وداعاً أيها الإكتئاب



انا رجعت مصر فى شهر 6 واحنا فى شهر 10 بقالى 4 شهور ونضيف عليهم شهر كمان قبل مارجع نقول خمس شهور ونطرح منهم اسبوعين
:D

ويبقا الناتج هو مدة اكتئاب قاتلة كنت عايشة فيها بمعنى الكلمة حيث فقدت كل معنى للحياة بالمعنى الحرفى للفقد ، وفقدت حماستى لأى شىء ومبقتش شايفة أى لازمة لأى حاجة ، ولا حتى كنت شايفة أهمية إنى اقابل أصحابى او ازور حد
وأثر على هواياتى الأساسية التصوير والقراءة والكتابة ،وفقدت رغبتى فى تعلم أى شىء ، وأصعب مافيه إنى مكنتش عارفة إنى مكتئبة غير لما وصلت للذروة وبقيت استنى الموت فقط !والأصعب من كده انعكاسه على تصرفات مع الى حواليك وهما مش عارفين انت فيك ايه اصلاً ؟

لكن الحمدلله انا اتحسنت كتير وكتير قوى كمان ، منكرش ان أوقات بحس بهمسات اكتئابية حادة لكن بحاول اتجاهلها على قد ماقدر :)

أنا مكنتش عارفة ايه الى وصلنى للدرجة دى بس كنت واثقة انها مرحلة وهتعدى والى جاى هيبقا أحلى ،، يمكن انى مكنتش عارفة انا عايزة أوصل لإيه؟وهل انا فى الإتجاه الى عايزة اكمل حياتى فيه؟وهل انا فى مجال العمل المناسب لقدراتى؟؟ وايه هيا ميولى الحقيقية؟؟وعايزة أوصل لإيه فيها؟؟وعايزة أوصل لإيه فى الآخر؟؟ وايه المرحلة التالية؟نسيت أهدافى شوية؟حسيت بفتور ناحية تحقيقه يمكن لأنى مبخدش خطوات جدية تجاهها؟عدم الرضا عن العلاقة بينى وبين الله؟ اكتشفت عيوب فيا عمرى مااخدت بالى منها؟حسيت انى بتراجع بشكل عام ويمكن السبب الرئيسى لده ان بقالى كتير محاسبتش نفسى ولا اهتميت انى اكتسب مهارات وعادات جديدة وامسح عادات سيئة؟
الجو كان حر قوى فى مصر؟؟ حد لطيف هيقولى يعنى الرياض الى جنة؟؟ احب اقوله ان هناك كل كهف فيه تكييف:D
انا طبعاً متخيلتش ان الجو يأثر عليا غير لما الموجة انتهت ،طول فترة وجودها مكنتش بعرف اخرج خالص ولا احتى انزل اجيب احتياجاتى إلا بالعافية وده كان بيحسسنى بتقصير وكسل ومليش نفس اتحرك خاااااالص

طول الفترة دى كنت بضغط على نفسى اقابل أشخاص إيجابية عشان اخرج من حالتى وأحاول استلهم منهم أفكار تساعدنى إنى أعرف أنا عايزة ايه ، وبالفعل محدش خرجت معاه إلا اما استلهمت منه حاجة برغم اختلاف النماذج !
كنت واثقة فى ربنا قوى انى لما استعين بيه هيعنى وحسيت بقوة كلمة الله المستعان وبقوة كلمة الهداية ، برغم ان فى ناس بتزعل لما تقولها ربنا يهديك انا مبزعلش بالعكس ......

الحمدلله ربنا ساعدنى وبيساعدنى لحد دلوقتى وقدرت اوصل بعد شهور من التفكير لبدايات تحديد أهدافى وتحقيقها ويمكن الى ساعدنى على إيجاد نفسى كتاب قوة التركيز فضلت أفكر وانا بقرأه ايه الى انا متميزة فيه ومحتاجة اطوره واقدر اعمله أفضل من ناس كتير؟
وإنى مهتمش بتعلم حاجات وابذل وقت فيها وانا عارفة انى مش متميزة فيها واركز فى تطوير الى انا قوية فيه،ويوم ماعرفت انا عايزة ايه فضلت سعيدة طول اليوم ، أما تحسين العلاقة بالله فمحاولات التقرب إلى الله حتى وإن قصرنا فيها ولكن لم نسأم المحاولة هى ماتزيل الغشاوة التى أحاطت القلب فملائته بالغفلة والفتور والله لا يطرد من يريده ابداً..

الآن فقط أدركت أنى شفيت تماماً فبتحسن الجو بقيت بخرج ومبكسلش ! الحمدلله كمان بقيت متفائلة ومتحمسة ورجعت رغبتى فى إنى أكمل وأحقق الى انا عيزاه ومتنازلش عن إضافة جزء ولو صغير فى حياة من حولى .

ودى أول حاجة هتقربنى من تحقيق حلمى ربنا ييسرلى ويجعلى نصيب فيها :)

8 comments:

  1. ربنا يسعدك يا هوندتي ويشرح صدرك ويعينك على القيام بدور إيجابي ويبعد عنك الاكتئاب

    إلى الأمام ديما ... أنا بفتخر بيكي
    :)

    ReplyDelete
  2. الحمد لله،ربنا يسعدك ويوفقك وتحققي أحلامك ويجعلك نصيب فيما تتمني،ويارب يكون وداعا للاكتئاب للأبد بلا رجعة،ويهديني ويهديكي عشان أنا عندي نفس المشكلة دي وبحاول أخرج منها

    ReplyDelete
  3. لأ يا هوندا متكتئبيش .. ده انتي مثال التفائل اللي في حياتي
    معلش يا هوندتي ان شاء الله تستعيدي نشاطك السابق
    وفعلا موجه الحر دي بتأثر جامد
    بس الحمد لله الجو اتحسن
    ويارب نشوفك دايما متفائلة :)

    ReplyDelete
  4. الحمد للة محنة وعدت ..welcome back ya gameel ;)

    ReplyDelete
  5. @ثورة
    آمييييييين انا كمان فخورة بيكى دائماً :)

    @miley ربنا يهدينا ويسعدنا جميعاً :)

    @TamTam ادعيلى انتى بس :)

    @ibhog u welcome :)

    @fatma thanks miss u ;)

    ReplyDelete
  6. مبارك على الخروج من الحالة دي، كلنا بنمر بحالات مشابهة لكن الحمد لله ربنا بيعنا وبنطلع منها.
    شيء رائع أن يكون ضمن حلمك جزء خاص بالدعوة ولغير المتكلمين بالعربية، ولكن أقترح عليكي في البداية أن تعملي على دراسة الدين ليتملك النفس ومن ثم الشروع في دراسة الدعوة للغير، فأقف على أرضية صلبة قوية في البداية ثم أدعو الغير ليشاركني الوقوف عليها.
    ربنا يوفقك

    ReplyDelete
  7. @كريم عبد المجيد
    ماهو المعهد اصلاً عشان نتعلم الدين الأول صح
    :)

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore