لنا كمسليمن جميعا

    هل تستطيعي ان تقولي انا لا اقبل ان افرح بمثل هذا اليوم الذي جعله الله لنا ذكري سعيده

    لك الاختيار ولي ان احب ما قدر الله لي ولنا جميعا

    وشكرا

    ReplyDelete
  5. الانتصار ليس عبارة عن انك تسترد الارض فقط
    الانتصار هو ما سوف نجنية بعد استرداد الارض
    ان يكون لنا سلطة كاملة و حرة علي كل شبر من ارض الوطن و تكون هذه السلطة و القرارات لخدمة الجماعة الداخلية الوطنية

    قد نكون استردينا الارض لكن هل تحقق اي من توابع هذا الانتصار بشكل مادي ملموس ؟؟؟؟
    سيادتنا علي ارضنا منقوصة بشكل بشع
    اليهود يقتلون من جنود حرس الحدود بل و عندما يردهم احد مثل البطل سليمان خاطر يقتل و يسجن بامر حكومي !!!
    القرارات لا تتخذ لخدمة الجماعة الوطنية الداخلية و لكن لخدمة اهداف خارجية و لصالح جماعة منتفعة فقط

    الانتصار لا يمكننا اختزالة في مجرد استرداد ارض
    الانتصار عبارة عن منظومة متكاملة تقام من اجل تحقيق
    التقدم و الديمقراطية


    **********
    هامش بسيط
    انا مستعدة اتنازل عن الجنسية المصرية لان مواقفها مواقف خائنة اتبرأ منها و لا فارق في رأيي بين الحكومة و الشعب لان الشعب مستضعف و لا لزوم له و لن تؤثر امانية علي اي من سير مواقف البلد

    ReplyDelete
  6. أكتوبر مالها ومال دة كله .. دي ملحمة عزة .. كان زمانا مزلولين علي ذل لغاية دلوقت من غيرها .. اكتوبر زيها زي مصر كدة .. ماينفعش أزعل منها هي أو اخاصمها هي .. لكن أزعل وألعن اللي استغلوهم هما الاتنين .... ولو كدة بئه يبقي ننسي بدر واليرموك وعين جالوت وغيرهم وغيرهم .

    ReplyDelete
  7. كلامك صح لكن مش معاكى فى حتة اننا منحتفلش بأكتوبر
    لأن ده يوم لازم نفتخر بيه ولو بعد 1000 سنة
    كده انتى عملتى زى اللى جالو العيد وقال لأ انا مش هعيد السنة دى لحدلما البلد دى تتعدل والمناظر اللى الواحد بيشوفها فى العيد متبقاش موجودة
    ونسيتى ان المشكلة مش فى العيد وده من حقك تحتفلى بيه لكن المشكلة فى الناس اللى موجودة

    ReplyDelete
  8. للأسف أنا فاهمة قصدك و مقتنعة بيه
    و ده اللى حسيته النهاردة فعلا ...
    كل القنوات بتحتفل و الناس بتحكى عن الامجاد
    جميل اننا نفتكر أمجادنا بس فعلا ايه الفايدة لو مش هتدفعنا اننا نبقى أحسن
    نفس فكرة اننا لحد دلوقتى عايشين بكلامنا عن أمجاد الفراعنة و بس ... يعنى مش بندرس الماضى علشان نستفيد لأ بندرسه و نتعلمه علشان نبرر حالنا دلوقتى بدون أى أمجاد تحسب لينا ...!

    ReplyDelete
  9. قلتي كل اللي جوايا بجد ياهوندا
    بس انتي عارفه احسن حاجه ايه
    انهم اخدو مننا ومنها كل حاجه
    بس محدش قدر انه ياخ حبنا ليها رغم كل اللي بيحصلنا فيها

    ReplyDelete
  10. لا احتفل
    عشان اللي حصل من ٣٦ سنه ده شئ يدعوا للفخر فعلا والاعتزاز
    لكن انا اتفق معاكي جدا في ان حالنا دلوقتي يفم مش يفرح
    وان احتفالنا بانتصار اكتوبر هو آخر انتصار حقيقي لينا حاجه تحزن
    لكن ماحتفلش افرح بالانتصار ليه !!
    اذا كان ده حالنا بعد مااستريدينا ارضنا ، متخيله كان هيبقى ازاي لو لسه فيه احتلال

    صح القدس لازالت محتله واحنا بنتفرج ، بس مش احسن ماكنا بقينا احنا و هما كمان

    اللي مزعلني انك لما تفتكري الاحداث ايامها تلاقي وحده تشرح القلب، كل البلاد العربيه وقفت في وجه امريكا للضغط علىها و على اسرائيل، حد ممكن يعمل كده دلوقتي ... للاسف لا :(

    بس انا احتفل و فخوره بانتصار اكتوبر ، حزينه على حالنا، بس هفضل برضه سعيده بالمناسبه دي.

    عايزاني ماحتفلش و ماخدوش اجازه
    :D

    ReplyDelete
  11. بصراحه معاك حق..

    الناس بتحتفل على الأغلب لانهم محتاجين لأي مناسبه تدخل على قلوبهم الفرح

    تحياتي لك

    ReplyDelete
  12. الله ينور عليكي ياهوندا
    تصدقي بالله... أنا الصبح قولت هما بيحتفلوا بيه طيب وبعدين هنفضل نحتفل بيه كده ونقول عملنا وعملنا ونبص ورانا ومانعملش أييييي حاجه غير اننا نحتفل بالانتصارات القديمه ومانعملش حاجه لمستقبلنا
    بجد بجد أنا حزينه على حالنا ده وعلى كل حاجه وحشه بتحصل وعلى كل كلام بيتقال ومش بيتنفذ
    بجد الله يكرمك يا هوندا على الكلام ده

    ReplyDelete
  13. مع احترامي لوجهة نظرك ياهنادي وتقديري لها الا اني اختلف معك

    يجب ان نحتفل باكتوبر ونظل نتذكره ونتذكر رجالنا العظام الذين ضحوا بارواحهم حتى نحيا نحن والاجيال التالية لنا

    كون البلد حالها لايسر عدو ولا حبيب فاللوم علينا وحدنا لاننا تركنا الحال يتدهور

    قارني بين تعاملنا مع مناسباتنا الوطنية وتعامل غيرنا

    يعني على سبيل المثال لو متابعة قناة المنار شوفي بيتعاملوا مع شهداءهم بإجلال وتقدير ازاي وعرض مكثف لصورهم وحديث عن بطولاتهم حتى لاينسى الناس

    عارفة ليه اكتوبر اصبح مرتبط في اذهان الكثيرين بالاجازة والاوبريتات السخيفة

    لاننا لانحتفل به الا بطريقتنا العقيمة التي أوصلت الناس للتريقة على الاغاني الوطنية

    حتى أغانينا الوطنية التي تحرك الدم في العروق استبدلوها باغاني ماسخة لناس لاطعم لهم حتى لااغاني القديمة لايذيعوها الا باصلوات ناس تانية خالص

    وهذه الاشياء وغيرها هي من اوصلت الناس للاحساس بهذه المناسبة الجليلة احساس باهت

    تحياتي

    ReplyDelete
  14. نسيت اقول لك عن حاجة مهمة جدا

    باعتباري مغتربة سابقة وعانيت اشد المعاناة في الغربة من حنين غريب لدرجة اني كنت استيقظ من النوم على صوت امي يناديني واحساس باني في غرفتي وظل هذا الاحساس معي حتى رجعت رغم نزولي اجازات عدة مرات

    وبالمناسبة رغم الفارق الشاسع في النظافة والامكانيات في الدولة الاوروبية التي كنت فيها وبين كل شيئ في مصر الا اني كنت افتقدها وافتقد كل شيئ فيها ولم يخف هذا الحنين الا بعد ان قمت بشراء ستالايت لمشاهدة الفضائية المصرية ومشاهدة شوارع مصر في التليفزيون

    الاحساس بالحزن على حال بلدنا هو مايجعلنا ننتقدها رغبة منا في تحسين احوالها ولكن ليس كرها لها

    تحياتي

    ReplyDelete
  15. على فكرة انا مقصدتش تجاهل المناسبة زى مافهمتو لكن أنا رافضة الاحتفال بتاعنا ده المتجسد فى فشخرة ع الفاضى لكن عمرى ماهقلل من الذكرى وعمرى ماهتجاهل المجهود والشهداء الى فيها

    لكن انا حاسة بمرارة مش حاسة بطعم للفرحة افرح بايه؟

    نفسى القشعريرة الى بحسها لما اسمع حاجة عن أكتوبر أو أغنيها وقتها احسها فى حاجات كتير تجاه بلدى
    رافضة انحصار مناسبتنا وتوحدنا فى ذكرى ماضية بس

    ReplyDelete
  16. انا كمان حاسة بمرارة وحزن شديد
    وفي كل مناسبة يزيد حزني لما وصلنا له من حال مرير

    خاصة ودماء شهداءنا يدنسها الصهاينة في كل لحظة

    ReplyDelete
  17. بعدين عزتنا الى ظهرت فى الحرب مش موجودة دلوقتى
    هو ينفع اقول انا انتصرت على جارى من شهر وهو ماسكنى من رقبتى طول السنة

    انا فعلا محتارة وبحاول اشوف فكرة ترضى تفكيرى وعقلى
    شوفى لما جندى مصرى اتقتل من حماس فى حرب غزة عملو ايه وجروبات ومصر أولا وفلسطين معرفش ايه

    ولما إسرائيل بتمون جنود ع الحدود بقت تيران صديقة
    وإصابة خاطئة وتكتيم إعلامى

    ReplyDelete
  18. لن ينعدل حالنا طالما قبيلة بني لبرل الليبراليون الدكتاتوريون يطبقون على اجثام هذا الوطن ويسرقون منه هويته حتى نصر اكتوبر الذي انتصرنا بالله اكبر فيه يريدون سرقته وتجويله لاوبريت واغنية ورقصة ومحمد ثروت ومبارك وسادات ووهو نصر المواطن المصري المؤمن حتى النصراني في هذا اليوم كان يقاتل مع اخيه في الوطن بكل قوة وصاموا في هذا اليوم مع اخوتهم المسلمون لكن الان بعد انقلاب البطريرك شنودة على الكنيسة المصرية وموروثها فجعلها دولة داخل دولة
    الوطن ياسادة يتجه للجحيم بعينه ان لم نوقف هؤلاء المتاجرين بنا وباسمائنا

    ReplyDelete
  19. أولا يا جماعة لازم نقسم فكرة النقاش لنقطتين ..
    أولا الإحتفال وتذكر ما فعله آبائنا (وليس نحن بكل تأكيد) وما أنجزوه وعن تكاتف إخواننا المسلمين من حولنا ولا أريد أن أقول فقط العرب مع القضية ووقف الكل موقف الرجل
    ثانيا عن فكرة إنعدام الإحساس بالإحتفال في ظل الوضع الموجود والتدني في كل جهة من جهات حياتنا إبتداءا بظروف المعيشة الصعبة وليس إنتهاءا بـ تدني مستوى عقليتنا وثقافتنا

    وأرى أن فكرة إنعدام الأحساس بالأحتفال وفقدان معناه (وهو موضوع التدوينة بالأساس) ليس فيه أي تعارض مع إحترام مع فعله (هؤلاء المصريون) يومها.. ولكن في الأساس لما يفعله (أشباه الأدميين) في مصر الأن ,, ولن أقول حكومة وحدها ولكن حكومة وأهلنا بمصر !! فقد وصلنا لحالة سلبية تجعلنا بجدارة شريك أساسي لما حدث ويحدث وما سوف يحدث !
    لن أتحدث عن المعاملات بيننا وبين الناس .. لن أتحدث عن الأخلاق ولا الزمم .. لن أتحدث عن الإحتقار السائد بين المصريين !! نعم لا تستغرب ! فقط إجعل نفسك تتعد حددودها وتخبط بأحد في الشارع بدون قصدك ,, وكأنك أهنته إهانة لا تغتفر .. ويجب أن تحمد الله أنه لن يقتلك وقتها !!!!
    هل أتكلم عن إنهيار مستوى الوعي ؟؟ هل أتكلم عن إنهيار فكرة أن تساعد غيرك وتعتبرها مجالا جيدا لهزار وسخرية؟
    لا أريد أن أكون متشائما والوضع أسوء بكثير من سىء! فعل أي أساس نحتفل بشىء نحن أبعد ما يكون عنه ؟! والله إني أرى أنه من المحزن أن أخد (أجازة) في يوم وبلدي كل يوم تتأخر لأحتفل بمجد لم أراه ولا أراه
    !

    @Ahmed Adel
    أنا مش فاهم بجد أيه دخل الليبراليين بالموضوع؟!!! ومن قال إن الليبرالية تسرق هوية الوطن ؟؟!! للمعلومة الييبراليين في مصر هم أكثر من يحتفلوا بصدق بنصر أكتوبر وبمواقف الرئيس السادات ,, ومش كون إن حضرتك معارض لليبرالية بالشكل ده إن كل مشكلة تحصل في الكرة الأرضية تكون بسببها

    ReplyDelete
  20. لنضع تعريفا لليبرالية اولا.اهم من يهاجم اي شيء وكل شيءينتمي للاسلام كمظاهر الحجاب والتدين الذين يدعون انه شكلي. وفي نفس الوقت يرحبون جدا بمظاهر الليبرالية الشكلية من حرية اختيار المراة لملبسها ولكن مشكلة تحجب المراة وسفورها هيا سر الكهنوت وغاية التحرر عندهم.
    اقرا مدوناتهم وستعرف كم الديكتاتورية واقصاء الاخر كما يرمون ما يسموهم المتعرعرين وفقهاء البدو المسلحين بفلوس البترول.
    كل من ليس معهم فهو في خانة الجهلة وغير المثقفين واحتكروا هم الثقافة والفكر والحرية .
    اقول لك لم هم اصل البلاء لانهم يريدون طمس هوية مصر الاسلامية والعربية فهم مشكلتهم ليست مع تصرفات خاطئة او محاولة تقويمها بل هم لا يريدون الاسلام جملة ولا تفصيلا بل يريدون دينا مائعا لا يهش ولا ينش.
    لنضع اولا تعريفا لما تقصده انت بالليبراليون ؟.
    هل هم سيد القمني وصلاح عيسى ومجدي الجلاد وابراهيم عيسى وعادل حمودة وفاروق حسني مثلا.
    فهم رؤساء عشائر قبيلة الليبرالية وحاملو راياتها الان فهل هم من تقصد

    ReplyDelete
  21. ايه دخل الليبراليون فى البوست مفيش أى علاقة بين الى اقصد وبينهم صد ال
    لأنى أقصد الكحومة فى الأول
    كمان الليبراليون مش بيطمسو الدين ولا حاجة انت اكيد تقصد العلمانيون هناك فرق كبير بينهم وبين الليبراليون

    ReplyDelete
  22. المصطلحات ليست مهمه الان لان كل يطلق على نفسه ما يريد فهل معنى ان يطلق جمال البنا لقب مفكر اسلامي انه حقا يفكر اسلاميا بالرغم من الطوام والمصائب في افكاره فانا لا يعنيني المصطلح لان لفظة ليبرالي المفترض ان تكون جيدة وهو التحر من القيود السلطوية بطريقة غير فوضوية.
    لكن هم الان اختزلوا المصطلح لكل من يتمرد على قيود الدين وهم يلبسون التهمة لرجال الدين حتى لا يستعدوا الجماهير عليهم فيقولوا ان المشكلة لست في الدين بل في رجال الدين او الاسلاميين كما يطلقون عليهم.
    اذا العلمانية او الليبرالية اصبح لقبا كالباسوية يطلقه دهاقنة اعداء الدين الاسلام خصوصا لكل من يريدون ان يخلعون عليه القاب التنوروالتحرر والثقافة.
    اما علاقة الكلام الكتير ده بالبوست ان نصر اكتوبر كان نصرا اسلاميا خالصا فوكسة 67 كان نتيجة التاثر الشديد بالقومية واقصاء الدين تماما عن فكر القوات المسلحة لكن السادات رحمه الله وغفر له علم بتدينه الفطري وذكاءه الوافر انه لن ينتصر الا بادخال الدين النار الحقيقية التي تدفع بقطار الامة الاسلامية الى الامام دوما فانتصر في الحرب.
    لكن الان العلمانيون او الليبراليون لا اهتم بالمسميات كثيرا افرغوا النصر من جوهره الحقيقي وهو التمسك بالدين فلا اشارة الى ذلك هذه الايام مع ان شعار حرب اكتوبر رمضا كان الله اكبر.
    ملحوظة صغيرة لا فارق الان بين الليبراليون والعلمانيون والحكومة ففي ساحة المعركة الحقيقية سينحاز كل هؤلاء وان كانوا اشدهم خصومة مع الحكومة الي صالحها في سبيل وقف التيار الاسلامي.
    وما ادل على ذلك من قضية هي الاصل فيها انها صغيرة وهو موضوع النقاب فهو كما يدعون المفترض ان الملابس واختيارها حرية فردية للشخص عظيم لكن هم يقصدون بها حرية التبرج ولا مانع الى الان لكن حين يصل الامر الى حرية ارتداء النقاب يقفوا صفا واحدا كالبنيان المرصوص الى جانب الحكومة سواء كانوا من مثقفو حظيرة فاروق حسني من الاقلام الحكومية او حتى من معارضو الحكومة كلهم بلا استثناء وقفوا قلبا واحدا ضد هذا النقاب كانه من اسباب كل كوارث العالم بدءا من ثقب الاوزون نهاية بانقراض السلاحف في جزر هالاباجوس.
    عذرا للاطالة لكن ما اراه في مدونات هؤلاء والحرب المستمرة على هوية مصر الاسلامية يجعلني اؤمن انهم السبب وراء كل مصائبنا

    ReplyDelete
  23. على فكرة كل من سيد القمني - -فرج فودة - جابر عصفور - جمال البنا - احمد صبحي منصور زعيم طائفة القرانيون
    هؤلاء هم من يعتبرهم "صفوة المجتمع"
    جنود الليبرالية فهم اسماء كما ارى منها انهم غلاة غلاة غلاة العلمانيون الذين يريدون فصل الدين عن الدولة فكما قلت المصطلحات لا تهم كثيرا فانا ارى ان الشيخ حسان مثلا ولاالغزالي ولا القرضاويليبراليونولكن بتعريفي انا انهم يريدون الحرية لامتنا من سجن الحكام الخونة.

    ReplyDelete
  24. @Ahmed Adel
    يا سيدي الفاضل لو دخلنا في كلامك عن الليبرالية (ومازلت لا أرى أن هذا سياقه ولا مكانه) فأريد أن أقول نقطتين ..
    أولا تعريفك لليبرالية غير صحيح بالمرة فبداية كلامك تقول إنهم كل من يهاجم الإسلام ؟؟!! وذكرت منهم أمثلة غريبة الحقيقة .. ما دخل إبراهيم عيسى بالموضوع؟؟!! هو مش إبراهيم عيسى ده برضه اللي كان مقدم برنامج عن حياة سيدنا عمر بن الخطاب وسيدنا أبو بكر الصديق ؟؟
    وبرضه مش فاهم إزاي تضع إبراهيم عيسى وسيد القمني في كفة واحدة !!
    ومن قال أيضا أن الشيخ محمد حسان ينتمي للفكر الليبرالي؟
    ومازلت بقول إن ده مش مجال إستعراض المعلومات السياسية ولا الفكرية .. وأرجو إن حضرتك تكون مفرق في الأساس بين العلمانية والليبرالية .. وإن كان حضرتك عندك خلط ففيه موسوعة ويكيبيدا وفيه كتب كتير بتتكلم عن الحاجات دي في مواضعها

    وأرى إن كنت حضرتك برضه متضايق شوية من المغالاة من مدونات من تدعوهم بالليبراليين فمن واجبك كمان إنك تقحم اللادينيين وغير المسلمين من الديانات الأخرى وربما أيضا مدونات الشواذ !! في الموضوع! لإن فعلا نظرية المؤامرة دي بقت بتستفذ كل ذرة منطق موجودة في أي نقاش ,, لإن قبل كل ذلك كاتبة التدوينة وضحت لحضرتك أصل الفكرة وسبب التدوينة
    !!

    ReplyDelete
  25. ياراااااجل حرام عليك كان حيكون كويس لو كنت اتولد وعشت ولسعه ارضنا محتلة وكنا عشنا نفس الشعور بتاع نكسة سبعة وستين.. اكيد نصر اكتوبر كان فرحة وعزة لمصر ومالوش اي علاقة تربطه باي ظروف بنعيشها دلوقتي

    ReplyDelete
  26. عمرك ما هاتوصلى للانتى عايزاه
    لانك بداتى الموضوع بالعكس
    يعنى الصح بيقول انك تعتزى و تحتفلي و تفتكرى اكتوبر
    و تسمعي عنه اكتر كل سنة
    لحد ما كلنا نفهم ازاى انتصرنا في اكتوبر ساعتها هانقدر نعمل كل اللى عايزينه
    و هانهزم كل مشاكلنا
    الكويت بتحتفل بجنون كل سنة بعيد التحرير
    اللى خاربوا فيه الامريكان بدالهم
    ضد دولة عربية هزيمتها قدام جيوش العالم كان شئ طبيعى
    اقرى و اسمعنى عن اكتوبر اكتر
    يا ريت تقروا التحقيق البسيط ده عن نصر اكتوير
    انا اللى عملته فى مجلة بحلقة
    بناقش فيه وجهات نظر
    منها وجهة نظرك
    http://b7l2a.net/nezam/1256.html

    ReplyDelete
  27. @عمر فؤاد

    ماقلنا بقالنا 36 سنة بنحتفل
    ليه بلدنا مبقتش حاجة بقا ها؟

    ReplyDelete
  28. ونحن بعد من صغرنا نسمع بهذا الاحتفال
    آباءنا كانوا فخورين بهذا النصر وكنت أشوف حب مصر في عيونهم .. ولكن عن نفسي لم أكن أرى مبرراً للاحتفال بهذا المستوى من الصخب .. لابأس أن نذكر انجازاتنا السابقة ونترحم على امواتنا ولكن من الأفضل أن نرحم الأجيال الجديدة التي ولدت في ضجيج الصراخ والخطب الرنانة على ما مضى وكأن الدنيا انتهت والانجازات توقفت عند تلك النقطة

    بقي أن أقول أن أملي في مصر كبير .. فهي أمنا ورائدتنا رغم ما تمر به من ظروف
    أتمنى الاهتمام بمشاريع الشباب أكثر وأكثر فمشاريع الشباب والمشاريع الصغيرة هي مفاصل مهمة في كيان أي اقتصاد
    تحياتي لك يا هوندا

    وبحبك يا مصر
    :)

    ReplyDelete
  29. ماتزعليش منى اوى بحس ان وجهه نظرك دى لمجرد انك تبقى خالف تعرف

    انا قولتلك بلاش تزعلى لان ده مجرد احساس يحتمل الصواب ويحتمل الخطأ

    انا لما بسمع الاغانى الوطنيه اللى بتتذاع فى اليوم ده بحس انها بتدينى دفعه اكبر ان مهما كانت بلدى وحشه فلازم اكون انا من صناع التغيير مش مجرد انى اكون احد نقاد السلبيات

    ReplyDelete
  30. في الحقيقة انا شوفت البوست متأخر , بس قولت ارد بردوا واقول الكلمتين الي عندي :)
    في الحقيقة انا مبحسش بموضوع نصر أكتوبر ده على انوا حاجة كبيرة اوي , على الرغم من الأنجازات الي اتعملت .
    زيي ما انتي قولتي يا هنادي , احنا فين دلوقتي وهما فين هما بيتقدموا على بريطانيا وفرنسا وفي بعض الأحيان الولايات المتحدة نفسها في الأبحاث العلمية في بعض المجالات مقارنة بعددهم وعدد الباحثيين لكل مواطن , واحنا 36 سنة أنتصار ولو قارنتي بينا وبينهم منجيش الصفر الي على الشمال حتى , بجد حاجة تحزن عشان دولة لقيطة زيي دي تبقى فين وانت فين وفرحان بالأنتصار وانتصرنا انتصرنا
    ربنا يكون في عونا اللهم آمين.

    ReplyDelete
  31. فعلا ياكريم ربنا يكون فى عونا

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore