ليه نحسد لما ممكن نغبط؟

عارفة إنى اتكلمت عن الحسد قبل كده بس من وقت ماتخطبت لحد ماتجوزت والكلام عن الحسد لازم يشغل حيز فى أى حوار مع الأهل أو الأصدقاء ,, كل حاجة "متقوليش لحد كده" , "دارى على فرختك تبيض " , "خليها فى سرك " . وكنت بندهش قبل كده من الناس الى بتركز على الشكوى المستمرة وإن حياتها كئيبة والدنيا مكركبة خوفاً من الحسد .

انا فى حاجة واحدة بفكر فيها ليه الناس بتحسد أصلاً؟ أصل أنا مش متخيلة ان كل حاجة فى حياة الواحد المفروض ميتكلمش عنها عشان الحسد , لو كل واحد المفرض انه ميتكلمش عن حياته هل ده معناه ان كل واحد بيتحسد ؟ده معناه ان الناس كلها بتحسد بعضها؟ لما كل الناس بتحسد بعضها مين مبيتحسدش؟ طب الحاسدون دول مبيتحسدوش ؟؟
:D :D

من وجهة نظرى إن الحاسد ده شخص مريض عنده ضعف إيمان لأنه مش واثق فى ربنا .. لأن ربنا مبيظلمش حد وكل واحد واخد حقه بس بشكل مختلف , مش عارفه ليه الحاسد ده مبيفكرش فى الى عنده ومش عند الى بيحسده؟

لنفترض إن واحدة بتحسدنى على أى حاجة فيا هل تقبلى إنك تاخدى الحاجات الحلوة الى فيا مع الحاجات الوحشة ؟
لو عندى مرض معين تحبى يكون عندك زى ماعندى الحاجة الى عجباكى؟
لو لسانى طويل عنك تحبى تاخديه ؟
طيب تحبى تاخدى الى عندى واخد الحلو الى عندك ؟عربية مثلاً أو أى فون
:D
يعنى لو الناس تحسد بعض على الوحش هيكون فى نوع من التوازن بردو
:D

أكتر الحاجات الى تنرفز بقا الحسد على الحمل !
فتلاقى كل واحدة حامل لازم تكتم على الخبر لمدة لا تقل عن 3 شهور طيب تفتكرو الناس ممكن تحسد واحدة حاااااامل ليه؟؟
هو مش ده رزق بردو؟
هل مفهوم الغبطة "أن تتمنى ماعند غيرك بدون زوال نعمته "منعدم للدرجة دى؟

اللهم ارزقنا الرضا

7 comments:

  1. بصراحة الموضوع عاجبني جدااا
    وبجد بتغاظ اووي من حاجتين .. 1- اللي بيحسد والحسد بتاعه واضح جداا
    2 - اللي بيقعد يقول انا حياتي وحشة او كئيبة علشان يدراي
    ..
    اللهم ارزقنا الرضا
    :)

    ReplyDelete
  2. هناك من المواضيع ما لا يبلي - كما يقولون - بكثرة التردد
    كل الناس تعرف أن هناك من يحسد ولكن لا يكون دائما هذا الشخص حاقد أو كاره أو حتي مريض
    أحيانا تكون هذه هي فطرته التي خلقه الله عليها
    سمعت من جدتي عن شخص كان معروف عنه أنه حسـّاد مر علي ترعه ووجد فيها أولاد يسبحون وكان أحدهم يسبح بمهاره ويفعل الكثير من الحركات فإذا بهذا الشخص الحاسد يلقي بكلمات عن مدي رشاقة هذا الولد وأنه يشق الماء كالسمكة فإلتفت إليه الولد ليجد هذا الرجل أن هذا الولد هو إبنه
    تصوروا أنه حسد إبنه نفسه ويقولون أن الولد مات بعدها
    بالطبع قد تكون هذه مبالغة ولكن الحسد هو الحسد في جميع الأوقات وعلي أي شخص

    أنا عارف إني أتكلمت كتير
    أتمني أن أراكم في مدونتي
    شكرا

    ReplyDelete
  3. تصرفات الناس تجاه الحسد والمبالغه في ردود افعالهم هي اللي مش طبيعيه!!

    عايزه اعلق على اكتر من حاجه في كلامك:
    ان الرسول صي الله عليه و سلم قال ""استعينوا على قضاء حوائجكم بلاكتمان " بس ده مش معناه اني اقول ان حياتي كئيبه واني و اني ، ولا معناه اني اعيش في اسرار طول عمري
    بس في حاجات مش المفروض تحكي لاي حد ولا في اي وقت
    لان انتي مش عارفه نفسيتك اللي قدامك ايه، زي الاحلام، يقولك مش المفروض تحكيها الا لشخص انتي واثقه فيه ، هل الاحلام ممكن تتحسد، فعلا آه. تتحسد لو تفسيرها ممكن يكون فيه اشاره لحاجه كويسه مثلا !!

    مين اللي بيحسد و ليه بقى ده فعلا شئ مش هنقدر نعرفه، لان انتي مستحيل تحسدي حد، و دي نعمه من ربنا
    لكن اللي بيحسد فعلا زي ماقولتي انسان مريض، والحسر زي البخل، مرض ربنا خلقه و اوجده في بعض النفوس المريضه، و في نفس الوقت وصفلنا و عرفنا ازاي نستعين به و نقي انفسنا شر الحسد والحاسدين

    الفكره ان مش الحساد بقى بس اللي مرضى، لا ده المهووسيين بانهم محسودين دائما في كل خطوه دول كمان مرضى

    بالنسبه للحمل، آه بيتحسد، او ناس تخاف انها تتحسد من واحده لسه مش جابت اطفال مثلا او كده، واللي بتحسد ممكن ماتكونش قصدها الحسد او الضرر للي قدامها، قد ما انها بتتمنى حاجه من غير ماتدعى لربنا انه يحفظ النعمه دي للي قدامها برضه او من غير ماتقول "ما شاء الله ولا قوة الا بالله " ساعتها ده ممكن يكون حسد غير مقصود ، و في بقى اللي بيبقوا قاصدينه فعلا و دول ربنا يهديهم و يكفينا شرهم


    طولت عليكي ، :)
    ربنا يعافينا و يعافيهم
    و يقينا شر الحسد و يهدي نفوسنا جميعا

    ReplyDelete
  4. @sinar
    أنا فعلا بتفقع من ان الشخص الى قدامك يصورلك ديماً إنه ضحية حسد , وإن خلاص الناس كلها مترصداله
    وطبعاً انا مؤمنة بالحديث ده بس مش دى الامور الى كنت اقصدها ,, اقصد الحاجات العادية فى حياتك زى مثلا إنك اشتغلتى عملتى مشروع , خارجةمع زوجك فهمانى
    ؟
    وفى حاجات انا مؤمنة انها خصوصيات أكثر من انها تتحكى زى مانتى قولتى

    بالنسبة لنقطة الأطفال وده الى خلانى اكتب البوست أصلاً
    إن اه نفسى أخلف بس ربنا مقدرليش لسه مش معنى كده إنى أحسد ا لى قدامى أو أضايق ليه مفرحلوش؟
    لأن المسألة أرزاق فى الأول والآخر وربنا ليه حكمة

    عشان كده المفروض شرعاً إننا نقول ماشاء الله لا قوة إلا بالله فى اى حاجة زى دى عشان نتقى حسد أنفسنا لأنفسنا حتى

    ReplyDelete
  5. تصدقي أنا دايما بسأل نفس السؤال : الناس اللي بتحسد دي عندها مناعة يعني مينفعش تتحسد هي كمان؟ :D
    المهم اللي وصلتله إن في ناس معينة أنا بقيت عارفاهم بعد ما سابوا علامات كتير في حياتي طبعا
    :D
    الناس دي ما يتقالش قودامها أي حاجة حتى لو بسيطة :)
    ربنا يشفي ..

    ReplyDelete
  6. بوست رائع

    تشرفني زيارتك

    ReplyDelete
  7. الحسد مذكور فى القراءن بس بلاش نخلى وسوسه الحسد دى عندنا دايما علشان منتحولش مرضى وميبقاش مالى تفكيرنا غير اننا محسدوين

    طبعا مش لازم نتكلم عن حياتنا كتير لان (استعينوا على قضاء حوائكم بالكتمان) دى كانت وصيه رسولنا لينا لكن لو اتسألنا عن حاجه منكدبش ... وعامه كلنا متفقين ان الحاسد ده شخصيه مريضه

    بالنسبه لموضوع الحمل دى ياستى اعتقد انه بيبقى هاجس عند الامهات مش اكتر ..بقولك كده لان فى عائلتى حصلت حاجه مشابهه لكده وسبحان الله اللى خبت حملها البيبى مكنش ليه نصيب فى الحياه وكان المولد بنت واللى مش خبت وقالت من اول شهر ربنا اراد ليه الحياه وهو ولد وماشاء الله عايش بصحه جيده هو ووالدته ...وعائلته فرحانه بيه الحمد لله ... وبعدين ماهو اللى بيحسد ممكن يحسد فى السادس او حتى التاسع مش بس فى الاول او التانى

    ممكن الواحده تخبى حملها على حد هى شاكه فيه وانه ممكن يحسدها ... لكن مابنفعش تخبى على اللى بيحبوها .. على الاقل ممكن يدعولها دعوه حلوه تكون من نصيبها هى والبيبى

    AH

    اسفه لللاطاله

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore