تخليص ذمة

مبحبش اتكلم فى حوارات الكورة ومبحبش ادخل فى نقاشات عنها كتير ومبتكلمش إلا لما الموضوع يستفذنى بزيادة انا كمصرية أحب أعبر عن قرفى واشمئزازى من الى بيحصل دلوقتى من فتنة مهببة بينا وبين أخواتنا الجزائرين على حاجة عبيطة متستاهلش إننا نخسر بعض عشانها وبجد مكسوفة من المنظر الى احنا فيه وان إسرائيل تتكلم فى جرايدها عن حرب بين مصر والجزائر بسبب الكورة شكلنا بقا عرة اوى

اتفرجو شجعوا اعملو الى تعملوه بس مش للدرجة دى عيب عليكم كسفتنو الله يكسفكم والكلام لكل المتخلفين من المصريين والجزائرين الى هاصو فى الزيطة والى ولعوها

لو كانت بلد أجنبية حصل معاها ده ومع منتخب مصر أو الجزائر كنا هنلاقى جروبات وحملات ضد الكفررررررررررة المضطهدين للمسلمييييين المؤامرة عايزين يخسرونا عايزين عايزين ... لكن احنا لما نقطع بعض عااااااااااااااتشى

انا اكتر حاجة شغلانى بعد ماتش انهردة والأيام الى فاتت دى كلها والمصريين مبيعملوش حاجة غير الكلام عن الماتش ده ياترى ايه بيجرى وراء الكواليس؟؟؟

ياترى هنخرج من مصيبة الكورة وندخل فى انهى مصيبة اصل البلد بقيت كلها مصايب

بجد بانهى وش تدعو ربنا ينصرنا على الجزائر وحملة يارب هو احنا فى حرب يابشر ؟
؟
وقال منظر روعة والأذان مرفوع فى الإستاد كانت الأمم دى قامت تصلى ؟ هتقوم ازاى والأماكن ! والفضيحة انهم بيدعو بالنصر على الأعداء والحماسة وخداهم قوى مش مكسوفين دى لو كانت إسرائيل مكنتوش عملتم كده !

حسبى الله ونعم الوكيل فى تشويهكم لصور المسلمين

فين أخلاق الرياضة الى انتم مدمنينها؟

أنا والله بحسد الكورة الى تأثيرها مسيطر على الريس وأولاده ووزراؤه انهم يهتمو بيها وبلاعبيها عقبال مايهتمو بينا وبمرضانا وبوالدى الى مستنى عملية توسيع شرايين قلبه بقاله شهرين وكل شوية تتأجل بدون أسباب غير انه روتين حكومى

اللهم إنى أبرىء إليك مما فعل هؤلاء
اللهم إنى أبرىء إليك مما فعل هؤلاء
اللهم إنى أبرىء إليك مما فعل هؤلاء

سؤال جانبى هيا انفلونزا الخنازير مبتتنقلش فى الاستاد ولا بتتنقل فى العمرة والحج بس؟؟؟

أهدى لكم أغنية أحمد مكى فوقو




كبر مخك

video

9 comments:

  1. السلام عليكم هوندا
    علي فكره انا اول مره اعلق علي الموضوع ده وده لاني بجد حسه اني اتخنقت و مش عارفه ايه اللي بيجرالنا بقا كل يوم بقراء الجرايد و اتغم من اللي بيحصل في مصر و الناس ساكته و كملت لما الموضوع التافه ده اخد اكتر من حقوا ده حتي النهارده اول ايام ذي الحجه افضل ايام عند ربنا عز و جل فيطلع علينا بناكل في بعض كده انا مش عارفه ايه عمي القلوب اللي احنا قيه ده اللهم لا تواخذنا بما فعل السفففففففففففففهاء منا

    ReplyDelete
  2. في حاجات لاحظتها ضحكتني من كتر الهم:
    محافظ المنيا طلب من احمد حسن كابتن المنتخب مليون ونص توصيل مرافق نواب مجلس الشغب مش الشعب هاجواعليه وقالوا ده مش عارف ايه ضد مهمة المنتخب القومية
    وفين ابوتريكة وانا عن نفسي اعتقد انه راجل طيب وابن حلال ومحترم فعلا بس ليه ماحاولش يخفف من حدة التصريحات بين الطرفين
    اه بس لو كل اللي طلعوا دول كانوا هبوا عشان كرامتهم اللي بتتبعتر من احقر واحد في قسم شرطة وبيتسبله اب وام ودين
    ده انا متاكد ان ماحدش اتحرق دمه عشان اي قضيةتانية من البلاوي المتلتله عندنا من اول القدس للشيشان لحتى خلينا في بلدنا من فساد جواه ماحدش اتحمق منهم للدرجة دي
    لا واللي يضحك ان المذيع الداخليقعد يقول الفاتحة والناس تردد وراه تقولش كفار قريش والمسلمين هيحاربوا حتى حسيت ان جمال هيدعي ربنا ويقول ان تهزم هذه العصبة فلن تعبد في الارض ابدا
    بالمناسبة مش دي طائفية انهم يقولوا الفاتحة بس المفروض كانوا يقولوا الصلاة الربية ابانا الذي في السماوات ليتقدس اسمك ليات ملوكتك ولتكن مشيئتك اعطنا ثلاثة اهداف اليوم كفافنا
    ولاتدخلنا في تجربة ولكن نجنا من الجزائر باسم الاب والابن -جمال يعني- حاكم واحد امين
    كله يقولك يعم حاجة تفرحنا وتنسينا همومنا وده يؤكد صحة مقولة افلام حسن الامام اشرب عشان تنسى
    واشربي يامصر واشربي ياجزاير لحد اما تكعوا
    جتنا القرف بجد
    ==============
    انا متاكد واحد هينط ونبدا لعبة مين الاول الفرخة ولا البيضة ويقولك هما بداوا لا احنا بدانا وشيء لله ياسيدي المونديال

    ReplyDelete
  3. حالة من العبط
    لااكتر ولا اقل
    تحياتى

    ReplyDelete
  4. من يومين كتبت تدوينة بالعربية عن هذا الموضوع بالرغم من أني أكتب عادة بالإنجليزية في مدونتي .. عبث في عبث خصوصا هذا الشحن الإعلامي والتعصب

    ReplyDelete
  5. اتهزمت مصر ولعله خيرا
    مش عارف لو مصر كانت كسبت كان ايه اللى هيحصل اظن كان هيبقى كل شغلنا الشاغل منتخبنا فى كاس العالم

    ReplyDelete
  6. في ناس فعلاً متخلفه وقلبوها حرب مصريين وجزائرين وتهديدات على اليوتيوب من الجزاشرين الله أعلم هي حقيقه ولا متفبركه علشان أنا مش بصدق حاجه والنهارده الصبح بدخل موقع من مواقع الشركه لاقيت رساله بتقول
    hacked by Algerians
    والداتا اللي عليه اتمسحت
    وبرضه الله أعلم دي لعبه ولا فعلاً هما اللي عمله كده

    المفروض ان الكوره مكسب وخساره وروح رياضيه وبرضه كانوا عايزين يقلبوها حرب أول الماتش وخناق وقرف وحسيت انهم بيتغابوا على الأخر
    حسيت ان لو احنا كنا كسبنا كان ممكن المنتخب مايرجعش سليم بصراحه
    ربنا يهدينا بجد ونعقل شويه ونبطل الهبل
    وكمان وانا جايه النهارده لاقيت شباب بيجروا يلحقوا الماتش واحد بيقولهم لو قالولكم تحاربوا مش هتجروا كده راح واحد رد قالو وزعلان ليه لو قالولنا تعالوا صلوا مش هنجري كده قولت ماشاء الله على الاستهتار بالحاجات الكبيره والاهتمام بالحاجات الصغيره

    سؤال جانبى هيا انفلونزا الخنازير مبتتنقلش فى الاستاد ولا بتتنقل فى العمرة والحج بس؟؟؟
    السؤال ده بالحـــــــــرف سألناه واحنا بنشوف الماتش يوم السبت ووزير الصحه بيبوس كل اللي حواليه وعادي خالص

    ReplyDelete
  7. والله حضرتك دا اللى انا اتكلمت فيه قبل الماتش بساعة تقريباً عن حلم 80 مليون مصرى من هنا
    وعلى الرغم كنت متوقع أن ما سيحدث فى السودان
    ولكن هذا ماحدث للأسف الشديد

    وفعلاً كبر مخك
    :)
    وندعو ألا يؤخذنا الله بما فعل السفهاء منا

    ألف لاباس على والد حضرتك

    ReplyDelete
  8. السلام عليكم

    عايزه بس اسجل اعجابي بمدونتك جداااا
    ما شاء الله :))

    ReplyDelete
  9. حاجة تكسف فعلا .. وتحزن بجد وأخرتها إيه ماتش كورة لكن اليوم انشغلنا باتفه الأمور وبكره إن شاء الله راح ننشغل بأعظم الأمور

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore