كيف اقرأ



كتير من أصدقائى كانو بيسألونى انتى بتقرأى الكتب دى كلها امتى؟ وبتجيبى الوقت ده منين؟الحقيقة انا مبقرأش كتير فى اليوم قد مابواظب على القراءة المستمرة بشكل يومى.
العام الماضى قرأت 100 كتاب لأنى كنت ديماً أحط كتاب فى شنطتى ولأن الحياة فى مصر كانت تتيح لى كثير من أوقات الإنتظار فكنت بصبر نفسى بالكتاب فى أوقات المواصلات للجامعة , انتظار المحاضرات , انتظار الأصدقاء , انتظار دورى عند الطبيب , السفر إلى القاهرة وهكذا.

طبعاً نوع الكتب دى تتميز يالخفة وانها تحتاج تركيز أقل لأنك بتقرأ فى أماكن غير مريحة أحياناً وغير هادئة فى الغالب ومحتاج جرأة فى إنك متتكسفش لما حد يبص عليك وانت بتقرأ وبالمناسبة مش كتير هيبصلك انا قرأت تقريباً فى أغلب أنواع المواصلات ميكروباص , تاكس , بيجو , مترو ده حتى أوقات بنات يسألونى عن الكتاب الى بقرأه وتبقا شجعت الناس كمان تقرأ,ده خلانى خلصت كتب كتيرة :D

أوقات مكنتش بقرأ فى البيت واكتفى بوقت المواصلات لانه كان بشكل يومى ولو مخرجتش بقرأ فى البيت كتب تحتاج للتركيزولأن ظروفى اتغيرت لما سافرت وطول اليوم فى البيت فيادوب بقرأ ربع أو نص ساعة فى اليوم المهم اخلص عدد الصفح المحددة . بمعدل عشر صفح مثلاً أو خمسة عشر على حسب نوع الكتاب وعدد الكلمات فى الصفحة والخطة الى بحددها للإنتهاء من الكتاب.

استراتيجية القراءة :

" أعمل بمبدأ أحب الأعمال إلى الله أدومها وإن قلت "

  • لما أمسك كتاب جديد بقلبه أشوف كام صفحة وابدأ احدد الخطة لو هو 100 صفحة مثلاً احدد 10 صفح كل يوم وبكده المفروض أخلصه فى 10 أيامولو طبعاً عديت يوم مقرأتش لأى سبب بعتبره دين وأضيفه لليوم الى بعديه ولو قرأت فى مره عشرة صفح زيادة بعتبره خزين ليوم مينفعش اقرأ فيه وهكذا.
  • ممكن تجيب ورقة وتكتب فيها المدة المحددة لإنتهاء الكتاب وتحطها فى الكتااب وتعلم قدام كل يوم قرأت فيه هيشجعك جداً.
  • مش بضغط على نفسى بحدد قدرتى ممكن فى وقت اقرأ خمس صفح يومياً المهم المواظبة.

أخطاء وقعت فيها واستفدت منها:

لا تقرأ أى كتاب فى أى وقت : خطأ عنه شراء كتب كثيرة برغم ان عندى كتب لم تقرأ بعد , استعارة كتب من الأصدقاء والأقارب وقمت بترحيل ماكنت أود قرائتة ولعلاج هذه المشكلة توقفت عن شراء الكتب نسبياً بمجهود بشع حتى انتهى من الى عندى أولاًويفضل عمل خطة للعام أو الشهر بالكتب التى تود قرائتها وتحاول الإلتزام بها قدر الإمكان .

علم لا ينفع وجهل لا يضر :يجب أن تبذل جهد فى اختيار الكتاب واستبعاد أى كتاب يقع تحت هذا البند فبسبب قرائى لأى كتاب دون الاهتمام بالاختيار قضيت أوقات وأدخلت معلومات لعقلى لا استفيد منها وبالطبع هذا يؤثر على استيعاب عقلك للمعلومات المهمة والحقيقة المقال ده الى ساعدنى جداً انى أحذر من النقطة دى.

نوع فى الكتب : بعد قراءة كتاب فكرى ضخم اقرأ كتاب خفيف نوعاً ما حتى تريح عقلك قليلاً .

اكسر الحواجز الوهمية :التى تمنعك من قراءة بعض الكتب لا تمنع نفسك من قراءة كل ماتحبه يجب أن يكون لديك حد أدنى من المعرفة فى كل شىء قدر استطاعتك لا تخف.

استفد مما تقرأه : ضع بجوارك دائماً ورقة أو قلم تظلل به دائما ما يلفت انتباهك فى الكتاب أو أفكار استنبطتها أو معلومة جديدة حتى تتذكرها دائماً .
لا تحبس المعرفة ولا تكتم علم :ناقش ماتعلمته مع أصدقائك أو المحيطين بك أو اكتب عنها تدوينة أو إرسالها بأصدقائك فهذا يعود عليك بالنفع بتثبيت المعلومة وبالمحيطين بك فقد تغير معلومة أفكار أو حياة شخص عن تجربة وتذكر دائما الثواب المستمر لهذا النشر وقمت بدور إيجابى ولم تكتفى بالمشاهدة والإستماع فقط :)


اقرأ ولن تندم
هنضوج فى الشخصية ,, ثراء فى الأفكار والألفاظ وتحسين مستمر لإتجاهك فى الحياة وتعاملك معها ومع المحيطين بك وتحسين مستوى حياتك واختياراتك ..

20 comments:

  1. بوست رائع

    انا بقا كل الكتب اللى بقراها من ذوات الالف صفحة..
    فدا بيصفى على آخر السنة على خمس ست كتب

    لذا انا عامل موضوع القراءة المتوازية

    يعنى

    فيه كتاب اخده معايا فى شنطة اللاب و انا ماشى
    دا فى المواصلات و كده
    و فى كتاب اقراه فى البيت او فى المسجد او كده

    و كده اكون انجزت كذا كتاب بشكل أفضل و من غير ملل

    ReplyDelete
  2. وياتري ختمتي المصحف كام مره.
    انا اعرف واحد حفظ القران في خلال سبع سنوان بس في المواصلات والاشارات

    ReplyDelete
  3. يسرا الصاويMarch 16, 2010 at 2:33 AM

    جزاك الله خيرا
    يارب نستفيد من الكلام ده .. بصراحه بعتبره عيب رهيب في الانسان انه مش بيداوم على القراءة
    وللأسف كل ما أحاول أواظب .. تفشل المحاولة
    على أمل نجاح المحاولة بعد البوست الجميل ياهوندا

    ReplyDelete
  4. جزاك الله خيرا

    تقريبا نفس الاستراتيجية اللى باتبعها في القراءة
    بس لسا نفسي اكتب ملخص لكل كتاب قرأته والحاجات اللى استفادتها منه

    ReplyDelete
  5. فعلا من اهم عوامل النجاح في خطة قراءة 100 كتاب هي استغلال الوقت الضائع .. حتى لو المنظر كان مستغرَب في الاول ..

    انا بصراحة بتبع اسلوب القراءة قبل النوم .. لكني عندي معضلة اني ببدأ اقرأ كتاب وبعدين اسيبه وابدأ اقرأ في كتاب تاني وبعدين ارجع للأولاني وهكذا .. مش عارفة اذا كانت هادي حاجة مضرة تماما بسبب انعدام التركيز احيانا.. لكنها بتبعد عني الملل الي ممكن يصيبني مهما كان الكتاب الي بين ايدي ممتع وانا عايزة اقراه فعلا

    وكمان لأني اميل لقراءة الكتب الكبيرة والروايات الطويلة

    بس تعرفي .. انا وحدة من الناس المبهورين بكمية الكتب الي قريتيها في فترة قصيرة :p

    ماشاء الله عليكي يا هوندا ;)

    تحياتي

    ReplyDelete
  6. هايل يا هنادي... تدوينة رائعة

    ReplyDelete
  7. @Ahmed انا غالباً السنة دى هكون زيك لأن نوعية الكتب الى مركزة عليها من ذوات الألف :D

    @Adel والله دى حاجة بينى وبين ربنا عبادة المؤمن عورة ربنا يبعدنا عن الرياء وأنصحك بشدة تكرر تجربة صحبك طالما عندك فرصة

    @يسرا
    كلنا كنا كده يسرا المهم متيأسيش وحاولى مرة واتنين وان شاء الله تقدرى :)

    ReplyDelete
  8. @ علا
    حاولى لو قرأتى كتاب متسيبهوش الا ماتنهيه بس ممكن تقرأى كتابين سوا وتخلى بالك انهم ميكونوش متشابهين يعنى كل كتاب فى اتجاه بحيث ميحصلكيش تشتيت
    كتابين معقولين جداً لأنك لو بعتى فترة طويلة عن الى بدأتيه ممكن حبل الأفكار يتقطع وان شاء الله توصلى لأكتر من مية كمان :)

    ReplyDelete
  9. هوندا الموضوع راااااااائع بجد وجميييييييل جدا

    ما انكرش انك كنتي سبب من غير ما تقصدي فى انى اتجه للقراءة بالشكل الكبير ده .. كنت بقرا من زمان جدا بس زي ما قولتي الفكرة فى المواظبة وانتى شجعتيني أواظب اكتر

    انا بقرا فى كل حتة .. فى المواصلات وعند الدكتور وفى البيت وعند حماتي وقبل ما انام وانا قاعدة على الكمبيوتر كتب إلكترونية

    حاسة ان الحياة فرصة بجد ولازم نستغلها بأحسن شكل

    والحمد لله القراءات دي بتفيدني فعلا وحاولت ما احبسش العلم عندي وده اللى خلاني أفتح مدونة اقرأني شكرا عشان اتكلم فيها بس عن الكتب

    لدرجة انى بعتبر نفسي مسؤلة اقرا وألخص كأني بشتغل بالظبط وفى الآخر اقدم المخلص ده فى أي جهة تحترم ده زي موقع عمرو خالد وحملة أضف إلى البشرية

    وعجبتني أوي فكرة خطة الإنتهاء من قراءة الكتاب .. جامدة أوي

    ربنا يحميكي ويكرمك يارب

    ReplyDelete
  10. تدوينة حلوة فعلاً ومشجعة للي عايز يبتدي يقرا
    ....
    لو ممكن، اسماء افضل كتُب انتي قريتيها واستمتعتي بيها

    ReplyDelete
  11. انتهيت من قراءة كتاب لماذا نقرأ، وكان فيه نصائح للقراءة قريبة جدا من دي :D

    فعلا بوست ممتاز، لخص كل اللي كان ممكن اقوله في الموضوع ده برضه من تجربتي الخاصة :)))

    ReplyDelete
  12. الراقية .... هوندا

    اشتريت مجموعة كبيرة من الكتب

    بنصف الراتب فقط

    من معرض الرياض الدولي للكتاب


    وهذا أول عهدي بالكتب بالسعودية
    ادعيلي

    أخلصهم

    ReplyDelete
  13. تصدقي فعلا تحديد عدد معين من الصفحات يقرأ كل يوم فكره حلوه فعلا
    :)

    ReplyDelete
  14. بوست جميل فعلا يا هنادي ..جزاك الله خيرا ، أنا استفدت منه
    ساعات ابتدي اقرأ كتاب و يكون تقيل عليه بس محتاجة اخلصه لأنه مهم فألاقى نفسي قعدت وقت كتير فيه
    انتى حلتيلى المشكلة بمنتهى البساطة احدد عدد صفحات يومية
    :))

    ReplyDelete
  15. @ إنسانة
    انا بجد مبسوطة انى كنت سبب ولو غير مباشر :)
    ربنا يوفقك ياياسمينة القراءة رفيقتنا العزيزة فى الحياة

    *********
    @ khal3d
    ممكن تشوف اللينك ده لحد معمل بوست محدث
    http://ana-w-honda.blogspot.com/2009/01/blog-post_26.html

    ReplyDelete
  16. @NG

    شجعتينى انى اقرأ الكتاب ده وممكن نهديه للأصدقاء قدام :)

    **************

    @ صوت من الجنوب
    الله يوفقك

    ReplyDelete
  17. @esraa
    هيا أفضل كتير من تحديد وقت بتحسى بمرونة أكثر

    @الحلم العربي

    وجزاكم مثله يويو , اجبرى نفسك ولو بصفحة يومياً :)

    ReplyDelete
  18. فكر رائع ودعوة جيدة

    ReplyDelete
  19. أفكارك جميلة و مرتبة

    أضيف إلى ذلك أن القاريء الحدث يجب أن يبدأ بالأساسيات العقدية و الفكرية حتى لا يصاب بالتشويش و الشك عند قراءة كتب لا تحتكم إلى أساس قوي صلب ثابت لدى القاريء..

    شكرا لأفكارك، جعلتيني احدد اهدافا واضحة.. :-)

    ReplyDelete
  20. فعلاً لابد من وجود معايير تقييم للأفكار لأن بدون أساس قوى كما قلت تترنح الأفكار بين كتاب وآخر ولا نستطيع تكوين فكر ثابت

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore