سنة أولى جواز :)



! انهردة كملت أنا وكريم أول سنة جواز ، وزى مالناس كلها بتقول محسناش بالوقت فعلاً
والحمدلله كانت سنة جميلة بخبرات كتير جديدة عليا ، قضيت منهم عشر شهور فى الرياض واستمتعت بيهم وبحريتنا فى أول حياتنا ، بحمد ربنا إن أول سنة كنت بعيدة فيها عن الناس عشان نقدر نأسس أسلوب حياتنا برغبتنا احنا من غير ماحد يتدخل ، ولأن فى حاجات كتير لو كنا فى زحمة اهلنا مكناش هناخد بالنا منها لكن بعدى فى الفترة دى علمنى حاجات كتير وخلانى اعمل كل الى نفسى اعمله فى بيتى وطبعاً بما ان حجر الأساس اتحط تقدر تكمل البناء عادى .

عرفت من السنة دى :

1- الزواج نعمة حلوة قوى وكبيرة لازم اشكر ربنا عليها طول العمر وربنا يرزق الجميع به .
2- الزوج الصالح نعمة لأن مفيش اسهل من التعامل مع شخص بيراعى ربنا فى حقوقك وواجباته.
3- الطيور على أشكالها تقع وإن ربنا بيبعت لكل واحد النص التانى الى يكمله مش الى يشبهه تماماً .
4- اختيارشريك حياتك صعب جداً وعدم التنازل عن صفات محددة بس هترتاحى قدام لانك موافقتيش على اى حد وخلاص.
5- الجواز حلو أو وحش زى مانتوا تحددوا ، رغبتك بإيدك .
6- حسن الظن بالآخر أهم شىء فى العلاقة .
7-كل واحد فيه عيوب بس الفكرة هل المميزات أكتر ولا العيوب؟وهل عندك استعداد تتقبليها ولا ؟
8-بعض العيوب بتحتاج وقت كبير عشان تتحسن المهم ازاى نتعامل معاها؟
9- مش من حق أى حد يعرف أسرار بيتك و زوجك حتى لو الأم والأب .
10-اجتنباب الزوجات من نوع انتوا لسه فى الأول بكره هيعمل معاكى كذا ، الى تتكلم على زوجها بإساءة مش محترمة .
11- مترميش ودانك لنصايح نفس الزواجات الى فاتوا لأن الى يمشى مع غيرك ميمشيش عليك .
12-لما تقفى جمب زوجك فى ظرف معين انتى معملتيش حاجة حلوة ده اصلاً المفروض !
13-القرارات المصيرية متقولوهاش لحد غير لما تكون هتتنفذ او قبلها بمدة بسيطة عشان الفتاوى والإشارات السلبية .
14- كل واحد حر فى حياته ! عالم غريبة صحيح
15- مفيش حاجة اسمها المفروض نجيب فى الشقة كذا وكل الناس بتجيب كذا مين الى حط المفروض؟
16- أجمل حاجة يكون فى بينكم اهتمامات مشتركة هتلاقوا مواضيع كتير تتكلموا فيها .
17-كتاب الرجال من المريخ والنساء من الزهرة طلع واقعى جداً وصح جداً .
18- الناس الى معندهاش اى حاجة فى حياتها هما الى شايفين الى اتجوزا لازم يخلفوا تانى يوم ،ومبيفكروش ان الخلفة رزق .
19-لو سمحت لشخص يتدخل فى حاجة صغيرة فى حياتك يبقا هيتدخل فى الكبيرة لازم تحط حدود .
20- أنا مش ندمانة إنى اتجوزت ،واتطورت كتير واتعلمت كتير زى لما كنت قبل الخطوبة المهم انا عايزة ابقا ايه؟
21-الست هيا الى ممكن تخلى نفسها تافهة أو ذات عقل ،المشكلة مش فيها بس المشكلة هتربى العيال ازاى هيا التربية سهلة؟
22-الطبخ مش عملية عويصة المهم تحبى إنك تطبخى وكله هيبقا زى الفل بالمناسبة أنتِ ماتأكلين :)
23-ايه الى يمنع إننا نأكل صحى وليه لازم ألتزم بالأكل المتعارف عليه ده حتى أغلبه مضر للقولون .
24-كل ماتهتمى بعقلك ومتهمليهوش كل ماتقل الفجوة بينك وبين زوجك .
25- ولهن مثل الذى عليهن بالمعروف ، كل واحد ليه حقوق وعليه واجبات مفيش حاجة فى الشرع بتقول ان الست تقلل من نفسها والمهم الراجل .
26- الصراحة والوضوح فى الخطوبة هتوفر صدمات الطبائع بعد الزواج وهتحسوا ان عادى مفيش اختلاف .
27-قوامة الرجل شىء جميل جداً ورحمة كبيرة من ربنا والقوامة مش فى الفلوس بس .
28-لو مخفتيش ربنا فى تعاملك مع زوجك يبقا قلبى معاكى فى الخناقات .
29-الدعم النفسى أهم حاجة فى العلاقة وبجد لا ينسى .
30-الناس شايفنا مجانين عشان بنعمل الى بنحبه بس ومبندخلش حد فى حياتنا ومبنلتزمش بلى كل الناس بتعمله مش مهم بس احنا مبسوطين كده
:D
ربنا يخليك ليا ياكريم ويبارلكنا فى حياتنا ويجمع بينا دائماً على حبه أنا فعلاً عمرى ماهلاقى حد ليا زيك
:)

24 comments:

  1. انا متأكد انك تعبتى على ما نظمتى افكارك فى الموضوع ده الا انه يستحق الاشاده وهخلى اختى " المتزوجه حديثا " تقرأه وعملتله ستار فى جوجل ريدر علشان النص التانى بتاعى اللى فى علم الغيب يقرأه

    ReplyDelete
  2. rabena yes3edko kaman w kaman. W rabena yebarekloko f 7ayatko.

    Loved how it was written. Keep being yourself. Keep being unique. Always find a way to grow, and Happy anniversary.

    ReplyDelete
  3. كل سنة وانتوا طيبين يا هوندا انتى وكريم .. فعلا الوقت بيمر بسرعة أوي .. انا فاكرة يوم ما سفرتي كأنه لسة إمبارح أصلا
    :D
    ربنا يسعدكوا ويهنيكوا ويخليكوا لبعض ويبعد الشيطان عنكوا اللهم آمين

    ReplyDelete
  4. كل سنة وانتم طيبين وفي سعاده
    ربنا يديم عليكم السعاده والهنا
    عقبال مليوووون سنة

    ReplyDelete
  5. بارك الله لكما، و بارك عليكما، و دام جمعكما في الخير

    ReplyDelete
  6. بوست جاااااامدة جداااا
    احييكي
    :)
    للمرة التانية : كل سنة وانتوا بخير ودايما مع بعض
    ومحدش يفرقكم ابدااا
    وعقبال 100 سنة
    :)

    ReplyDelete
  7. مبروك عليكي
    غقبال سنوات ان شاء الله

    ReplyDelete
  8. very nice post :)
    3o2bal 213808 sana
    Happy ramadan

    ReplyDelete
  9. كل سنه و انتم طيبين و مع بعض
    و بجد البوست اكتر من راائع

    ReplyDelete
  10. كل سنة و انتوا طيبين يا هنودة ....بجد انتى جميلة
    بدعيلك من قلبي ربنا يحفظكم لبعض و يبعد عنكم شر الحاسدين و يبارك لكم في بعض
    انتى من اصحابي القلائل اللى حسسونى ان الزوراج ده شئ كويس مش وحش
    معظمهم فعلا بعد الزواج مش بيفتكروا غير الشكوى و الاحساس بانهم اتغيروا و ان حياتهم بقت أصعب و المسئولية عليهم لوحدهم و حاجات كده وبينسوا ان فيه شعور كويس بردو بييج للانسان لما يحس انه عنده بيته الخاص و حياته الخاصة مع انسان بيشاركه كل شئ
    و فعلا الانسان هو اللى بيحدد الزواج ده شئ كويس و لا وحش لو انت عايز تاخده على انه كويس هتعرف تعمل ده و لو عايز العكس هتعرف بردو
    عقبال 100 سنة زواج في سعاده و هناء و ربنا يرزقكما تقواه يارب العالمين

    ReplyDelete
  11. this was amazing, rabena ye7fazko we yekhaleeko le ba3d :)

    ReplyDelete
  12. تدوينة مبهجة والله
    قلتيلي كتاب الرجال من المريخ طلع صح هههههههه كويس كويس ..
    باقي الحاجات .. هاخليها لوقت عوزة ... اذا احتاجتها يعني في يوم من الايام
    ربنا يخليكو لبعض ويسعدكم :D
    تحياتي

    ReplyDelete
  13. تدوينه رائعه
    ربنا يسعدك ويسعد الجميع

    ReplyDelete
  14. كل سنة وأنتم طيبين

    ReplyDelete
  15. -قوامة الرجل شىء جميل جداً ورحمة كبيرة من ربنا والقوامة مش فى الفلوس بس
    يعني لو سمحتي تفيدينا و توضحي الجملة ده أكتر تكوني مشكورة جدا

    الموضوع بمجمله رائع
    بارك الله لكما و عليكما و حواليكم و جمع بينكم دائما و ابدا في خير

    ReplyDelete
  16. سبحان الله، لسة من فترة كنت كاتبة
    http://hopefulhopes.blogspot.com/2010/08/blog-post_04.html
    بس مش عارفة ليه نظرتي اتغيرت نوعا ما (مش أوي بردو) لما قرأت كلامك
    ربنا يجزاك خير، دي تقريبا أول مرة في حياتي أقرأ حاجة إيجابية عن الزواج
    :D
    ربنا يديم ما بينكم المحبة والتفاهم والتألف يا رب ويحفظكم من كل سوء وشر
    وألف ألف ألف ممبروووووك

    ReplyDelete
  17. @M.M.Abdullaah شكراً لك انا فعلاً كنت بحاول اتكلم فى كل النقط الى شغلت تفكيرى طول السنة الحمدلله انى عرفت اخرجها

    @Ze2red ولكِ مثله عزيزتى :) وشكراً على كلامك التحفيزنى الى بسطنى فى الحقيقة

    @نـســـانـة آمين ياياسمينة ولكِ مثل مادعوتى ، انا فعلاً مش قادرة اقتنع انها سنة بجد
    :D

    ReplyDelete
  18. زهرة الجنة , WINNER ,elahlawy ,Ĥ!bØ ,anawafkary,hager

    وأنتم بخير دائماً شكراً ليكم :)

    ReplyDelete
  19. @ الحلم العربي

    وانتى بخير يايويو ، الحقيقة انا حسيت ان ده دورى انا اتكلم بصدق عشان اخلى الناس عندها أمل يعنى :D
    وبالنسبة للنقاط الى ذكرتيها للأسف احنا مش بنفكر فى الجوانب دى قبل الجواز فبعد الجواز بيكون فى زى صدمات بس الموضوع بسيط الجواز حاجة حلوة وصعبة او بمعنى ان الحياة مش سهلة تماماً على طول لكن لو اخدنها ان ده أمر طبيعى هنتقبل الجوانب كلها

    ReplyDelete
  20. ibhog ,golden,MMF,علا

    ربنا يسعدكم جميعاً :)

    @Anonymous

    أقصد ان القوامة فى الإحتياجات المادية والمعنوية سوا ، مش فى الفلوس بس وإهمال باقى احتياجات المرأة المعنوية أو المبادرة فى الإصلاح لمشكلة ما

    @Hopeful Hopes

    الحقيقة انا مستغربة من فكرة ان الناس كلها بتشكى ومش بتقول الحقيقة
    :D
    الأصل فى الزواج الراحة والإستقرار يبقا فيما عدا ذلك العيب من الأزواج مش من فكرة الزواج

    ReplyDelete
  21. اللهم أدم السعادة عليكما دائمًا، آمين

    ReplyDelete
  22. @ كريم
    اللهم آميين ولك مثله

    ReplyDelete
  23. الناس شايفنا مجانين عشان بنعمل الى بنحبه بس ومبندخلش حد فى حياتنا ومبنلتزمش بلى كل الناس بتعمله مش مهم بس احنا مبسوطين كده
    :D
    -----


    هههههه تمام يا هوندتي
    ربنا يسعدك حبيبتي أنا فرحانه جدا من البوست ده
    ونفسي اتفحت للجواز
    :D

    ReplyDelete
  24. ربنا يسعدك ياهدهودتى ويرزقك بالى يملى عينك وقلبك وحياتك كلها :)

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore