الغربة ياضنايا



كل سنة وانتم بخير عيد أضحى سعيد ربنا يسعد أيامكم كلها

4 شهور تقريباً على خروجى من مصر المحروسة لأرض الرياض العزيزة وفى أول سفر ليا افتقد أهلى أصدقائى كما يفتقدونى ،، لكن بعض الأصدقاء بيفتقدونى بشكل رخم أوى يعنى كذا واحدة تدخل تقولى عاملة ايه فى الغربة ياضنايا؟ تلاقيكى محبوسة فى البيت ياعينى ؟ على كده انتى تخنتى اوى ياهنادى معلش الغربة صعبة ، يحسسو الواحد بالغربة حتى لو هو مش حاسسها ،لنفترض إنى فعلاً حاسة بالغربة هل المفروض انهم يحسسونى بده ولا يحاولى يساندونى ؟؟ وده للأسف جزء من ثقافتنا السلبية فى الكلام

أحب ألفت النظر لحاجة ان الغربة ممكن الواحد يحسها وهو فى بلده وبين أهله وأصحابه لأنها إحساس داخلى غير مرتبط بالمكان وممكن تكون مع شخص متحسش معاه بغربة حتى لو كنتم على سطح القمر ،، بالنسبة لى مستمتعة بالوضع الى أنا فيه حالياً الحمدلله فى أول الزواج بنحتاج نأسس أسلوب حياتنا بعيدأ عن تدخلات الأهل والأصدقاء والفضول المستمر لمعرفة الخصوصيات الى مبتنفعهمش أصلاً بس يسلو فراغهم .. مكنتش هلاقى أجمل من كده بصراحة

كلمة غربة دى احنا الى بنعيش نفسنا فيها طالما احنا اختارنا السفر وأى اختيار لازم يكون له مكاسب وتضحيات ،، زى التضحيات الى كانت هتنتنج من وجودنا فى مصر ويمكن ده السبب الرئيسى الى عمره مايحسسنى بغربة ان مصر دلوقتى للأسف وقلبى بيعتصر وانا بكتبها مبقتش بلد يتعاش فيها ،، لو كان مهيء لنا اننا نشتغل ونلاقى شقة بسهولة ونلاقى أكلنا وشربنا ايه الى هيخرجنا غاويين تغريب عن بلدنا ، عن نفسى عمرى ماتخيلت انى هقدر اخرج بره مصر واعيش لكن للأسف احنا بقينا بنتنفخ جوه مصر عشان نطير براها.. ليه بنخنق نفسنا جوه جدار غربة ومبنفكرش انها وسيلة لتحقيق أهداف , أحلام , رسالة , طلب علم ؟ ليه مبنحاولش نستمتع باختلاف الثقافات واسلوب المعيشة فى البلدان المختلفة ونكون نموذج مشرف لبلدنا؟ ليه نعيش نفسنا فى سجن الغربة ونكتئب ومنستمتعش بالمميزات الى حوالينا؟ ليه منحترمش اى بلد ولا شعب ولا اختلاف ثقافتهم غير بلدنا وشعبنا وثقافتنا وحكومتنا حتى لو كانو الأسوء؟

انا كنت مفكره انى هنسى هموم مصر لما اخرج او ارتاح من الغليان المستمر نتيجة المعاملات والأخلاق والزحمة والسرقة ووووو

لكن للأسف الهم زاد بعد ماجيت هنا كل ماشوف حاجة حلوة اقول لكريم ليه مفيش كده فى مصر؟
انا بقيت بحزن من حاجات كتير مفتقدينها فى مصر زى النظافة والنظام والأمان والأمانة والحدائق والجناين الكبيرة المفتوحة على جدرانها للشعب كله.

احنا عايشين فى مصر بروحنا وعقلنا لكن جسدنا فى الرياض ، أوقات كتير بنسى فعلاً إنى بره مصر بسبب تويتر ، الفيس بوك ،متابعتنا المستمرة لما يحدث فى مصر ، ده غير ان المصريين كتييييييير قوى فى البلد ومنتجات كتير مستوردة من مصر ومحلات كتير مصرية .
اكتر حاجة مأزمانى لما انزل من مصر ان هفقد الهدوء وراحة البال من اول ماشوف الظابط بتاع المطار وهو بيقولنا نورتم مصر وماسك الباسبور فى ايد وقافلها وفاتح ايديه التانية ....

12 comments:

  1. حاسة بكلامك مية في المية والله

    وجهة نظرك بخصوص ميزات السفر وال"غربة" هي الصح .. وخليني اقولك كلمتين بخصوص تعليقات الناس .. احبانا ممكن تكون من غير قصد لكن الي بيحاول يحبطك ويحزنك انك في غربة .. بيكون في الغالب داخليا بيغبطك على سفرك وعايز بس بنزلك من معنوياتك :p
    حتى لو من غير قصد
    عشان كدة ما تسمعيش منهم وانتي كدة صح .. استفيدي من كل يوم بتقضيه بره

    تحياتي :)

    وعيد سعيد

    ReplyDelete
  2. معلش يا ضنايا ههههههههههه

    ;)حلوه ولو على سطح القمر دى
    معاكى طبعا لأنى اكتر واحده بحس بالموضوع ده :(

    ReplyDelete
  3. من وانا صغير باسمع موضوع الغربة صعبة والحاجات دى
    بس اولا دا كان بيبقى لما راجل مسافر لوحده عشان مفيش حد معاه يساعده مثلا او يخفف عنه الموضوع لكن انتوا مع بعض يعنى نفس الوضع لو انتوا كنتوا اقعدتوا مثلا فى القاهرة كنتوا هتبقوا بعيد عن الاهل برده
    تانى حاجة انا مش عارف الناس ليه بتبص للغربة بأنها بهدله مش انها فرصه اننا نشوف حاجات جديدة نتعرف على شعوب ثقافات افكار نشوف الدنيا يعنى
    عموما كبرى دماغك وربنا يوفقكوا
    دى غربة :D

    ReplyDelete
  4. فرج الله همك وهم الأمة الإسلامية العربية وقربنا الله في طاعته

    ReplyDelete
  5. أستاذة هوندا
    متفق في الرأي على إن الغربة ليست مرتبطة بالمكان اطلاقاً ؛ بالعكس أنا نزلت مصر اجازة من شهرين لم أشعر أبداً أني في مصر وحتى الاجازة اللي قبلها كان نفس الشعور عندي إني حاسس بغربة وأنا في مصر وبجد محستش براحة غير لما رجعت لمكان عملي في الخليج مش لأنه أفضل أو حاجة لكن هو شعور داخلي وروابط نفسية ممكن

    الطريقة السلبية في الكلام عادة من عاداتنا السيئة إن الأشخاص المقربين بيحاولوا يوصلولنا إنهم حاسين بينا أو بإحساسنا فيتكلموا برؤيتهم هما " فلان في الغربة يبقى حاسس بغربة ، فلان حصلتله مشكلة يبقى كل تفكيره في المشكلة " ويبقى كل الكلام على الحاجات اللي هما بيفكروا فيها بوجهة نظرهم هما رغم إن الغالب بيكون عكس كده تماماً لكن لإن الناس تبنت وجهة نظر فبيعبروا عنها بغض النظر الطرف التاني ده حاسس بكده فعلاً ولا لأ
    أما عن الاختلاف بين البلاد سواء في نظام أو في تطور أو اعمار أو أو ... فأظن فيه فرق امكانيات بين البلاد لكن لا نعفي طبعاً شعبنا وحكومتنا من عدم وجود نظام أو وجود فساد اداري في مجالات كتير جداً ... وده ممكن الفرق اللي بيننا وبين بلاد تانية كتير
    بخلاف نقطة بحسها اليومين دول جداً ... يوم 2 ديسمبر الامارات بتحتفل بعيدها الوطني تخيلي حضرتك غالب البنايات معلقين أعلام الامارات أو حاطين أنوار وليزر بيعكس علم الامارات ويوم العيد الوطني ده بتلاقي الشوارع كلها زحمة ومرسوم ع العربيات اعلام الدولة بل وناس بتلف الشوارع رافعة العلم
    متهيألي دي حاجة بتهز مشاعر الانتماء أوي في قلب أي حد
    هل احنا في انتصارات اكتوبر بنعمل حاجة زي دي ؟
    مبنلاقيش الانتماء ده غير مع ماتشات الكورة
    عرفتي ليه فيه فرق كبير وهنظلم نفسنا لو قارنا نفسنا بالناس دي؟ رغم اننا فينا عباقرة ودايماً بنقول احنا اللي علمناهم واحنا واحنا .... بس احنا فين دلوقتي؟
    عيد مبارك على حضرتك وعلى كريم ويارب كل أيامكم خير وسعادة

    ReplyDelete
  6. السلام عليكم هوندا
    انا كمان مغتربه و حاسه بكل اللي قولتيه من حيث المكاسب و التضحيات يعني الحمد لله اكتر حاجه مفيده في غربتي ان ما فيش حد بيتدخل في حياتنا لا اهلي و لا اهله و لا اصحابي و لا اصحابه و لا اي حد من المتطفلين اللي للاسف موجودين في مكان في مصر اما بالنسبه للاشتياق الاهل و الاصحاب فده طبعا موجود و مستنيه الاجازه علشاه اشوفهم ان شاء الله و يارب يهدي شعوبنا و حكامنا و نرجع كده مسلمين بجد مش بالبطاقه الشخصيه

    ReplyDelete
  7. @علا
    ماهى الفكرة ان بعض الأشخاص بتبالغ بالكلام فممكن تخنقك بدل ماتفك عنك ده غير انى اما احاول اشرحلهم وجهة نظر مختلفة مفيش مجال لان مصر ام الدنيا هكذا يعتقدون :D :D

    @marwa معرفش موضوع القمر ده طلع فى دماغى ربنا يفك غربتك ياضنايا :D

    ReplyDelete
  8. @ahmed بالظبط ماهو استغرابى ان ناس بتقولى انتى لوحدك وبينسو انى متزوجة كان الزوج ملوش دور ،لكن ربنا بيقسم لكل انسان رزق فى مكان مختلف عن التانى

    ReplyDelete
  9. @sakayar
    فعلا فى روابط نفسية وفى راحة نتيجة هدوء الأعصاب الى للأسف مش بنقدر نحتفظ بيه فى مصرنا الحبيبة بسبب تعاملات البشر،،وجهة نظرك عن كلام الناس أقنعتنى تماماً يمكن متعلمناش نساند الناس صح للأسف ،أما بالنسبة لنقطة الإعمار فى حاجات محتاجة وقت لكن فى حاجات بسيطة لو الحكومة عايزة تعملها مش هكلف حاجة لكن هتريح ناس كتير اوى زى النضافة ، الأمانة ، الجودة وهكذا

    اما مظاهر الاحتفال فهيا شبيهة بالاحتفالات هنا برغم انهم معندهمش اعياد كتيير زيينا ويمكن ده ايجابى نوعا ما لانهم بيركزو ع حدث واحد بعقولهم انما احنا اتعودنا ومبقيناش بنحس بقيمتها الحقيقية

    كل سنة وانت بخير وعيد سعيد عليك

    ReplyDelete
  10. بصي انا من نعومه اظافري زي ما بيقولوا وانا عايشه في السعوديه مع اهلي ...وبصره يعني كمان في الرياض .... والله انتي قلتي كلام جوايا انا فعلا حاسه في غربه في بلدي ...وبعتبر السعوديه دي بلدي ولو قامت حرب هناك "بعيد الشرر" هروح احارب معاهم.... الغربه مش انك تتحبسي في بيت او متلاقيش جيران يونسوكي لأنك مثلا كنتي ممكن تعيشي في لقصر مثلا وانتي من القاهره وكنتي هتتبعدي عن احبابك بردو....القلب هو الحاجه الوحيده اللي تقدر تقولك انتي وطنك فين مكان راحته هو ....،علي فكره لو عايزه تعرفي اي حاجه او مكان في الرياض اختك موجوده وفي الخدمه

    ReplyDelete
  11. مفيش فايدة .. اللي بشرب من نيلها لازم يحن لها وهذه سمة عامة فينا كمصريين بالرغم من كل شيء.

    كل عام والجميع بخير إن شاء الله بمناسبة عيد الأضحى وأسأل الله الهداية لنا جميعا

    ReplyDelete
  12. @MaraM ياريت نتواصل لانى فعلا مش لاقية حد مفيد فى البلد دى :D

    @Hicham عمرنا ماهنمنع اشتياقنا لمصرنا :)

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore