يسروها ربنا ييسرها عليكم

كنا بنشوف انهردة أسعار الشقق فى القاهرة بجد تعجيزية أوى مش عارفه ليه كده الناس تجيب فلوس منين كأنهم بيقولو للشباب السرقة هيا الحل !

حرام والله ،انا محبطة اوى انا شايفة ان الحكومة هيا الى بتساعد على انحراف الشباب نتيجة لتعجيزهم انهم يقدرو يوفرو سكن يتجوزو فيه أو انهم يشتغلو أو يأكلو بجد الناس دى بتفكر ازاى التعجيز ده ساحب على طبقات كبيرة وواسعة مش زى زمان كان الفقير فقير وطبقة محدودة ..وللأسف جزء كبير من الشعب بيساهم فى التعجيز زى بعض الآباء الى بيشترطو شبكة بكذا وشقة كام أوضة والأثاث مكون من ايه بجد الناس دى هتتحاسب على تعسيرهم ده ،،انا بقيت بحس انهم بيعاقبو الشاب الى عايز يعف نفسه ويتزوج ،،ده غير بعض الأمهات الى بتشجع بنتها انها تسف من خطيبها ويجيبلك ويجيبلك يإما يبقا بخيل كأن العريس ده مصنع فلوس

18 comments:

  1. كلامك صحيح يا هنادي ,
    ربنا بأذن الله هيخلصنا قريب بأذن الله ,
    عاوز اطلب منك طلب انتي وكريم , متنسوش مصر من الدعاء بصلاح الحال وحكومة تقوم بينا , حكومة تراقب الله . أمانه عليكي متنشيس ابداً

    ReplyDelete
  2. انا والله ياكريم بدعى ديما ربنا يزيح الغمة

    ReplyDelete
  3. السلام عليكم :)
    الامر مش مقصود بشكل عيني انهم بيعاقبوا الشباب او ما شابه

    الفكرة علي ما اعتقد ان الفساد له اليه تدميرية حتي و ان لم تكن مقصودة , يعني احتكار الحديد اللي استاذ عز واخده دا بالنسبة له انه فقط متحكم في سعر طن الحديد و لكن الاثار بقي الاجتماعية او ما شابه اللي هتترتب علي ذلك لا تعنية و اعتقد ان اصلا مخه مش علي درجة من الوعي انه يفهم التبعيات اللي بتحصل

    الناس دي عايزة بس تكسب و تجيب فلوس , لكن بقي النتايج اللي هتترتب علي كسب الفلوس دا ملهومش هما دعوة بيه

    الامر فعلا معقد و متشابك جدا جدا جدا و اعتقد ان كل حالة منفرده بذاتها
    يعني انا متفاهمة ان الام عايزة تطمن علي بنتها لان فعلا فيه نوعية شباب لو تنازلتي عن الشكليات دي بيسوقوا فيها ...ففعلا صعب تقيسي مقياس معين يتعمم لكن كل حالة تكاد تكون خاصة و متفرده بذاتها

    البلد فعلا مليانا جراح كتير اوي :(

    ReplyDelete
  4. وعليكم السلام ياشموس
    انا عارفه انه مش مقصود بس دى نتائج المفروض لو مهتمين يعالجوها

    خير الأمور الوسط كل حاجة بحدود انا بتكلم على المبالغة واحدة كانت بتحكيلى ان والدتها بتقولهاش على خطيبها بخيل عشان مبيبعتلهاش فلوس لانه مسافر برغم انهم مش كاتبين كتاب وهو مش المفروض يبعتلها اصلا ،، بتكلم عن النوعيات دى

    ReplyDelete
  5. فاكرة ياهنادى سكن الشباب اللى كنت قلتلك عليه ان خطيبى بيسأل فيه
    انا اكتشفت يومها ان كلمة مساكن للشباب دى أكبر كذبة وأكبر خدعة
    مكتوب فى الاعلان بفونت عريض بدون مقدم وبدون فوايد وبالتقسيط
    قلنا بدون مقدم جميل جدا لما نسأل راح يابنتى ولقى ان شقة 80 متر واقفة فوق ال 150 ألف جنيه وطالبين مبالغ متجمدة بال 40.000 مرة و 20.000 مرة تانية اللى هو نص تمن الشقة متسدد قبل ما تستلميها
    تقدرى تقولى بقى لو شاب معاه اصلا 70.000 جنيه ايه اللى هيخليه يروح يسكن فى صحرا ومنطقة جديدة وبعيدة
    ده على افتراض ان لسه مفيش فلوس عفش
    والله فعلا ربن يسترها مع شباب المسلمين

    ReplyDelete
  6. الحكومة بتحاول يا هنادي خاصة في قرار الايجار المؤقت.. أما موضوع ارتفاع الأسعار ده نتيجة للمستوى الاقتصادي للبلد.. يعني لازم نشتغل أكتر.. عشان نحسن اقتصادنا.. و موضوع المغالاة ده مش عارفة اقولك ايه عليه.. بس مش عايزة ابقى كدابة.. ده فعلا سلوك الناس.. بس مش حكاية فلوس.. حكاية تفاخر و حكاية ثقافة لازم تتغير و مفاهيم حتى عند الشباب نفسه مش عند الأهالي بس

    ReplyDelete
  7. السلام عليكم جميعا
    أنا بس ليا تعليق على كلام شمس الدين إذا سمحتلي هي طبعا :).. أنا أظن إن كل اللي بيحصل ده سيناريو مقصود جدا جدا ومش بس نتيجة الرغبة في إنهم عايزين يكسبوا ويجيبوا فلوس. الحقيقة من وجهة نظري إن في رغبة أقوي من دي وهي الاستمرار في السلطة. طيب لما تكون السلطة فاسدة وعايزة تستمر وأكيد طبعا مش عايزة حد يفتح بقه يثور أو يعترض عليها تعمل إيييييييه ؟؟؟؟
    الإجابه: تشغله. تشغل عقله ومجهودة كله عن فسادها. إزاي؟ إنهم يحولوه زي مابيقولوا كده وعذرا ع النشبيه لتور في ساقية عمال يلف يلف يلف كل هدفه يلاقي لقمة العيش لولاده وبعد مايلاقيها بالعافية يقعد يلف تاني عشان يلاقي فلوس تعليمهم وفلوس الدروس وبعديها يلف تالت عشان يجهز بنته للجواز ولا يساعد ابنه بقرشين.. من الآخر بقى يصحي وينام ومش بيفكر غير في إزاي يجيب متطلبات حياته الأساسية اللي تكفله حد أدنى من الحياة الآدمية.
    في نفس الوقت بقى يغرقوا الشباب بطوفان من الكليبات والأفلام و الثقافات اللي تخلي كل همه _وعذرا على اللي هقوله برضه_ تخلي كل همه في إزاي يشبع غرائزه مع إني بتقرف من المصطلح اللي استخدمته ده بس معلشي نعديها لإن هي دي الحقيقة.
    وفي النهايه يبقى هم أي شاب وأقصى أحلامه تنحصر في لقمة عيش ياكلها و امرأة . مش مهم بقى ييجوا إزاي ولا منين المهم ييجوا وده يخلي ساقية تانية تدور إسمها ساقية الجريمة والفساد. واستمرار لمسلسل الساقية و من أجل بعض التحابيش يقوموا معظمين أوي أوي من أهمية ماتش كورة ويحولوه لقضية انتماء و وطنية ومهلبية أهو برضه حاجة تلهي الشعب وهو بيدور في الساقية أحسن عينه تروح كده ولاكده ويشوف البلاوي اللي حوالين الساقية..
    كله مقصود يا شموسة وكله عشان خاطر عيون الساقية ;)

    ReplyDelete
  8. وبالنسبة بقى لطلبات الأسر فكلامك صح فيها يا هوندا الرسول عليه الصلاة والسلام قال: إذا جاءكم من ارتضيتم دينه و حلقه فزوجوه لكن اللي بيحصل من الأهالي إنهم بيطلعوا عين اللي جابوه_ أنا مش عارفة مالي النهاردة كلامي لهجته بقت غريبة شوية بس عدوها برضه_ والحقيقة إن الحديث له بقية الحديث بيقول : ...فزوجوه وإلا تكن فتنة في الأرض و فساد عظيم
    وهو ده بالظبط اللي حصلنا دلوقتي .. فتنة في الأرض :(وفساد عظيم
    ربنا يعفينا جميعا

    ReplyDelete
  9. الحكومة مش بتستغلب علينا بس وبتقولنا نجيب منين؟
    بصى يا ستى
    الحكومة بتاعتنا هتدفع 400 مليون جنيه لواحد نصاب اسمه وجيه سياج
    اخد ارض فى طابا من ايام عاطف عبيد وقال هيعمل فيها وهيسوى
    فوجىء الامن اخيرا بانه على شراكه مع اسرائيلين (مستثمر اسرائيلى على حدودك)
    طبعا الامن رفض وهنكع 400 مليون جنيه
    شوبير كسبان 5 مليون جني فى اقل من 20 ساعة
    اخد ارض من وزارة الزراعة وباعها تانى يوم وكسب 5 مليون جنيه
    الحكومة بتبيع القطاع العام عشان بيخسر وياسبحان الله مسافة مابتبيعه بيكسب ملايين قد اللى اتباعت بيه
    اكمل؟
    الحكومة غلبانة فى عقلها
    مش فى فلوسها
    سلام

    ReplyDelete
  10. زي ما قلتي
    ربنا يزيح الغمه بجد

    ReplyDelete
  11. للأسف هو ده حالنا

    وفعلا الناس دى هتتحاسب على الكلام ده

    ربنا يصلح الحال

    ReplyDelete
  12. والله أنا بيصعب عليا أوييييييييييييي الشباب
    ربنا يكون في عونهم و في عونا بجد

    ReplyDelete
  13. إن شاء الله قريبا ستحل كل الأزمات التي في العالم بإذن الواحد القهار

    ReplyDelete
  14. @S_A_S_O حصلت معانا مرة بردو اعلان فى الوسيط وبعد مارح كريم يسأل طلع سعر تانى جر رجل يعنى هههههههه

    @iman elbaz ايه الإيجار المؤقت ده؟؟ اكيد مش قصدك الإيجار الجديد الى بيبدأ من 400
    :D
    انا معاكى اننا لازم نشتغل اكتر بس انا بتكلم ع فئة كبيرة من المصريين بتقتل نفسها شغل لكن المرتبات مش جايبة همها

    ReplyDelete
  15. @Zahraa وعليكم السلام انا شايفة زيك ان رغبة السلطة فى الكرسى خلتها منشغله بيه بس أصلاً وميهماش حاجة تانية وهما نجحو فعلاً فانهم يخلو المواطن يدور فى ساقية رغيف العيش!!!

    ReplyDelete
  16. السلام عليكم

    لماذا تحميل كل شيء على الحكومة ... أساساً أنت تتعاملي مع القطاع الخاص فلماذا تلومي الحكومة .. ليه كل مشاكلنا نحملها على شماعة الحكومة ..هي الحكومة هتعمل إيه ولا إيه

    طب عندك إسكان المستقبل وإسكان مبارك وإبني بيتك هل فكرت تبصي على المشاريع العظيمة ده اللي تبنتها الحكومة ف يالأربع سنين اللي فاتوا

    على كل حال دمتِ بكل ود

    وأتمنى لكم التوفيق ويا ريت تقوليلي الأسعار عندكم كام والمساحات والمناطق بصدق والله حابب آخد فكرة وأقارنها بكفر الشيخ اللي معروف عنها الغلاء غير العادي للعقارات

    ReplyDelete
  17. على فكرة أنا لي تجارب خاصة لأصدقائي مع مشروع مبارك ومشروع ابني بيتك والحقيقة كانت مشاريع عظيمة جدا

    بالنسبة لللي بيغير السعر وبتعلن عن سعر آخر بعد لقائك بهم بلغي عنهم فوراً جهاز حماية المستهلك

    ReplyDelete
  18. عفواً قسمت تعليقاتي على أكثر من مشاركة بدون قصد

    الأمر الآخر أحيي فيك طرقك لباب غلو الأهل على استنزاف طاقة الشباب في مصاريف الزواج

    دمتِ بكل ود وأتمنى لك ولخطيبك زواجاً ناجحاً إن شاء الله

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore