رحلتى إلى المطبخ

قبل ماتجوز كنت بكره حاجة اسمها مطبخ وياما أمى كانت بتصوت عشان ادخل معاهم المطبخ واتعلم الطبيخ وإلا كده مش هتجوز واتربت جوايا عقدة انى لو متعلمتش الطبيخ مش هتجوز ..يعنى هو هيتجوزنى عشان اطبخ ممممم طب مش متعلمة الطبيخ يلا بقا

يمر الزمن وابدأ اسمع من شيوخ ان الأعمال المنزلية التى تقوم بها المرأة ليست فرضاً عليها ولو هو مقتدر يجيب لها شغالة ولو مش مقتدر يساعدها فى الأعمال المنزلية كما كان يفعل الرسول ..فالمرأة عندما تقوم بهذه الأعمال كنوع من التعبير عن الحب للزوج ويجب منه تقدير ذلك ولا يعاملها كخادمة وفين الأكل ياهانم وروحى اغسليلى مش عارف ايه

وكان يوجه الشيخ الكلام لهؤلاء الأزواج الذين لا يقدرون ماتفعله المرأة باعتبار ان ده الى المفروض يتعمل ، طبعا مزجنى بقا الكلام ده وفضلت اردده فى بيتنا وكله كان بينفضلى

:D

تمر الأيام ويترسب فى ذهنى شرط فى فتى أحلامى بأن يحترم ماأقوم به ولا يعاملنى كخادمة المفروض ان ده دورها وهأنذا تزوجت ولم أكن أعرف قيد أنملة فى المطبخ ولله الحمد مع إيقان أهلى بإنى هسود وشهم عشان مبعرفش أطبخ

والعملية طلعت أبسط مما أتصور ومستوايا بيتحسن يوم عن يوم أهم حاجة الحس المطبخى مجموعة قواعد بسيطة بعد إتقانها يطلع أكل يتأكل والحمدلله زوجى كان ومازال متفهم وبيساندنى معوياً لما الاكل مايطلعش قد كده وبياكله منتحرمش من تشجيعه

:D

أهم حاجة لكسر روتين الملل فى موضوع الطبيخ أنى أتعلم حاجات جديدة أكلات جديدة .. إضافات للأكلات الى أعرفها وهكذا والنت ملوش حل فى المواضيع دى

كل مامستوايا يتحسن بيكسر عندى حتة الخانقة الى بتجيلى كل ماييجى ميعاد دخول المطبخ وبقيت أحاول أحبب نفسى فى الجو ،فأنا بحب الأكل وبحب الأكل الحلو وأحب إن زوجى يستمتع بالأكل وأحب إنى أتقن المهارة دى زى أى مهارة بعرفها بحاول أكون كويسة فيها ، ده غير إن الزوج بيتعب فى شغله ومن أبسط حقوقه أنه ييجى يرم عضمه :D

ومن هنا طلعت بقاعدة إنى عشان أطبخ كويس لازم أحب المطبخ

وعشان مزهقش من الوقت بخلى اللاب توب معايا فيه وكانت الحصيلة : برنامج قصص القرآن كله- مسرحية انتهى الدرس ياغبى – كارمن –سكة السلامة – الهمجى – لعبة الست – ماما أمريكا وحاليا يوميات ونيس :D

كمان حاجة مهمة قوى لازم تحديد وقت فى اليوم للمطبخ وبعد انتهاء الوقت ده ميتعتبش، لأن فى أول الجواز اكتشفت ان نص اليوم ضايع فى المطبخ ومن هنا اضطريت احدد قاعدة تانية ان فى وقت محدد لدخول المطبخ ووقت محدد للخروج و ممنوع دخول المطبخ غير تانى يوم ومن هنا اتنظم يومى

وأحب أقول لكل بنت متعرفش تطبخ متقلقيش فى أمل وأنا قدامك أهو ، والطبخ ده فن بس للى عنده مزاج ولو الراجل قدر محاولات زوجته وتعبها هتعطيله أجمل ماعندها وهتحاول تعمله كل جديد وكل مايحبه ويشتهيه زى ما هو بيعملها الى نفسها فيه وبعد إنجاز أكله بتحبيها أو زوجك بيحبها زى المحشى مثلا هتحسى بإنجاز رهييييييييب أنا فى البيت عملولى حفلة لما عملته أكتر من حفلة جوازى

:D

15 comments:

  1. LOL :D

    المطبخ هو تاني مكان الواحد يروحه لما يكون عايز يهرب من المذاكرة(ملحوظة: أول مكان التلاجة اذا مكانتش في المطبخ)

    ربنا يوفقك :)

    ReplyDelete
  2. الله عليكي يا هوندا طمنتيني والله :))
    يعني في أمل :)) بس يارب يستحمل بس أول كام سنه كده طبييخ وتكون معدته كويسه يارب :))

    ReplyDelete
  3. يا هوندا كويس انك بتتعلمى وفى النهايه هتوصلى
    انا بقى بعرف اطبخ وكله تمام بس مشكلتى انى دايما بحرق الاكل بنساه على النار:(

    ReplyDelete
  4. شطورة

    وعندي اقتراح كمان عشان تشجعى نفسك وتحبي الطبخ اكتر انك تصوري كل أكلة تعمليها ، حتلاقى شعور رهيب بالإنجاز والشطارة والجمودية

    ربنا يوفقك دايما ياقمر
    :)))

    ReplyDelete
  5. طمنتيني والله اصل الحال من بعضه

    ReplyDelete
  6. cool ya honda :D asl ana 3elakty beeh a5rha sandwitchat w msh dayman bardo loool:D

    ReplyDelete
  7. والله الشئ الوحيد اللي علمني الطبخ لما بعدت عن اهلي ...وبجد طبيخي سد نفسي عن الأكل مما ادى إلى اني اصمم اني اتعلمه طبعامن المواقع وكدا وحاليا من قناة فتافيت ...المهم ناو الحمد لله بقيت طباخه ميه ميه

    ReplyDelete
  8. ليا واحد صاحبي لما اتجوز كانت زوجته برضه مش أوي في الطبخ ... كان أول فترة في الجواز بيجيب دايماً أكل دليفري وأهله طبعاً يتصلوا بيه عاوزين يطمنوا يقولوله أخبار الأكل ايه؟ على أساس انهم بيسألوا زوجته شاطرة في الطبخ ولا إيه النظام ... كان بيجاوبهم دايماً الأكل النهاردة تحفة ... ولإنه كان مغترب في فترة قبل الزواج فكان متعلم الطبخ شوية بدأ يدخل المطبخ مع زوجته ويتعلموا سوا الطبخ بيقوللي عزم عيلته بعد فترة على الغدا اتفقوا معاهم يبقى ليهم يوم في الأسبوع لازم ييجوا يتغدوا عنده كل أسبوع
    :)
    ربنا يباركلك في كريم ويباركله فيكي ويعينكم في حياتكم يا هوندا جميل أوي ان شريك الحياة يكون متفهم الأمور دي
    يارب يديم عليكم السعادة ويباركلكم في حياتكم سوا
    تقبلي مروري
    :)

    ReplyDelete
  9. ربنا يكرمك يا هنادي طمنتيني انا فعلا حكاية الطبخ دي عملالي كلو في دماغي لاني مش بحب الطبخ ومش بعرف غير كام اكله بس بعملهم كويس عموما طمنتيني جدا
    كل سنه وانتي طيبة

    ReplyDelete
  10. عسى ايامكم كلها عيد :)

    ReplyDelete
  11. لا ياجماعة متقلقوش ولو حد محتاج اى مساندة انا موجودة
    :D

    ReplyDelete
  12. بشكركم على المدونة المميزة دمتم بودو اطلعوا على وصفات شهية اخرى معنا
    طريقة عمل المندى السعودى
    اكلات بالارز البسمتى

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore